Ntọt M’ọkwọrọ Obio Ubọn̄

Ndifehe N̄ka Esop Ukara Abasi eke Jehovah

KE ANYANINI ko-o ẹma ẹnụk prọfet Isaiah ndidọhọ: “Mbufo ke isuo inyan̄ ẹkpono enyịn̄ Jehovah.” (Isaiah 24:15) Mme Ntiense Jehovah ẹda mme isuo inyan̄ nte ubak ikpehe “ekondo” emi Jesus ọkọdọhọde ete ke “ẹnyene ndibem iso n̄kwọrọ gospel.”—Matthew 24:14; Mark 13:10.

Mme Isuo Marquesas ẹdu kilomita 1,400 ke ufọt edem edere ye edem usiahautịn Tahiti. Mmọ ẹdi ubak nsannsan otu isuo ke Edem Usụk Pacific ẹkotde French Polynesia. Ye eti isọn̄ itiat, ye ufiop eyo, mme mfri ẹsehe etieti ke mme isuo ẹmi. Nte ededi, mme isuo Marquesas ke ẹsion̄o orụk mfri en̄wen. Da ke uwụtn̄kpọ ubon kiet emi okokopde etop Obio Ubọn̄ ke isuo Hiva Oa.

Jean ye n̄wan esie, Nadine, ikokopke inemesịt ye inua-okot n̄kaowo ntatenyịn N̄kan̄ Edem Usoputịn Europe emi mmọ ẹkedụn̄de. Ntre mmọ ẹma ẹbiere ndikpọn̄ usụn̄uwem etiede itọk itọk do ẹnyụn̄ ẹsan̄a ye eyeneren mmọ ẹwọrọ idụn̄ ẹka Mme Isuo Marquesas. Obufa ufọk mmọ, emi ẹkedade ọkọkọk ẹbọp, okodu ke nsannsan itịghede kiet. Man ẹsịm mme n̄kpere-n̄kan mbọhọidụn̄ mmọ, mmọ ẹkesinyene ndisan̄a anyan usụn̄ ke afan̄usụn̄ obot emi etiede n̄kpotụk n̄kpotụk ke hour iba. N̄kpere-n̄kan obio-in̄wan̄ emi ekenyenede dọkta, ufọkn̄wed, ye akamba ufọkurua ekedi se ẹsan̄ade hour ita ke moto ẹka.

Jean ye Nadine ikenyeneke udọn̄ ke ido ukpono. Nte ededi, mmọ ẹma ẹsibuana ke nneme ẹban̄ade nte uwem ọkọtọn̄ọde. Ediwak ini, mmọ ẹma ẹsitịn̄ n̄kpọ ntatara ntatara ẹban̄a mme awak n̄kukọhọ ukpepn̄kpọ edito ke unam mforo owo. Edi baba kiet ke otu mme ukpepn̄kpọ mmọ ikadaha uyụhọ isọk mmọ.

Ke ẹma ẹkedụn̄ ke nsannsan itie emi ke isua itiokiet, idem ama akpa mmọ ndikụt owo iba ke otu Mme Ntiense Jehovah ẹwahade ẹkese mmọ. Mme Ntiense ẹmi ẹkediọn̄ọ ebiet emi Jean ye Nadine ẹdụn̄de ẹto mbon obio-in̄wan̄ oro ẹkedụn̄de ẹkpere. Nte ido edide, nneme ama ada ekesịm edineme mban̄a ukpepn̄kpọ edito ke unam mforo owo. Ke idatesịt ebe ye n̄wan emi, Mme Ntiense oro ẹma ẹkama n̄wed Life—How Did It Get Here? By Evolution or by Creation?, emi Mme Ntiense Jehovah ẹmịn̄de. Jean ye Nadine ẹma ẹkop inemesịt ndinyene n̄wed oro ọkọnọde ntotụn̄ọ ndụn̄ọde ke nte uwem akasan̄ade edidu mi.

Ekem, ke esisịt ini ama ekebe, ukpepn̄kpọ Bible ama ọtọn̄ọ. Ke n̄kpọ nte ufan̄ isua ita, Jean ye Nadine ẹma ẹka iso ndinam n̄kọri. Mmọ ẹma ẹdinịm ke akpanikọ nte ke idibịghike ẹyenam ofụri isọn̄ edi paradise. Ke ubon mmọ ama ọkọkọri esịm nditọwọn̄ ita, ndinam isan̄ ke hour inan̄ man ẹkedụk mme mbonoesop Christian ke Ufọkmbono Obio Ubọn̄ ama akabade edi ata n̄kpọ-ata. Nte ededi, oro ikakpanke mmọ ndidụk mme mbonoesop. Ke akpatre Jean ye Nadine ẹma ẹyarade uyakidem mmọ ẹnọ Jehovah ke baptism mmọn̄. Mmọ ẹkenam emi ke akamba mbono oro ẹkenịmde ke akamba obio-in̄wan̄, emi n̄wakn̄kan ibat mme andidụk ekedide owo 38!

Man ẹn̄wam ekpri otu mme asuanetop Obio Ubọn̄, ubon oro ama ebiere ndikpọn̄ nsannsan ebietidụn̄ mmọ. Mmọ ẹma ẹwọrọ ẹka obio-in̄wan̄ emi mme andidụn̄ ẹdide n̄kpọ nte owo tọsịn kiet, ke ebiet emi Jean anamde utom idahaemi nte asan̄autom unamutom ke esop n̄kann̄kụk eke Mme Ntiense Jehovah. Ubon emi, emi ke akpa ekefehede aka mme isuo oro man ọbọhọ ntatenyịn, abat ete ke edi mfọniso ndikụt n̄kukụre ata itie ubọhọ, kpa esop ukara Abasi eke Jehovah.