Nte Itie Ebeakpa Okotụkde Iban Iba

SANDRA emi odụn̄de ke Australia edi ebeakpa. Ke ini ebe esie akakpade ke ndusụk isua emi ẹkebede, akpa edinam Sandra ekedi ọkpọsọn̄ ndịghe. “Idem ama emem mi ndifiọk nte ke mma ntaba nsan̄a ndọ ye akpan ufan mi ke mbuari. N̄kemeke ndinen̄ede nti nte n̄kasan̄ade nto ufọkibọk ndisịm ufọk m̀mê se n̄kanamde ofụri usen oro. Ke urua ifan̄ oro ẹketienede, ndịk oro n̄kokopde ama akabade ata ata ubiak oro akade-ka iso.”

Sandra enyene ufan oro ọsọn̄ọde enye, Elaine, emi edide ebeakpa ke n̄kpọ nte isua itiokiet. Elaine ama ese aban̄a ebe esie, David, ke ọfiọn̄ itiokiet mbemiso kansa okowotde enye. Enye ama enen̄ede ofụhọ tutu ikebịghike ke ebe esie ama akakpa, enye ama ọdọn̄ọ nnan ke ibio ini. Isua iba ke ukperedem enye ama osụhọ ke eferife. Abiausọbọ esie ikekwe idiọn̄ọ ata ata udọn̄ọ ndomokiet. Nte ededi, enye ama edifiọk ete ke Elaine ekesidedịp mfụhọ esie, ntre enye ama ọnọ ekikere ete enye ọnyọn̄ ufọk okodomo nditua eyet. Elaine enyịme ete: “Ama ada anyan ini mbemiso n̄kakande mfụhọ mi,” onyụn̄ adian do ete ke ini ndobo, “mma n̄kam nsidụk ubet n̄katan̄ ọfọn̄ David mfụk ibuot mi.”

Ih, n̄kpa edima nsan̄a ekeme ndinam owo anam n̄kpọ ke nsio nsio usụn̄, koro itie ebeakpa enen̄ede abuana se ikande sụk edidu uwem unana ebe. Ke uwụtn̄kpọ, ke ndusụk ini Sandra ama ekere ke owo ikọdiọn̄ọke imọ aba. Ukem nte ediwak iban efen oro mme ebe mmọ ẹkpan̄ade ke ndondo emi, enye n̄ko ama ekere ete ke imọ inyeneke un̄wam ye ukpeme. Sandra eti ete: “Sia ndiyak ebe mi anam akpatre ubiere ama ekemehe mi, ẹma ẹkpọn̄ mi ke mbuari ndinam mme ubiere oro ikpọn̄. N̄kekemeke ndide idap. Mma nsikpa mba nnyụn̄ n̄kop mmemidem. Ekedi ọkpọsọn̄ n̄kpọ ndifiọk nnennen se n̄kpanamde.”

Ẹsibụk mme mbụk ẹbietde eke Sandra ye Elaine ke usen ke usen ke ofụri ererimbot. Udọn̄ọ, mbabuat n̄kpọntịbe, ekọn̄, nsobo ofụri ekpụk, ye afai ke ofụri ofụri ẹtịp ẹsịn ke ibat mme ebeakpa ndikọri.a Ediwak ke otu iban emi ẹyọ ke ndopuyo, sia mîfiọkke se ẹkpenamde. Nso ke mme ufan ye mme iman ẹkeme ndinam ndin̄wam mbon oro ẹdide mme ebeakpa? Ibuotikọ etienede enyene ndusụk ekikere oro ẹkemede ndinyene ufọn.

[Ikọ idakisọn̄]