Edidịp N̄kpọ ke Enyịn̄ Ọbọn̄
OFỤM n̄kpa oro ẹkekpọhọrede ke usụn̄ idakisọn̄ ke Tokyo, Japan, ke March 1995 ama owot owo 12, ọnọ ediwak tọsịn efen udọn̄ọ, onyụn̄ an̄wam ndiyarade ndịben̄kpọ. N̄ka ido ukpono kiet ẹdiọn̄ọde nte Aum Shinrikyo (Akakan Akpanikọ) ama omụm ata idiọk ofụm n̄kpa akama ke ndịbe ndida nnam n̄kpọ ke ndibịne mme utịtmbuba esie oro ẹkpade owo idem.
Ọfiọn̄ kiet ke ukperedem bọmb emi okobomode ama asuan ufọkutom akwa ukara ke Oklahoma City, U.S.A., onyụn̄ owot owo 167. Etie nte uyarade owụt ete ke en̄wan emi ke ndusụk udomo ekenyene ebuana ye ukpan oro ukara okodoride n̄ka ido ukpono Branch Davidian ke Waco, Texas, ke isua iba oro ẹkebede. Ke ini oro n̄kpọ nte owo 80 ẹkedide mme andibuana ke n̄ka oro ẹma ẹkpan̄a. Bọmb oro okobomode do ama ayarade n̄ko se ata ediwak owo mîkọfiọkke: Ediwak mbon n̄ka en̄wan emi mîdịghe mbonekọn̄ ofụri ini ẹdu idahaemi ke United States, ndusụk mmọ ke nsụhọde n̄kaha ke ẹdiomi ndịbe ndịbe ndin̄wana ye ukara.
Ekem, nte 1995 akasan̄ade ekpere utịt, ẹma ẹkụt okpo owo 16 ẹmi ẹkefọpde ẹwot ke ikpehe akai oro ekperede Grenoble, France. Mmọ ẹkedi mme andibuana ke N̄ka Solar Temple, ekpri n̄ka ido ukpono emi ke October 1994 okodụkde mbụk n̄kpọntịbe ke Switzerland ye Canada ke ini owo 53 ke otu mme andibuana ke enye ẹkewotde idem m̀mê mme owo ẹkewotde mmọ. Edi idem ke n̄kpọ mmọn̄eyet emi ama ekebe, n̄ka emi ama aka iso ndidu. Tutu esịm mfịn emi uduak ye mme utịtmbuba esie ẹsụk ẹdi ndịben̄kpọ.
N̄kpọndịk Oro Odude ke Ido Ukpono Ndidịp N̄kpọ
Ke ikerede iban̄a mme utọ n̄kpọntịbe oro, nte edi n̄kpọ n̄kpaidem ndikụt nte ke ediwak owo ẹnyene eyịghe ẹban̄a mme otu ido ukpono? Ke akpanikọ idụhe owo emi okpoyomde ndida nnọ ndedịbe n̄ka—edide eke ido ukpono m̀mê idịghe—oro adade ibetedem emi owo oro ọnọde enye anam n̄kpọ ke idiọk usụn̄ onyụn̄ anamde enye ebịne mme utịtmbuba emi enye mînyịmeke. Nte ededi, nso ke mme owo ẹkeme ndinam man ẹfep ediduọ ndụk afia editiene mbuana ye mme ndedịbe n̄ka oro ẹdemerede eyịghe?
Nte an̄wan̄ade, okpowụt eti ibuot owo ekededi oro ekerede ndidi andibuana ke ndedịbe n̄ka ndidụn̄ọde ataata uduak esie. Ẹkpenyene ndikpeme mbiọn̄ọ edidi se mme ufan m̀mê mme ọdiọn̄ọ ẹnyịkde, ndien ubiere ikpenyeneke ndikọn̄ọ ke ntụk edi ke akpanikọ. Ti ete ke ekeme ndidi owo oro ke idemesie—idịghe mbon en̄wen—ke ẹdikot ndibọ ufen ke mme utịp ekededi oro ẹkemede ndidu.
Nditiene mme edumbet Bible edi mfọnn̄kan usụn̄ ndidianade idem n̄kpọn̄ mme enyene-ndịk otu ẹmi mme uduak mmọ mîfọnke. (Isaiah 30:21) Emi abuana edida san̄asan̄a n̄kpọn̄ mbre ukara, ediwụt ima nnọ mmọ en̄wen, idem ye mme asua, ndifep mme “ubọkutom obụkidem,” ndinyụn̄ n̄kọri mbun̄wụm spirit Abasi. Ke akande ofụri ofụri, inaha mme ata Christian ẹdi ubak ererimbot, idem kpa nte Jesus mîkedịghe, ndien edinam emi ọbiọn̄ọ edibuana ke mme ndedịbe n̄ka ererimbot.—Galatia 5:19-23; John 17:14, 16; 18:36; Rome 12:17-21; James 4:4.
Mme Ntiense Jehovah ẹdi mme ifịk ifịk nditọ ukpepn̄kpọ Bible ẹmi ẹdade ido ukpono mmọ ke ata akpan n̄kpọ ndien ke in̄wan̄în̄wan̄ usụn̄ ẹdomode ndidu uwem nte ekemde. Ke ofụri ererimbot, ẹtịm ẹdiọn̄ọ mmọ nte otu ido ukpono oro ‘oyomde emem onyụn̄ ebịnede enye.’ (1 Peter 3:11) N̄wed mmọ oro Jehovah’s Witnesses—Proclaimers of God’s Kingdom etịn̄ nte enende ete: “Mme Ntiense Jehovah idịghe ndedịbe n̄ka ke usụn̄ ndomokiet. Ẹnam se mmọ ẹnịmde ke akpanikọ ẹmi ẹkọn̄ọde ke Bible an̄wan̄a ke mme n̄wed ẹmi owo ekededi ekemede ndinyene. Adianade do, mmọ ẹsisịn akpan ukeme ndikot mme owo ẹdidụk mme mbonoesop man ẹkụt ẹnyụn̄ ẹkop ke idemmọ se idade itie.”
Ata ido ukpono inamke n̄kpọ ke ndịbe ke usụn̄ ndomokiet. Ẹma ẹteme mme andituak ibuot nnọ Abasi akpanikọ ẹte ẹkûdịp se mmọ ẹdide mîdịghe ẹkûtre ndinam uduak mmọ nte Mme Ntiense Jehovah an̄wan̄a. Mme akpa mbet Jesus ẹma ẹyọhọ Jerusalem ye ukpepn̄kpọ mmọ. Mmọ ẹma ẹda se mmọ ẹkenịmde ke akpanikọ ye utom mmọ ẹwọrọ ke an̄wa. Ukem oro ke edi ye Mme Ntiense Jehovah mfịn. Nte an̄wan̄ade, ke ini mme ukara ufịk ke ukwan̄ usụn̄ ẹdoride ukpan ke ifụre utuakibuot, ana mme Christian ke mbufiọk ye uko ẹnam utom mmọ, ẹkopde uyo ‘Abasi nte andikara ẹkan uyo owo,’ kpa idaha oro ẹnyịkde mmọ ẹsịn ke ntak an̄wan̄wa edinọ ikọ ntiense mmọ uko uko.—Utom 5:27-29; 8:1; 12:1-14; Matthew 10:16, 26, 27.
Edieke edide akanam afo emekere ete ke ekeme ndidi Mme Ntiense Jehovah ẹdi ndedịbe n̄ka m̀mê mbahade-nda otu, oro ekeme ndidi koro afo mûnen̄ekede unyene ifiọk uban̄a mmọ. Anaedi oro ekedi ntre ye ediwak owo ke akpa isua ikie.
Utom ibuot 28 asian nnyịn aban̄a mboho oro apostle Paul ekenyenede ke Rome ye “ikpọ owo mme Jew.” Mmọ ẹkedọhọ enye ẹte: “Iyom ndikop se ekerede ke inua fo: edi amaedi n̄ka emi, nnyịn imọfiọk ite mme owo ẹtịn̄ n̄kpọ ẹbiat enye ke kpukpru ebiet.” (Utom 28:16-22) Ke ibọrọ, Paul “an̄wan̄ade n̄kpọ ọnọ mmọ, ọkwọrọ Ubọn̄ Abasi,” ndien ‘ndusụk mmọ ẹnịm ke akpanikọ.’ (Utom 28:23, 24) Ekenen̄ede edi ke nsinsi ufọn mmọ ndinyene ataata akpanikọ aban̄ade ata Ido Ukpono Christ.
Sia mmọ ẹsịnde idem ke in̄wan̄în̄wan̄ ye an̄wan̄wa utom Abasi, Mme Ntiense Jehovah ẹyekop inemesịt ndiyarade in̄wan̄în̄wan̄ akpanikọ aban̄ade utom mmọ ye se mmọ ẹnịmde ke akpanikọ nnọ owo ekededi emi oyomde ndifiọk se idide akpanikọ. Ntak mûdụn̄ọkede ke idemfo, ke ntem odude ke idaha ndinyene ifiọk mban̄a nnennen n̄kpọ oro aban̄ade mbuọtidem mmọ?
[Ndise ke page 6]
Mme Ntiense Jehovah ẹkop inemesịt ndiyarade mme owo ẹmi mmọ ẹdide ye se mmọ ẹnamde