“Kiet Kpọt ke Otu Ediwak Uwem Oro Afo Okotụkde”
KE January 1996 emi ekebede, Carol ama ọdọn̄ọ mbufụt mfre. Enye okodu ke iduọk isua 60 esie ndien mbemiso ini oro enye ekedi owo oro esikopde inemesịt kpukpru ini, kpa okop idem an̄wan emi esitịn̄de ikọ nsịnudọn̄ ọnọ kpukpru owo. Edi idahaemi mme dọkta ke ẹkedomo ndikan akama-n̄kpa mbufụt oro ndikọri. Ke adan̄aemi osụk an̄wanade ye udọn̄ọ esie, Carol ama ọbọ leta oro etienede mi:
“Edima Carol:
“Mmeseme ata etieti mban̄a mfịna unana nsọn̄idem fo. Ke mfọniso, nnyịn imenyene ata idotenyịn oro Bible an̄wamde nnyịn ndidiọn̄ọ nnyụn̄ mma. Idotenyịn emi edi kaban̄a Obio Ubọn̄ Jehovah ndikara isọn̄ man nnyịn ikpekeme ndidụn̄ ke idaha paradise, kpa ini oro kpukpru nnyịn idoride enyịn iban̄a.
“Nyom fi ọfiọk ete ke ọkpọkpọ utom ukwọrọikọ fo amanyan̄a ediwak owo osio ke nsinsi n̄kpa. Ndi kiet ke otu mme owo ẹmi. Mfiọkke m̀mê afo emeti akpa ini oro nnyịn ikosobode. Ke ini oro n̄kedi isua 20 ke emana. N̄kesinyene nnyan idet, nsinyam n̄kpọsọn̄ ibọk, nnyụn̄ nsikpọrọde nsan̄a ye mbon afai. Kpukpru nnyịn ikesisan̄a ye ikan̄ ikonyụn̄ inyeneke ata ima inọ owo ndomokiet ibọhọke idem nnyịn.
“Afo ye Ntiense efen ẹma ẹkọn̄ usụn̄ufọk mi ẹnyụn̄ ẹnọ mi Enyọn̄-Ukpeme ye Awake! Mma ndomo ndinọ fi dollar kiet nnyụn̄ ndọhọ ke ami nyomke mme magazine oro. Afo ama anam mi mfiọk nte ke mmimọ ikasan̄ake ikwọrọ ikọ man ibọ mme etịbe. Afo ama asian mi ete ke mmimọ inam utom ndin̄wam mme owo ẹkot Bible. Ntịghi m̀mê mma mbọ mme magazine oro m̀mê mma n̄kot mmọ. Nte ededi, afo ama ọtọ n̄kpasịp akpanikọ ke uwem mi.
“Ndusụk isua ke ukperedem Ntiense efen, Gary, ama edi ufọk eka mi ke ini n̄kodude ke ufọk. Mma ntịn̄ nnọ enye mban̄a ediwaha oro afo akawahade ke ndusụk isua ke mbemiso. Gary ama ekpep Bible ye ami ke ata anyanini tutu ke akpatre mma nna baptism ke 1984. Idahaemi ami ke n̄kpep nditọ mi akpanikọ oro aban̄ade Obio Ubọn̄ Abasi.
“Mmenịm ke akpanikọ nte ke ami ndi kiet kpọt ke otu ediwak uwem oro afo okotụkde ke mme isua utom mbuọtidem fo. Nte ededi, ebede ke ima mfọnido emi, afo amanam ami ye ubon mi ididiọn̄ọ Akwa Abasi, Jehovah, ye Eyen esie, Christ Jesus. Mmodori enyịn mban̄a usen oro ndikụtde fi ke obufa editịm n̄kpọ ke ini Jehovah edikwọhọrede mmọn̄eyet ke enyịn nnyịn efep, n̄kpa mîdinyụn̄ idụhe aba.—Ediyarade 21:4.
“Amaedi ami ye ubon mi, nnyịn imokop inemesịt nte ke nnyịn ima inyene ifet ndidiọn̄ọ fi ndinyụn̄ ndi ubak utom unọ ikọ ntiense fo. Sọsọn̄ọ-o.
“Ye ima nditọete,
Peter”
Ke ama ọkọdọn̄ọ ke ọfiọn̄ itiokiet, Carol ama akpa ke March 1996, ke ama ọkọtọ ediwak n̄kpasịp akpanikọ ke ufan̄ isua 35 oro enye akanamde utom nte ifịk ifịk ọkwọrọikọ. Enye ama ọfiọk ete ke tutu amama ke owo idiọn̄ọke ini emi n̄kpasịp edin̄wụmde mfri, idem ke ediwak isua ẹma ẹkebe.—Matthew 13:23.