“Ẹsan̄a Ẹkpere Abasi, Ndien Enye Ayasan̄a Ekpere Mbufo”
Mbemiso ye ke Ama Ekekpep Bible—Enye Ama Enyene Odudu Ndinam Ukpụhọde
SANDRA, n̄wan kiet ke Mexico, ọkọdọhọ ke imọ ikedi idiọk eyen ke ubon mmimọ. Unana edise enyịn ye unana ediwụt ima ẹma ẹbiat mme isua uyen esie. Enye ọdọhọ ete: “Ini uyen mi ọkọyọhọ ye ukpọk ukpọk ekikere ye ediwak eyịghe kaban̄a ntak oro ami ndude uwem ye se inen̄erede idi uduak uwem.”
Ke adan̄aemi okodude ke akamba ufọkn̄wed, Sandra ama ọtọn̄ọ ndin̄wọn̄ mmịn oro ete esie ekenyenede ke ufọk. Nte ini akakade, enye ama ọtọn̄ọ ndidep eke esie onyụn̄ akabade edi owo mmịn. Enye enyịme ete: “Ikọdọn̄ke mi ndidu uwem.” Ke nnanenyịn, Sandra ama ọtọn̄ọ ndida n̄kpọsọn̄ ibọk. Enye ọdọhọ ete: “N̄kukụre n̄kpọ oro akan̄wamde mi ndifre mme mfịna mi ekedi se n̄kesikamade nsan̄a ke ekpat mi: mmịn, n̄kpọsọn̄ ibọk, m̀mê esisịt ikọn̄ekpo.”
Ke Sandra ama okokụre ufọkn̄wed ukpep ibọkusọbọ, enye ama enen̄ede ọduọ odụk mbumehe un̄wọn̄ ọkpọsọn̄ mmịn. Enye ama odomo ndiwot idem. Edi enye ama ọbọhọ.
Sandra ama oyom un̄wam eke spirit ye eke ntụk oto ediwak nsio nsio ido ukpono edi ikekwe. Ke ama ọkọduọk idotenyịn onyụn̄ odu ke nnanenyịn, enye ama eseme ọnọ Abasi ete: “Afo odu m̀mọ̀n̄? Ntak mûnyan̄ake mi?” Etisịm ini emi owo Ntiense Jehovah kiet ekenyenede nneme ye enye, ekikere esie nte ke imọ inyeneke uku ama enen̄ede ọdiọk akan nte akanam edide. Nneme emi ama ada okosụn̄ọ ke ukpepn̄kpọ Bible. Ama enen̄ede otụk Sandra ke ini enye ekekpepde nte ke “Jehovah emekpere mmọ eke esịt obụn̄ọde mmọ.”—Psalm 34:18.
Andikpep Sandra Bible ama an̄wam enye ndifiọk nte ke Jehovah Abasi ọdiọn̄ọ ete ke nnyịn imenyene mme mmeme ke ntak idiọkn̄kpọ ye unana mfọnmma oro nnyịn ikadade imana ito Adam. Sandra ama edifiọk ete ke Abasi ọdiọn̄ọ ke nnyịn ikemeke ndisịm ndinen idaha ke mfọnmma usụn̄. (Psalm 51:5; Rome 3:23; 5:12, 18) Enye ama okop inemesịt ndifiọk nte ke Jehovah isiwụkke ntịn̄enyịn ke mme mmeme nnyịn, enye isinyụn̄ iyomke n̄kpọ ito nnyịn ikan se nnyịn ikemede ndinam. Andiwet Psalm okobụp ete: “O Jehovah, afo ekpese mme idiọk ido, O Ọbọn̄, anie ekpekeme ndida?”—Psalm 130:3.
Akpanikọ Bible oro akaduaide Sandra idem ekedi uwa ufak Jesus Christ. Ebede ke uwa ufak emi, Jehovah ke mbọm amanam okopitem ubonowo ẹnyene eti idaha kpa ye unana mfọnmma mmọ. (1 John 2:2; 4:9, 10) Ih, imekeme ndinyene “edifen mme idiọk-n̄kpọ nnyịn” ndien ke ntre inyene un̄wam ndikan ekikere unana edidot ekededi.—Ephesus 1:7.
Sandra ama ekpep nti n̄kpọ oto uwụtn̄kpọ apostle Paul. Paul ama enen̄ede owụt esịtekọm aban̄a mfọnido Abasi ke enye ndida mbọm mfen mme ndudue esie eke ini edem nnyụn̄ n̄n̄wam enye ekeme ndin̄wana ọkpọsọn̄ ndikpan mme mmeme esie ndifiak n̄wụt idem. (Rome 7:15-25; 1 Corinth 15:9, 10) Paul ama enen̄ede usụn̄ uwem esie, ‘ọtọn̄ọ idem esie ita, anam enye odụk ufụn’ man odu ke usụn̄ oro Abasi enyịmede. (1 Corinth 9:27) Enye ikayakke ntụhọ unam idiọkn̄kpọ esie esịn enye ke ufụn.
Mme mmeme Sandra ẹma ẹsifịna enye, edi enye ama aka iso ndin̄wana ye mmọ. Enye ama ọbọn̄ akam ke ofụri esịt eben̄e un̄wam Jehovah ndikan mmọ onyụn̄ oyom mbọm esie. (Psalm 55:22; James 4:8) Ke ọfiọkde ke Abasi enyene ọkpọkpọ udọn̄ ke idem imọ, Sandra ama ekeme ndinam mme ukpụhọde ke uwem esie. Enye ọdọhọ ete: “Mmokop idatesịt ndikpep mbon efen Bible kpukpru ini.” Sandra ama enyene ifet ndin̄wam akamba ye ekpri eyeneka esie an̄wan ndifiọk Jehovah. Nte enye ‘ọfọnde ido,’ enye n̄ko esida ifiọk ibọkusọbọ esie anam utom unyịmesịt ke ikpọ mbono Mme Ntiense Jehovah.—Galatia 6:10.
Nso kaban̄a mme mbumehe Sandra? Enye ọdọhọ uko uko ete: “Mmenyene in̄wan̄-in̄wan̄ ekikere. N̄n̄wọn̄ke mmịn, sika, m̀mê ndida n̄kpọsọn̄ ibọk aba. Nyomke mmọ. Mma n̄kụt se n̄koyomde.”
[Se Ẹwetde ke Ikpọ Abisi ke page 9]
“Mma n̄kụt se n̄koyomde”
[Ekebe ke page 9]
Mme Edumbet Bible ke Ẹnam Utom
Ndusụk edumbet Bible emi ẹn̄wamde ediwak owo ndikịbe mbọhọ mme mbumehe emi ẹsisabarede owo ẹdi emi:
“Ẹyak nnyịn iyet kpukpru se isabarede obụkidem ye spirit ifep ke idem nnyịn, inam nti ido nnyịn ẹfọn ẹma ke edibak Abasi.” (2 Corinth 7:1) Abasi esidiọn̄ mbon oro ẹnamde idemmọ asana, kpa mbon oro ẹsịnde mme ndek ndek edinam.
“Uten̄e Jehovah edi ndisua idiọk.” (Mme N̄ke 8:13) Ukpono ukpono mbak Abasi esin̄wam owo ndikịbe mbọhọ ndiọi ido, esịnede edida ibọk ke idiọk usụn̄. Ke ẹsiode edinem Jehovah esịt ẹfep, owo emi anamde ukpụhọde mi idinyeneke mme enyene-ndịk udọn̄ọ.
“Ẹsụk idem ẹnọ mme andikara ye mme enyene-idaha, ẹnyụn̄ ẹsụk ibuot.” (Titus 3:1) Ke ediwak itie, edinyene m̀mê edida ndusụk ibọk edi edibiat ibet. Ata mme Christian isinyeneke isinyụn̄ idaha mme ibọk emi mîkemke ye ibet.