Itie Unọ Ukpep Watchtower Ọnọ Mme Isụn̄utom Ẹwọrọ
UFỌKN̄WED Watchtower Ukpep Bible eke Gilead omonịm mme ukpepn̄kpọ ke nsio nsio itie. Tọn̄ọde ke 1943 osịm 1960, ke mme ufọkutom ke South Lansing, New York, U.S.A., otu 35, ẹmi mme andidụk ẹdide nditọ ufọkn̄wed ẹtode idụt 95, ẹma ẹbọ san̄asan̄a ukpep. Ekem ẹma ẹmen ufọkn̄wed oro ẹka ibuot itieutom ofụri ererimbot ke Brooklyn, New York, ebiet emi enye okodude ke se ikperede ndisịm isua 28. Tọn̄ọde ke 1988 tutu osịm ntọn̄ọ ntọn̄ọ 1995, Ufọkn̄wed Gilead ama onịm ukpepn̄kpọ ke Wallkill, New York.
Ke ufan̄ isua ẹmi ufọkn̄wed oro ama atat ndutịm esie. Ke idak ndausụn̄ esie ẹma ẹnọ otu ita ukpep oro ebịghide ke urua duop ke Mexico; ẹkenịm ition ke otu utọ ukpepn̄kpọ oro ke Germany; iba ke India. Tọn̄ọde ke 1987 udiana ufọkn̄wed emi ẹdiọn̄ọde nte Ufọkn̄wed Unọ Mme Asan̄autom Ukpep onịm ukpepn̄kpọ ke idụt 34, ọnọde n̄kparawa iren ẹmi ẹdotde ukpep oro ebịghide ke urua itiaita. Nte ededi, ukpep oro ẹkenọde ọyọhọ otu 99 eke Gilead, ke obufa Itie Unọ Ukpep Watchtower oro ẹbọpde ke Patterson, New York, ekedi ukpep oro ebịghide ke urua 20, kiet oro ekesịnede edikpep ofụri Bible ntatara ntatara, nneme aban̄ade mbụk ye esop Mme Ntiense Jehovah eke eyomfịn, ọkọrọ ye ntatara item kaban̄a utom isụn̄utom esenidụt.
Ke September 2, ọyọhọ otu 99 oro ama okụre ukpep. Ẹkenịm ndutịm edinam ukụre ukpep oro ekebịghide ke hour ita ke obufa efe mbono ke Itie Unọ Ukpep Watchtower. Enye ama ọyọhọ kpak kpak. Ẹma ẹyịri otuowo efen efen ke ufọkutom Bethel ke Patterson, Wallkill, ye Brooklyn ẹbe ke ndutịm ukwakutom ilektrik. Emi ikedịghe usen nduaidem inọ otu oro ẹkekụrede ukpep ọkọrọ ye iman ye n̄kpet n̄kpet ufan mmọ ikpọn̄ edi ama edi n̄ko ọnọ ediwak owo ẹmi ẹketienede ẹbuana nte mme anamutom unyịmesịt ke ndibọp ediye obufa okụre ufọkn̄wed oro.
Ke ntọn̄ọikọ esie, Carey Barber eke Otu Ukara okowụk ntịn̄enyịn ke se edinam oro akadade itie do ọwọrọde. Enye ọkọdọhọ ete: “Emi enyene ndidi iwụk ebiet n̄kponn̄kan edinam ukpepn̄kpọ Abasi oro akanam adade itie ke isọn̄ emi.” Enye ama anam an̄wan̄a ete ke nnyịn ke isan̄a ikpere ata-utịt en̄wan oro odude ke ufọt mfri n̄wan ye mfri urụkikọt. (Genesis 3:15) Enye ama owụt ete ke n̄kukụre mbon ẹmi ẹdibọhọde enyene-ndịk ntuaha ke ini akwa ukụt emi edide edidi mbon ẹmi ẹnyenede nnennen ifiọk Ikọ Abasi ẹmi ẹnyụn̄ ẹsụkde ibuot ẹnọ enye.
Enye ama ọdọhọ ete: “Ẹdiomi ndutịm unọ ukpep nnyịn emi odude kemi man anam ofụri ikọt Jehovah ke kpukpru ebiet ẹdisịm eti idaha edikọri nsịm ọyọhọ idaha oro ẹtịn̄de ẹban̄a ke Mme N̄ke 1:1-4—oro aban̄ade edibụre eti ibuot ye item, edikeme nditịm mfiọk asian, edibọ item oro ọnọde mbufiọk, eti ido, ikpe, se inende, nti ekikere.” Nso ukpeme ke emi edi ntem ndinyene mme utọ inyene eke spirit oro!
Item Ẹnọde Otu Oro Ẹkụrede Ukpep
Udịm udịm mbio mbio utịn̄ikọ ition ẹmi ẹketịn̄de nnennen ẹnọ otu ẹkụrede ukpep mi ẹma ẹtiene mme ntọn̄ọikọ ẹmi. Harold Jackson, emi inikiet ko ekedide andikpep Gilead ndien idahaemi edide kiet ke otu mbonutom ibuot itieutom ke Brooklyn, ama akpak otu emi ete, “Ẹsọn̄ọ Ẹmụm Uyụhọ Mbufo Emi Otode Abasi Ẹkama.” Lloyd Barry, emi edide isụn̄utom ke anyanini ndien idahaemi edide andibuana ke Otu Ukara, eketịn̄ ikọ ke “Ndinam N̄kpọ Jehovah ye Nsụhọdeidem.” Enye ama anam an̄wan̄a ete ke edu emi eyenyene ufọn ọnọ mme andikụre ukpep oro ke ndikpụhọde nda ekekem ye mbufa idaha ọkọrọ ye ke itie ebuana mmọ ye ekemmọ mme isụn̄utom, ye mme esop ẹmi mmọ ẹdinamde utom, ye mbon n̄kann̄kụk oro.
Karl Adams, emi anamde utom idahaemi ke ikpehe ukpepn̄kpọ Gilead, ama ọkọk ibuot ye otu oro ke mbụme emi “Nso ke Mbuọtidem Edisịn Mbufo Ẹnam?” Enye ama esịn udọn̄ ọnọ mmọ ete ẹkûbiet nditọ Israel ẹmi ẹkesemede ẹban̄a mme idaha mmọ ke wilderness ẹnyụn̄ ẹyomde ndifiak nnyọn̄ Egypt edi, utu ke oro, ẹbiet Abraham, emi akasakde iso ese Obio Ubọn̄ Abasi utu ke ndifiak nnyọn̄ Ur eke mme Chaldean nte usọbọ kaban̄a mme mfịna. (Exodus 16:2, 3; Mme Hebrew 11:10, 15, 16) Ulysses Glass, esịn owo enyịn̄ ke ufọkn̄wed oro, ama obụk ifiọkutom Asaph nte ẹwetde ke Psalm 73 ndinọ otu oro ẹkụrede ukpep mi item, “Ẹbụk Mme Edidiọn̄ Mbufo.” Ndien Albert Schroeder, andibuana ke Kọmiti Unọ Ukpep eke Otu Ukara, ama etịn̄ ikọ ke ibuotikọ oro “Jehovah Esinọ.” Nte uyarade utọ enọ oro, enye ama anyan ubọk owụt Ufọkn̄wed Gilead ke idemesie ye udeme oro enye enyenede ke ndiyọhọ akwa utom ukwọrọikọ ye edinam mbet.
Ekem otuowo ẹma ẹkpan̄ utọn̄ ye ọkpọsọn̄ udọn̄ ke ini Milton Henschel, etieibuot Watch Tower Society, eketịn̄de aban̄a “Mme Ndido Oro Ẹnyenede Kiet Eken.” Enye ama okot onyụn̄ etịn̄ ntatara ntatara aban̄a N̄wed Mbon Rome ibuot 12. Ke adianade ye mme n̄kpọ eken, enye ama ọdọhọ ete: “Nnyịn inyene ndifiọk nte ke imenyene ata n̄kpet n̄kpet itie ebuana ye ekemmọ mme asan̄autom ke esop.” Enye ama adian do ete: “Ọfọn nnyịn ndikere kpukpru ini mban̄a kiet eken nte inyene Jehovah, ndien utu ke ndikụt ndudue nnọ, utu ke ndiyom ndudue, ẹyak nnyịn inọnọ un̄wam kpukpru ini. Nnyịn in̄wam idem nnyịn ke ini imụmde edidianakiet eke esop Christian ikama.” Enye ama owụt nte ẹkemede ndiwụt utọ un̄wam oro ke ndinam udia ke mme ufọk isụn̄utom, ke ndifiọk akpanikọ oro nte ke kpukpru owo ikemeke ndidia ukem udia. Enye n̄ko ama esịn udọn̄ ọnọ edinọ un̄wam utu ke edikụt ndudue nnọ ke ini ẹbuanade ke utom an̄wautom ye ekemmọ mme Christian ẹmi mîtịmke inyene n̄kpọ ke n̄kan̄ obụkidem. Brọda Henschel ama osio owụt ete ke edieke nnyịn ke akpanikọ inọde un̄wam, ibọpde-bọp, inyụn̄ inọde kiet eken nsịnudọn̄, “Jehovah eyema nnyịn ke ntak emi.” Nso eti item ke edi ntem ọnọ mme isụn̄utom ẹmi ẹdinamde utom ke mme idụt ẹmi ẹdide ata isio ye mmọ oro mmọ ẹkewọrọde ẹkpọn̄!
Ndifiọk Otu Oro Otịm Ọfọn
Nditọ ufọkn̄wed 48 eke ọyọhọ otu 99, ke ẹbaharede ukem ukem, ẹkedi isua 32 ke emana ndien ẹma ẹkam ẹsesịn se iwakde ikan isua 11 ke utom ukwọrọikọ uyọhọ ini.
Mme ndụn̄ọde ẹmi ẹkedide ubak ndutịm edinam ukụre ukpep oro ẹma ẹnọ otuowo ifet ndimehe ye ibat ibat ke otu mmọ. Nikki Liebl, emi otode United States, ye Simon Bolton, emi otode England, ẹma ẹbụk mme ifiọk n̄kpọntịbe ẹmi ẹkesịnde mbuọtidem mmọ ke udomo nte ke Jehovah eyenọ mme n̄kpọ obụkidem ẹmi mmọ ẹyomde. Mmọ ẹma ẹkụt un̄wam Jehovah nte mmọ ẹkenịmde utom ukwọrọikọ uyọhọ ini ke akpa itie.
Isabelle Kazan, emi usem emana esie edide French, ọkọdọhọ ke imọ ima ikpep usem Arabic man ikeme ndinọ mbon ẹmi ẹsemde Arabic ke idụt imọ ikọ ntiense. Ke ini enye ọkọtọn̄ọde ke 1987, ekpri otu kiet oro okodude ke Paris ẹkesịne nditọete inan̄ kpọt ẹmi ẹsemde usem Arabic, adianade ye enye ke idemesie ye eyenete an̄wan efen ẹmi ẹkekpepde usem oro. (Ikememke utom. Mmọ ẹma ẹsibiat hour itiaita kpukpru urua ke ndinam ntịmidem nnọ ukpepn̄kpọ Enyọn̄-Ukpeme man ẹkeme ndinọ ibọrọ.) Nte ukeme oro ẹkesịnde ama odot? Ọfọn, mfịn, Mme Ntiense ẹmi ẹsemde usem Arabic ẹdu ẹmi ẹtịmde ẹdọn̄ ke circuit ition ke ofụri France. Miko Puro, eyen ufọkn̄wed en̄wen, ama etịn̄ nte usem French emi enye ekekpepde ke ufọkn̄wed akan̄wamde imọ ndikwọrọ ikọ nnọ mme oyom ubọhọ ke esenidụt ẹmi ẹtode Africa ke obio emana esie, Finland, emi n̄ko eyenyụn̄ enyene ufọn ke utom isụn̄utom esie ke Benin. Bonny Bowes ama etịn̄ aban̄a nte enye akan̄wanade ndisem usem French udọn udọn man ekpekeme ndinam utom ke Quebec, Canada. Ndien Bjarki Rasmussen, otode Denmark, ama obụk mme ifiọkutom oro enye ye n̄wan esie ẹma ẹkenyenyene ke mme isua oro mmọ ẹkenamde utom ke mme Isuo Faeroe. Ih, mbufa isụn̄utom ẹmi ẹdi mme asan̄autom uyọhọ ini ẹmi ẹnyenede ifiọk.
Ẹkenọ mme andikụre ukpep ẹmi ẹka idụt 19—ke Africa, Central ye South America, Edem Usiahautịn Europe, ye Edem Usiahautịn. Mme andikụre ukpep ke mme otu ẹmi ẹkebemde iso ẹdu ẹmenanam utom ke se iwakde ikan idụt 200. Ediwak ke otu mme andikụre ukpep ẹmi ke ẹsesịn idem ke utom mmọ. Mbufa isụn̄utom ẹmi ẹdiana ye mmọ idahaemi ke ndikaiso nnam ikọ ntiense Obio Ubọn̄ atara osịm utịt isọn̄.—Utom 1:8.
[Mme ndise ke page 25]
Ndise ẹwụtde nte ufọkn̄wed odude ke edinam ke Itie Unọ Ukpep Watchtower
[Ndise ke page 26]
Ọyọhọ Otu 99 Oro Ẹkụrede Ukpep ke Ufọkn̄wed Watchtower Ukpep Bible eke Gilead
Ke udịm enyịn̄ etienede mi, ẹtọn̄ọ ke udịm iso ẹnọ nọmba ẹka edem, enyịn̄ ẹnyụn̄ ẹtọn̄ọ ke ufien ẹka nnasia ke udịm kiet kiet.
(1) Heffey, S.; Riley, E.; Mortensen, D.; Honable, A.; Bolton, J.; Poole, J.; Siimes, G.; Sousa, L. (2) Pashnitski, B.; Shepherd, D.; Pashnitski, W.; Järvinen, J.; Paulsen, K.; Rasmussen, E.; Schewe, C.; Olsson, L. (3) Paulsen, E.; Samsel, T.; Bowes, B.; Harris, E.; Kazan, I.; Liebl, N.; Sousa, P.; Puro, J. (4) Lager, K.; Lager, V.; Golden, K.; Bolton, S.; Johnson, M.; Johnson, S.; Liebl, A.; Rasmussen, B. (5) Harris, D.; Samsel, W.; Schewe, O.; Heffey, R.; Kazan, L.; Riley, T.; Järvinen, O.; Puro, M. (6) Mortensen, D.; Golden, R.; Honable, L.; Shepherd, M.; Bowes, R.; Siimes, T.; Poole, E.; Olsson, J.
[Mme ndise ke page 27]
Ke ẹsụk ẹdu ke utom mmọ: (ufien) Charles Leathco ye Fern, n̄wan esie, ke Brazil, mme andikụre ukpep ke akpa ye ọyọhọ otu itiokiet eke Gilead; (ke idak) Martha Hess, ke Japan, andikụre ukpep ke ọyọhọ otu itiaba eke Gilead