Enye Ama Abuana Se Enye Enịmde ke Akpanikọ ye Mme Nsan̄a Ubet Ukpepn̄kpọ Esie

NDI afo akpama ndin̄wam mme nsan̄a ubet ukpepn̄kpọ fo ẹnen̄ede ẹfiọk mme edinịm ke akpanikọ fo oro ẹkọn̄ọde ke Bible? Magdalena, emi edide isua 18 onyụn̄ edide eyen ufọkn̄wed sekọndri ke Poland, esiwak ndisian mme nsan̄a ubet ukpepn̄kpọ esie se enye nte kiet ke otu Mme Ntiense Jehovah enịmde ke akpanikọ. Nte utịp, ẹsiwak ndibụp enye mme utọ mbụme nte, ‘Nso ke ọwọrọ ndidi kiet ke otu Mme Ntiense Jehovah?’ ye ‘Ndi ọwọrọ ke mbufo inịmke Jesus Christ ke akpanikọ?’ Didie ke enye ekekeme ndin̄wam mme nsan̄a ubet ukpepn̄kpọ esie? Magdalena ama ọbọn̄ akam ọnọ Jehovah oyom ndausụn̄ onyụn̄ anam n̄kpọ ke n̄kemuyo ye akam esie.—James 1:5.

Usen kiet, Magdalena ama obụp andikpep kiet emi amade se enye enịmde ke akpanikọ m̀mê imọ imekeme ndiwụt mme nsan̄a ubet ukpepn̄kpọ imọ vidio oro Jehovah’s Witnesses—The Organization Behind the Name.a Andikpep oro ama enyịme. Ndien Magdalena ama asian mme nsan̄a ubet ukpepn̄kpọ esie ete: “Mmodiomi edinam hour kiet ye ubak nnọ mbufo, ndien ufan mi edise aban̄a edinam emi. Edinam emi eyesịne edise vidio ye nneme aban̄ade Mme Ntiense Jehovah. Ndi mbufo ẹyema ndidụk?” Kpukpru mmọ ẹma ẹnyịme. Magdalena ye Wojciech, ọkwọrọ eti mbụk uyọhọ ini emi enyenede mbufiọk, ẹma ẹtọn̄ọ nditịm idem nnọ edinam oro.

Mmọ ẹkeduak nditọn̄ọ edinam emi ye utịn̄ikọ a-minit 20 ọkọn̄ọde ke ediye uduot ekpri n̄wed oro Mme Ntiense Jehovah—Mmanie ke Mmọ Ẹdi? Nso ke Mmọ Ẹnịm ke Akpanikọ?b ndien ke oro ebede, nneme mbụme ye ibọrọ ekenyene nditiene. Ekem, ẹkenyene ndiwụt vidio oro ke itie ubon n̄wed ufọkn̄wed. Kpukpru nsan̄a ubet ukpepn̄kpọ esie ẹkenyene ndibọ enọ—akamba efọkn̄wed oro ẹdọn̄de ndiye uduot n̄kpri n̄wed ifan̄, n̄wed oro Mme Mbụme N̄kparawa Owo Ẹbụpde—Mme Ibọrọ Ẹnyenede Ufọn,c ye ndusụk tract ye mme magazine.

Ke usen edinam oro, mme andidụk ẹma esịne nsan̄a ubet ukpepn̄kpọ 14, andikpep oro ọkọnọde Magdalena unyịme ndidiomi edinam emi, ye nditọ ufọkn̄wed inan̄ emi ẹkedude ke itie ubon n̄wed. Wojciech ama ebem iso anam an̄wan̄a nte ke ediwak mme ewet uto ye mme ewet n̄wed ẹtode Poland ẹma ẹsịn enyịn̄ Abasi, kpa Jehovah, ke mme n̄wed mmọ. Enye ama asiak n̄ko ndusụk n̄kani katkisịm Catholic oro enyịn̄ Abasi esịnede. Ke ini enye eketịn̄de n̄kpọ aban̄a utom Mme Ntiense Jehovah eyomfịn, enye ama owụt ndiye uduot n̄kpri n̄wed oro ẹdọn̄ọde ndise nsio nsio ọfis n̄kọk itieutom ye ediwak Ufọk Mbono.

Inem inem nneme ama etiene. Magdalena ye Wojciech ẹma ẹda Bible ẹbọrọ mme mbụme. Emi ama otụk mbon oro ẹkekpan̄de utọn̄ ẹnọ mmọ onyụn̄ anam mmọ ẹnịm ke Mme Ntiense Jehovah isikwọrọke ekikere idemmọ. Nso idi ndusụk mbụme oro ẹkebụpde, ndien didie ke ẹkebọrọ mmọ?

Mbụme: Bible ọyọhọ ye mme ikọ oro mîn̄wan̄ake owo ye mme n̄ke, emi ẹkemede ndikabade ke nsio nsio usụn̄. Didie ke ẹkeme ndidu uwem ke n̄kemuyo ye se Bible etịn̄de?

Ibọrọ: Ndusụk owo ẹdọhọ ke Bible etie nte ndido urụk emi afo ekemede ndibre ikwọ eke amama. Edi kere ise: Edieke afo oyomde ndifiọk se ikọ ewet n̄wed ọwọrọde, ndi ikpetịmke ifọn ndibụp enye? Sia mîbietke mme ewet n̄wed oro ẹma ẹkekpan̄a, Andiwet Bible, kpa Jehovah Abasi, edi odu-uwem Abasi. (Rome 1:20; 1 Corinth 8:5, 6) Udọn̄ikọ itie N̄wed Abasi ekeme ndinam ẹdiọn̄ọ se itie N̄wed Abasi enen̄erede ọwọrọ. Adianade do, Bible esiwak nditịn̄ mban̄a ukem n̄kpọ ke ediwak itie Bible efen, ntre ndimen mmọ ndomo ayan̄wam. Ntem, nnyịn imekeme ndiyak Abasi ada ekikere nnyịn usụn̄, nte n̄kpọ eke enye ke idemesie anamde itie N̄wed Abasi an̄wan̄a nnyịn. Ke ndinam ntre, nte nnyịn ikemeke ndidi ndifiọk nnyụn̄ ndu uwem ekekem ye uduak esie oro ẹyararede ke Bible?

Mbụme: Nso ukpụhọde idu ke ufọt mme Christian ye Mme Ntiense Jehovah?

Ibọrọ: Nnyịn idi mme Christian! Edi utu ke ndidọdọhọ kpọt ke idi mme Christian, Mme Ntiense Jehovah ẹdomo ndidu uwem ekekem ye se mmọ ẹnịmde ke akpanikọ ye se Abasi ekpepde mmọ ke ntak udori mmọ. (Isaiah 48:17, 18) Sia kpukpru ukpepn̄kpọ mmọ ẹkọn̄ọde ke Bible, mmọ ẹfiọk ke mmimọ inyene akpanikọ.—Matthew 7:13, 14, 21-23.

Mbụme: Ntak emi mbufo ẹsikade ẹbịne isenowo ẹnyụn̄ ẹsọn̄ọde ẹyịre ndinyene nneme ye mmọ? Nte oro idịghe edinyenyịk mbon en̄wen ẹnịm se mbufo ẹnịmde ke akpanikọ?

Ibọrọ: Ndi afo ekere ke ọdiọk owo ke efak nditịn̄ ikọ ye afo ukpono ukpono ndien ekem obụp fi mbụme man ọfiọk ekikere fo? (Jeremiah 5:1; Zephaniah 2:2, 3) (Ekem Wojciech ye Magdalena ẹma ẹnam ẹwụt nte mmọ ẹkebụpde owo ke efak m̀mê Abasi ekere aban̄a mbon unọmọ ukwọ ndondo emi ke Poland.) Ke owo oro ama ọkọnọ ekikere esie, nnyịn ima idụri ntịn̄enyịn esie ika Bible. Edieke owo mîmaha nneme nnyịn, nnyịn imesikọm enye inyụn̄ ika ibịne owo en̄wen. (Matthew 10:11-14) Ndi oro edi ndinyenyịk mme owo ẹneme nneme ye nnyịn? Ndi ọwọrọ ke ikpanaha mme owo ẹneme nneme aba?

Mbụme: Ntak emi mbufo mîsinịmke mme usọrọ usen nduọkodudu?

Ibọrọ: Nnyịn isinịm sụk usọrọ oro Bible owụkde nnyịn ete inịm—usọrọ Editi n̄kpa Jesus Christ. (1 Corinth 11:23-26) Kaban̄a mme usen nduọkodudu, mbufo ẹmekeme ndidụn̄ọde mme n̄wed ofụri orụk ifiọk ye mme n̄wed eken oro ẹkemede ndiberi edem man ẹfiọk nte mmọ ẹketọn̄ọde. Edieke mbufo ẹnamde ntre, eyenen̄ede emem mbufo utom ndikụt ntak emi nnyịn mîsinịmke mme utọ usọrọ usen nduọkodudu oro.—2 Corinth 6:14-18.

Ẹma ẹbụp ekese mbụme efen ẹnyụn̄ ẹbọrọ mmọ. Nneme emi ama ada ini tutu ẹkenyene ndisịk edise vidio nnịm usen en̄wen.

Didie ke nditọ ufọkn̄wed oro ẹkenam n̄kpọ? Yak Magdalena asian nnyịn: “Idem ama akpa mi ndikụt nte ndusụk nditọ ufọkn̄wed oro ẹsinamde n̄kpọ nditen̄ nditen̄ ẹnyụn̄ ẹdade mbon en̄wen ẹnam nsahi, ẹbụpde nti mbụme. Okposụkedi mmọ ẹkedọhọde ke mmimọ inịmke ke Abasi odu, ke ini nneme oro mmọ ẹma ẹwụt ke imọbuọt idem ke Abasi!” Mbon oro ẹkedụkde edinam emi ẹma ẹkop inemesịt ndibọ mme enọ—n̄wed 35, ndiye uduot n̄kpri n̄wed 63, ye magazine 34.

Nso n̄wọrọnda utịp ke ẹkenyene ntem ẹto nneme oro ẹkenyenede ke ufọkn̄wed! Nneme emi ama an̄wam mme nsan̄a ubet ukpepn̄kpọ Magdalena ndinen̄ede mfiọk Mme Ntiense Jehovah onyụn̄ esịn udọn̄ n̄ko ọnọ ediwak n̄kparawa owo ndikere mban̄a uduak uwem. Ntak mûdomoke ndin̄wam mme nsan̄a ubet ukpepn̄kpọ fo ẹfiọk ekese ẹban̄a se afo enịmde ke akpanikọ?

[Ikọ idakisọn̄]

[Ndise ke page 31]

Magdalena ye Wojciech ke ẹtịm idem ẹnọ nneme oro