Nte Afo Emekeme Ndinịm Bible Ke Akpanikọ?

EDINỊM Bible ke akpanikọ aka iso nditara, idem ke ererimbot mfịn. Ke uwụtn̄kpọ, ke ndụn̄ọde oro ẹkenamde ye mbon America, mbahade 80 eke ikie ẹma ẹwụt mbuọtidem nte ke Bible edi Ikọ Abasi eke odudu spirit. Edide mbahade oro awak ntre ke edem mbufo m̀mê iwakke, ekeme ndin̄wan̄a fi nte ke mme utọ andinịm ke akpanikọ oro ẹdori enyịn ndidi se ẹkpepde Bible ke ufọkabasi. Edi ediwak ini owo isikpepke mmọ. Da ukpepn̄kpọ aban̄ade edinọ owo ufen ke ama akakpa ke uwụtn̄kpọ.

Ndi ẹkpep purgatory m̀mê ikan̄ ikan̄ hell ke ebiet ekededi ke Bible? Mfịn, ediwak nditọ ukpepn̄kpọ ke Christendom ẹdidọhọ baba. New Catholic Encyclopedia ọdọhọ ete: “Ke akpatre, ukpepn̄kpọ Catholic aban̄ade purgatory ọkọn̄ọ ke ido edinam, idịghe ke Edisana N̄wed Abasi.” Kaban̄a hell, A Dictionary of Christian Theology ọdọhọ ete: “Ke O[bufa] T[estament] nnyịn ikwe nte hell ikan̄ edide ubak akpasarade ukwọrọikọ.”

Ke akpanikọ, kọmiti esede aban̄a ukpepn̄kpọ Ufọkabasi England ke ndondo emi ama anam n̄wọrọnda n̄kpọ ke ini enye okotorode ete ẹkpọn̄ ukpepn̄kpọ aban̄ade hell ikan̄ ofụri ofụri. Dr. Tom Wright, ọkwọrọ ederi Akwa Ufọkederi Litchfield, ọdọhọ ete ke ndise hell ini edem “akanam Abasi edi owo ubi onyụn̄ ọnọ ediwak owo unan ke n̄kan̄ eke ekikere.” Ntọt kọmiti oro ọdọhọ ke hell “idụhe ke baba usụn̄ kiet.”a Kpasụk ntre, New Catholic Encyclopedia etịn̄ kaban̄a ekikere Catholic ete: “Ukpepn̄kpọ ido ukpono mfịn ese mfịna aban̄ade hell nte edidianarede n̄kpọn̄ Abasi.”

Ke akpanikọ, se Bible ekpepde aban̄a ukpọn̄ atuaha ye mme ukpepn̄kpọ purgatory ye hell ikan̄. Bible esiwak nditịn̄ mban̄a mme ukpọn̄ ndikpa. “Ukpọn̄ eke anamde idiọk ayakpa n̄kpa.” (Ezekiel 18:4; men King James Version ye Douay Version eke mbon Catholic domo.) Nte Bible ọdọhọde, mme akpan̄kpa ifiọkke baba n̄kpọ kiet, ikemeke ndikop ubiak. “Mme odu-uwem [ẹfiọk] ẹte ke mmimọ inyene ndikpa: edi ama edi mme akpa-n̄kpa, mmọ ifiọkke baba n̄kpọ kiet.” (Ecclesiastes 9:5) Idotenyịn oro Bible ọnọde mme akpan̄kpa edi ediset ke n̄kpa ke ini iso. Ke ini Lazarus ufan Jesus akakpade, Jesus ekemen n̄kpa odomo ye idap. Martha eyeneka Lazarus ama owụt mbuọtidem ke idotenyịn oro ẹkpepde ke Bible ke ini enye ọkọdọhọde ete: “Mmọfiọk nte enye eyeset ke ediset ke n̄kpa ke akpatre usen.” Ke ndikanam Lazarus eset ke n̄kpa, Jesus ama ọsọn̄ọ idotenyịn oro ọnọ ubonowo.—John 5:28, 29; 11:11-14, 24, 44.

Mme ewetmbụk ẹwụt ẹte ke ukpepn̄kpọ oro nte ke owo enyene san̄asan̄a ukpọn̄ oro mîkemeke ndikpa ikọtọn̄ọke ito Bible edi ke ọkọtọn̄ọ oto ukpepn̄kpọ akwaifiọk mbon Greece. New Catholic Encyclopedia ọdọhọ ke mme Hebrew eset ikekereke ke owo enyene ikpọkidem oro enyịn okụtde ye ukpọn̄ oro enyịn mîkwe. Enye etịn̄ aban̄a se mme Hebrew ẹnịmde ke akpanikọ ete: “Ke ini ibifịk uwem okodụkde akpa owo oro Abasi okobotde oto ntan isọn̄, enye ama akabade edi ‘odu uwem n̄kpọ’ (G[enesis] 2.7). Mmọ ikadaha n̄kpa nte n̄kpọ iba oro ẹdude ke owo ndidianarede, nte ẹdọhọde ke ukpepn̄kpọ akwaifiọk mbon Greece; ibifịk uwem ọwọrọ ndien owo akabade ‘n̄kpọ eke mînyeneke uwem’ (L[eviticus] 21.11; N[umbers] 6.6; 19.13). Ke idaha kiet kiet ikọ oro ‘n̄kpọ’ edi [neʹphesh] ke usem Hebrew, ẹwakde ndikabade ‘ukpọn̄’ edi, ke akpanikọ, ekperede ndidi ukem n̄kpọ ye owo.”

N̄wed ofụri orụk ifiọk oro ọdọhọ ete ke nditọ ukpepn̄kpọ Catholic ke ndondo emi “ẹdọhọ ke O[bufa] T[estament] ikpepke ukpọn̄ ikpaha ke nsinsi ke usụn̄ ifiọk [Greece].” Enye eberi ete: “Akpan usọbọ idụhe ke se ẹkerede-kere ke ukpepn̄kpọ akwaifiọk inọ mfịna emi edi odu ke enọ oro akande ukeme owo emi edide Ediset ke N̄kpa.”

Bible m̀mê Ido Edinam?

Nte ededi, didie ke mme ekikere oro mîdịghe eke Bible ẹkekabarede ẹdi ubak ukpepn̄kpọ ufọkabasi? Ediwak ufọkabasi ẹdọhọ ke Bible edi akakan ebiet emi mmimọ idade odudu ito. Ke uwụtn̄kpọ, ke mîtịmke ibịghi Pope John Paul II ama etịn̄ ke oyom ‘mme andinịm ke akpanikọ ẹnyịme N̄wed Abasi ofụri ofụri nte edide akpanikọ ọyọhọ ọyọhọ ye nte akakan idaha mbuọtidem nnyịn.’ Nte ededi, ẹnyịme ke ofụri ofụri nte ke mme ukpepn̄kpọ Christendom mfịn idịghe ukem ye eke mme Christian akpa isua ikie. Ata ediwak ufọkabasi ẹda mme ukpụhọde ẹmi nte ubak n̄kaiso n̄kọri ukpepn̄kpọ ufọkabasi. Akan oro, Ufọkabasi Catholic ada nte ke ido edinam ufọkabasi enyene ukem odudu nte N̄wed Abasi. New Catholic Encyclopedia ọdọhọ ke ufọkabasi “inịmke akpanikọ oro ọkọn̄ọde ke N̄wed Abasi ikpọn̄îkpọn̄, ke ẹsiode ido edinam ẹfep, inyụn̄ inịmke enye oro ọkọn̄ọde ke ido edinam ikpọn̄îkpọn̄, ke ẹsiode N̄wed Abasi ẹfep.”

Nte mbụk owụtde, mme ufọkabasi ẹmeda mme ukpepn̄kpọ oro ẹkọn̄ọde ke ido edinam ikpọn̄îkpọn̄ ẹkpụhọ ye eke N̄wed Abasi. Ke akpanikọ, ediwak ufọkabasi ẹdọhọ idahaemi ẹte ke mme ukpepn̄kpọ Bible ẹkwan̄a. Ke uwụtn̄kpọ, New Catholic Encyclopedia ọdọhọ ke “ana in̄wan̄în̄wan̄ nte ke ediwak ikọ Bible ẹnen̄ede ẹkwan̄a ke ini ẹdade ifiọk ntaifiọk ye mbụk eyomfịn ẹbiere.” Ke etịn̄de aban̄a ukpepn̄kpọ Bible oro nte ke mme akpan̄kpa ifiọkke baba n̄kpọ kiet, enye adian ete: “Idem ke mme n̄kpọ ẹban̄ade ido ukpono, A[kani] T[estament] owụt ke inyeneke ọyọhọ ifiọk aban̄ade . . . uwem ke n̄kpa ebede.” N̄wed ofụri orụk ifiọk oro asiak Psalm 6:5 (ufan̄ikọ 6 ke ndusụk Bible) nte uwụtn̄kpọ kaban̄a emi: “Koro mîtịghi fi ke n̄kpa: anie edikọm fi ke udi?” Ndusụk itie ye ikpọ ufọkn̄wed unọ mme oku ukpep eke Protestant ikpepke aba ite ke Bible inyeneke ndudue. Ke n̄kan̄ eken, Ufọkabasi Catholic enịm ke akpanikọ ke imọ imenyene odudu unọ ukpep, emi ikemede ndida nnam se Bible ekpepde an̄wan̄a. Nte ededi, afo emekeme ndiyịk, ‘Nso edieke etiede nte mme utọ edinam an̄wan̄a oro ẹtuaha ye N̄wed Abasi?’

Nte N̄wed Abasi Edide Akpan N̄kpọ

Jesus ama esitịn̄ otụk N̄wed Abasi ndien ndien nte ebiet adade odudu oto, awakde nditọn̄ọ ikọ esie ke ndidọhọ: “Ẹma ẹwet ẹte.” (Matthew 4:4, 7, 10; Luke 19:46) Ke akpanikọ, ke ini Jesus eketịn̄de aban̄a idaha ndọ owo, enye ikadaha ikọ esie ito ukpepn̄kpọ akwaifiọk mbon Greece oro ẹkerede-kere, edi akada oto mbụk Genesis aban̄ade edibotn̄kpọ. (Genesis 1:27; 2:24; Matthew 19:3-9) Nte an̄wan̄ade, Jesus akada ke Abasi ọkọnọ odudu spirit ẹda ẹwet N̄wed Abasi ndien ke edi akpanikọ. Ke akam oro ọkọbọn̄de ọnọ Abasi, enye ọkọdọhọ ete: “Ikọ Fo edi akpanikọ.”—John 17:17.b

Bible ewet aban̄a nte Jesus ọkọsọn̄ọde asua ọnọ mme adaiso ido ukpono eyo esie: “Mbufo ẹtịm ẹsịn ibet Abasi, man mbufo ẹnịm item mbufo. . . . Ntem ke mbufo ẹnam ikọ Abasi ọwọrọ ikpîkpu oto ke item eke mbufo ẹkenọde.” (Mark 7:6-13) Ukem ntre, apostle Paul ama ọbiọn̄ọ mfịghe edisịn ukpepn̄kpọ akwaifiọk mbon Greece m̀mê mme nsunsu ido edinam ke ukpepn̄kpọ esie. Enye ọkọtọt ete: “Ẹkpeme mbak owo ekededi edidu, eke adade ifiọk owo ye ikpîkpu abian̄a eke asan̄ade ye se owo ekpepde obụme mbufo.” (Colossae 2:8; 1 Corinth 1:22, 23; 2:1-13) Ama odu ndusụk ido edinam, m̀mê mme ukpepn̄kpọ, oro Paul eketemede mme Christian ete ẹsọn̄ọ ẹmụm ẹkama, edi mmọ ẹmi ẹkekọn̄ọ ke N̄wed Abasi ẹkenyụn̄ ẹdu ke ọyọhọ ọyọhọ n̄kemuyo ye enye. (2 Thessalonica 2:13-15) “Kpukpru n̄wed, eke ẹdade odudu Spirit Abasi ẹwet, ẹnyụn̄ ẹdi se ifọnde,” ntem ke Paul ekewet, “man owo Abasi enyene ọyọhọ ifiọk, onyụn̄ eben̄e idem ke kpukpru nde ndinam eti utom ekededi.” (Sịghisịghi ubọkn̄wed edi eke nnyịn.)—2 Timothy 3:16, 17.

Paul ama ebem iso ada okụt edifiọrọ n̄kpọn̄ N̄wed Abasi. Enye ama ọtọt Timothy ete: “Ini ọmọn̄ edi eke mme owo mîdibọhọ eti ukpep-n̄kpọ; . . . ẹyenyụn̄ ẹsio utọn̄ ẹfep ke akpanikọ.” Enye ama akpak Timothy ete: “Edi ama edi afo, fara ke idem ke kpukpru n̄kpọ.” (2 Timothy 4:3-5) Edi didie? Usụn̄ kiet edi ndidi “enyene-ido.” N̄wed ukabadeikọ usem Greek akabade ikọ Bible emi nte “unyịme ndikpep nnyụn̄ ndụn̄ọde n̄kpọ ye unana asari.” Luke akada ikọ emi nditịn̄ mban̄a mbon oro ẹkekpan̄de utọn̄ ẹnọ Paul ke Beroea eke akpa isua ikie. Mme ukpepn̄kpọ Paul ẹkedi mbufa ẹnọ mmọ, ndien mmọ ikoyomke ẹbian̄a mmimọ. Ke otorode mmọ, Luke ekewet ete: “[Mbon Beroea] ẹdi enyene-ido ẹkan mme andidụn̄ Thessalonica; mmọ ẹkop ikọ ke edinyịme esịt, ẹnyụn̄ ẹdụn̄ọde n̄wed Abasi ke usen ke usen, ẹte ifiọk m̀mê mme ikọ oro ẹkem ntre.” Ndikedi mme enyene-ido ikanamke mbon Beroea ẹnyene eyịghe, ẹtrede ndinịm n̄kpọ ekededi. Utu ke oro, utịp ndụn̄ọde esịt akpanikọ mmọ ekedi nte ke “ediwak mmọ [ẹma] ẹnịm ke akpanikọ.”—Utom 17:11, 12.

Mme Utịp Edidu Uwem nte Ekemde ye Bible

Ẹma ẹtịm ẹdiọn̄ọ mme akpa Christian kaban̄a edisọn̄ọ nyịre ke Bible ye kaban̄a ima n̄waidem mmọ. Nte ededi, mfịn ediwak owo ẹnyene “enyọn̄-enyọn̄ ido uten̄e Abasi, edi isan̄ake n̄kpọ ye odudu eke odude ke uten̄e Abasi.” (2 Timothy 3:5) Orụk Ido Ukpono Christ ekededi oro mîdaha ikekem ye akpasarade Ido Ukpono Christ ikemeke ndinyene eti odudu ke uwem mme owo. Ndi emi ekeme ndinam an̄wan̄a ntak emi nnyịn ikụtde afai, oburobụt ido, n̄wụre ubon, ye uma inyene obụkidem oro ẹkọride-kọri ke n̄kponn̄kan ikpehe Christendom? Ke ndusụk idụt “Christian,” ẹn̄wana mme ubi ubi ekọn̄ eke ekpụk idem ke ufọt mme andibuana ke ukem ido ukpono.

Ndi eti edu mbon Beroea amakpa? Ndi odu otu ekededi mfịn emi enịmde Bible ke akpanikọ onyụn̄ odude uwem nte ekemde ye enye?

Encyclopedia Canadiana ọdọhọ ete: “Utom eke Mme Ntiense Jehovah edi edifiak ndemede ye edifiak n̄wụk akpa Ido Ukpono Christ oro Jesus ye mme mbet esie ẹketienede ke akpa ye udiana isua ikie eke eyo nnyịn.” Ke etịn̄de aban̄a Mme Ntiense, New Catholic Encyclopedia ọdọhọ ete: “Mmọ ẹda Bible nte n̄kukụre ebiet edinịm ke akpanikọ mmọ ye ibet ido uwem.”

Eyịghe idụhe nte ke emi edi akpan ntak emi ẹdiọn̄ọde Mme Ntiense Jehovah ke ofụri ererimbot kaban̄a uforo eke spirit, emem, ye inemesịt mmọ. Nnyịn ke ntre imesịn udọn̄ inọ mme andikot n̄wed nnyịn ite ẹkpep n̄kpọ efen efen ẹban̄a nti ukpepn̄kpọ eke spirit ẹdude ke Bible. N̄kponn̄kan ifiọk ekeme ndikam nda n̄kesịm n̄kponn̄kan mbuọtidem ke Bible ye edinyene mbuọtidem oro okponde akan ke Abasi. Mme nsinsi ufọn utọ mbuọtidem oro ẹdot ye ukeme oro ẹsịnde.

[Mme Ikọ idakisọn̄]

[Ndise ke page 6]

Apostle Paul ye mbon en̄wen ẹma ẹkwọrọ ikọ ke an̄wa urua

[Ndise ke page 7]

Mme Ntiense Jehovah “ẹda Bible nte n̄kukụre ebiet edinịm ke akpanikọ mmọ ye ibet ido uwem”