Ndidat Esịt Nnyịme Ndausụn̄ Jehovah
Nte Ulysses V. Glass Obụkde
Enye ekedi n̄wọrọnda edinam. Nditọ ufọkn̄wed 127 kpọt ẹkedu ke otu oro ẹkekụrede ukpep, edi otuowo emi ẹkopde nduaidem emi ekedide owo 126,387, ẹmi ẹketode ediwak idụt ẹdi ẹma ẹdụk. Enye ekedi edinam ukụre ukpep ọyọhọ otu 21 eke Ufọkn̄wed Enyọn̄-Ukpeme Ukpep Bible eke Gilead, akadade itie ke An̄wambre Yankee eke New York City ke July 19, 1953. Ntak emi oro ekedide utọ n̄wọrọnda edinam oro ke uwem mi? Yak ntịn̄ esisịt idaha mi ke uwem.
AMI n̄kamana ke Vincennes, Indiana, U.S.A., ke February 17, 1912, n̄kpọ nte isua iba mbemiso emana Obio Ubọn̄ Messiah, nte ẹbụkde ke Ediyarade 12:1-5. Ke isua oro ekebemde iso ete ye eka mi ẹma ẹtọn̄ọ ndikpep Bible ọkọrọ ye mme eboho Studies in the Scriptures. Kpukpru usenubọk Sunday, Papa ama esikot kiet ke otu n̄wed oro ọnọ ubon, ndien ekem nnyịn ineme iban̄a oro.
Mama ama ada se enye ekekpepde an̄wam ndinọ ekikere nditọ esie ukpep. Enye ekedi ata eti owo—ọfọn ido etieti, enen̄ede ama ndin̄wam owo. Nnyịn ikedi nditọ inan̄, edi Mama ama ama nditọ eken ke n̄kann̄kụk. Enye ama esibiat ini ye nnyịn. Enye ama esima ndinọ nnyịn mme mbụk Bible nnyụn̄ n̄kwọ ikwọ ye nnyịn.
Enye ama esikot nsio nsio owo n̄ko oro ẹkenamde utom uyọhọ ini ẹdi ufọk nnyịn. Mmọ ẹkesidu usen kiet m̀mê iba kpọt, ediwak ini ẹnịmde mme mbono esop ẹnyụn̄ ẹnọde mme utịn̄ikọ ke ufọk nnyịn. Nnyịn ikesinen̄ede ima mbon oro ẹkesidade mme n̄ke ẹnyụn̄ ẹnọde nnyịn mme mbụk. Isan̄ kiet ke 1919, n̄kpọ nte isua kiet ke akpa ekọn̄ ererimbot ama okokụre, etịn̄ikọ oro okotode-to edi eketịn̄ ikọ esie akpan akpan ọnọ nnyịn nditọwọn̄. Enye ekeneme ediyak idem nnọ onyụn̄ an̄wam nnyịn ifiọk nte emi otụkde uwem nnyịn. Nte ini akakade ke mbubịteyo oro ke ini n̄koyomde ndidụk idap, mma mbọn̄ akam nnọ Ete mi eke heaven nnyụn̄ nsian enye nte ke n̄koyom ndinam n̄kpọ esie kpukpru ini.
Nte ededi, ke 1922 ama ekebe eketie nte mme n̄kpọ eken ke uwem ẹma ẹnam ubiere oro akabade udiana n̄kpọ. Nnyịn ima isiwọrọ idụn̄ ke ebiet kiet ika en̄wen ndien ikenyeneke ebuana ye esop ikọt Jehovah. Papa ikodụhe ke ufọk ke ntak akanamde utom ke usụn̄ tren. Ukpepn̄kpọ Bible nnyịn ikedịghe kpukpru ini. Mma mbọ ukpep ke ufọkn̄wed ye ekikere edikabade ndi asuanetop n̄kpọurua, ndien ke n̄kanam ndutịm ndika n̄wọrọnda ufọkn̄wed ntaifiọk.
Ndikpụhọde Ekikere Mi ke Uwem
Ke ufọt ufọt iduọk isua 1930, ererimbot ama ọtọn̄ọ ndifiak ntịm idem nnọ ekọn̄ ofụri ererimbot. Nnyịn ikodụn̄ ke Cleveland, Ohio, ke ini kiet ke otu Mme Ntiense Jehovah akawahade enyịnusụn̄ nnyịn. Nnyịn ima itọn̄ọ ndinen̄ede n̄kere mban̄a se nnyịn ikekpepde nte nditọwọn̄. Akpaneka mi, Russell, ama enen̄ede enyene ifiọk, ndien enye ekedi akpa ndina baptism. Ami n̄kenen̄ekede nnyene ifiọk ntre, edi ke February 3, 1936, mma nna baptism n̄ko. Ifiọk mi kaban̄a se ediyak idem nnọ Jehovah abuanade ama ọkọri, ndien ke n̄kekpep ndinyịme ndausụn̄ Jehovah. Kpasụk ke isua oro, nditọeka mi iban iba, Kathryn ye Gertrude, ẹma ẹna baptism n̄ko. Kpukpru nnyịn ima idụk utom uyọhọ ini nte mme asiakusụn̄.
Nte ededi, oro iwọrọke ite ke nnyịn ikekereke iban̄a n̄kpọ en̄wen ekededi. Mma nnen̄ede n̄kpan̄ utọn̄ ke ini n̄wan akpaneka mi eketịn̄de ọnọ mi aban̄a ata ediye eyenan̄wan ekerede Ann emi idem eketiede urua urua tọn̄ọ enye okokop aban̄a akpanikọ emi okonyụn̄ aduakde ndidi mme mbono esop ke ufọk nnyịn. Ke ini oro Ann akanam utom nte ewetn̄wed ke ọfis ekpeibet, ndien ke ufan̄ isua kiet enye ama ana baptism. N̄kaduakke ndidọ ndọ, edi ama ana in̄wan̄în̄wan̄ nte ke Ann ama ada ọnọ akpanikọ ke ofụri esịt. Enye ama oyom ndibuana ọyọhọ ọyọhọ ke utom Jehovah. Enye ikedehede idi owo emi esidọhọde, “Ndi mmekeme ndinam?” Utu ke oro, enye edibụp ete, “Nso idi mfọnn̄kan usụn̄ ami ndinam?” Ndien enye ama ebiere ndinam nsịm utịt. Mma mma in̄wan̄în̄wan̄ edu oro. Ke ẹsiode oro ẹfep, enye ama eye etieti, ndien enye osụk eyeye. Enye ama akabade edi n̄wan mi, ndien ikebịghike enye ama akabade edi nsan̄a mi ke utom usiakusụn̄.
Eti Ukpepn̄kpọ nte Mme Asiakusụn̄
Nte mme asiakusụn̄ nnyịn ima ifiọk ukpọhọde ediyụhọ ye se inyenede ke ini nnyịn ikenyenede esisịt ye ke ini nnyịn ikenyenede ediwak. (Philippi 4:11-13) Usen kiet, eyo ke okosụhọde, ndien nnyịn ikenyeneke n̄kpọ ndomokiet ndidia. Nnyịn ikenyene beni ition kpọt. Nnyịn ima ika itie unyam unam inyụn̄ ibụp, “Nte afo emekeme ndinọ nnyịn unam ke beni ition?” Enye ama ese nnyịn ndien ekem esịbe n̄kukụk inan̄. Mmetịm nnịm nte ke ama ebe eke beni ition, ndien oro ama ọnọ nnyịn ndusụk nsọn̄idem.
Ikedịghe esen n̄kpọ ndisobo ọkpọsọn̄ ubiọn̄ọ nte nnyịn inamde utom ukwọrọikọ nnyịn. Ke obio kiet ekperede Syracuse, New York, nnyịn ikodu ke efak ideme mme n̄wedikot inyụn̄ ikọn̄ọ mme kad ntọt ndidụri ntịn̄enyịn n̄wụt akpan an̄wan̄wa mbono. Okopidem irenowo iba ẹma ẹmụm ẹnyụn̄ ẹtụhọde mi. Kiet ekedi akwa owo bodisi, edi enye ikesịneke ọfọn̄utom esie, ikonyụn̄ inyịmeke eben̄e mi ndikụt kad idiọn̄ọ esie. Ke ebe oro, Grant Suiter okotode Bethel Brooklyn ama edi edidọhọ ke nnyịn inyene ndika itieutom mme bodisi man ikọkọk mfịna oro. Ekem enye ama okot ọfis N̄ka ke Brooklyn ke urụk ukopikọ, ndien ẹma ẹdọhọ ami ye n̄wan mi ifiak ikama mme kad ikot ye mme n̄wedikot ika kpasụk usen oro man inọ isọn̄ kaban̄a ikpe ndomonse. Nte ẹkedoride enyịn, ẹma ẹmụm nnyịn. Nte ededi, ke ini nnyịn ikọdọhọde mme bodisi ite ke imọn̄ ikot mmọ ikpe ke ndimụm nnyịn nte mîdotke, mmọ ẹma ẹsana nnyịn ẹyak.
Ke ndan̄nsiere ndusụk uyom uyom uyen ẹmi oku ekesịnde nsọk ọnọ ẹma ẹdụk itiembono nnyịn, ndien owo ikekwe mme bodisi. N̄ka ukpọtiọ oro ẹma ẹmia eto umia bọl ke isọn̄ ufọk oro ẹkedade eto ẹnam, ẹnụk ndusụk mme andidụk mbono ke n̄kpọitie ẹduọn̄ọ, ẹnyụn̄ ẹdọk mbot utịn̄ikọ, ẹmenede ọfọn̄ etakubom America ke enyọn̄ ẹnyụn̄ ẹfiori ẹte, “Ẹkọm enye! Ẹkọm enye!” Ekem mmọ ẹma ẹtọn̄ọ ndikwọ ikwọ ẹkekotde “Beer Barrel Polka.” Mmọ ẹma ẹsuan mbono oro ofụri ofụri. Nnyịn ima ikụt nnennen nnennen se ikọ Jesus ọwọrọde ke ini enye ọkọdọhọde ete: “Sia mbufo mîdịghe mbon ererimbot, edi Ami n̄kemekde mbufo nsio ke ererimbot, ke ntak oro ererimbot asua mbufo.”—John 15:19.
Ke nditịm ntịn̄, utịn̄ikọ an̄wa ekedi edifiak mbre utịn̄ikọ J. F. Rutherford, emi adan̄aoro ekedide etieibuot Watch Tower Society. Ami ye Ann ima idu ke obio oro ke usen ifan̄ inyụn̄ iwaha ibịne mme owo ndinọ mmọ ifet ndikop utịn̄ikọ oro ke ufọk mmọ. Ibat ibat owo ẹma ẹnyịme.
Ndinọ Idem Unyịme Unyịme Kaban̄a Utom Esen Idụt
Nte ini akakade, mbufa ifet unam utom ẹma ẹberede. Ẹma ẹnọ Russell eyeneka mi ye n̄wan esie, Dorothy, ikot nte n̄wan ye ebe ndidụk akpa otu Ufọkn̄wed Gilead, ke 1943, ndien ekem ẹnọ mmọ ẹka Cuba nte mme isụn̄utom. Kathryn eyeneka mi okodụk ọyọhọ otu inan̄. Ẹkenọ enye aka Cuba n̄ko. Nte ini akakade ẹma ẹfiak ẹnọ enye aka Dominican Republic ndien ekem ẹnọ aka Puerto Rico. Nso kaban̄a mi ye Ann?
Ke ini nnyịn ikokopde iban̄a Ufọkn̄wed Gilead ye akpanikọ oro nte ke N̄ka okoyom ndinọ mme isụn̄utom ẹka mme idụt en̄wen, nnyịn ima ikere ke ikpenyene ndinọ idem nnyịn kaban̄a utom esen idụt. Ke akpa, nnyịn ikekere ndika ke idem nnyịn, iso-ọfọn ikade Mexico. Edi ekem nnyịn ima ibiere ite ke ekeme ndidi eyetịm ọfọn ndibet nnyụn̄ nyak N̄ka ọnọ nnyịn itie ke ima ikodụk Ufọkn̄wed Gilead. Nnyịn ima ifiọk ite ke emi ekedi ndutịm oro Jehovah akadade anam n̄kpọ.
Ẹma ẹnọ nnyịn ikot ndidụk ọyọhọ otu Ufọkn̄wed Gilead inan̄. Edi esisịt ini mbemiso otu oro ọkọtọn̄ọde ukpepn̄kpọ, N. H. Knorr, emi ekedide etieibuot Watch Tower Society ke ini oro, ama enen̄ede etịm ọfiọk aban̄a mme unana ukeme Ann ke ntak ekenyenede udọn̄ọ mbụn̄ọ nditọwọn̄ ke ini uyen. Enye ama enyene nneme ye ami onyụn̄ ebiere ete ke idiwụtke eti ibuot ndinọ nnyịn ikanam utom ke idụt en̄wen.
N̄kpọ nte isua iba ke ukperedem, ke ini n̄kanamde utom mbono, Brọda Knorr ama afiak okụt mi onyụn̄ obụp m̀mê nnyịn ke ikosụk inyenyene udọn̄ ndika Gilead. Enye ama asian mi ete ke nnyịn idikaha utom esen idụt; enye ekenyene n̄kpọ en̄wen ke ekikere. Ntre ke ini ọyọhọ otu usụkkiet ekesịnde enyịn̄ ke February 26, 1947, ẹma ẹsịn nnyịn ke otu nditọ ufọkn̄wed.
N̄kemeke ndifre ini oro ikodude ke Gilead. Ukpepn̄kpọ oro ama enen̄ede esịne n̄kpọ ke n̄kan̄ eke spirit. Ima inam mme ufan anyan ini. Edi ebuana mi ye ufọkn̄wed oro ama aka anyan akan oro.
Ke Ufọt Washington ye Gilead
Ufọkn̄wed Gilead okosụk edi obufa obufa. Ukara United States iketịmke imehe ye mme uduak ufọkn̄wed emi, ntre ẹma ẹdemede ediwak mbụme. N̄ka ama oyom ndinyene andida ke ibuot mmọ ke Washington, D.C. Do ke ẹkenọ nnyịn ika ke ọfiọn̄ ifan̄ ẹma ẹkebe nte ikokụre ukpep ke Gilead. Ami n̄kenyene ndin̄wam ke ndibọ n̄wed isan̄ nnọ mbon oro ẹtode idụt en̄wen ẹmi ẹkenọde ikot ẹdi Gilead ye ke ndibọ mme n̄wed oro ibet oyomde man otodo ẹkpekeme ndinọ mbon oro ẹkụrede ukpep ẹka utom isụn̄utom ke esenidụt. Ndusụk ikpọ owo ukara ẹma ẹnen̄ede ẹnana asari ẹnyụn̄ ẹn̄wam. Mbon en̄wen ẹma ẹnyene ọkpọsọn̄ usua ẹban̄a Mme Ntiense. Ibat ibat oro ẹkenyenede mme ekikere ukaraidem ẹma ẹdọhọ ẹte ke nnyịn ikenyene mme ebuana ye mme owo oro mmọ mîkamaha.
Eren kiet emi n̄kakade ọfis esie ama enen̄ede okụt ndudue ọnọ nnyịn koro nnyịn mîsikọmke ọfọn̄ etakubom m̀mê ndika ekọn̄. Ke enye ama akanam uyom aban̄a oro ke ndusụk ini, mma ndọhọ ke akpatre nte: “Nyom fi ọfiọk, ndien afo ọmọfọfiọk, ete ke Mme Ntiense Jehovah in̄wanake ekọn̄ ye owo ndomokiet ke ererimbot. Nnyịn ibuanake ke mme mbubehe ererimbot. Nnyịn ibuanake ke mme ekọn̄ mmọ, mbre ukara mmọ. Nnyịn inen̄ede ida san̄asan̄a. Nnyịn imakakan mme mfịna oro mbufo ẹsobode; nnyịn imenyene edidianakiet ke esop nnyịn. . . . Ke emi, nso ke afo oyom nnyịn inam? Ndi afo oyom nnyịn ifiak ibịne usụn̄ edinam mbufo inyụn̄ ikpọn̄ eke nnyịn?” Enye iketịn̄ke n̄kpọ ndomokiet ke oro ebede.
Ikosio ofụri usen iba ke urua inịm ndida nnam utom ye mme ọfis ukara. Ke adianade ye oro, nnyịn ikanam utom nte mme akpan asiakusụn̄. Ke ini oro, emi ama abuana edibiat hour 175 ke utom ukwọrọikọ ke ọfiọn̄ kiet kiet (ke ukperedem ẹma ẹkpụhọde man edi hour 140), ntre nnyịn ikesiwak ndidu ke an̄wautom tutu ata mbubịteyo. Nnyịn ima isikop inem. Nnyịn ima isinịm nti ukpepn̄kpọ ye mme ofụri ubon, ndien mmọ ẹma ẹnam eti n̄kọri. Ami ye Ann ima ibiere nditre ndinyene nditọ, edi ke nditịn̄ ke n̄kan̄ eke spirit, nnyịn inyeneke nditọ kpọt edi n̄ko nditọ nditọ ye nditọ nditọ-nditọ. Nso n̄kpọ idatesịt ke mmọ ẹdi ntem ẹnọ nnyịn!
Ke utịt utịt 1948, mma mbọ utom en̄wen. Brọda Knorr ama anam an̄wan̄a nte ke Brọda Schroeder, esịn-owo-enyịn̄ onyụn̄ edide kiet ke otu mme andikpep ke Ufọkn̄wed Gilead, ama enyene akpan utom en̄wen ndinam, ntre ẹma ẹdọhọ mi ẹte nnọ ukpep ke Gilead ke ini okoyomde. Ye ọkpọsọn̄ nnyekidem, mma mfiak n̄ka Gilead, ke South Lansing, New York, ye Ann ke December 18. Ke akpa, nnyịn ikesidu ke Gilead ke urua ifan̄ ke ini kiet, ndien ekem ifiak ika Washington. Nte ededi, nte ini akakade mma nsibiat ini ke Gilead n̄kan nte n̄kabiatde ke Washington.
Ekedi ke ini emi, nte n̄ketịn̄de ke mbemiso, ke ọyọhọ otu 21 eke Gilead okokụre ukpep ke An̄wambre Yankee ke New York. Ntre nte kiet ke otu mme andikpep, mma nnyene ifet nditiene mbuana ke ndutịm ukụre ukpep oro.
Utom ke Ibuot Itieutom Ofụri Ererimbot
Ke February 12, 1955, nnyịn ima itọn̄ọ utom en̄wen. Nnyịn ima ikabade idi mme andibuana ke ubon Bethel ke ibuot itieutom ofụri ererimbot esop Jehovah oro ẹkụtde ke enyịn. Edi nso ke emi akabuana? Ke ofụri ofụri, ndinyịme ndinam se ededi oro ẹnọde nnyịn inam, ndibuana ke mme utom oro oyomde ẹdiana kiet ye mbon en̄wen. Edi akpanikọ, nnyịn ima inanam oro ke mbemiso, edi idahaemi nnyịn ikenyene ndidi ubak akamba otu—ubon Bethel ibuot itieutom. Nnyịn ima inyịme obufa utom emi ye idatesịt nte uyarade ndausụn̄ Jehovah.
Akpan ikpehe utom mi akabuana mme n̄kpọ ẹnyenede ebuana ye ndutịm usuanetop. Ke ntak udọn̄ ndiwet mme mbụk oro ẹdemerede owo ntụk ye ke ntak edibọ ntọt nto mbon asari, mme ewetmbụk n̄kpọntịbe ẹma ẹwet ntaha ntaha n̄kpọ ẹban̄a Mme Ntiense Jehovah. Nnyịn ima idomo ndinen̄ede idaha oro.
Brọda Knorr okoyom nditịm n̄kụt nte ke kpukpru nnyịn imenyene ekese ndinam, ntre mme utom en̄wen ẹma ẹdu n̄ko. Ndusụk ke otu mmọ ẹmi ẹma ẹyom usọ ukpep oro n̄kọbọde nte asuanetop n̄kpọurua. Mbon eken ẹma ẹbuana itieutom ekebe utịn̄ikọ N̄ka, WBBR. Utom ama odu ndinam ke ebuana ye mme ndise ẹsan̄ade isan̄ oro N̄ka akanamde. Edi akpanikọ, mbụkeset eke Ukara Abasi ekedi ubak ukpepn̄kpọ Gilead, edi idahaemi ke ẹkenam nsio nsio utom ndinam ikọt Jehovah efen efen ẹmehe ye mme ọyọhọ ntọt mbụkeset oro ẹban̄ade esop ukara Abasi eyomfịn ndinyụn̄ nnam mbon an̄wa n̄ko ẹkeme ndinyene emi. Ikpehe ukpepn̄kpọ Gilead en̄wen akabuana an̄wan̄wa utịn̄ikọ, ndien ama oyom ẹnam utom man ẹnam mme akpan n̄kpọ ke an̄wan̄wa utịn̄ikọ odu ọnọ nditọete ke mme esop. Ntre ekese ama odu ndinam.
Gilead Ofụri Ini
Ke 1961, ke ini edinọ mme esenyịn oro ẹsan̄ade-san̄a ye mme anamutom n̄kọk itieutom ukpep ekekperede, ẹma ẹsio Ufọkn̄wed Gilead ẹka Brooklyn, emi Watch Tower Society enyenede mme akpan ọfis esie. Mma mfiak n̄ka ndinọ ukpep—isan̄ emi idịghe nte ukpụhọ andikpep edi nte andibuana ke ikpehe unọ ukpep ofụri ini. Nso ifetutom ke emi ekedi ntem! Ami mmenen̄ede nnịm ke akpanikọ nte ke Ufọkn̄wed Gilead edi enọ otode Jehovah, enọ oro ọnọde ofụri esop esie oro ẹkụtde ke enyịn ufọn.
Ke Brooklyn mme otu ukpepn̄kpọ Gilead ẹma ẹnyene mme ifet oro nditọ ufọkn̄wed oro ẹkedude ke mme otu eken mîkenyeneke. Ediwak mme andikpep oro ẹtode-to ẹdi ẹma ẹdu ndien ẹma ẹnyene n̄kpet n̄kpet ebuana ye Otu Ukara ye n̄kaiso ebuana ye ubon Bethel ibuot itieutom. Nditọ ufọkn̄wed ẹma ẹkeme ndibọ ukpep n̄ko ke nte ẹtịmde ọfis, nte ẹnamde mme n̄kpọ ke ufọkidụn̄ Bethel, ye ke nsio nsio ikpehe utom ke ufọk umịn̄n̄wed.
Ke ediwak isua ẹmi ẹbede ibat nditọ ufọkn̄wed ẹkedi nsio nsio, kpa ntre ke ekedi ye ibat mme andikpep. Ẹma ẹkpụhọde itie ufọkn̄wed ediwak ini n̄ko. Idahaemi enye odu ke ndiye n̄kann̄kụk ke Patterson, New York.
Ndinam Utom ye Nditọ Ufọkn̄wed
Edi ata n̄kpọ idatesịt ndinọ mme otu ẹmi ukpep! Mmọ ẹdi n̄kparawa owo ẹmi mînyeneke udọn̄ ndinam mme n̄kpọ ke akani editịm n̄kpọ emi. Mmọ ẹkpọn̄ mme ubon mmọ, mme ufan mmọ, ufọk mmọ, ye mme owo ẹmi ẹsemde usem mmọ. Idaha eyo, udia—kpukpru n̄kpọ ẹdidi isio isio. Mmọ isikam ifiọkke idụt emi ẹdinọde mmọ ẹka, edi utịtmbuba mmọ edi ndidi mme isụn̄utom. Iyomke afo ededemede udọn̄ utọ mbon oro.
Ke ini n̄kesidụkde ubet ukpepn̄kpọ, kpukpru ini utịtmbuba mi ekedi ndinam nditọ ufọkn̄wed ẹnyene ifụre. Idụhe owo emi esikpepde n̄kpọ ọfọn ke ini idem enyekde enye m̀mê okopde editịmede esịt. Edi akpanikọ, n̄kedi andikpep, edi mma mfiọk nte ndidi eyen ufọkn̄wed eketiede. Mma ntie ke mme n̄kpọitie oro ini kiet ko. Edi akpanikọ, mmọ ẹma ẹkpep n̄kpọ ọkpọsọn̄ ẹnyụn̄ ẹkpep ekese n̄kpọ ke Gilead, edi mma nsiyom mmọ ẹkop inem uwem n̄ko.
Mma mfiọk nte ke ini mmọ ẹkade mme itieutom mmọ, oyodu ndusụk n̄kpọ oro mmọ ẹdiyomde man ẹkụt unen. Mmọ ẹma ẹyom ọkpọsọn̄ mbuọtidem. Mmọ ẹma ẹyom nsụhọdeidem—ekese. Ama oyom mmọ ẹkpep ndinyene eti itie ebuana ye mbon en̄wen, ndinyịme mme idaha, ndifen nnọ ifụre ifụre. Ama oyom mmọ ẹka iso ẹsion̄o mbun̄wụm spirit. Ama oyom mmọ ẹma mme owo n̄ko ẹnyụn̄ ẹma utom oro ẹkedọn̄de mmọ ẹka ẹkenam. Mmọ oro ẹdi mme n̄kpọ oro n̄kesidomode kpukpru ini ndisọn̄ọ ntịn̄ nnọ nditọ ufọkn̄wed ke adan̄aemi mmọ ẹkedude ke Gilead.
Nnen̄ekede mfiọk m̀mê nditọ ufọkn̄wed ifan̄ ke ami n̄kekpep. Edi mmọfiọk nte n̄kerede mban̄a mmọ. Ke mma n̄kabiat ọfiọn̄ ition ye mmọ ke ubet ukpepn̄kpọ, mma nsinen̄ede mma mmọ etieti. Ekem ke ini nsede mmọ nte ẹdọkde mbot utịn̄ikọ ẹkebọ mme n̄weditoro mmọ ke usen ukụre ukpep, mma mfiọk nte ke mmọ ẹma ẹkụre ukpep mmọ uforo uforo ye nte ke ibịghike mmọ ẹmọn̄ ẹnyọn̄ọ. Eketie nte ndiyak ubak ubon mi ẹnyọn̄ọ. Afo akpasan̄a didie etre ndima mme owo ẹmi ẹnyịmede ndinọ idemmọ nnyụn̄ nnam utom oro n̄kparawa owo ẹmi ẹdinamde?
Ediwak isua ke ukperedem, ke ini mmọ ẹfiakde ẹdi ndise, mmesikop mmọ ẹnemede ẹban̄a idatesịt oro mmọ ẹnyenede ke utom, ndien mfiọk nte ke mmọ ke ẹsụk ẹdu ke mme itieutom mmọ, ẹnamde se ẹkenọde mmọ ukpep ndinam. Oro anam etie mi didie ke idem? Ami ndọhọ fi, edi inem inem n̄kpọ.
Ndisak Iso Nse Ini Iso
Enyịn mi ẹmekịm idahaemi, ndien mmokụt mme edikpu oro emi adade edi. Ami n̄kemeke aba ndikpep n̄kpọ ke ubet ukpepn̄kpọ Gilead. Ke akpa, oro ekedi ọkpọsọn̄ ukpụhọde ndinam, edi ke ofụri uwem mi mmekpep ndinyịme mme idaha nnyụn̄ nyọ mmọ. Mmesiwak ndikere mban̄a apostle Paul ye “n̄kukịm ke obụkidem” esie. Paul ama ọbọn̄ akam utịm ikata man ọbọhọ udọn̄ọ emi, edi Ọbọn̄ akasian enye ete: “Mfọn Mi ke ekekem fi; koro ẹnamde odudu Mi ọfọn ama ke mmemidem.” (2 Corinth 12:7-10) Paul ama aka iso ndiyọ enye. Edieke enye ekekemede ndiyọ, ami nnyene ndiyọ. Okposụkedi mmen̄kpepke n̄kpọ aba ke ubet ukpepn̄kpọ, mmowụt esịtekọm nte ke mmekeme ndisụk n̄kụt nditọ ufọkn̄wed ẹsibede kpukpru usen. Ndusụk ini mmesikeme ndinyene nneme ye mmọ, ndien esida idatesịt ọsọk mi ndikere mban̄a eti edu oro mmọ ẹwụtde.
Edi utịbe utịbe n̄kpọ ndikere mban̄a se ini iso akamade. Ke ẹsịn itiat idakisọn̄ idahaemi. Gilead emenyene akamba ikpehe ke ndinam oro. Ke akwa ukụt ebede, ke ini ẹdikụbọrede mme n̄wed oro ẹtịn̄de ẹban̄a ke Ediyarade 20:12, ekese ukpep efen efen ẹban̄ade mme usụn̄ Jehovah ẹyedu ke tọsịn isua. (Isaiah 11:9) Edi idem enye oro idịghe utịt. Enye enen̄ede edi sụk ntọn̄ọ. Ke nsinsi nsinsi, ekese n̄kpọ ẹyedu ndikpep mban̄a Jehovah ndien ekese n̄kpọ ẹyedu ndinam nte nnyịn ikụtde mme uduak esie ẹsude. Ami mmenen̄ede nnyene ọyọhọ mbuọtidem nte ke Jehovah oyosu kpukpru utịbe utịbe un̄wọn̄ọ oro enye ọn̄wọn̄ọde, ndien nyom ndidu do man ntiene nnyịme mme ndausụn̄ oro Jehovah edinọde nnyịn adan̄aoro.
[Ndise ke page 26]
Ukụre ukpep Gilead ke An̄wambre Yankee eke New York ke 1953
[Ndise ke page 26]
Gertrude, ami, Kathryn, ye Russell
[Ndise ke page 26]
Ndinam utom ye N. H. Knorr (ke ata ufien) ye M. G. Henschel ke nditịm mbono
[Ndise ke page 26]
Ke itie usuanetop WBBR
[Ndise ke page 29]
Ke ubet ukpepn̄kpọ Gilead
[Ndise ke page 31]
Ye Ann, ke mîtịmke ibịghi