Mmọ Ẹma Ẹnam Uduak Jehovah

Jesus Ama Abiat Ini ye Nditọwọn̄

UTOM ukwọrọikọ Jesus ke isua ita ye ubak ke ekekpere utịt esie. Ke mîbịghike enye oyodụk Jerusalem onyụn̄ osobo ubiak ubiak n̄kpa. Enye ama etịm ọfiọk se ikodude ke iso, koro enye ama asian mme mbet esie ete: “Ẹmeyak Eyen Owo ẹsịn mme owo ke ubọk, ndien mmọ ẹyewot Enye.”—Mark 9:31.

Ke akpanikọ, Jesus oyoyom ndida kpukpru usen, kpukpru hour, kpukpru ini oro okosụhọde nnam n̄kpọ ke mfọnn̄kan usụn̄. Mbet esie ke ẹkesụk ẹyeyom ntịn̄enyịn. Jesus ama okụt ete ke osụk oyoyom ẹnọ mmọ ọkpọsọn̄ item kaban̄a nsụhọdeidem ye n̄kpọndịk eke edituak ukot nduọ oro okodude kpukpru ini. (Mark 9:35-37, 42-48) Mmọ ẹma ẹyom item n̄ko kaban̄a ndọ, usiondọ, ye itie unana ndọ. (Matthew 19:3-12) Ke ọfiọkde ke ibịghike imọ imọn̄ ikpa, nte eyịghe mîdụhe Jesus eketịn̄ ikọ mbio mbio ọnọ mbet esie ye usọp usọp ini ke ekikere. Ini ekedi akpan n̄kpọ—kpa n̄kpọ oro akanamde se Jesus akanamde ke oro ebede enen̄ede edi n̄wọrọnda.

Jesus Adara Nditọwọn̄

Mbụk Bible ọdọhọ ete: “Ẹda n̄kpri nditọ ẹsọk Enye ẹte, Enye otụk mmọ ubọk.” Ke ini mme mbet ẹkekụtde emi, mmọ ẹma ẹsọsọp ẹsua ẹnọ mmọ. Eyedi mmọ ẹkekere ẹte ke Jesus ama okpon akaha mîdịghe ama anana ini akaha ndikere mban̄a nditọwọn̄. Kere nte akakpade mme mbet idem, ndien, ke ini Jesus akayatde esịt ye mmọ! “Ẹyak n̄kpri nditọ ẹtiene Mi,” ntem ke enye ọkọdọhọ mme mbet. “Ẹkûkpan mmọ: koro Obio Ubọn̄ Abasi edide eke orụk emi.” Ekem Jesus ama adian ete: “Ke akpanikọ ke ndọhọ mbufo, Owo ekededi eke mîdibọhọ Obio Ubọn̄ Abasi nte ekpri eyen, ididụkke dụk ke esịt.”—Mark 10:13-15.

Jesus ama okụt mme edu oro ẹmade ke idem nditọwọn̄. Mmọ ẹsiwak ndibụp mbụme nnyụn̄ mberi edem ke owo. Mmọ ẹsinyịme ikọ ete ye eka mmọ ẹnyụn̄ ẹda ẹnọ mmọ ke iso nditọwọn̄ eken. Odot kpukpru owo oro ẹyomde ndidụk Obio Ubọn̄ Abasi ẹkpebe edu mmọ eke edinyịme ndibọ item ye edidi se ẹkemede ndinọ ukpep. Nte Jesus ọkọdọhọde, “Obio Ubọn̄ Abasi [edi] eke orụk emi.”—Men Matthew 18:1-5 domo.

Edi Jesus ikadaha nditọwọn̄ ẹmi n̄kukụre ndinọ uwụtn̄kpọ. Mbụk oro owụt ete ke Jesus ama enen̄ede ama ndidu ye mmọ. Mark obụk ete ke Jesus ama “emen mmọ akama, odori mmọ ubọk, onyụn̄ ọdiọn̄ mmọ.” (Mark 10:16) Mbụk Mark ikpọn̄ esịne ufiop ufiop ọyọhọ ntọt emi nte ke Jesus ama “emen mmọ akama.”a Jesus ke ntem ama anam n̄kpọ ebe se ikpọ owo oro ẹkedoride enyịn, ẹmi ẹkedade nditọwọn̄ ẹmi ẹsọk Jesus n̄kukụre man enye “otụk” mmọ.

Nso ke Jesus ‘ndidori nditọwọn̄ ẹmi ubọk’ ọkọwọrọ? Emi inọhọ ekikere ndomokiet aban̄ade edinam ido ukpono, utọ nte baptism. Ke adan̄aemi ke ndusụk idaha, edidori ubọk ọkọwọrọde edimek owo nnọ itie, ke mme idaha efen enye n̄kukụre owụt ndinọ owo edidiọn̄. (Genesis 48:14; Utom 6:6) Ntre ekeme ndidi Jesus n̄kukụre ọkọnọ nditọwọn̄ oro edidiọn̄.

Ke idaha ekededi, Mark ada ọkpọsọn̄ ikọ oro adade ọnọ “edidiọn̄” (ka·teu·lo·geʹo), owụtde ọkpọsọn̄ odudu. Emi ọnọ ekikere ete ke Jesus ọkọdiọn̄ nditọ oro ifịk ifịk, ima ima, ye ufiop ufiop. Nte an̄wan̄ade, enye ikadaha nditọwọn̄ nte mbiomo oro adiade ini owo.

Ukpepn̄kpọ Odude ọnọ Nnyịn

Edu oro Jesus akanamde n̄kpọ ye nditọwọn̄ ye ikpọ owo ikanamke owo edịghe m̀mê ndisụhọde uku mmọ. “Enyene ndidi enye ama esituak inua imam mmemmem mmemmem onyụn̄ asak imam ye idatesịt,” ntre ke n̄wed kiet oro ẹkotde ẹto ọdọhọ. Eyịghe idụhe mme owo ke kpukpru isua emana ẹkenyenede ifụre ndidu n̄kpere enye. Ke ndikere mban̄a uwụtn̄kpọ Jesus, nnyịn imekeme ndibụp idem nnyịn, ‘Ndi mbon efen ẹkeme ndisan̄a n̄kpere mi?’ ‘Ndi etie nte mmanana ini n̄kaha anamde edinam ye mbubehe mbon en̄wen ẹfefịna mi?’ Ndinyene udọn̄ esịt akpanikọ ke idem mbon en̄wen oyonụk nnyịn ndinọ idem nnyịn, nte Jesus akanamde. Mbon en̄wen ẹyekụt ata udọn̄ oro nnyịn inyenede ndien ẹyesịk ẹkpere nnyịn.—Mme N̄ke 11:25.

Nte mbụk Mark owụtde, Jesus ama adara ndidu ye nditọwọn̄. Nte an̄wan̄ade, enye ama ada ini ndise nte mmọ ẹbrede mbre, koro enye ama etịn̄ aban̄a mbre mmọ ke uwụtn̄kpọ esie kiet. (Matthew 11:16-19) Eyedi ndusụk nditọwọn̄ oro Jesus ọkọdiọn̄de ẹma ẹkpri ẹkaha ndifiọk owo emi enye ekedide ye se enye ekekpepde. Edi emi ikanamke enye ekere ke enye akababiat ini esie. Enye akabiat ini ye nditọwọn̄ koro enye akamade mmọ. Eyedi esịt ama edemerede ediwak nditọwọn̄ oro Jesus okosobode ke ini utom ukwọrọikọ esie ndinam n̄kpọ mban̄a ima esie ke ndikabade ndi mbet esie.

Edieke Jesus akabiatde ini ye nditọwọn̄ ke mme akpatre urua oro ẹkedide akpan ini ke uwem esie, nnyịn ke akpanikọ imekeme ndifet ufan̄ nnọ mmọ ke ndutịm nnyịn oro ọyọhọde ye utom. Nnyịn ikpenyene ndinọ mbon oro ẹnyenede mme san̄asan̄a udọn̄ ntịn̄enyịn, utọ nte nditọ akpa. Ke akpanikọ, kpukpru nditọwọn̄ ẹsinam n̄kọri ke ini ẹnọde mmọ ntịn̄enyịn, ndien edi uduak Jehovah nte nnyịn inọ mmọ kpukpru ima ye un̄wam oro nnyịn ikemede.—Psalm 10:14.

[Ikọ idakisọn̄]