Dara “Ata Uwem”

JEHOVAH ABASI ọmọnọ owo ekikere nsinsi ini. (Ecclesiastes 3:11) Emi anam mme owo ẹnana odudu ke ẹsobode n̄kpa edi, ke ukem ini oro, edemede mmọ ọkpọsọn̄ udọn̄ ndidu uwem.

Edisana Bible, Ikọ Abasi eke odudu spirit, ọnọ nnyịn akwa idotenyịn. (2 Timothy 3:16) Jehovah, emi edide ima ke idemesie, ikpakanamke owo ye ekikere ndifiọk se nsinsi ini edide ndien ekem anam enye odu uwem ke isua ifan̄ kpọt. Ndibot nnyịn man ibọ ufen ke ntak idaha oro nnyịn idude enen̄ede edi isio ye edu Abasi. Owo ikobotke nnyịn nte “n̄kpọ-uwem eke mînyeneke ibuot, eke ẹmanade ke uduot unam, man ẹkpemụm mmọ ẹwot.”—2 Peter 2:12.

Ke ndibot Adam ye Eve ye ndammana ifiọk aban̄ade nsinsi ini, Jehovah Abasi akanam n̄kpọ oro ‘ọfọnde eti eti’; enye akanam mmọ ye ukeme ndidu uwem ke nsinsi. (Genesis 1:31) Edi ke mfụhọ, akpa ebe ye n̄wan oro ẹma ẹda ifụre uduak mmọ ẹnam n̄kpọ ke idiọk usụn̄, ẹsọn̄de ibuot ye in̄wan̄în̄wan̄ ukpan otode Andibot mmọ ẹnyụn̄ ẹtabade akpasarade mfọnmma. Nte utịp, mmọ ẹma ẹkpan̄a, ke ẹma ẹkeyak unana mfọnmma ye n̄kpa ẹnọ mme andito ubon mmọ.—Genesis 2:17; 3:1-24; Rome 5:12.

Bible inamke uduak uwem ye se n̄kpa ọwọrọde edi ndịben̄kpọ. Enye ọdọhọ ete ke owo ama akpa “baba edinam, baba uduak, baba ifiọk, baba mbufiọk [idụhe]” ye nte ke mme akpan̄kpa “ifiọkke baba n̄kpọ kiet.” (Ecclesiastes 9:5, 10) Ke ikọ en̄wen, mme akpan̄kpa ẹkpan̄a. Ukpepn̄kpọ ukpọn̄ ikpaha ke nsinsi ikemke ye Bible, ntre akwa ndịben̄kpọ ndomokiet idụhe ndiyarade kaban̄a idaha mme akpan̄kpa.—Genesis 3:19; Psalm 146:4; Ecclesiastes 3:19, 20; Ezekiel 18:4.a

Abasi enyene uduak; enye ikobotke isọn̄ “ke ikpîkpu.” Enye okobot enye man mme mfọnmma owo “ẹdụn̄ ke esịt” ke mme idaha paradise, ndien Abasi ikpụhọkede uduak esie. (Isaiah 45:18; Malachi 3:6) Man ẹnyene oro, enye ama ọdọn̄ Eyen esie edi isọn̄. Ebede ke ndinam akpanikọ tutu esịm n̄kpa, Jesus Christ ama ọnọ n̄kpọ ndida mfak ubonowo nsio ke idiọkn̄kpọ ye n̄kpa. Ke akpanikọ, Jesus ọkọdọhọ ete: “Abasi akamama ererimbot ntem, tutu Enye osio ikpọn̄-ikpọn̄ Eyen emi Enye obonde ọnọ, man owo ekededi eke ọbuọtde idem ye Enye okûtak, edi enyene nsinsi uwem.”—John 3:16.

Anyan ini ko, Abasi ama ọn̄wọn̄ọ ete ke imọ iyobot “mbufa enyọn̄ ye obufa isọn̄.” (Isaiah 65:17; 2 Peter 3:13) Oro ayabuana enye ndimek esisịt ibat ke otu mme anam-akpanikọ Christian man ẹkedu uwem ke heaven. Ke ẹdianade ye Jesus Christ, mmọ ẹnam iwụk ukara. Bible etịn̄ aban̄a emi nte “Ubọn̄ Heaven,” m̀mê “Ubọn̄ Abasi,” emi edisede aban̄a “n̄kpọ eke ẹdude ke isọn̄.” (Matthew 4:17; 12:28; Ephesus 1:10; Ediyarade 5:9, 10; 14:1, 3) Ke ama okosobo kpukpru unana uten̄e Abasi ke ekondo nnyịn onyụn̄ anam enye asana, Abasi ayada edinen obufa n̄kaowo, m̀mê “obufa isọn̄,” edi. Emi eyesịne mme owo ẹmi Abasi ekpemede ebe nsobo editịm n̄kpọ emi oro ekperede. (Matthew 24:3, 7-14, 21; Ediyarade 7:9, 13, 14) Mbon oro ẹnamde ẹfiak ẹdidu uwem ebe ke ediset ke n̄kpa oro ẹken̄wọn̄ọde ẹyediana ye mmọ.—John 5:28, 29; Utom 24:15.

“Ata Uwem” Adan̄aoro

Ke ndisọn̄ọ aduai-owo-idem mbụk aban̄ade uwem ke Paradise ini iso ke isọn̄, Abasi ọdọhọ ete: “Sese, mmanam kpukpru n̄kpọ ẹdi mbufa.” (Ediyarade 21:5) Imemke utom ekikere owo ndifiọk ọyọhọ ọyọhọ mme utịbe utịbe utom oro Abasi edinamde ọnọ ubonowo. Abasi oyobot paradise ofụri ererimbot, anamde etie nte Eden. (Luke 23:43) Kpa nte ekedide ye Eden, uyai ye ndiye uduot, inem inem uyom, ye inem ẹyedu akpakịp. Ubuene ye unana udia ididụhe aba, koro kaban̄a ini oro Bible ọdọhọ ete: “Ebe-iso n̄kpọ ẹma ẹbe ẹfep.” (Ediyarade 21:4; Psalm 72:16) Owo baba kiet ididọhọke aba ite, “ndọdọn̄ọ,” sia ẹyesio udọn̄ọ ẹfep ke nsinsi. (Isaiah 33:24) Ih, kpukpru ntak ubiak ẹyebe ẹfep, esịnede usua ubonowo anyan ini, n̄kpa. (1 Corinth 15:26) Ke ndyọ ndyọ n̄kukụt aban̄ade “obufa isọn̄,” kpa obufa n̄kaowo ke idak ukara Christ, apostle John ama okop uyo ọdọhọde ete: “[Abasi] ọyọkwọhọde kpukpru mmọn̄eyet ke enyịn mmọ efep. N̄kpa idinyụn̄ idụhe aba; eseme ye ntuan̄a ye ubiak idinyụn̄ idụhe aba.” Nso ikpekeme ndida ndọn̄esịt ye idatesịt oro okponde akan edisu un̄wọn̄ọ Abasi emi ndi?

Ke nditịn̄ nte uwem ini iso editiede, Bible enen̄ede etịn̄ aban̄a mme idaha oro ẹdiyụhọde mme udọn̄ eke ido uwem ye eke spirit mme owo. Ẹyenyene kpukpru nti ekikere oro ubonowo an̄wanade oyom edi mînyeneke tutu esịm emi ata ọyọhọ ọyọhọ. (Matthew 6:10) Ndusụk ke otu ẹmi edi udọn̄ kaban̄a unenikpe, emi owo mînyeneke koro ibak ibak mbon ufịk ẹmi ẹkarade mbon oro mînyeneke odudu ẹsiwakde ndinọmọ owo. (Ecclesiastes 8:9) Andiwet psalm ama ewet ke ntịn̄nnịm ikọ aban̄a mme idaha ke idak ukara Christ ete: “Edinen ido ọyọkọri ke eyo esie, ndien emem oyodu akpakịp.”—Psalm 72:7, The New Jerusalem Bible.

Unana utụk edi udọn̄ en̄wen emi anamde ediwak owo ẹyak mme n̄kpọ ẹtak. Ke “ini ẹdinamde n̄kpọ ẹkabade ẹdi mbufa,” Abasi ayabiat asari efep. (Matthew 19:28) Kpukpru owo ẹdinyene ukem uku. Emi ididịghe unana utụk oro ndusụk ọsọn̄-ido ukara ẹnịmde. Ke edide isio, ẹyetre mme ntak asari, esịnede idiọkitọn̄ ye ntan̄idem oro anamde mme owo ẹyom ndikara mbon en̄wen m̀mê ndikọ akpakịp n̄kpoduoho. Isaiah eketịn̄ ntịn̄nnịm ikọ ete: “Mmọ ẹyebọp ufọk ẹnyụn̄ ẹdụn̄ ke esịt: ẹyenyụn̄ ẹtọ in̄wan̄-vine, ẹnyụn̄ ẹdia mfri mmọ. Mmọ idibọpke, ndien owo en̄wen odụn̄; iditọhọ, ndien owo efen adia.”—Isaiah 65:21, 22.

Owo ọbọ ufen ke ntak uduọkiyịp ke ọkpọkpọ ekọn̄ ye eke otu didie ntem! Emi ọkọtọn̄ọ toto ke ediwot Abel tutu esịm mme ekọn̄ idahaemi. Mme owo ẹdori enyịn ẹnyụn̄ ẹbet ebịghi didie ntem, ekperede ndidi ke ikpîkpu, ẹyom ẹwụk emem! Ke Paradise oro ẹfiakde ẹwụk, kpukpru owo ẹdidi mbon emem ye sụn̄sụn̄ owo; “ediwak emem oyonyụn̄ enem mmọ esịt.”—Psalm 37:11.

Isaiah 11:9 ọdọhọ ete: “Ifiọk Jehovah ọyọyọhọ ke ererimbot, kpa nte mmọn̄ ofụkde inyan̄.” Ke ntak ndammana unana mfọnmma, ke adianade ye mme n̄kpọ eken, imemke utom nnyịn ndifiọk ọyọhọ ọyọhọ se mme ikọ oro ẹwọrọde mfịn. Etie nte nnyịn ifiọkke kan̄a nte mfọnmma ifiọk Abasi edinamde nnyịn idiana kiet ye enye ye nte oro edidade ikesịm ọyọhọ idatesịt. Edi sia N̄wed Abasi asiande nnyịn ete ke Jehovah edi Abasi emi enyenede utịbe utịbe odudu, ọniọn̄, unenikpe, ye ima, nnyịn imekeme nditịm nnịm nte ke enye oyokop kpukpru akam oro mme andidụn̄ “obufa isọn̄” ẹdibọn̄de.

“Ata Uwem” Edi Akpanikọ—Mụm Enye Kama!

Ye ediwak owo, nsinsi uwem ke eti ererimbot edi sụk ndap ndap m̀mê abian̄a abian̄a n̄kpọ. Nte ededi, ye mbon oro ẹnen̄erede ẹnyene mbuọtidem ke un̄wọn̄ọ Bible, un̄wọn̄ọ emi edi akpanikọ. Enye ebiet ukwak ubom uwem mmọ. (Mme Hebrew 6:19) Kpa nte ukwak ubom omụmde ubom akama mîyakke enye oyo, idotenyịn nsinsi uwem anam mme owo ẹnyene iwụk ye uko onyụn̄ anam mmọ ẹsobo n̄kpọsọn̄ idaha ke uwem ẹnyụn̄ ẹkam ẹkan mmọ.

Nnyịn imekeme nditịm nnịm nte ke Abasi oyosu mme un̄wọn̄ọ esie. Enye amakam ọnọ ubiọn̄ ebe ke ndida un̄wọn̄ọ, unyịme oro owo mîkemeke ndikpụhọde. Apostle Paul ekewet ete: “Sia Abasi oyomde mmọ ẹmi ẹdidade un̄wọn̄ọ ẹnyene ẹtịm ẹkụt ẹte Enye idikpụhọkede uduak Esie, Enye ada un̄wọn̄ọ edisịn: man okpoto ke n̄kpọ iba ẹmi mîkemeke ndikpụhọde, ẹmi Abasi mîkemeke ndisu nsu ke esịt, nnyịn ikpenyene akwa nsọn̄esịt . . . ke edimụm idot-enyịn emi ẹnịmde nnyịn ke iso.” (Mme Hebrew 6:17, 18) “N̄kpọ iba ẹmi mîkemeke ndikpụhọde” oro Abasi mîkemeke ndibiat mfep ẹdi ikọ esie ye un̄wọn̄ọ esie, ẹmi nnyịn ikọn̄de idotenyịn nnyịn.

Mbuọtidem ke mme un̄wọn̄ọ Abasi ọnọ akwa ndọn̄esịt ye ukeme eke spirit. Joshua, adausụn̄ mbon Israel, ama enyene orụk mbuọtidem oro. Ke ini Joshua eketịn̄de ikọ unyọn̄ esie ọnọ nditọ Israel, enye ama ọsọn̄ onyụn̄ ọfiọk ete ke imọn̄ ikpa. Edi, enye ama owụt odudu ye edinam akpanikọ oro n̄kpọ mîkemeke ndibiat, emi okotode ọyọhọ mbuọtidem ke mme un̄wọn̄ọ Abasi. Ke ama ọkọdọhọ ete ke imọ imọn̄ ika “usụn̄ ofụri ererimbot,” usụn̄ oro adade ofụri ubonowo ekesịm n̄kpa, Joshua ama ọdọhọ ete: “Mbufo ẹmefiọk ke ofụri esịt mbufo, ye ke ofụri ukpọn̄ mbufo, ẹte ke baba eti ikọ kiet eke Jehovah Abasi mbufo ọkọdọhọde aban̄a mbufo, ikpụhu: kpukpru ẹma ẹsu ẹnọ mbufo, baba ikọ kiet ikpụhu ke esịt.” Ih, Joshua ama etịn̄ ikata ete ke Abasi kpukpru ini esisu kpukpru un̄wọn̄ọ esie.—Joshua 23:14.

Afo n̄ko emekeme ndinyene ukem mbuọtidem oro ke un̄wọn̄ọ Abasi aban̄ade obufa ererimbot oro ẹdiwụkde ke mîbịghike. Ebede ke ndikpep Bible ifịk ifịk, afo eyedi edifiọk owo emi Jehovah edide ye ntak emi odotde afo ọbuọt idem ye enye ọyọhọ ọyọhọ. (Ediyarade 4:10b) Abraham, Sarah, Isaac, Jacob, ye mme anam-akpanikọ eken ke eset ẹma ẹnyene mbuọtidem oro n̄kpọ mîkemeke ndibiat, ọkọn̄ọde ke ntotụn̄ọ ifiọk mmọ aban̄ade ata Abasi, Jehovah. Mmọ ẹma ẹnyene ọkpọsọn̄ idotenyịn, kpa ye akpanikọ oro nte ke mmọ “[ikọbọhọ] se ẹken̄wọn̄ọde ẹnọ mmọ” ke ini mmọ ẹkedude uwem. Kpa ye oro, “mmọ [ẹma] ẹda nsan-nsan ẹkụt, ẹnyụn̄ ẹdara mme un̄wọn̄ọ oro.”—Mme Hebrew 11:13.

Sia ifiọkde mme ntịn̄nnịm ikọ Bible, nnyịn idahaemi imokụt nte “akwa usen Abasi, Andikara kpukpru n̄kpọ” asan̄ade ekpere, emi ẹdikpọride kpukpru idiọkido ke isọn̄ ẹfep. (Ediyarade 16:14, 16) Ukem nte mme anam-akpanikọ iren eke eset, ana nnyịn ika iso idori enyịn ke mbuọtidem iban̄a mme n̄kpọntịbe ini iso, idide se mbuọtidem ọkọrọ ye ima inyenede inọ Abasi inyụn̄ inyenede inọ “ata uwem” onụkde. Obufa ererimbot ndikpere ọnọ mbon oro ẹnyenede mbuọtidem ke Jehovah ẹnyụn̄ ẹmade enye ọkpọsọn̄ ntak ndinam n̄kpọ. Oyom ẹkọri utọ ima ye mbuọtidem oro man ẹnyene mfọn ye ukpeme Abasi ke akwa usen esie emi ekperede.—Zephaniah 2:3; 2 Thessalonica 1:3; Mme Hebrew 10:37-39.

Ntre, nte afo amama uwem? Ndien nte afo amakam etịm ama “ata uwem”—uwem nte asan̄autom Abasi oro ẹnyịmede, ye idotenyịn inem inem ini iso, ih, ye nsinsi uwem ke ekikere? Edieke oro edide se afo oyomde, nyịme item apostle Paul, emi ekewetde ete ke nnyịn ikpenyeneke ‘ndidori enyịn ke se iyan̄ade owo nte enyene, edi idori enyịn ke Abasi.’ Paul ama aka iso ete: “Ẹnam nti utom,” ẹmi ẹnọde Abasi ukpono, man “ẹkpemụm uwem eke edide ata uwem ẹkama.”—1 Timothy 6:17-19.

Ebede ke ndinyịme ndikpep Bible ye Mme Ntiense Jehovah, afo emekeme ndinyene ifiọk emi ọwọrọde “nsinsi uwem.” (John 17:3) Ke ima, Bible ewet ikot ebietde eke ete mi ọnọ kpukpru owo: “Eyen mi, kûfre mbet mi; edi yak esịt fo ekpeme mme ewụhọ mi: koro ẹyekọrọ anyan usen, ye isua uwem, ye ifụre ẹnọ fi.”—Mme N̄ke 3:1, 2.

[Ikọ idakisọn̄]