Ẹma Ẹnyan̄a ke Ini Afanikọn̄
AKWA ufọkurua enyenede enyọn̄ ition ke Seoul, Korea, ama owụre ke mbuari, okụkde mme owo ke ediwak itie ikie esịn! Mbonutom edinyan̄a ẹma ẹnam utom uwemeyo ye okoneyo man ẹnyan̄a adan̄a ediwak uwem nte ekekeme. Nte mme usen ẹkebede, eketie nte owo idikwe mme andibọhọ efen efen aba ke ibombom n̄wụre ibibene itiat ye ukwak oro.
Ke ẹma ẹkeduọk idotenyịn ofụri ofụri, n̄kpọ n̄kpaidem ama etịbe. Ẹma ẹda ẹkop mmemmem, mbọm mbọm uyo eyet ke idak n̄wụre oro. Mme anyan̄a uwem ẹma ẹdọk isọn̄ ke ubọk mbrenyịn mbrenyịn man ẹnyan̄a eyenan̄wan isua 19 emi n̄wụre oro okofụkde ye uwem ke ofụri usen 16. Usụn̄ n̄kpọ umen owo ndọk ufọkenyọn̄ oro okowụrede ama anam aba ofụk enye onyụn̄ ọbiọn̄ọ udop itiat n̄wụre ibibene oro ndifịk enye. Okposụkedi mmọn̄uwem akasatde enye ke idem okonyụn̄ adade unan, eyenan̄wan oro ama ọbọhọ n̄kpa!
Idahaemi, ọsọsọn̄ ọfiọn̄ kiet ndibe owo ikopke mbụk aban̄ade afanikọn̄, edide unyekisọn̄, afai afai oyobio, obot nsụn̄ikan̄ ndibomo, mbabuat n̄kpọntịbe, m̀mê akan̄. N̄wọrọnda mbụk ẹban̄ade edinyan̄a ye ubọhọ ẹsidemede ẹnyụn̄ ẹduai mbon oro ẹsikpan̄de utọn̄ ke mbụk n̄kpọntịbe idem. Nte ededi, ntọt aban̄ade nsobo emi edide—kiet emi okponde akan ekededi ke mbụk owo—edi se ẹfụmide ofụri ofụri. (Matthew 24:21) Bible etịn̄ aban̄a n̄kpọntịbe emi edide mi ke mme ikọ ẹmi: “Sese, idiọkn̄kpọ oto ke idụt kiet esịm idụt eken, akwa oyobio oyonyụn̄ edemede ke n̄kan̄ ererimbot. Ndien mmọ eke Jehovah ediwotde ke usen oro ẹyetọn̄ọ ke utịt ererimbot ẹna ẹsịm ke utịt ererimbot: idituaha mmọ, idinyụn̄ itan̄ke, idinyụn̄ ibụkke, mmọ ẹyetie nte ifụm ke iso isọn̄.”—Jeremiah 25:32, 33.
Ikọ n̄kpaidem! Edi ke mîbietke mme oto-obot afanikọn̄ ye mme mbabuat n̄kpọntịbe, nsobo emi idiwotke owo ntịme ntịme. Ke akpanikọ, mme owo ẹyebọhọ—afo emekeme ndibọhọ!
Ini Ndinam N̄kpọ Usọp Usọp
Man n̄kpọ emi enen̄ede an̄wan̄a, ana owo etịm ọfiọk ntak emi nsobo ofụri ererimbot emi editịbede ke akpa ifet. Ke akpanikọ, enye edi n̄kukụre ata usọbọ ọnọ mme mfịna ubonowo. Ibat ibat owo ẹnyene ukpeme ye ifụre mfịn. Kpa ye mfọnn̄kan ukeme ifiọk ntaifiọk, mme udọn̄ọ oro ẹbede owo ẹka iso ndisobo mme andidụn̄ isọn̄. Mme ekọn̄ ẹsụn̄ọde ẹto mme utọk ido ukpono, ekpụk, ye mbre ukara ẹda uwem ediwak tọsịn owo. Akan̄ adiana ke unana inemesịt ye ndutụhọ irenowo, iban, ye nditọwọn̄ oro mîduehe isop. Mbiara ido uwem ke abiat n̄kaowo; idem nditọwọn̄ ẹbiara.
Prọfesi kiet ke Bible emi ẹkewetde ke se ibede isua 1,900 ẹmi ẹkebede etịn̄ aban̄a idaha nnyịn ke nnennen usụn̄ oro edide ata n̄wọrọnda. Enye ọdọhọ ete: “Ana mbufo ẹfiọk ẹte ke mme akpatre usen eyo ediyọhọ ye n̄kpọndịk.”—2 Timothy 3:1, The New Testament in Modern English, eke J. B. Phillips; men Matthew 24:3-22 domo.
Ndi afo emekere ke ima ima Abasi akpanana udọn̄ aban̄a mfịna nnyịn? Bible ọdọhọ ete: “Enye edi Abasi emi obotde isọn̄, onyụn̄ anamde enye; . . . ibotke enye ke ikpîkpu, obot enye man ẹdụn̄ ke esịt.” (Isaiah 45:18) Ih, utu ke ndiyak ẹsobo ediye ekondo emi ndien kpukpru se idụn̄de ke esịt ẹkpan̄a, Abasi eyesịbe odụk. Mbụme edi, Didie ke enye edinam ntre?
Mek Uwem!
Bible ọbọrọ ke Psalm 92:7 ete: “Ke ini mme oburobụt owo ẹfiaride nte mbiet, ndien ke kpukpru mme anamidiọk ẹsiahade, ẹyesobo mmọ ke nsinsi.” Usọbọ oro Abasi edinọde mme mfịna isọn̄ emi edi ndisobo idiọkido ke idemesie mfep. Ke inemesịt, emi iwọrọke ite ke ẹnyene ndisọhi kpukpru owo mfep. Psalm 37:34 (NW) ọnọ nnyịn nsọn̄ọ ete: “Dori enyịn ke Jehovah nyụn̄ san̄a ke usụn̄ esie, ndien enye eyemenede fi enịm ke enyọn̄ man ada isọn̄ enyene. Ke ini ẹsobode mme idiọkowo ẹfep, afo oyokụt.”
Mme ikọ ẹmi ẹwụt ẹte ke ifet odu ndidi se ẹnyan̄ade ẹbe n̄kponn̄kan afanikọn̄ oro edisịmde ubonowo. Abasi ọnọ nnyịn edimek. Mme ikọ oro Moses akadade eteme nditọ Israel ke ini mmọ ẹkeyomde ndibe ndụk Isọn̄ Un̄wọn̄ọ abuana nnyịn ukem ukem mfịn: “Mmada uwem ye n̄kpa, edidiọn̄ ye isụn̄i, nnịm fi ke iso; mek uwem, ndien, man afo ye nditọ fo ẹdu uwem.” (Deuteronomy 30:19) Edi didie ke owo ‘emek uwem’ onyụn̄ enyene edinyan̄a? Nso ke ata edinyan̄a enen̄ede ọwọrọ?
[Ebiet Ẹdade Ndise Ẹto ke page 2]
IKPAEDEM: Se ibomode: Copyright © Gene Blevins/Los Angeles Daily News
[Ebiet Ẹdade Ndise Ẹto ke page 3]
Yunhap News Agency/Sipa Press