Mmọ Ẹnam N̄kpọ ẹnọ Nditọete Christian ke Ofụri Ererimbot
NTE afo emesikop mme ikọ emi “mme asan̄autom ofụri ererimbot” ye “mme anamutom unyịmesịt ofụri ererimbot”? Mme Ntiense Jehovah oro ẹnamde otu emi ẹnọ ini ye usọ mmọ unyịme unyịme ke ndibọp mme itie umịn̄ n̄wed nnyụn̄ nsuan etop Bible aban̄ade Obio Ubọn̄. Utọ mme anamutom unyịmesịt emi ẹn̄wam ke ndibọp mme Ufọk Mbono ye mme Ufọkmbono Obio Ubọn̄, emi ẹdide iwụk ebiet unọ ukpep Bible. Idahaemi, mme anamutom unyịmesịt emi ẹn̄wam ke mme utom ubọpn̄kpọ ke idụt 34, akpan akpan ke mme idụt oro ẹnyenede esisịt okụk. San̄asan̄a n̄kpọ-ata ye mme idatesịt ewe ke utọ mme asan̄autom emi ẹsisobo nte mmọ ẹn̄wamde nditọete Christian ke ofụri ererimbot? Mmọ ẹsise “edisana utom” (NW) oro mmọ ẹnamde didie? (Ediyarade 7:9, 15) Man ifiọk, ẹyak ikop ito ndusụk mme anamutom unyịmesịt oro ẹnamde utom ke Mexico.
Mme anamutom unyịmesịt oro ẹtode esenidụt ẹkebem iso ẹsịm Mexico ke May 1992. Ibịghike ke oro ebede, mmọ ẹma ẹda usụn̄ ke nditat n̄kọk itieutom oro esede aban̄a utom Mme Ntiense Jehovah ke Mexico. Utom editat emi ama esịne mbufa ufọk 14, esịnede mme ufọkidụn̄ mme anamutom unyịmesịt oro ẹnamde utom ke n̄kọk itieutom oro, itie umịn̄n̄wed, ye ọfis.
Man ẹn̄wam ke utom ubọpn̄kpọ emi, se iwakde ibe mme anamutom unyịmesịt 730 oro ẹtode Canada, Great Britain, United States, ye mme idụt eken ẹma ẹdiana kiet ye mme anamutom unyịmesịt ke mme itie ikie oro ẹtode kpukpru ikpehe Mexico. Ke adianade do, se ibede Mme Ntiense 28,000 emi ẹbuanade ye n̄kpọ nte esop 1,600 oro ẹdude ẹkpere ọfis n̄kọk itieutom ẹma ẹn̄wam ke utom ubọpn̄kpọ ke mme utịturua. Kpukpru mmọ ẹkenam utom ke edu unyịmesịt ẹnyụn̄ ẹda usọ mmọ ẹnam n̄kpọ ye unana ediyom udori. Mmọ ẹkeda edinam n̄kpọ nnọ Jehovah ke usụn̄ emi nte akwa ifet. Ke ofụri ini utom ubọpn̄kpọ emi, mmọ ẹma ẹkere ẹban̄a mme ikọ eke odudu spirit emi ẹdude ke Psalm 127:1: “Ke mîbọhọke Jehovah ọbọp ufọk, mmọ eke ẹbọpde ẹkpa utom ikpîkpu ke esịt.”
Mme N̄kpọ-Ata Oro Mmọ Ẹsobode
Nso idi mme n̄kpọ-ata oro mme anamutom unyịmesịt ofụri ererimbot ẹsisobode ke adan̄aemi mmọ ẹnamde utom ke esenidụt? Emi edi ndusụk n̄kpọ oro mmọ ẹsobode. Curtis ye Sally, n̄wan ye ebe ẹtode United States, ẹn̄wam ke utom ubọpn̄kpọ ke Germany, India, Mexico, Paraguay, Romania, Russia, Senegal, ye Zambia. Curtis ọdọhọ ete: “Akpa n̄kpọ-ata ekedi ndikpọn̄ eyen nnyịn an̄wan, oro akanamde utom nte asiakusụn̄ [asan̄autom uyọhọ ini], ndinyụn̄ n̄kpọn̄ esop obio nnyịn ke Minnesota. Ami ye n̄wan mi ima ibuana ye esop oro ke isua 24, ndien ima inen̄ede ikop inem ndidu do.”
Sally ọdọhọ ete: “Edi ọkpọsọn̄ n̄kpọ ndidụn̄ ke mme idaha oro afo mûmeheke, ekeme ndinen̄ede nsọn̄ ye n̄wan akan erenowo, edi mma n̄kpep nte ke mmekeme ndinam ukpụhọde. Mma n̄kam n̄kpep ndidụn̄ ke ebiet emi n̄ken̄ ẹyọhọde!” Enye adian do ete: “Ke idụt kiet, nnyịn mme anamutom unyịmesịt duop ima idụn̄ ke ubet kiet emi mîkenyeneke itie utem udia edi enyenede itie uyere mmọn̄ iba kpọt. Do mma n̄kpep ndinen̄ede nnyene ime.”
Ndikpep obufa usem edi n̄kpọ-ata efen oro oyomde ukeme ye nsụhọdeidem. Sharon, oro anamde utom ubọpn̄kpọ ye ebe esie ke nsio nsio idụt, ọdọhọ ete: “Edi n̄kpọ-ata edieke afo mûfiọkke usem idụt oro afo anamde utom. Ke ntọn̄ọ ntọn̄ọ, edi ọkpọsọn̄ n̄kpọ ndisan̄a n̄kpere nditọete fo eke spirit ke ini afo mûkemeke nditịn̄ ikọ ye mmọ ifụre ifụre. Oro esinam esịt ọdiọk owo. Edi nditọete oro nnyịn isobode ke utom esenidụt ẹnen̄ede ẹnyene ime ye nnyịn ẹnyụn̄ ẹnen̄ede ẹkere ẹban̄a nsọn̄idem nnyịn. Ikebịghike, nnyịn ima itọn̄ọ ndinyene nneme.”
Ndibuana ke Utom An̄wautom Oyom Uko
Ke adan̄aemi mme utọ anamutom unyịmesịt emi ẹwade idem man ẹtịp ekese ẹsịn ke n̄kọri utom ubọpn̄kpọ emi, mmọ ẹfiọk nte ke akpa ye akakan utom mmimọ edi ndikwọrọ eti mbụk Obio Ubọn̄ Abasi. Ke ntre, mmọ ẹnọ ibetedem ọyọhọ ọyọhọ ke utom ukwọrọikọ emi mme esop oro mmọ ẹbuanade ẹnamde. Åke ye Ing-Mari, n̄wan ye ebe oro ẹken̄wamde ke utom ubọpn̄kpọ ke Guadeloupe, Malawi, Mexico, ye Nigeria, ẹnyịme nte ke ndisem usem efen ke ini abuanade ke an̄wautom ke esenidụt oyom uko.
Ing-Mari obụk ete: “Ke ntọn̄ọ ntọn̄ọ, nnyịn ikenen̄ekede ibuana, sia ikesisan̄ade ye Mme Ntiense n̄kann̄kụk, nnyịn ima isiyak mmọ ẹkwọrọ ikọ ke ntak emi ikesikopde bụt. Nte ededi, usen kiet nnyịn ima ibiere ndiwọrọ an̄wautom ke idem nnyịn. Ima iwọrọ an̄wautom okposụkedi ikokopde nyekidem. Nnyịn ima isobo ye n̄wan oro akakpan̄de utọn̄ ọnọ nneme oro n̄ketịmde. Mma n̄kot itie N̄wed Abasi kiet nnyụn̄ nnịm mme n̄wed. Ekem n̄wan oro ama ọdọhọ ete: ‘Mbọk bọrọ mbụme emi ise. Ami mmenyene iman oro ekpepde Bible ye Mme Ntiense Jehovah. Didie ke ami n̄ko n̄keme nditọn̄ọ ukpepn̄kpọ?’ N̄kekemeke ndisioro uyo. Ekem mma n̄kere se n̄kpetịn̄de nnyụn̄ ntọn̄ọ ukpepn̄kpọ Bible ye enye.”
Ing-Mari adian do ete: “Kere ban̄a idatesịt ye esịtekọm oro n̄kowụtde nnọ Jehovah ke ndidiọn̄ se ikọtọn̄ọde ye udọn̄ oro inyenede ndibuana akpanikọ emi.” N̄wan emi ama anam eti n̄kọri onyụn̄ ana baptism nte Ntiense ke mbono district ke Mexico City. Åke ye Ing-Mari ẹtịn̄ ibio ibio ẹban̄a utom an̄wautom mmọ ke usụn̄ emi ẹte: “Nnyịn inen̄ede ida nsio nsio utom ubọpn̄kpọ nnyịn ke akpan n̄kpọ, edi inyeneke se ikande idatesịt ye uyụhọ eke edin̄wam owo okụt akpanikọ.”
Edu N̄waidem
Ke akpanikọ, mme anamutom unyịmesịt oro ẹkpọn̄de ubon ye mme ufan mmọ ẹnam n̄waidem man ẹnam n̄kpọ ẹnọ nditọete mmọ ke isenidụt, edi mmọ n̄ko ẹnyene anana-mbiet idatesịt. Nso ke mmọ ẹdi?
Howard, oro akanamde utom ye n̄wan esie, Pamela, ke Angola, Colombia, Ecuador, El Salvador, Guyana, Mexico, ye Puerto Rico anam an̄wan̄a ete: “Edi san̄asan̄a ifet ndisobo ye nditọete ke nsio nsio idụt ndinyụn̄ n̄kụt ata mbọbọ ima oro odude ye otu nditọete ofụri ererimbot nnyịn. Nnyịn imesiwak ndikot mban̄a emi, edi ke ini afo odụn̄de onyụn̄ anamde utom ye mbon en̄wen oro ẹtode nsio nsio obio ye idaha ke uwem, afo eyenen̄ede ama ọsọn̄urua itie nditọete nnyịn.”
Gary, oro an̄wamde ke utom ubọpn̄kpọ ke Colombia, Costa Rica, Ecuador, Mexico, ye Zambia, ọdọhọ n̄ko nte ke ndutịm emi enyene ufọn ọnọ imọ akamba akamba. Enye ọdọhọ ete: “Ukpep oro n̄kọbọde ke ediwak isua oro ẹkebede ke ndibuana ye nditọete oro ẹkọride ẹsịm ọyọhọ idaha oro ẹnamde utom ke mme n̄kọk itieutom ke mme idụt oro ẹkenọde mi n̄kanam utom an̄wam nditịm mi idem mben̄e mme n̄kpọ-ata oro utom mi akamade. Enye enen̄ede ọsọn̄ọ mbuọtidem koro enye ọnọ mi ifet ndikụt edidianakiet oro ẹdade ẹdiọn̄ọ esop Jehovah eke ofụri ererimbot—edidianakiet oro akande asari ke nsio nsio usem, orụk, ye obio.”
Kan̄a ke emi, ẹma ẹkụre utom ubọpn̄kpọ ke Mexico, ndien ẹma ẹyak n̄kọk itieutom oro ẹketatde ẹnọ isua emi. Ima oro ẹnyenede ẹnọ Abasi ama onụk mme asan̄autom ofụri ererimbot ye mme anamutom unyịmesịt ofụri ererimbot ndinen̄ede ntịp nsịn ke nditat utuakibuot akpanikọ ke Mexico ye mme itie en̄wen. Mme Ntiense Jehovah ke ofụri ererimbot ẹnen̄ede ẹwụt esịtekọm ẹban̄a edu unyịmesịt ye n̄waidem mmọ ke ndinam n̄kpọ nnọ nditọete Christian mmọ ke ofụri ererimbot.
[Ndise ke page 25]
Ecuador
[Ndise ke page 25]
Colombia
[Ndise ke page 25]
Angola
[Ndise ke page 26]
Ekpri in̄wan̄ ke n̄kọk itieutom
[Ndise ke page 26]
Utom ọtọn̄ọ ke mbufa ufọk ke n̄kọk itieutom Mexico
[Ndise ke page 26]
Ke idak: Ndusụk mme andibuana ke Itieutom Ubọpn̄kpọ ke iso obufa ufọk
[Ndise ke page 27]
Mme anamutom unyịmesịt ẹkop idatesịt ndin̄wam ke utom ukwọrọikọ ye esop n̄kann̄kụk