Ediyak Itie Unọ Ukpep Enyọn̄-Ukpeme Nnọ

Usọrọ Ẹnamde Ẹnọ Jehovah

TOTO ke eset, mme usọrọ idatesịt ẹdi ubak utuakibuot akpanikọ. Ndusụk usọrọ oro ẹkesinịmde ke Israel eset ẹma ẹsibịghi ke ediwak usen ndien ediwak tọsịn mme andituak ibuot nnọ Jehovah ẹma ẹsidụk. Ediyak temple Solomon nnọ ekebịghi usen itiaba ndien Usọrọ Mme Ataya oro ekebịghide urua kiet ama etiene. Emi ama ọnọ nditọ Israel ifet ndikere mban̄a utịbe utịbe usụn̄ oro Jehovah akanamde n̄kpọ ye mmọ. Mmọ ẹma ẹnyọn̄ọ ufọk, “ẹdat esịt ẹnyụn̄ ẹnem esịt ẹban̄a kpukpru mfọn ẹmi Jehovah ọkọfọnde.”—1 Ndidem 8:66.

Se ikadade itie ke Itie Unọ Ukpep Enyọn̄-Ukpeme ke Patterson, New York, U.S.A., ke May 17-22, 1999, ama eti isenowo aban̄a mme usọrọ inemesịt eset oro. Emi ekedi urua akpan edinam ọkọn̄ọde ke ediyak okụre enyenede ufọk 28 oro ẹbọpde man esịn udọn̄ ọnọ unọ ukpep Bible ofụri ekondo, nnọ. Ẹma ẹnam ndutịm ẹnọ owo 5,400 ẹdide mbonutom ibuot itieutom ke Brooklyn, Wallkill, ye Patterson ndinam ọyọhọ ọyọhọ edisan̄a n̄kanade nse okụre Patterson ke n̄wọrọnda urua oro. Ndusụk ke otu isenowo ẹkedi se ibede n̄kani mbonutom 500 ẹmi ẹkebuanade ke utom ke ini edibọp itie unọ ukpep oro, mme andida ke ibuot n̄kọk itieutom 23 eke Watch Tower Society, ye mbon eken ẹtode n̄kpet n̄kpet esop—ke nsụhọde n̄kaha owo 8,100 ke ofụri ofụri.

Ndise Ẹbonde Ẹsan̄a Ẹkanade Ẹse Ọnọ Ukpep

Ẹma ẹdiomi mme san̄asan̄a ndise, mme ndise unọ ukpep eke vidio, ye mme edisan̄a n̄kanade oro enyene-idem anamde ke idemesie man ẹnam isenowo oro ẹmehe ye itie unọ ukpep emi. Ke akpan usụn̄otop, ekpri mbiet temple oro okodude ke Jerusalem ke ini utom ukwọrọikọ Jesus ke isọn̄ ama omụm ntịn̄enyịn isenowo inikiet inikiet. Mme ndise eken ẹkewụt mme ntọn̄ọ ntọn̄ọ mbụk Ufọkn̄wed Enyọn̄-Ukpeme Ukpep Bible eke Gilead, mme enịm-mbụk mbono, mme mbono esop, n̄kọri ukpepn̄kpọ Bible eyomfịn—ẹmi ẹnịmde ediwak miliọn idahaemi ke urua kiet kiet—ye utom oro Itieutom Ukpeibet anamde man ẹnam usụn̄ aka iso ana in̄wan̄ ọnọ utọ utom oro ke ndinam ewụhọ Jesus.—Matthew 28:19, 20.

Ẹma ẹwụt mbon oro ẹkedide isen ke ini usọrọ ediyak nnọ oro vidio emi ebịghide ke minit 33, oro ẹkotde “Not by Power—By My Spirit!” (Itoho ke Odudu—Edi Oto Spirit Mi!) ke efe mbono oro ekperede, emi odụkde owo 1,700 ifụre ifụre. Vidio emi owụt nte Itie Unọ Ukpep Enyọn̄-Ukpeme akasan̄ade edidu. Mme ndụn̄ọde ẹma ẹwụt mme n̄kpọntịbe ẹmi ẹwụtde ndausụn̄ Jehovah in̄wan̄în̄wan̄ ke mme n̄kpọ ye edidiọn̄ esie ke mme ukeme ẹkesịnde ndida utom isua 15 emi ndisịm utịt uforo uforo. Ediwak tọsịn owo ẹma ẹbuana ke ata ata utom ubọpn̄kpọ oro. Ini kiet ke 1994, mbonutom 526 ẹkedu ke itieutom, esịnede mme anamutom unyịmesịt eke uyọhọ ini 350, mme anamutom ibio ini 113, ye mme anamutom 63 oro ẹkesitode-to ẹdi kpukpru usen man ẹdin̄wam. Ediwak owo efen efen ẹma ẹda mme etịbe ẹnọ utom emi ibetedem. Kpukpru mmọ ẹfiọk ẹte ke tutu amama owo ikpakanamke emi ke ẹsiode spirit Jehovah ẹfep.—Zechariah 4:6.

Mbon oro ẹkesan̄ade ẹkanade ẹse ẹma ẹkeme ndikụt nte ke akpan utom oro ẹnamde ke itie unọ ukpep emi edi nditat ukpepn̄kpọ Abasi. Ndise oro ẹwụtde ke enyịnusụn̄ Ufọkn̄wed Gilead ke ufọkenyọn̄ ufọkn̄wed oro owụt uforo uforo inyene eke spirit ye mbụk ufọkn̄wed oro. Toto ke akpa otu esie ke 1943 ke akpasarade ufọkn̄wed oro ke South Lansing, New York, Ufọkn̄wed Gilead ọmọnọ se ibede nditọ ufọkn̄wed 7,000 ukpep kaban̄a utom isụn̄utom. Mme ndise ẹwụtde ke ọyọhọ enyọn̄ iba ke ufọkn̄wed ẹdi ndise Ufọkn̄wed Mme Andibuana ke Kọmiti N̄kọk Itieutom ye Ufọkn̄wed Mme Esenyịn Oro Ẹsan̄ade-San̄a, emi mbiba ẹsibọde ukpep do. Toto ke ntọn̄ọ esie ke November 1995, ufọkn̄wed n̄kọk itieutom ọmọnọ mme andibuana ke Kọmiti N̄kọk Itieutom 360 ẹtode idụt 106 n̄kokon̄ ukpep.

Nte isenowo ẹkesan̄ade ẹkanade ẹse n̄kpọ, mmọ ẹma ẹsọsọp ẹkụt nte ke mmimọ ima ikụt se ikande mme ndise ke ata ediwak ikpehe. Mmọ ẹma ẹkeme ndidụk nsịm nsio nsio itieutom, ẹka mme ọfis ye mme itieutom eken, ẹnyụn̄ ẹnen̄ede ẹkụt utom oro ẹnamde. Akpan n̄kpọ udọn̄ ke edisan̄a n̄kanade nse n̄kpọ oro ekedi ufọkutom Ọkpọ Umụmikọ ye Vidio. Nti n̄kpọutom ẹkamade do ẹsọn̄ urua didie ntem nditat unọ ukpep Bible! Ebede ke udịm udịm ndise oro akamade ntọt ye mbio mbio vidio, ẹma ẹn̄wam isenowo ẹfiọk nte ẹsimụmde ikọ ke ọkpọ umụmikọ ye nte ẹsitịmde vidio. Mmọ ẹma ẹkpep n̄kpọ ẹban̄a anyan ndụn̄ọde oro abuanade ke nditịm se ẹdikamade ye edisịnen̄kpọ. Mmọ ẹma ẹkụt nte ẹketịmde itie edinam ye esisịt ekọmurua edi ẹnọde n̄wọrọnda ntịn̄enyịn ke kpukpru nde. Mmọ ẹma ẹkụt nte ẹdade ikwọ ukwak ẹnam man etie mme owo ke idem nte mmọ ẹnen̄ede ẹdu ke ikpehe edinam oro mmọ ẹsede. Toto ke 1990 N̄ka amanam vidio duop ke usem 41, ẹwụtde nsio nsio ibuotikọ Bible, ke adianade ye mme vidio eken ẹnamde ẹnọ mbon oro ẹsikamade Usem Idiọn̄ọ mbon America.

Ediwak owo oro ẹkesan̄ade ẹkanade ẹse n̄kpọ ẹma ẹka Itie Uyet Ndise, Itieutom Uwet Ndise, Itieutom Kọmputa, emi esinọde ukpep ke kọmputa onyụn̄ esede aban̄a kọmputa, Itieutom Utịmutom, emi esede aban̄a utom esop 11,242 ye mme esenyịn oro ẹsan̄ade-san̄a 572, ye Itieutom Uwetn̄kpọ, emi esibọrọde mbụme 14,000 ke isua kiet kiet. Ndụn̄ọde oro ẹsinamde ke mme leta oro ẹnọde ẹwọrọ ye ata ata edikere mban̄a oro ẹwụtde mbon oro mbụme mmọ ẹwụtde nte ke mmọ ke ẹdomo ndiyọ ikpọ mfịna, ẹma ẹnen̄ede ẹtụk mmọ.

Akwa udịm mbon oro ẹnamde isan̄ ẹkanade ẹma ẹka Itieutom Ukabade N̄wed ndien ndien. Idem ama akpa mmọ ndifiọk nte ke isua ition oro ẹkebede, ẹma ẹdian usem 102 efen ke ibat usem oro N̄ka osiode mme n̄wed Bible. Ke ofụri ererimbot, n̄kpọ nte mbahade 80 eke ikie ke otu Mme Ntiense Jehovah ẹkot n̄wed N̄ka ke mme usem oro mîdịghe Ikọmbakara. Man ẹnọ se mmọ ẹyomde, se iwakde ibe mme anamutom unyịmesịt 1,700 ẹdu, ẹmi ẹnamde utom ke itie ukabade n̄wed ke idụt 100. Mme ndise ẹwụt Enyọn̄-Ukpeme ke mme usem Edem Edere ye Edem Usụk America, Europe, Asia, ye Africa. Isenowo ẹma ẹkeme ndikụt Bible New World Translation ke usem 31 ẹmi ẹsiode enye. Mmọ ẹma ẹfiọk nte ke mme n̄wed Watch Tower ẹdu idahaemi ke usem 332 ye nte ke ẹsio ediye uduot ekpri n̄wed oro Nso ke Abasi Oyom Oto Nnyịn? ke usem 219 ke otu mmọ ẹmi.

Ẹma ẹwụt isenowo oro ẹkekade Itieutom Ukpeibet nsio nsio edinam oro oyomde ẹnọ ntịn̄enyịn ke n̄kan̄ ibet ke ofụri ererimbot. Ke vidio kiet, mmọ ẹma ẹkụt ata ata ikpe ke esopikpe emi Ntiense edide ekpeibet akafan̄ade ikpe abuanade edikịm iyịp nsịn ke idem. Mmọ ẹma ẹkop n̄ko ẹban̄a se ẹnamde man ẹberede usụn̄ ẹnọ an̄wan̄wa edikwọrọ eti mbụk. (Philippi 1:7) Ẹma ẹdụri ntịn̄enyịn ẹwụt ubiereikpe akwa esopikpe ke March isua emi, ọdọhọde akwa obio Oradell, New Jersey, U.S.A., ete okpụhọ mme ibet esie man etre n̄wed unyịme ye kad idiọn̄ọ oro ẹyomde ẹto Mme Ntiense Jehovah ẹmi ẹyomde ndibuana ke utom ukwọrọikọ eke ufọk ke ufọk ke obio oro.

Emi ikedịghe n̄kukụre n̄kpọ oro isenowo oro ẹkekụtde. Mmọ ẹma ẹse mme ndise ubọpn̄kpọ ke Efe Ubọp Ibibene ke Isọn̄ ẹnyụn̄ ẹsan̄a ẹkanade Itieutom Esede Aban̄a Ndedehe Mmọn̄, Ufọk Unọ Ikan̄, Itieutom Unọ Edin̄wọn̄ Mmọn̄, ye ediwak itieutom udiọn̄ n̄kpọ eken. Enye ekedi n̄wọrọnda ifet.

Ndutịm Ediyak nnọ Ọsọn̄ọ Owụt Ukpepn̄kpọ Abasi

Ẹkenịm ata ndutịm ediyak nnọ ke Wednesday, May 19, ọtọn̄ọde ke n̄kanika inan̄ mbubịteyo. Otuowo ẹkopde idatesịt ẹkedide owo 6,929 ama esịne mbonutom ibuot itieutom, isenowo N̄ka, ye owo 372 oro ẹkesopde idem ke n̄kọk itieutom Canada, emi ẹkeyịride ke urụk ukopikọ.

Otuowo ama enen̄ede enem esịt ndikop ufiop ufiop ikọ ekọm ẹtode Milton G. Henschel, etieibuot Watch Tower Society. Theodore Jaracz, andibuana ke Otu Ukara okonyụn̄ edide etieibuot okpokoro edinam oro, ama okot William Malenfant. Ke ndineme “Mme Akpan N̄kpọ Udọn̄ eke Ndutịm Ubọpn̄kpọ,” enye ama anam ndụn̄ọde ye nditọete ita ẹmi ẹkenyenede akpan udeme ke nditọn̄ọ, ndinam mbuwed, ye ndibọp Itie Unọ Ukpep Enyọn̄-Ukpeme. Ke ini ndụn̄ọde oro, ẹma ẹdọhọ ẹte ke mme isua ata ata edibọp, se ibede mme anamutom ibio ini 8,700 ẹma ẹkpe usụn̄ ke idemmọ ẹdi ndinam utom oro. Nso eti ikọ ntiense ke edidianakiet ye ntatubọk oro ukpepn̄kpọ Abasi anamde ekeme ndidu ke emi edi ntem!

Ekem nneme ke ibuotikọ oro “Ukpepn̄kpọ Abasi ke Udomo Ofụri Ererimbot” ama etiene. Mbon Otu Ukara inan̄ ẹkeneme. John E. Barr ama ọsọn̄ọ etịn̄ nte ke ukpepn̄kpọ Abasi enyene nsọn̄ọ esie ke Ikọ Abasi, kpa Bible, emi esịnde udọn̄ ọnọ mme Christian ete “ẹn̄wụm mfri ke edinam kpukpru nti utom, ẹnyụn̄ ẹkọri ke ifiọk Abasi.” (Colossae 1:10) Daniel Sydlik ama eneme nte ẹtịmde ukpepn̄kpọ Abasi ke ido ukara Abasi ọtọn̄ọde ke ibuot esop Christian, Jesus Christ, tutu osụhọde esịm kpukpru mme andibuana ke itie nditọete ofụri ererimbot. (1 Corinth 12:12-27) Akpatre ikpehe iba ke nneme oro, ẹmi Gerrit Lösch ye Carey Barber ẹkenemede, ẹma ẹwụt nte ukpepn̄kpọ Abasi anamde mme asan̄autom ẹdot ndisịm mme owo ke kpukpru ebiet onyụn̄ etemede mmọ man otodo mmọ n̄ko ẹkeme ndisan̄a ke usụn̄ Abasi.—Isaiah 2:1-4; 2 Corinth 3:5.

Man ẹn̄wam otuowo ẹfiọk nsio nsio ufọkn̄wed oro ẹdude ke itie unọ ukpep emi, ẹma ẹnam mme ndụn̄ọde ẹnyụn̄ ẹneme nneme ye mme andikpep ọkọrọ ye mbon en̄wen ẹmi ẹnyenede ebuana ke mme edinam ufọkn̄wed. Ẹma ẹwụt udeme ufọkn̄wed kiet kiet ke ndinam ndutịm ukpepn̄kpọ Abasi aka iso ke udomo ofụri ererimbot. Ẹma ẹsio ẹwụt nte ke Ufọkn̄wed Gilead owụk ntịn̄enyịn ke edikpep n̄wed Bible kiet kiet, ke mbụk eyomfịn eke ikọt Jehovah, ye ke editịm idem nnọ utom isụn̄utom. Ufọkn̄wed n̄kọk itieutom edi utịbe utịbe ọyọhọ ukpepn̄kpọ aban̄ade ediwak ikpehe utom ẹmi mme andibuana ke Kọmiti N̄kọk Itieutom ẹbuanade. Owo itịmke Ufọkn̄wed mme Esenyịn oro Ẹsan̄ade-san̄a man ẹyụhọ udọn̄ nditọete oro ẹsan̄ade-san̄a kpọt edi n̄ko man ẹtịm mmọ idem ndinọ orụk un̄wam eke spirit oro edinen̄erede an̄wam mme esop.

Man ẹda eti ndutịm emi ẹkeberi, Lloyd Barry eke Otu Ukara ama ọnọ utịn̄ikọ ediyak nnọ ke ibuotikọ oro “Ndidiana ye Akwa Andibot Nnyịn Mbọp.” Enye ama osio owụt nte ke Andibot, Jehovah, adat esịt aban̄a kpukpru edibotn̄kpọ esie onyụn̄ ọnọ nnyịn ikot ete idara ye imọ. (Isaiah 65:18) Sia “Enye emi ọkọbọpde kpukpru n̄kpọ [edide] Abasi,” ofụri itoro enyene Jehovah Abasi kaban̄a ofụri ubọpn̄kpọ emi. (Mme Hebrew 3:4) Ke ama eketịn̄ mme utọ ekikere ẹmi, etịn̄ikọ ama ọbọn̄ akam ofụri esịt, ayakde Itie Unọ Ukpep Enyọn̄-Ukpeme ọnọ Jehovah, kpa Akwa Andibot nnyịn.a

Eyịghe ndomokiet idụhe nte ke kpukpru mbon oro ẹkedụkde ẹyeti usọrọ ofụri urua kiet emi ke anyan ini. Ntak mûdiomike ndika n̄kese Itie Unọ Ukpep Enyọn̄-Ukpeme? Nnyịn imetịm inịm ite ke ndika n̄kese nnyụn̄ nnam isan̄ n̄kanade nse enye edidi n̄kpọ nsịnudọn̄ ọnọ fi ke mme ukeme oro afo esịnde ndikpep n̄kpọ efen efen mban̄a ima ima Andibot nnyịn nnyụn̄ nda ndinen idaha esie ndu uwem.

[Ikọ idakisọn̄]

[Mme ndise ke page 10]

Efe mbono oro mme owo ẹkeyọhọde kpak, ye nyọhọ-nsụhọ otuowo ke ubet udia

[Mme ndise ke page 10]

Mme edisan̄a n̄kanade ẹkenen̄ede ẹdi ikpehe edinam idatesịt