Mme Mbụme Ẹtode Mme Andikot
Ke 1 Peter 4:3 (NW), nnyịn ikot ite ke ini kiet ko ndusụk mme Christian ẹma ẹsịn idem ke “ukpono ndem eke ibet mînyịmeke.” Nte kpukpru ukpono ndem idịghe se ibet mînyịmeke, se Abasi obiomde ikpe onyụn̄ akpande?
Ih, ke ekikere Abasi, kpukpru ukpono ndem ẹdi se ibet mînyịmeke. Mbon oro ẹyomde mfọn esie ikemeke ndisịn idem ke ukpono ndem.—1 Corinth 5:11; Ediyarade 21:8.
Nte ededi, etie nte apostle Peter eketịn̄ aban̄a ukpono ndem ke usụn̄ efen. N̄kpọ kiet edi-o, ke otu ediwak idụt eset, ukpono ndem ekedi ọsọ n̄kpọ ye se ibet ukara ekenyịmede. Oro edi, ibet idụt ikọbiọn̄ọke utọ ukpono ndem oro. Ndusụk ukpono ndem ẹkekam ẹdi ubak ndutịm idụt m̀mê ndutịm ukara. Ke usụn̄ifiọk oro, ndusụk owo ẹma ẹsịn idem ke ‘ukpono ndem eke ibet enyịmede’ mbemiso ẹkekabarede ẹdi mme Christian. (New World Translation, nsiondi eke 1950) Ke uwụtn̄kpọ, ẹkeme ndifiọk nte ke Edidem Nebuchadnezzar eke Babylon ama owụk edisọi mbiet o-gold, edi mme asan̄autom Jehovah oro Shadrach, Meshach, ye Abednego ẹma ẹsịn ndituak ibuot nnọ edisọi mbiet oro.—Daniel 3:1-12.
Ke usụn̄ efen, ediwak edinam ukpono ndem ẹma ẹsisịne mme edinam oro ẹkenen̄erede ẹdu ke ntuaha ye ndammana ibet m̀mê ifiọk ido uwem oro ẹnyenede ẹto ubieresịt. (Rome 2:14, 15) Apostle Paul ama etịn̄ aban̄a mme esuene esuene edinam oro “ẹtuahade ye obot” ẹnyụn̄ ẹdide “mbubiam,” ndien mmọ emi ẹma ẹsiwak ndidu ke mme edinam ido ukpono. (Rome 1:26, 27, NW) Iren ye iban oro ẹkebuanade ke ukpono ndem oro ibet mîkenyịmeke do ikenịmke ndammana ibet ido uwem. Ama enen̄ede odot nte mbon oro ẹkabarede ẹdi mme Christian ẹkpọn̄ mme oburobụt edinam oro.
Ke adianade ye se ẹwetde ke enyọn̄ emi, Jehovah Abasi ama obiom mme utọ ukpono ndem oro ẹkedide ọsọ n̄kpọ ke otu mbon oro mîkedịghe mme Jew, ikpe. Ntem mmọ ẹkedi se ibet mîkenyịmeke.a—Colossae 3:5-7.
[Ikọ idakisọn̄]
a Ke ata ata usụn̄, uwetn̄kpọ usem Greek oro ke 1 Peter 4:3 ọwọrọ “ukpono ndem emi mîkemke ye ibet.” Ẹkabade ubak udịmikọ oro ke nsio nsio usụn̄ ke Bible Ikọmbakara, ẹdade mme utọ ikọ nte “oburobụt ukpono ndem,” “ukpono ndem oro ẹkpande,” ye “ukpono ndem emi ibet mînyịmeke.”