Ọsọn̄urua N̄kpọ-Akpa Nnyịn—Nso ke Enye Ọwọrọ Ọnọ Fi?
“Ẹdi, mbufo emi Ete Mi ọdiọn̄de, ẹdida ubọn̄ emi ẹkenịmde ẹnọ mbufo toto ke editọn̄ọ ererimbot.”—MATTHEW 25:34.
1. Mme n̄kpọ ewe ke mme owo ẹbọ nte n̄kpọ-akpa?
KPUKPRU owo ẹnyene n̄kpọ-akpa. Ye ndusụk owo n̄kpọ-akpa oro ekeme ndisịne uwem oro ẹnyenede se ededi oro ẹyomde ke n̄kan̄ eke obụk. Ye mbon efen enye edi uwem unana. Ke ndusụk idaha, mme ete ete, ke ntak se mmọ ẹkekụtde m̀mê ẹkekopde, ẹma ẹyak ọkpọsọn̄ usua oro mmọ ẹkesuade ekpụk efen ẹnọ nditọ mmọ. Nte ededi, kpukpru nnyịn imenyene ọsọ n̄kpọ kiet. Kpukpru nnyịn ima ibọ n̄kpọ-akpa edide idiọkn̄kpọ ito akpa owo oro, Adam. N̄kpọ-akpa oro ke akpatre osụn̄ọ ke n̄kpa.—Ecclesiastes 9:2, 10; Rome 5:12.
2, 3. Nso n̄kpọ-akpa ke Jehovah ọkọnọ nditọ Adam ye Eve ke editọn̄ọ, ndien ntak emi mmọ mîkọbọhọ enye?
2 Jehovah, nte ima ima Ete eke heaven, ke editọn̄ọ ama ọnọ ubonowo ata isio isio n̄kpọ-akpa—nsinsi uwem ke mfọnmma idaha ke Paradise. Ẹma ẹnọ akpa ete ye eka nnyịn, Adam ye Eve, mfọnmma ntọn̄ọ. Jehovah ama ọnọ ubonowo Ekondo Isọn̄ nte enọ. (Psalm 115:16) Enye ama ọnọ in̄wan̄ Eden nte uwụtn̄kpọ ke se ofụri ererimbot ekemede ndikabade ndi onyụn̄ ọnọ akpa ete ye eka nnyịn utịbe utịbe utom, oro akakamade nduaidem. Mmọ ẹkenyene ndinyene nditọ, ndikpeme isọn̄ ye uwem nsio nsio eto ye unam, nnyụn̄ ntat adan̄a Paradise nsịm ofụri ererimbot. (Genesis 1:28; 2:8, 9, 15) Nditọ mmọ ẹkenyene ndibuana ke emi. Nso utịbe utịbe n̄kpọ-akpa ke mmọ ẹkpekekeme ndiyak ntem nnọ mmọ!
3 Nte ededi, edieke mmọ ẹkeyomde ndidara kpukpru emi, akana Adam ye Eve ye nditọ mmọ ẹnyene eti itie ebuana ye Abasi. Mmọ ẹkenyene ndima Jehovah nnyụn̄ n̄kop uyo esie, edi Adam ye Eve ẹma ẹnana esịtekọm ẹban̄a se Abasi ọkọnọde mmọ ẹnyụn̄ ẹbiat ibet esie. Mmọ ẹma ẹtaba Paradise ebietidụn̄ mmọ ye ubọn̄ ubọn̄ ini iso oro Abasi ekenịmde mmọ ke iso. Ke ntre, mmọ ikekemeke ndiyak emi nnọ nditọ mmọ.—Genesis 2:16, 17; 3:1-24.
4. Didie ke nnyịn ikeme ndibọ n̄kpọ-akpa oro Adam ọkọduọkde?
4 Ke mbọm, Jehovah ama anam ndutịm man nditọ Adam ye Eve ẹkpekeme ndinyene ifet ndibọ n̄kpọ-akpa oro Adam ọkọduọkde. Didie? Ke edikem ini Abasi, eyen esie, Jesus Christ, ama ọnọ mfọnmma uwem esie ke ibuot nditọ Adam. Ke usụn̄ emi Christ ama edep kpukpru mmọ. Nte ededi, n̄kpọ-akpa oro ikabakede idi eke mmọ ke mbuari. Ana mmọ ẹnyene eti idaha ye Abasi, emi mmọ ẹkemede ndinyene ebe ke ndibuọt idem ke ekọmurua uwa Jesus oro osiode isop idiọkn̄kpọ ye ke ndiwụt mbuọtidem oro ebe ke n̄kopuyo. (John 3:16, 36; 1 Timothy 2:5, 6; Mme Hebrew 2:9; 5:9) Nte usụn̄ uwem fo owụt ke afo omowụt esịtekọm aban̄a ndutịm oro?
N̄kpọ-Akpa Oro Ẹkenọde ebe ke Abraham
5. Didie ke Abraham okowụt esịtekọm aban̄a itie ebuana esie ye Jehovah?
5 Nte enye akanamde uduak esie kaban̄a isọn̄, Jehovah ama anam n̄kpọ ye Abraham ke san̄asan̄a usụn̄. Abasi ama ọdọhọ anam-akpanikọ eren oro ete ọkpọn̄ idụt esie onyụn̄ aka isọn̄ oro Abasi ke idemesie ediwụtde enye. Abraham ama anam oro unyịme unyịme. Ke Abraham ama ekesịm do, Jehovah ama ọdọhọ ete ke nditọ Abraham, idịghe Abraham ke idemesie, ẹdibọ isọn̄ oro ẹda ẹnyene. (Genesis 12:1, 2, 7) Didie ke Abraham akanam n̄kpọ? Enye ama enyịme ndinam n̄kpọ Jehovah ke ebiet ekededi ye ke usụn̄ ekededi oro Abasi eketemede enye man nditọ esie ẹkpekeme ndibọ n̄kpọ-akpa mmọ. Abraham ama anam n̄kpọ Jehovah ke idụt oro mîkedịghe eke esie ke isua 100, tutu esịm n̄kpa esie. (Genesis 12:4; 25:8-10) Nte afo akpakanam oro? Jehovah ọkọdọhọ ke Abraham ekedi “ufan” imọ.—Isaiah 41:8.
6. (a) Nso ke Abraham akanam owụt ebe ke enye ndinyịme ndiwa eyen esie? (b) Nso ọsọn̄urua n̄kpọ-akpa ke Abraham ekeme ndiyak nnọ nditọ esie?
6 Ke ediwak isua Abraham ama etie ebet eyen, Isaac, emi enye ekenen̄erede ama. Nte an̄wan̄ade, ke ini eyen oro ama akakabade edi akwa akparawa, Jehovah ama eteme Abraham ete ada eyen oro akawa nte uwa. Abraham ikọfiọkke ke imọ ikoyom ndinam n̄wụt se Abasi ke idemesie edinamde ke ndinọ Eyen Esie nte ufak; edi, enye ama okop item okonyụn̄ odu ke mben̄eidem ndiwa Isaac nte uwa ke ini angel Jehovah akakpande enye. (Genesis 22:9-14) Jehovah ama etetịn̄ ete ke mme un̄wọn̄ọ oro imọ ikọn̄wọn̄ọde inọ Abraham ẹdisu ẹbe ke Isaac. Ntem, Abraham nte an̄wan̄ade ama enyene mbuọtidem nte ke, edieke oyomde, Abasi ekeme ndinam Isaac eset ke n̄kpa, okposụkedi oro akananam owo mîkanamke utọ n̄kpọ oro. (Genesis 17:15-18; Mme Hebrew 11:17-19) Ke ntak oro Abraham mîkesịnke ndinọ eyen esie, Jehovah ama ọdọhọ ete: “Kpukpru mme idụt ke ererimbot ẹyenyụn̄ ẹkụt mfọn eke otode ke [mfri, NW] fo.” (Genesis 22:15-18) Emi okowụt nte ke Mfri oro ẹketịn̄de ẹban̄a ke Genesis 3:15 (NW), kpa Messiah oro edinyan̄ade, edito ke udịm ubon Abraham. Nso ọsọn̄urua n̄kpọ-akpa ndiyak nnọ ke emi edi ntem!
7. Didie ke Abraham, Isaac, ye Jacob ẹkewụt esịtekọm ẹban̄a n̄kpọ-akpa mmọ?
7 Abraham ikọfiọkke se edinam Jehovah ọkọwọrọde ini oro; m̀mê eyen esie Isaac mîdịghe eyeyen esie Jacob, emi ‘ẹketienede enye ẹdi mme andinyene un̄wọn̄ọ oro,’ ndikọfiọk. Edi kpukpru mmọ ẹma ẹnyene mbuọtidem ke Jehovah. Mmọ ikadianke idemmọ ye mme obio ukara ekededi ke idụt oro koro mmọ ẹkedoride enyịn ke se ifọnde ikan oro—“Obio eke enyenede nsọn̄ọ-nda, eke Andibọp ye Andinam Enye [edide] Abasi.” (Mme Hebrew 11:8-10, 13-16) Edi, idịghe kpukpru nditọ Abraham ẹkewụt esịtekọm ẹban̄a ọsọn̄urua n̄kpọ-akpa oro ẹkenamde odu ebe ke Abraham.
Ndusụk Mbon Oro Ẹkesịnde N̄kpọ-Akpa Oro ke Ndek
8. Didie ke Esau okowụt ke imọ iwụtke esịtekọm iban̄a ọsọn̄urua n̄kpọ-akpa imọ?
8 Esau, akpan Isaac, ama okpu ndida itie akpan esie ke ọsọn̄urua n̄kpọ. Enye ikowụtke esịtekọm iban̄a edisana n̄kpọ. Ntre usen kiet ke ini biọn̄ ọkọdọn̄de Esau, enye ama anyam itie akpan esie ọnọ eyeneka esie, Jacob. Ke nso? Ke uyo ye udia ọkọti! (Genesis 25:29-34; Mme Hebrew 12:14-17) Idụt oro edibede ke enye Abasi osu mme un̄wọn̄ọ oro enye ọkọn̄wọn̄ọde ọnọ Abraham okoto ubon Jacob, emi Abasi okokpụhọde enyịn̄ esie okot Israel. Mme ifet ewe ke n̄kpọ-akpa oro ekeberede ọnọ mmọ?
9. Ke ntak n̄kpọ-akpa eke spirit mmọ, nso edinyan̄a ke nditọ Jacob, m̀mê Israel, ẹkenyene?
9 Ke ini akan̄, Jacob ye ubon esie ẹma ẹwọn̄ọ ẹka Egypt. Do mmọ ẹma ẹtọt ẹwak etieti, edi mmọ ẹma ẹkabade ifịn n̄ko. Nte ededi, Jehovah ikefreke ediomi esie ye Abraham. Ke edikem ini Abasi, enye ama anyan̄a nditọ Israel osio ke ufụn onyụn̄ asian mmọ ete ke imọ iyada mmọ idi “isọn̄ emi ọfiọrọde mmọn̄-eba ye aran-ọkwọk,” kpa isọn̄ emi enye ọkọn̄wọn̄ọde ọnọ Abraham.—Exodus 3:7, 8; Genesis 15:18-21.
10. Ke Obot Sinai, ewe n̄wọrọnda edinam efen akada itie ke ebuana ye n̄kpọ-akpa nditọ Israel?
10 Ke ini nditọ Israel ẹkekade Isọn̄ Un̄wọn̄ọ, Jehovah ama anam mmọ ẹsop idem ke Obot Sinai. Enye ama ọdọhọ mmọ do ete: “Edieke mbufo mîditreke ndikop uyo mi, nnyụn̄ nnịm ediomi mi, mbufo ẹyedi ndien akpan inyene mi ẹkan kpukpru obio: koro ofụri ererimbot edide okịm. Mbufo ẹyenyụn̄ ẹnyene mi nte obio oku, ye nte edisana idụt.” (Exodus 19:5, 6) Ke mme owo oro ẹma ẹkenyịme emi ye esịt kiet, Jehovah ama ọnọ mmọ Ibet esie—n̄kpọ oro enye mîkanamke ye mbon en̄wen ekededi.—Psalm 147:19, 20.
11. Nso ikedi ndusụk ọsọn̄urua n̄kpọ oro ẹkesịnede ke n̄kpọ-akpa eke spirit nditọ Israel?
11 Nso n̄kpọ-akpa eke spirit ke obufa idụt oro ekenyene ntem! Mmọ ẹketuak ibuot ẹnọ ata Abasi kierakiet. Enye ama anyan̄a mmọ osio ke Egypt, mmọ ẹma ẹnyụn̄ ẹkụt mme enyene-uten̄e edinam ke ini ẹkenọde Ibet ke Obot Sinai. N̄kpọ-akpa mmọ ama etetịm awak ke ini ẹkenọde mmọ “ikọ Abasi” efen efen ẹbe ke mme prọfet. (Rome 3:1, 2) Jehovah ama emek mmọ ete ẹdi mme ntiense imọ. (Isaiah 43:10-12) Mfri edide Messiah ekenyene ndiwọrọ nto idụt mmọ. Ibet oro akanyande ubọk owụt enye, ayanam ẹdiọn̄ọ enye, ndien ekpenyene ndin̄wam mmọ ndifiọk nte ke mmimọ imoyom enye. (Galatia 3:19, 24) Akan oro, ẹyenọ mmọ ifet ndinam utom ke ebuana ye Mfri edide Messiah nte obio oku ye edisana idụt.—Rome 9:4, 5.
12. Okposụkedi mmọ ẹkedụkde Isọn̄ Un̄wọn̄ọ, nso ke mmọ mîkenyeneke? Ntak-a?
12 Nte ekemde ye un̄wọn̄ọ esie, Jehovah ama ada nditọ Israel usụn̄ ekesịm Isọn̄ Un̄wọn̄ọ. Edi nte apostle Paul akanamde an̄wan̄a ke ukperedem, ke ntak unana mbuọtidem mmọ, isọn̄ oro ikedịghe ata itie “nduọk-odudu.” Nte otu, mmọ ikodụkke “nduọk-odudu Abasi” koro mmọ ẹma ẹkpu ndifiọk nnyụn̄ nnam n̄kpọ ke n̄kemuyo ye uduak usen nduọk-odudu Abasi, emi ọkọtọn̄ọde ke ẹma ẹkebot Adam ye Eve.—Mme Hebrew 4:3-10.
13. Ke ntak mmọ mîkowụtke esịtekọm iban̄a n̄kpọ-akpa eke spirit mmọ, nso ke Israel nte idụt akataba?
13 Ẹkpekeda ofụri ibat mbon oro ẹdibuanade ye Messiah ke Obio Ubọn̄ esie eke heaven nte obio oku ye edisana idụt ẹto Israel eke obụk. Edi mmọ ikowụtke esịtekọm iban̄a ọsọn̄urua n̄kpọ-akpa mmọ. Ibat ibat nditọ Israel eke obụk kpọt ẹkenyịme Messiah ke ini enye ekedide. Nte utịp, edi ibat ibat kpọt ẹkesịne ke obio oku oro ẹkebemde iso ẹtịn̄. Ẹma ẹbọ Israel eke obụk Obio Ubọn̄ oro ẹnyụn̄ “ẹyak ẹnọ idụt emi edin̄wụmde mfri.” (Matthew 21:43) Ewe idụt idi oro?
N̄kpọ-Akpa ke Heaven
14, 15. (a) Ke Jesus ama akakpa, didie ke mme idụt ẹketọn̄ọ ndikụt mfọn ebe ke “mfri” Abraham? (b) Nso ke mme andibuana ke “Israel Abasi” ẹbọ nte udeme?
14 Idụt oro ẹkeyakde Obio Ubọn̄ oro ẹnọ edi “Israel Abasi,” Israel eke spirit, emi mme anditiene Jesus Christ edide owo 144,000 emi ẹbonde ke spirit ẹnamde. (Galatia 6:16; Ediyarade 5:9, 10; 14:1-3) Ndusụk ke otu owo 144,000 ẹkedi mme Jew eke obụk, edi ata ediwak ẹketo idụt mme Gentile. Ke usụn̄ oro, un̄wọn̄ọ oro Jehovah ọkọn̄wọn̄ọde ọnọ Abraham ete ke ebede ke “mfri” esie kpukpru mme idụt ẹyekụt mfọn, ama ọtọn̄ọ ndisu. (Utom 3:25, 26, NW; Galatia 3:8, 9) Ke akpa edisu oro, ẹma ẹyet mme Gentile aran ke edisana spirit ndien Jehovah Abasi ama ada mmọ enyene nte nditọ eke spirit, nditọete Jesus Christ. Ntem, mmọ n̄ko ẹma ẹkabade ẹdi ubak udiana “mfri” oro.—Galatia 3:28, 29, NW.
15 Mbemiso n̄kpa esie, Jesus ama ọtọn̄ọ obufa ediomi emi ẹdidade iyịp esie ẹsọn̄ọ ọnọ mme Jew oro ẹditienede ẹbuana ke obufa idụt oro. Ke isọn̄ mbuọtidem mmọ ke uwa oro ẹsọn̄ọde do, ẹyenam mbon oro ẹdade ẹdisịn ke ediomi oro “ẹfọn ẹma ke nsinsi.” (Mme Hebrew 10:14-18) Ẹkeme ‘nditebe mmọ ikpe’ ẹnyụn̄ ẹfen mme idiọkn̄kpọ mmọ. (1 Corinth 6:11) Ntem, ke usụn̄ifiọk oro mmọ ẹtie nte Adam mbemiso enye akanamde idiọkn̄kpọ. Nte ededi, mbon emi ididụn̄ke ke paradise isọn̄. Jesus ọkọdọhọ ke imọ ika ndiketịm itie nnọ mmọ ke heaven. (John 14:2, 3) Mmọ ẹsana idotenyịn eke isọn̄ mmọ ẹyak man ẹkenyene ‘udeme ẹkenịmde ke heaven ẹnọ mmọ.’ (1 Peter 1:5) Nso ke mmọ ẹdinam do? Jesus ama anam an̄wan̄a ete: ‘Mmenịm Obio Ubọn̄ nnọ mbufo.’—Luke 22:29, 30.
16. Nso utịbe utịbe utom ana ọnọ mme Christian oro ẹyetde aran?
16 Ke heaven, mbon oro ẹdikarade ye Christ ẹyesio kpukpru idiọn̄ọ nsọn̄ibuot ye itie edikara Jehovah ẹfep ke isọn̄, ke adianade ye mme n̄kpọ eken. (Ediyarade 2:26, 27) Nte ubak udiana mfri eke spirit Abraham, mmọ ẹyebuana ke ndinam mme owo ẹtode kpukpru idụt ẹsịm mfọnmma uwem. (Rome 8:17-21) Nso ọsọn̄urua n̄kpọ-akpa ke mmọ ẹnyene ntem!—Ephesus 1:16-18.
17. Mme ikpehe n̄kpọ-akpa mmọ ewe ke mme Christian oro ẹyetde aran ẹdara ke adan̄aemi ẹsụk ẹdude ke isọn̄?
17 Edi n̄kpọ-akpa mme anditiene Jesus oro ẹyetde aran idịghe ke ini iso kpọt. Ke usụn̄ oro baba owo efen mîkpekemeke, Jesus ama an̄wam mmọ ndifiọk Jehovah, ata Abasi kierakiet. (Matthew 11:27; John 17:3, 26) Ke ikọ ye ke uwụtn̄kpọ, enye ama ekpep mmọ se ‘ndibuọt idem ye Jehovah’ ọwọrọde ye se nsụkibuot nnọ Jehovah abuanade. (Mme Hebrew 2:13; 5:7-9) Jesus ama ọnọ mmọ ifiọk akpanikọ aban̄ade uduak Abasi onyụn̄ ọsọn̄ọ ọnọ mmọ ete ke edisana spirit ayanam enye etịm an̄wan̄a mmọ. (John 14:24-26) Enye ama esịn nte Obio Ubọn̄ Abasi edide akpan n̄kpọ ke ekikere ye esịt mmọ. (Matthew 6:10, 33) Jesus ama ọnọ mmọ n̄ko utom edinọ ikọ ntiense ye edinam mme mbet ke Jerusalem, Judea, Samaria, tutu esịm utịt ererimbot.—Matthew 24:14; 28:19, 20; Utom 1:8.
Ọsọn̄urua N̄kpọ-Akpa eke Akwa Otuowo
18. Ke nso usụn̄ ke un̄wọn̄ọ Jehovah oro nte ke kpukpru idụt ẹyekụt mfọn otode “mfri” Abraham enyene edisu mfịn?
18 Eyedi ẹma ẹmemek ọyọhọ ibat Israel eke spirit, kpa “ekpri otuerọn̄” eke mme adiakpa Obio Ubọn̄. (Luke 12:32) Ke ediwak isua idahaemi, Jehovah ọmọwọn̄ọde ntịn̄enyịn ọnọ ẹditan̄ akwa otu mbon efen ẹtode kpukpru idụt mbok. Ntem, un̄wọn̄ọ oro Jehovah ọkọn̄wọn̄ọde ọnọ Abraham ete ke ebede ke “mfri” esie kpukpru idụt ẹyekụt mfọn ke osu ke akamba usụn̄. Ke idara, mbon oro ẹkụtde mfọn mi ke ẹnam edisana utom ẹnọ Jehovah ẹnyụn̄ ẹfiọk ẹte ke edinyan̄a mmimọ ọkọn̄ọ ke mbuọtidem ke Eyenerọn̄ Abasi, Jesus Christ. (Ediyarade 7:9, 10) Nte afo emenyịme ikot oro Jehovah ọnọde fi ke mfọnido ete edibuana ye otu idatesịt oro?
19. Nso n̄kpọ-akpa ke mbon idụt oro ẹkụtde mfọn idahaemi ẹbet?
19 Nso ọsọn̄urua n̄kpọ-akpa ke Jehovah ọnọ mbon oro mîdịghe eke ekpri otuerọn̄? Baba, enye idịghe udeme ke heaven. Enye edi n̄kpọ-akpa oro Adam akpakayakde ọnọ nditọ esie—idotenyịn nsinsi uwem ke mfọnmma idaha ke paradise oro editarade sụn̄sụn̄ esịm ofụri ererimbot. Enye edidi ererimbot emi ‘n̄kpa mîdidụhe aba; eseme ye ntuan̄a ye ubiak mîdinyụn̄ idụhe aba.’ (Ediyarade 21:4) Do, edi afo ke Ikọ Abasi eke odudu spirit ọdọhọ ete: “Buọt idem ye Jehovah, nyụn̄ nam se ifọnde; dụn̄ ke isọn̄ nyụn̄ dia akpanikọ. Yak Jehovah onyụn̄ adat fi esịt; ndien enye ọyọnọ fi se esịt fo oyomde. Koro osụk esisịt idiọk owo ididụhe . . . Edi mbon nsụkidem ẹyeda isọn̄ ẹnyene; ediwak emem ẹyenyụn̄ ẹnem mmọ esịt. Nti owo ẹyeda isọn̄ ẹnyene, ẹnyụn̄ ẹdụn̄ ke esịt ke nsinsi.”—Psalm 37:3, 4, 10, 11, 29.
20. Didie ke “mme erọn̄ en̄wen” ẹdara ekese n̄kpọ-akpa eke spirit mme Christian oro ẹyetde aran?
20 “Mme erọn̄ en̄wen” eke Jesus ẹnyene udeme ke ikpehe Obio Ubọn̄ heaven ke isọn̄. (John 10:16a) Okposụkedi oro mmọ mîdidụhe ke heaven, ẹyak ekese n̄kpọ-akpa eke spirit emi mbon oro ẹyetde aran ẹkenyenede ẹnọ mmọ. Ebede ke otu oro ẹyetde aran, “asan̄autom emi anamde akpanikọ, onyụn̄ enyenede ọniọn̄” ke anam mme ọsọn̄urua un̄wọn̄ọ oro ẹdude ke Ikọ Abasi ẹn̄wan̄a mme erọn̄ en̄wen. (Matthew 24:45-47; 25:34) Ke edidianakiet, mbon oro ẹyetde aran ye mme erọn̄ en̄wen ẹfiọk ẹnyụn̄ ẹtuak ibuot ẹnọ ata Abasi kierakiet, Jehovah. (John 17:20, 21) Ke edidianakiet, mmọ ẹkọm Abasi ẹban̄a ekọmurua uwa Jesus oro osiode isop idiọkn̄kpọ. Mmọ ẹnam n̄kpọ ọtọkiet nte otuerọn̄ kiet ke idak Ekpemerọn̄ kiet, kpa Jesus Christ. (John 10:16b) Kpukpru mmọ ẹdi ubak ima ima, itie nditọete ofụri ererimbot. Mmọ ẹbuana ifet edidi Mme Ntiense nnọ Jehovah ye Obio Ubọn̄ esie ọtọkiet. Ih, edieke afo edide asan̄autom Jehovah oro ama akayak idem ọnọ onyụn̄ ana baptism, kpukpru emi ẹsịne ke n̄kpọ-akpa eke spirit fo.
21, 22. Didie ke kpukpru nnyịn ikeme ndiwụt nte ke ida n̄kpọ-akpa eke spirit nnyịn ke ọsọn̄urua n̄kpọ?
21 N̄kpọ-akpa eke spirit emi ọsọn̄ urua adan̄a didie ọnọ fi? Nte afo emenen̄ede abat enye ke ọsọn̄urua tutu edinam uduak Abasi edi ata akpan n̄kpọ ke uwem fo? Nte uyarade kaban̄a oro, ndi afo ke anam item Ikọ esie ye esop esie ndidụk kpukpru mbono esop Christian kpukpru ini? (Mme Hebrew 10:24, 25) Nte n̄kpọ-akpa oro ọsọn̄ urua ke enyịn fo tutu afo aka iso ndinam n̄kpọ Abasi kpa ye nsọn̄ọn̄kpọ? Nte esịtekọm oro afo enyenede aban̄a enye okop odudu ekem ndisọn̄ọ fi idem ndibiọn̄ọ idomo ekededi nditiene usụn̄ edinam oro ekemede ndisụn̄ọ ke afo nditaba enye?
22 Kpukpru nnyịn ikpakam iwụt esịtekọm iban̄a n̄kpọ-akpa oro Abasi ọnọde nnyịn. Ke adan̄aemi inen̄erede iwụk enyịn nnyịn ke Paradise oro odude ke n̄kpet n̄kpet ini iso, ẹyak nnyịn ibuana ọyọhọ ọyọhọ ke mme ifetutom eke spirit oro Jehovah ọnọde nnyịn idahaemi. Ebede ke ndinen̄ede n̄kọn̄ uwem nnyịn ke itie ebuana nnyịn ye Jehovah, nnyịn inọ uyarade anamde ẹnịm nte ke n̄kpọ-akpa oro Abasi ọnọde nnyịn enen̄ede edi ọsọn̄urua n̄kpọ ọnọ nnyịn. Nnyịn ikpakam idu ke otu mbon oro ẹtan̄ade ẹte: “Nyokpono fi, O Abasi mi, edidem; nnyụn̄ n̄kọm enyịn̄ fo ke nsinsi.”—Psalm 145:1.
Didie ke Afo Akpanam An̄wan̄a?
• Edieke Adam akpakanamde akpanikọ ọnọ Abasi, nso n̄kpọ-akpa ke enye akpakayak ọnọ nnyịn?
• Didie ke nditọ Abraham ẹkenam n̄kpọ ẹban̄a n̄kpọ-akpa oro okodude ọnọ mmọ?
• Nso ibuana ke n̄kpọ-akpa eke mme anditiene Christ oro ẹyetde aran?
• Nso idi n̄kpọ-akpa akwa otuowo, ndien didie ke mmọ ẹkeme ndiwụt ke mmimọ imenen̄ede iwụt esịtekọm iban̄a enye?
[Mme ndise ke page 20]
Ẹma ẹn̄wọn̄ọ ndinọ nditọ Abraham ọsọn̄urua n̄kpọ-akpa
[Mme ndise ke page 23]
Nte afo omowụt esịtekọm aban̄a n̄kpọ-akpa eke spirit fo?