Ndi Ukara Owo Ekeme Nditre Ubuene?
EDIWAK miliọn owo ẹkọri ẹkponi edi akanam idịghe ubuene. Akanam mmọ inaha biọn̄ m̀mê ndikop tuep ke ini ẹdede idap ke ntak mînyeneke ọfọn̄ ndifụhọ. Kpa ye oro, ediwak mmọ ẹsikop mbọm ẹban̄a mme ubuene, ẹsinyụn̄ ẹsịn ọkpọsọn̄ ukeme ndin̄wam mmọ.
Nte ededi, mbon oro ekọn̄ mbio obio, ukwọ, unana edịm, ye mme mfịna eken ẹnọmọde ẹsinen̄ede ẹbuene. Mme n̄kpọ emi ẹsida ekese afanikọn̄ ẹsọk mme ọtọin̄wan̄ ke Africa, emi ẹsitọde in̄wan̄ man ẹkam ẹnyene se ẹdade edu uwem kpọt. Emi anam ndusụk owo ẹkpọn̄ obio emana mmọ ẹka ikpọ obio, m̀mê ẹwọrọ ẹkedụn̄ ke obio en̄wen nte mbon itọkekọn̄. Mbon oro ẹdụn̄de ke obio-in̄wan̄ ẹwọrọ ẹka ikpọ obio sia ẹdọhọde mmọ ke uwem akam ọfọn do akan.
Ubuene esinen̄ede okpon ke ikpọ obio oro mme owo ẹwakde ẹkaha. Isọn̄ isidụhe ikem nditọ in̄wan̄, edieke edide esikam ododu. Esinen̄ede ọsọn̄ ndinyene utom. Nnanenyịn esinam ediwak owo ẹdu uwem ubiatibet. Mme andidụn̄ ikpọ obio ẹseme ẹyom un̄wam, edi ukara owo ikemeke ndikọk mfịna ubuene oro akade-ka iso ndikọri. N̄wedmbụk n̄kpọntịbe oro The Independent eke London ama etịn̄ aban̄a ntọt oro Edidiana Mme Idụt ekemịn̄de ke November 2003 ete: “Mbon oro ẹtiede biọn̄ ẹtetịm ẹwak ke ererimbot.” N̄wedmbụk oro ama adian do ete: “Ke ofụri ererimbot mfịn, n̄kpọ nte miliọn owo 842 isidiaha eti udia—ibat oro ke aka iso ndikọri, ndien miliọn owo 5 efen efen ẹsitie biọn̄ kpukpru isua.”
Ọfis n̄kọk itieutom Mme Ntiense Jehovah ke South Africa esibọ leta ndusụk ini oto mme ọkpọikpọi ubuene. Ke uwụtn̄kpọ, eren kiet otode Bloemfontein ekewet ete: “Ami nnyeneke utom, ntre mmesiyịp n̄kpọ ini ekededi oro ufan̄ odude. Edieke mmenyịpke n̄kpọ, nnyịn imesitie biọn̄ ediwak usen—ntịn̄ke-ntịn̄ mban̄a ọkpọsọn̄ etuep oro esinamde nnyịn. Utom idụhe. Ediwak owo ke ẹsan̄a ẹyom utom ye se ẹdiade. Mmesikụt mme owo ẹkade itie uduọn̄ọ mbio ẹkeyom udia. Ndusụk owo ẹwot idem. Ediwak owo ẹsikop mfụhọ ẹnyụn̄ ẹnana idotenyịn ukem nte ami. Etie nte idotenyịn ndomokiet idụhe inọ ini iso. Ndi Abasi oro okobotde nnyịn ye udọn̄ ndidia udia nnyụn̄ nsịne ọfọn̄ ikwe se itịbede emi?”
Ẹnyene mme ibọrọ oro ẹdidọn̄de eren emi esịt. Nte ibuotikọ oro etienede ediwụtde, ẹkụt mme ibọrọ emi ke Ikọ Abasi, kpa Bible.