Udọn̄ Oro Ẹnyenede Mfịn ke “Ndisana Owo”

“Ndi emeti ini oro eketiede nte ke nnyịn imakpa mba ke ini ẹtịn̄de n̄kpọ ekededi ẹban̄a mbon uko? Itiehe nte oro ama afịna mbon America miliọn 4.2 emi ẹkedụkde edinam edibụk Mma Teresa ke September 13. Tọn̄ọ nte enye akakpa ke September 5, mme owo ẹka iso ndiben̄e Obio Ukara Pope ẹte anam enye edi edisana owo. Ibat ibat owo ẹyịk m̀mê ẹyenam emi.”—SUN-SENTINEL, UNITED STATES, OCTOBER 3, 1997.

EDIWAK owo ẹse utom unọ un̄wam ye utom mfọnido emi isụn̄utom Catholic oro Mma Teresa akanamde nte utom oro edisana owo akpanamde. Mme owo oro ẹkponode ẹdu ke otu ido ukpono eken. Nte ededi, ekeme ndidi owo idiọn̄ọke owo mmọ ndomokiet nte ẹdiọn̄ọde mbon oro Ufọkabasi Roman Catholic emekde nte ndisana owo.

Pope John Paul II emek se iwakde ibe owo 450 nte ndisana owo ke ini ukara esie, se iwakde ikan ibat oro kpukpru pope eken ke ọyọhọ isua ikie 20 ẹkemekde, ke ẹtan̄de ẹdian ọtọkiet.a Ntak emi ẹkade iso ntre ndituak ibuot nnọ “ndisana owo,” emi ediwak mbon Catholic ke ofụri ofụri mînen̄ekede idiọn̄ọ mmọ?

Lawrence Cunningham, ekpep ukpepn̄kpọ ido ukpono ke Ufọkn̄wed Ntaifiọk Notre Dame anam an̄wan̄a ete: “Ekikere edinyene edisana idaha ke ererimbot edemede udọn̄ mme owo. Ndifiọk nte ke ndisana owo ẹdu owụt nte ke ẹkeme ndidu edisana uwem, idem mfịn emi.” Ke adianade do, ẹdọhọ ke “ndisana owo” ẹnyene san̄asan̄a itie ebuana ye Abasi, anamde mmọ ẹdi okopodudu mme andinam n̄kpeubọk nnọ mme odu-uwem. Ke ini ẹsikụtde mme inyene m̀mê mbak idem “edisana owo,” ẹsikpono mmọ, ẹnịmde ke akpanikọ ẹte ke odudu esito mmọ.

Catechism eke Esop Trent, emi ẹkesiode ke ọyọhọ isua ikie 16 man ẹfiak ẹsọn̄ọ ukpepn̄kpọ Catholic ọkọdọhọ ete: “Nnyịn imenen ke ndibiere nte ke ndinọ ndisana owo ‘emi ẹdede ke Ọbọn̄’ ukpono, ndiben̄e mmọ ẹnam n̄kpeubọk ẹnọ nnyịn, ndinyụn̄ n̄kpono ndisana mbak idem ye ntọn̄ mmọ, enen̄ede anam ubọn̄ oro ẹnọde Abasi okpon utu ke ndisosụhọde, ukem nte anamde idotenyịn Christian ọsọn̄ onyụn̄ ayama, onụkde enye ndikpebe nti ido mmọ.” (The Catechism of the Council of Trent, 1905) Mme Christian akpanikọ ẹnen̄ede ẹyom ndidu eti uwem, ndisan̄a n̄kpere Abasi ke eti usụn̄, ndinyụn̄ mbọ un̄wam Abasi. (James 4:7, 8) Mmọdo, nte ekemde ye Ikọ Abasi, mmanie ẹdot ndidi ata ndisana owo? Ndien nso idi utom mmọ?

[Ikọ idakisọn̄]