Nte Afo Emeti?

Nte afo omokụt nte mme nsiondi Enyọn̄-Ukpeme eke ndondo emi ẹnyenede ata ufọn ẹnọ fi? Do ntak mûdaha mme mbụme ẹtienede mi udomo ibuot uti n̄kpọ fo use?

◻ Armageddon editie didie? (Ediyarade 16:14, 16)

Enye ididịghe nsobo nuclear m̀mê afanikọn̄ emi mme owo ẹdide ntak. Baba, enye edi ekọn̄ Abasi ndida utịt nsọk kpukpru ekọn̄ ubọk owo, ndisobo kpukpru mbon oro ẹsịnde udọn̄ ẹnọ mme utọ ekọn̄ oro, nnyụn̄ nda ata emem nsọk mbon oro ẹmade emem. Enye idibịghike. (Habakkuk 2:3)—4/15, page 17.

◻ Nso utọ udianndọ inọ Jehovah ukpono?

Udianndọ ke ebiet oro mme idaha eke spirit ẹkande mme usụn̄ edinam ererimbot eyenen̄ede ọnọ Jehovah ukpono. Mme Christian ẹyedara edinam oro edieke ẹfepde mme ido edinam ererimbot oro ẹsabarede owo, nsunsu ekikere, ye mme ebeubọk edinam; edieke mmọ mîyakke enye etịmede mme edinam ukara Abasi; ye edieke mmọ ẹnyenede nsụkidem utu ke ndiwụt idem.—4/15, page 26.

◻ Nso inam ẹdiọn̄ọ owo nsọn̄ọnda?

Idịghe ekemmọ owo kpọt ekeme ndiberi edem ke idem owo nsọn̄ọnda edi, ke edide akpan n̄kpọ akan, Abasi ekeme ndiberi edem ke enye. Ẹkụt edisana esịt utọ owo oro ke mme edinam esie. Enye inyeneke mbubịk ido. Enye idịghe owo n̄kari m̀mê owo n̄wo. (2 Corinth 4:2)—5/1, page 6.

◻ Moses ye Elijah ndikọbiọn̄ọde ke n̄kukụt edikpụhọde mbiet oro akada aban̄a nso?

Ke udọn̄ikọ edikpụhọde mbiet oro, Moses ye Elijah nte odotde ẹkeda ẹban̄a nditọete Jesus oro ẹyetde aran. Nte ke mmọ, ọkọrọ ye Jesus, ‘ẹma ẹbiọn̄ọde ke ubọn̄’ okowụt ete ke ẹyenọ mme anam akpanikọ Christian oro ẹyetde aran ‘ubọn̄ ọtọkiet’ ye Jesus ke ndutịm Obio Ubọn̄ eke heaven. (Luke 9:30, 31; Rome 8:17; 2 Thessalonica 1:10)—5/15, page 12, 14.

◻ Nso idi “edisana ndịben̄kpọ” Abasi? (1 Corinth 2:7, NW)

“Edisana ndịben̄kpọ” Abasi ọkọn̄ọ ke Jesus Christ. (Ephesus 1:9, 10) Nte ededi, enye idịghe sụk edidiọn̄ọ Jesus nte edide Messiah oro ẹken̄wọn̄ọde. Enye abuana ukara eke heaven, kpa Obio Ubọn̄ Messiah Abasi, onyụn̄ esịne utom oro ẹnọde Jesus ndinam ke uduak Abasi.—6/1, page 13.

◻ Didie ke Christian ekpese usọn̄ m̀mê udọn̄ọ?

Utu ke ndise mme utọ idomo oro nte n̄kpọ emi osụhọrede utom emi enye anamde ọnọ Jehovah, enye akpada mmọ nte ifet ndikọri ibetedem esie ke enye. Enye n̄ko ekpenyene nditi nte ke owo idaha nte utom owo okponde ibiere nte Christian ọsọn̄de urua, edi ẹda mbuọtidem ye nte ima esie otụn̄ọde ẹbiere. (Mark 12:41-44)—6/1, page 26.

◻ Didie ke Jehovah ndikada mme owo ẹwet Bible utu ke mme angel owụt akwa ọniọn̄ esie?

Edieke n̄kpọ aban̄ade owo ẹkpenanade ofụri ofụri, ekpedi ọkpọsọn̄ n̄kpọ etop Bible ndin̄wan̄a nnyịn. N̄ko, Bible esịne ufiop, mme ukpụhọde, ye inem oro n̄kpọ aban̄ade owo ọnọde enye.—6/15, page 8.

◻ Nso idi ukpọhọde inemesịt uwem ubon?

Ukpọhọde oro odu ke mme ikpan̄wed Ikọ Abasi, kpa Bible, ye ke edida mme edumbet esie nsịn ke edinam, utọ nte mfara ke idem, edidiọn̄ọ itieibuot, eti nneme, ye ima.—6/15, page 23, 24.

◻ Didie ke ukọkudọn̄ọ oro Jesus akanamde ekenen̄ede okpụhọde ye enyeoro mbon oro ẹdọhọde nte inyenede odudu ukọkudọn̄ọ mfịn ẹwakde ndinam?

Ọkpọsọn̄ edinam uwụt ntụk otode otuowo ikodụhe ndien idat idat edinam ikonyụn̄ idụhe ke n̄kan̄ Jesus. Ke adianade do, akananam Jesus ikekwe edikpu ke ndikọk mbon n̄kpọnnam anamde n̄kari nte ke enọ mmọ iwakke ikem m̀mê nte ke mmọ inyeneke mbuọtidem.—7/1, page 5.

◻ Didie ke Jehovah an̄wam ikọt esie ndinyene itie ke edisana uduak esie kaban̄a enyịn̄ ye Obio Ubọn̄ esie?

Akpa, Jehovah ọnọ ikọt esie akpanikọ. Udiana, enye ama ọnọ mmọ edisana spirit esie. Ndien ọyọhọ ita, nnyịn imenyene otu nditọete ofụri ererimbot ye ndutịm esop Jehovah oro ẹnamde ẹnọ utuakibuot.—7/1, page 19, 20.

◻ Nso idi eti ido?

Eti ido edi ata eti ido uwem, se ifọnde, nnennen edinam ye ekikere. Enye idịghe ndebe ndebe edu edi edi ifịk ifịk, in̄wan̄în̄wan̄ edu. Eti ido esịne n̄kpọ akan editre ndinam idiọkn̄kpọ; enye ọwọrọ ndibịne se ifọnde. (1 Timothy 6:11)—7/15, page 14.

◻ Nso idi inyene oro ọsọn̄de urua akan emi mme ete ye eka ẹkemede ndikpọn̄ nnọ nditọ mmọ?

Inyene oro ọsọn̄de urua akan edi uwụtn̄kpọ oro mmọ ẹnịmde ke ndiwụt ima nnọ mbon en̄wen. Ke edide akpan n̄kpọ, oyom nditọ ẹkụt ẹnyụn̄ ẹkop nte mme ete ye eka mmọ ẹtịn̄de-tịn̄ ẹnyụn̄ ẹwụtde-wụt ata ima oro mmọ ẹnyenede ẹnọ Abasi ke kpukpru n̄kpọ oro mmọ ẹnamde.—7/15, page 21.

◻ Nso idi ndusụk akpan n̄kpọ kaban̄a ukpepn̄kpọ ubon oro enyenede uforo?

Ana ẹnịm ukpepn̄kpọ ubon kpukpru ini. Ana afo “ededep ifet” ọnọ ukpepn̄kpọ. (Ephesus 5:15-17) Nam mme ini ukpepn̄kpọ ẹnyene inem ẹnọ nditọwọn̄ ebe ke ndinam Bible enyene uwem. Man nditọwọn̄ ẹkop inem, oyom mmọ ẹtiene ẹbuana ke enye.—8/1, page 26, 28.