Didie ke Afo Ekeme Ndiwụt Ata Nsụhọdeidem?

ATA nsụhọdeidem etịm ọsọn̄ urua ke enyịn Abasi. James ekewet ete: “Abasi ọbiọn̄ọ mbon iseri, edi ọnọ mbon nsụhọde-idem mfọn.” (James 4:6) Mi ekeme ndidi James eketịn̄ aban̄a nsio nsio ekikere oro ẹwụtde ke N̄wed Abasi Usem Hebrew. “Koro Jehovah okon̄de, ndien enye ese mbon nsụkidem; edi etie nsan-nsan ọdiọn̄ọ mbon iseri.” “Mmenede-enyịn owo ọduọ, ntan̄idem mbọn̄ onyụn̄ osụhọde, ndien Jehovah ikpọn̄-ikpọn̄ okon̄ ke usen oro.” “Ke ini enye [Abasi] asakde mbon nsahi, enye ọfọn ido ndien ye mme osụk-esịt.”—Psalm 138:6; Isaiah 2:11; Mme N̄ke 3:34.

Apostle Peter n̄ko ama esịn udọn̄ ọnọ nsụhọdeidem. Enye ekewet ete: “Kpukpru mbufo ẹnyụn̄ ẹbọbọ nsụkidem ke idem nte mbọbọ, ẹnam n̄kpọ ẹnọ kiet eken: koro Abasi an̄wan̄wana ye mbon iseri, edi ọfọn ido ye mbon nsụkidem.”—1 Peter 5:5.

Uwụtn̄kpọ Nsụhọdeidem Christ

Afo emekeme ndibụp, Nso eti m̀mê ufọn idu ke ndisụhọde idem? Kaban̄a owo emi odomode ndidi ata Christian, ibọrọ edi akpan n̄kpọ—ndisụhọde idem edi nditie nte Christ. Jesus ama owụt nsụhọdeidem esie ke ndinyịme n̄wọrọnda utom edito ke ikpehe n̄kan̄ heaven ndi isọn̄ nnyụn̄ n̄kabade ndi usụhọde owo, osụhọde akan mme angel. (Mme Hebrew 2:7) Okposụkedi enye ekedide Eyen Abasi, enye ama ọyọ mme esuene oro mme asua esie eke ido ukpono ẹkesuenede enye. Enye ama omụm idem akama ke ini ẹkedomode enye mme idomo, kpa ye oro enye ekekemede ndikot legion mme angel ẹdin̄wam enye.—Matthew 26:53.

Ke akpatre, Jesus ama ọkọn̄ọ esuene esuene ke eto ndutụhọ, edi osụk anamde akpanikọ ọnọ Ete esie. Ntem, Paul ama ekeme ndiwet mban̄a enye ete: “Yak mbufo ẹnyene orụk esịt emi okodude ke Christ Jesus. Okposụk edi nte Enye ekedide mbiet Abasi, Enye ikabatke ndida n̄ka-n̄ka ye Abasi ke n̄kpọ eke okpomụmde akama: edi Enye akan̄wan̄a Idem Esie, ada mbiet ofụn, owụt idem nte owo; ndien sia Enye ọwọrọde edi ke ido owo, Enye osụhọde idem, akabade osụk ibuot tutu osụn̄ọ ke n̄kpa, kpa n̄kpa [eto ndutụhọ, NW].”—Philippi 2:5-8.

Ntre didie ke nnyịn ikeme ndiwụt ata nsụhọdeidem? Ke mme ata ata idaha, didie ke nnyịn ikeme ndinam n̄kpọ ke usụn̄ owụtde nsụhọdeidem utu ke ntan̄idem?

Nte Owo Nsụhọdeidem Esinamde N̄kpọ

Ẹyak nnyịn ikere iban̄a nsụhọdeidem ke afan̄ utom, edide ke itieutom m̀mê ke utom Christian. Man ẹnam utom ke usụn̄ okụtde unen, mme esenyịn, mme etubom utom, ye mme eseutom ẹkeme ndidi se ẹyomde. Owo enyene ndinam mme ubiere. Didie ke afo esinam n̄kpọ? Ndi afo emesikere, “Enye ekere ete imọ idi anie nditeme mi se n̄kpanamde? Ami mmanam utom emi ke ediwak isua n̄kan enye.” Ih, edieke afo atan̄de idem, afo ayayat esịt ndisụk ibuot. Ke n̄kan̄ eken, owo nsụhọdeidem odomo nditre ‘ndinam baba n̄kpọ kiet ke ndomo-idem m̀mê ke ntan̄-idem, edi ada nsụhọde-esịt abat ete, owo en̄wen ọfọn akan imọ.’—Philippi 2:3.

Didie ke afo esinam n̄kpọ ke ini owo oro ekpride akan m̀mê n̄wan ọnọde ekikere? Edieke afo osụhọde idem, ke nsụhọde n̄kaha afo eyekere aban̄a enye. Edieke afo atan̄de idem, afo ayayat esịt mîdịghe esịn enye inikiet inikiet. Ndi afo akpama itoro ye nneminua oro adade fi ekesịm nsobo m̀mê item oro ọbọpde-bọp kaban̄a n̄kọri fo?—Mme N̄ke 27:9; 29:5.

Ndi afo emekeme ndikan n̄kpọ-ata eke ini nnanenyịn? Nsụhọdeidem ayan̄wam fi ndisobo n̄kpọsọn̄ idaha onyụn̄ ọyọ, idem nte Job akanamde. Edieke afo atan̄de idem, afo eyenyene ntụhọ edikpu ndien emekeme ndisọn̄ ibuot ke mme ubiak ubiak idaha ye se ekerede ke edi asari.—Job 1:22; 2:10; 27:2-5.

Nsụhọdeidem Etie Ima Ima Onyụn̄ Efen Ọnọ

Esisọn̄ ndusụk owo ndidọhọ, “Mmeseme mban̄a oro. Mma nnam ndudue. Afo ama enen.” Ntak-a? Ọkpọsọn̄ ntan̄idem! Edi, ke ediwak ini ata n̄kpeubọk ekeme nditre utọk ke ndọ mmemmem mmemmem.

Ndi afo emesinyịme ndifen nnọ ke ini owo eduede fi? Mîdịghe, ke ntan̄idem fo, ndi afo emesikama udu, ndusụk ke ediwak usen ye ọfiọn̄, esịnde nditịn̄ ikọ ye andidue oro? Ndi afo emesikam enyene isiọ aban̄a owo ke ukeme ndisio usiene? Ẹma ẹwot mme owo ke ndusụk isiọ. Ye mbon efen, usụn̄ unam n̄kpọ oro ẹkedade ekedi edibiat enyịn̄ owo. Ke edide isio, owo nsụhọdeidem etie ima ima onyụn̄ efen ọnọ. Ntak-a? Koro ima ikamake udu. Jehovah ama enyịme ndifen nnọ nditọ Israel edieke mmọ ẹtrede ntan̄idem mmọ. Anditiene Jesus oro osụhọrede idem enyịme ndifen nnọ, idem ke ediwak ini!—Joel 2:12-14; Matthew 18:21, 22; 1 Corinth 13:5.

Mbon nsụhọdeidem “ẹsọp ndikpono kiet eken.” (Rome 12:10) New International Version okot ete: “Ẹkpono kiet eken ẹkan idem mbufo.” Ndi afo emesitoro mbon efen onyụn̄ owụt esịtekọm aban̄a mme ukeme ye ndammana ifiọk mmọ? Mîdịghe ndi afo kpukpru ini esiyom ndo man abiat eti enyịn̄ mmọ? Ih, ndi afo emenyene edu editoro mbon efen ke esịt akpanikọ? Edieke afo enyenede mfịna ke afan̄ emi, ekeme ndidi unana ọkpọkpọ ifụre ye ntan̄idem ẹdi mfịna fo.

Owo ntan̄idem inyeneke ime. Owo nsụhọdeidem enyene ime ye anyan ime. Nso kaban̄a fi? Ndi esisọp otụk fi ke ini ekerede ke owo inamke n̄kpọ ye afo nte ọfọnde? Utọ edinam oro edi isio ye edinyene anyan ime. Edieke afo enyenede nsụhọdeidem, afo udubatke idemfo ke n̄kpọ ukaha. Ti se iketịbede ke ini mbet Jesus ẹkebatde idem mmọ ke n̄kpọ ẹkaha—mmọ ẹma ẹdụk ọkpọsọn̄ eneni ẹban̄a owo emi akanade edi akpan n̄kpọ akan. Mmọ ẹma ẹfre ẹte ke kpukpru mmimọ ikedi “ifịn eke mînamke utom ibe adan̄a”!—Luke 17:10; 22:24; Mark 10:35-37, 41.

Ewetn̄wed owo France oro Voltaire eketịn̄ aban̄a nsụhọdeidem nte “nsụkidem ukpọn̄ . . . editịbe ntan̄idem.” Ih, nsụhọdeidem edi nsụhọde esịt. Owo nsụhọdeidem enyene ukeuke edu, itan̄ke idem. Enye enyene ntotụn̄ọ ukpono onyụn̄ ọfọn ido.

Ntre ntak idomode ndinyene nsụhọdeidem? Koro nsụhọdeidem enyene unyịme Abasi onyụn̄ an̄wam nnyịn ndinyene ndausụn̄ Abasi. Ke ubak ubak, ke ntak nsụhọdeidem Daniel, Jehovah ama abat prọfet oro nte owo emi “enemde Abasi esịt” onyụn̄ ọdọn̄ angel esie okowụt enye n̄kukụt! (Daniel 9:23; 10:11, 19) Nsụhọdeidem ada ediwak utịp edi. Enye anam fi enyene mme ufan akpanikọ oro ẹmade fi. Ke akande oro, enye ada edidiọn̄ Jehovah edi. “Utịp nsụkesịt ye eke uten̄e Jehovah edi inyene, ye ukpono, ye uwem.”—Mme N̄ke 22:4.

[Ndise ke page 7]

Ikọ n̄kpeubọk oro ẹtịn̄de ke nsụhọdeidem ekeme ndinam uwem enem akan