Ntọt Mme Anditan̄a Obio Ubọn̄
Ime Ada Esịm Edidiọn̄ Abasi ke Malawi
JOSEPH ekedi anam-akpanikọ asan̄autom Jehovah. (Mme Hebrew 11:22) Enye n̄ko ekedi owo oro enyenede n̄wọrọnda mbuọtidem. Idem okposụkedi nditọete esie ẹketapde enye ẹnọ, ẹnyamde ikaba ẹsịn ke ufụn, ndien ekem ẹtop enye ẹsịn ke n̄kpọkọbi ke nsunsu edori ikọ, Joseph ikọduọhọ. Utu ke oro, enye ke ime ama ọyọ ukụt ke ediwak isua, osụhọrede idem ebet edidiọn̄ Jehovah.—Genesis 37:23-28, 36; 39:11-20.
Kpasụk ntre mfịn, Mme Ntiense Jehovah ke Malawi ẹma ẹbet edidiọn̄ Abasi ke ime. Ke isua 26, mme Christian Ntiense ẹmi ẹma ẹyọ mme ukpan ẹtode ukara, ọkpọsọn̄ ubiọn̄ọ, ye ekese ibak ibak edinam. Edi ime mmọ enyene utịp!
Ke ini ukọbọ ọkọtọn̄ọde ke Malawi ke utịt utịt 1967, n̄kpọ nte mme asuanetop Obio Ubọn̄ 18,000 ẹkedu. Kere ban̄a idatesịt emi Mme Ntiense oro ẹkenyenede ke ini mmọ ẹkefiọkde ẹte ke isua utom 1997 ọkọtọn̄ọ ye obufa n̄wakn̄kan ibat mme asuanetop 38,393—se iwakde ikan utịm ikaba nte ekedide ke ntọn̄ọ ntọn̄ọ ukpan oro! Akan oro, ibat mme andidụk Mbono District “Mme Isụn̄utom Emem Abasi” 13 oro ẹkenịmde ke Malawi ẹma ẹwak ẹbe owo 117,000. Ke akpanikọ, Jehovah ọdiọn̄ mbuọtidem ye ime mmọ.
Uwụtn̄kpọ edidiọn̄ emi kiet edi ifiọkutom ekpri akparawa kiet emi ekerede Machaka. Ke ini Machaka ekenyịmede ndikpep Bible ye Mme Ntiense Jehovah, ete ye eka esie ẹma ẹyat esịt etieti. Mmọ ẹkedọhọ ẹte: “Edieke oyomde ndikabade ndi Ntiense, ana afo ọwọrọ ke ufọk emi.” Nte ededi, ndịghe emi ikanamke enye etre ndika iso ke ukpepn̄kpọ esie. Nte utịp, ete ye eka Machaka ẹma ẹtan̄ kpukpru ọfọn̄ esie. Nditọete ẹma ẹnam n̄kpọ ẹban̄a ke ndidep mme ọfọn̄ efen nnọ enye. Ke ini ete ye eka Machaka ẹkediọn̄ọde ẹban̄a emi, mmọ ẹma ẹdọhọ enye ete: “Edieke edide Mme Ntiense ẹmọn̄ ẹn̄wam fi, ana afo ọwọrọ okodụn̄ ye mmọ.” Ke ama ekekere aban̄a n̄kpọ emi ye ntịn̄enyịn, Machaka ama ọkpọn̄ ufọk, ndien ubon Ntiense kiet ke esop n̄kann̄kụk oro ẹma ẹda enye ẹsịn ke ufọk.
Esịt ama ayat ete ye eka Machaka tutu mmọ ẹbiere ndiwọrọ n̄kpọn̄ ikpehe oro man ẹfep kpukpru ebuana ye Mme Ntiense. Nte ededi, emi ama anam Machaka ofụhọ, edi enye ama enyene ekese ndọn̄esịt ke ini nditọete ẹkenemede Psalm 27:10 ye enye, emi ọdọhọde: “Koro ete ye eka mi ẹkekpọn̄de mi, ndien Jehovah emen mi akama.”
Nte ini akakade, ete ye eka Machaka ẹma ẹsụhọde esịt, ndien enye ama ebiere ndifiak nnyọn̄ ufọk. Nte an̄wan̄ade ubiere eyen mmọ ndinam n̄kpọ Jehovah ama otụk mmọ akamba akamba koro mmọ n̄ko ẹma ẹyom ndikpep Bible ye Mme Ntiense Jehovah! Mmọ n̄ko ẹma ẹdụk Mbono District “Mme Isụn̄utom Emem Abasi” ofụri usen ita oro, ke oro ebede ama onụk mmọ ndidọhọ: “Ke akpanikọ, esop Abasi edi emi.”
Ih, ubiọn̄ọ ekeme ndidori n̄kpọ-ata, edi mme anam-akpanikọ isụn̄utom Abasi ikpaha mba. Mmọ ẹka iso ẹsịn ifịk uko uko, ẹfiọkde ẹte ke “ukụt ọwọrọ ime, ime ọwọrọ eti edu.” (Rome 5:3, 4) Mme Ntiense Jehovah ke Malawi ẹkeme ndiwụt nnennen nte edide akpanikọ nte ke ime ada esịm edidiọn̄ Abasi.