Ntak Ọkọride Eti Ido?

EREN Japan kiet emi ekerede Kunihito emi odude ke ufọt ufọt isua uwem esie ama ọwọrọ aka United States ke ndondo emi.a Ke ufan̄ urua ifan̄ ke enye ama ekesịm do, enye ama osobo idaha emi akpakabiatde ubọkọkọ esie. Kunihito obụk ete: “Ke ini eseutom mi okobụpde m̀mê ami mmekeme ndinam ndusụk utom, mma nnen̄ede mfiọk ndinam utom oro. Edi, sia ẹkekpepde mi ndida nsụkidem nte eti ido, mma mbọrọ nte: ‘Mfiọkke m̀mê nyekeme ndinam utom oro, edi nyodomo ofụri ukeme mi.’ Ye eseutom mi emi ekedide owo America, emi eketie nte ke ami n̄kenyeneke ukeme nnyụn̄ nnyeneke mbuọtidem. Ke ini n̄kedide ndidiọn̄ọ emi, mma mfiọk nte ke ama oyom nnam ndusụk ukpụhọde.”

Maria, emi odụn̄de ke New York City, ekedi ata eti eyen ufọkn̄wed, okopde inemesịt ndin̄wam mme nsan̄a ubet ukpepn̄kpọ esie kpukpru ini. Juan ekedi ekemmọ eyen ufọkn̄wed emi ekesiyomde un̄wam oto Maria ke ini ke ini. Edi enye n̄ko ama enyene ima ọnọ Maria esinyụn̄ odomo ndinam enye ama imọ. Kpa ye oro enye okoyomde ndika iso nsana ke ido uwem, Maria ama ayak idem ọnọ mme etabi Juan onyụn̄ abuana ke oburobụt ido idan̄.

Enen̄ede edi n̄kpọ-ata ndinyene eti ido ke ererimbot emi enyenede nsio nsio ido edinam onyụn̄ abiarade ke n̄kan̄ ido uwem. Ntre ntak ọkọride eti ido? Koro eti ido esinemde Abasi esịt, ndien ke akpanikọ ata ediwak nnyịn imoyom ndinyene unyịme esie.

Ikọ Abasi, kpa Bible, eteme mme andikot enye ete ẹkọri eti ido. Ke uwụtn̄kpọ, apostle Paul ewet ete: “Edieke eti ido odude ke n̄kpọ, edieke itoro onyụn̄ odude, ẹkere n̄kpọ oro.” (Philippi 4:8) Ndien apostle Peter esịn udọn̄ ọnọ nnyịn ete isịn ‘ofụri ukeme ndidian eti ido ke mbuọtidem nnyịn.’ (2 Peter 1:5) Edi nso idi eti ido? Nte ẹkeme ndikpep enye ke ufọkn̄wed? Didie ke nnyịn ikeme ndikọri enye?

[Ikọ idakisọn̄]