Ntọt M’ọkwọrọ Obio Ubọn̄

Ndikịbe Mbọhọ Odudu Mme Demon

EDINAM ubụpekpo amakara uwem ediwak miliọn owo ke anyanini. Edi ẹkeme ndikịbe mbọhọ! Oro edi se iketịbede inọ ediwak owo ke obio Ephesus eset. Nte mbụk Bible ọdọhọde, “ediwak mmọemi ẹkam ẹbrede idiọn̄ ẹtan̄ n̄wed mmọ ẹdi ẹdifọp . . . Ntem ke ikọ Ọbọn̄ ọkọri ọkpọsọn̄ onyụn̄ akara.”—Utom 19:19, 20.

Esop Christian ke enyene ukem n̄kọri oro mfịn. Nte ekedide ke Ephesus, mbon oro ke mbemiso ẹketuakde ibuot ẹnọ mme demon ẹma ẹdu ke otu mbon oro ẹkekabarede ẹdi mme andinịm ke akpanikọ. Ifiọkutom etienede mi otode Zimbabwe anam emi an̄wan̄a.

Ẹma ẹtịm ẹdiọn̄ọ Gogo (Ekaeka) Mthupha kaban̄a odudu ubụpekpo esie. Mme owo ẹma ẹsito ata anyan ebiet nte Zambia, Botswana, ye South Africa ẹbịne enye man ada ikọn̄ ikọt ọnọ mmọ usọbọ. Gogo Mthupha n̄ko ama ekpep mbon en̄wen nte ẹkemede ndikabade ndi n’anga, m̀mê abia ifọt. Ndien ndusụk ini enye ama esibre idiọn̄!

Usenubọk Sunday kiet Mme Ntiense Jehovah ẹmi ẹkenamde utom ukwọrọikọ eke ufọk ke ufọk ẹma ẹsobo ye Gogo Mthupha. Enye ama enen̄ede adara nneme oro mmọ ẹkenyenede ẹban̄a un̄wọn̄ọ Bible kaban̄a obufa ererimbot edinen ido, kpa ererimbot oro ndiọi odudu mîdidụhe aba. Enye ama ọbọ n̄wed Afo Emekeme Ndidu Uwem ke Nsinsi ke Paradise ke Isọn̄ onyụn̄ enyịme ndinyene ukpepn̄kpọ Bible.a Ke ẹma ẹkenịm ukpepn̄kpọ ikata kpọt, enye ama ọtọn̄ọ ndidụk mme mbonoesop.

Ke ofụri ini ukpepn̄kpọ Bible esie, Gogo Mthupha ama ekpep ete ke san̄asan̄a odudu esie ẹketo ndiọi edibotn̄kpọ eke spirit ẹmi ẹkesọn̄de ibuot ye itie edikara Jehovah. (2 Peter 2:4; Jude 6) Enye n̄ko ama ekpep nte ke mme demon ẹmi ẹbiere ndiwọn̄ọde kpukpru owo nte mmọ ẹkekeme n̄kpọn̄ Jehovah ye edisana utuakibuot. Sia enye ekenyenede mme n̄kpọ uduuwem oto edida mfa n̄kot ndiọi edibotn̄kpọ eke spirit ẹmi, nso ke enye edinam?

Gogo Mthupha ama ọdọhọ ke imọn̄ ibiat kpukpru ibọk ye mme n̄kpọ n̄kpemeidem mme spirit imọ ifep. Emi ama esịne san̄asan̄a bọkịt esie ye “nnụk enan̄ ẹmi ẹsitịn̄de ikọ,” emi enye ekesikamade ke ukọk udọn̄ọ n’anga esie. Gogo Mthupha okoyom ndibiat kpukpru utọ n̄kpọ oro mfep man enye ekpekeme ndinam n̄kpọ nnọ n̄kukụre ata ye oduuwem Abasi, Jehovah.

Nte ededi, ndusụk iman esie ẹma ẹbiọn̄ọ emi koro enye ekesin̄wamde mmọ ke okụk. Mmọ ẹma ẹkpe enye ubọk ẹte ọkpọn̄ mme n̄kpọ oro ọnọ mmimọ, ọkọrọ ye ndedịbe odudu esie man mmọ ẹkeme ndika iso mbọ ufọn. Gogo Mthupha ama esịn.

Ye un̄wam esop Mme Ntiense Jehovah n̄kann̄kụk, enye ama ọdọn̄ n̄kpoduoho mme spirit oro ke ikpọ ekpat ita onyụn̄ ọfọp kpukpru mmọ. Nte edemeikan̄ okofụkde mme n̄kpoduoho utuakibuot nnọ demon esie, Gogo Mthupha ama ofiori ete: “Kamse! Nnụk oko, ikemeke ndinyan̄a idemesie.”

Nte ini akakade, Gogo Mthupha ama ayarade uyakidem esie idara idara ọnọ Jehovah ke baptism mmọn̄. Enye asan̄a didie enyene se adade odu uwem idahaemi? Ebe ke ndinyam ikọn̄ efere. Ih, ebede ke odudu Ikọ Abasi, owo ekeme ndikịbe mbọhọ utuakibuot mme demon. Gogo Mthupha ọdọhọ ete: “Akananam nnyeneke ifụre ntem.”

[Mme Ikọ idakisọn̄]