Mmọ Ẹdat Esịt Ndinam Uduak Abasi
JESUS ama enịm uwụtn̄kpọ ọnọ kpukpru mme Christian ke ndibọn̄ akam nnọ Ete esie ete: “[Yak] okûdi ke uduak mi, edi yak uduak fo ada itie.” (Luke 22:42) Ata ediwak mme asan̄autom Abasi ẹtiene ẹtịn̄ ikọ emi owụtde ke imosụhọde idem mi inyụn̄ isụk ibuot inọ Jehovah. Nditọ ufọkn̄wed 52 eke ọyọhọ otu 120 eke Ufọkn̄wed Enyọn̄-Ukpeme Ukpep Bible eke Gilead, esịne ke otu oro. Ke March 11, 2006, mme andikụre ukpep emi ẹma ẹkop inemesịt sia ẹdoride enyịn ndinam uduak Abasi ke nsio nsio idụt, idem kpa ye n̄kpọsọn̄ idaha.
Nso inam mme andikụre ukpep emi ẹyak uduak Jehovah ada mmọ usụn̄? Chris ye Leslie, n̄wan ye ebe oro ẹnọde ẹkenam utom isụn̄utom ke Bolivia, ẹtịn̄ ntak emi mmọ ẹnamde emi ẹte: “Sia ima ikakan̄ idem nnyịn, nnyịn iyom esop Jehovah ada nnyịn anam se ededi oro enye oyomde.” (Mark 8:34) Jason ye Chere, emi ẹnọde ẹka Albania, ẹdọhọ kpasụk ntre ẹte: “Nnyịn imesisobo n̄kpọ-ata ke kpukpru utom oro esop Jehovah ọnọde nnyịn. Nte ededi, nnyịn imokụt ke odot ibuọt idem ye Jehovah ofụri ofụri.”
Ẹsịn Udọn̄ Ẹnọ Mmọ Ndinam Uduak Jehovah
George Smith, owo ubon Bethel emi anamde utom ke Itieutom Uwet Ndise, ekeberede edinam ukụre ukpep oro ke akam. Stephen Lett, owo Otu Ukara Mme Ntiense Jehovah emi ekedide etieibuot okpokoro edinam oro ama ọkọm kpukpru owo ete ẹmedi-o. Isenowo oro ẹketode idụt 23 ẹkeka Itie Unọ Ukpep Enyọn̄-Ukpeme ke Patterson ke New York, man ẹkedụk inem inem edinam oro. Brọda Lett ama ọdọhọ mme andikụre ukpep oro ke mmọ ẹyenam “n̄kpọ emi enen̄erede okop odudu.” Enye ama anam mbufa isụn̄utom emi ẹfiọk “mme n̄kpọ eke ẹsọn̄ọde ẹdọn̄ n̄kam”—utọ nte mme nsunsu ukpepn̄kpọ—emi mmọ ẹdidade odudu N̄wed Abasi ẹwụri. (2 Corinth 10:4, 5) Enye ama ada ikọ esie ekeberi ete: “Nso idatesịt ke emi edinọ mbufo ntem Jehovah ndida mbufo n̄wụri mme n̄kpọ eke ẹsọn̄ọde ẹdọn̄ n̄kam ke esịt mbon oro ẹyomde ndifiọk akpanikọ ke efakutom mbufo!”
Harold Jackson, emi anamde utom ke ibuot itieutom Mme Ntiense Jehovah, ọkọnọ utịn̄ikọ ke ibuotikọ oro ọdọhọde ete: “N̄kpọ Ifan̄ Nditi.” Enye ama ọdọhọ mbufa isụn̄utom oro ete ẹkûdedei ẹfre ‘ndibem iso nyom obio ubọn̄ ye edinen ido Abasi.’ (Matthew 6:33) Mmọ ẹnyene nditi ke “ima ọbọbọp” onyụn̄ anam owo okụt unen. (1 Corinth 8:1) Enye ọkọdọhọ ete: “Ẹyak ima ada mbufo usụn̄ ke nte ẹnamde n̄kpọ ye mbon en̄wen.”
Ekem, Geoffrey Jackson, owo Otu Ukara emi ama akanam utom isụn̄utom ọtọn̄ọde ke 1979 tutu esịm 2003, ama obụp mme andikụre ukpep oro ete, “Ndi Edi Mbiomo Fo?” Enye ama ọsọn̄ọ owụt ntak ọfọnde owo ndinyene ekikere oro adade ukem ukem mban̄a idemesie ye utom ukwọrọikọ. Mme Christian ẹnyene ndisịn ifịk ntọ nnyụn̄ nda mmọn̄ mbọk n̄kpasịp akpanikọ. Nte ededi, edi mbiomo Jehovah “ndinam enye ọkọri” ke n̄kan̄ eke spirit. (1 Corinth 3:6-9) Brọda Jackson ama adian do ete: “Jehovah ada ke edi mbiomo mbufo ndisọn̄ idem ke n̄kan̄ eke spirit. Edi nso idi akakan mbiomo mbufo? Edi ndima Jehovah ye mme owo oro mbufo ẹkade ndin̄wam.”
Lawrence Bowen, andikpep ke Gilead ama etịn̄ ikọ ke ibuotikọ emi: “Fiọk nte Odude Uwem.” Enye ama eti nditọ ufọkn̄wed ke Jehovah akada utịbe utịbe usụn̄ ọnọ nditọ Israel ndausụn̄ ye ukpeme ke wilderness. (Exodus 13:21, 22) Esop Christian oro ẹyetde aran, emi edide “adaha ye isọn̄ akpanikọ,” edi usụn̄ kiet oro enye adade ọnọ nnyịn ndausụn̄ ye ukpeme mfịn. (1 Timothy 3:14, 15) Mbufa isụn̄utom emi ẹnyene ndisọn̄ọ nda nnọ akpanikọ Bible, emi ọnọde mbon nsụhọdeidem ndausụn̄ ye ukpeme.
Wallace Liverance emi edide andikpep n̄ko ke Gilead, ama ọdọhọ mme andikụre ukpep oro ẹkûfre ikọ Abasi oro odude ke “edem” mmọ. Ikọ Abasi odu ke edem sia ebịghi ẹkewet Bible. Ukem nte ekpemerọn̄ esidade ke edem etịn̄ ikọ ye otuerọn̄, Jehovah odu ke edem ikọt esie, onyụn̄ ada “ofụn emi anamde akpanikọ onyụn̄ enyenede ọniọn̄” ọnọ mmọ ndausụn̄. (Isaiah 30:21; Matthew 24:45-47) Ufọkn̄wed Gilead ama an̄wam mme andikụre ukpep oro ẹnen̄ede ẹwụt esịtekọm ẹnọ otu ofụn oro. Ofụn oro akam ọnọ nnyịn New World Translation of the Holy Scriptures. Etịn̄ikọ oro ama esịn udọn̄ ọnọ mme andikụre ukpep oro ete: “Da ọsọn̄urua n̄kpọuto emi kpep mbon en̄wen n̄kpọ.”—Matthew 13:52.
Ndinam Uduak Jehovah ke An̄wautom
Ke ikpehe edinam oro ibuotikọ ekedide “Ọkpọsọn̄ Udọn̄ Nditan̄a Eti Mbụk,” Mark Noumair emi edide andikpep ke Gilead ama obụk ndusụk ifiọkutom oro mme andikụre ukpep oro ẹkenyenede ke an̄wautom ke adan̄aemi ẹkebọde ukpep ke Ufọkn̄wed Gilead. (Rome 1:15) Mme ndụn̄ọde oro ẹkenamde ye mme andikụre ukpep oro ẹma ẹwụt ke mmọ ke akpanikọ ẹma ẹnyene ọkpọsọn̄ udọn̄ ndida kpukpru ifet n̄kwọrọ ikọ.
Mme andikụre ukpep oro ẹma ẹbọ nsịnudọn̄ efen efen ẹto ndụn̄ọde oro Kenneth Flodin akanamde ye mme esenyịn ita oro ẹsan̄ade-san̄a ke United States. Richard Keller ye Alejandro Lacayo, emi ẹkenamde utom ke Edem Usụk ye Ufọt Ufọt America, ẹma ẹtịn̄ nte mmimọ ikọyọde nsio nsio idomo ẹnyụn̄ ẹtịn̄ ndusụk edidiọn̄ oro mmọ ẹkenyenede ke ini ẹkenamde utom isụn̄utom. Moacir Felisbino ama etịn̄ nti ukpep oro enye ọkọbọde ke ndinam utom ọtọkiet ye mme isụn̄utom oro ẹdude ke Brazil, emi ẹkebọkde enye.
David Schafer ama anam ndụn̄ọde ye Robert Jones, Woodworth Mills, ye Christopher Slay, kpa isụn̄utom ita oro ẹma ẹkenam utom emi ẹbịghi. Nditọete ita emi ẹma ẹbụk nte mmimọ ikekpepde ndinyene mbuọtidem ke Jehovah ke ini n̄kpọ ọkọsọn̄de ye mmimọ. Mmọ ẹma ẹnam nditọ ufọkn̄wed oro ẹfiọk ke ukpep oro mmimọ ikọbọde ke esop Jehovah ekenen̄ede eben̄e mmimọ idem ọnọ utom isụn̄utom mmimọ. Brọda Mills ama etịn̄ ibio ibio ete: “Ikedịghe ifiọk oro n̄kọkọde ke Gilead ekenen̄ede an̄wam mi nte nsụhọdeidem ye ima oro ufọkn̄wed oro ekekpepde mi.”
Guy Pierce emi edide owo Otu Ukara ama ọnọ akpan utịn̄ikọ emi ibuotikọ ekedide: “Tutu Amama Jehovah Idikpụhu.” Adam ama okpu, edi ndi oro ọkọwọrọ ke Abasi ama okpu? Ndi Abasi okobot Adam nte anana-mfọnmma owo, nte ndusụk owo ẹdọhọde? Baba-o, koro “Abasi ama anam owo [edi] edinen.” (Ecclesiastes 7:29) Etịn̄ikọ ama ọdọhọ ke Jesus ndikọsọn̄ọ nda nyọ akakan idomo ke isọn̄ ama owụt ke “Adam ikenyeneke ntak ndomokiet ndikpu.” Idomo n̄kopuyo oro Adam okosobode ke In̄wan̄ Eden ikokponke nte idomo oro Jesus akakande uforo uforo. Kpa ye oro, Adam ama okpu. Edi, tutu amama Jehovah idikpụhu. Uduak esie oyokụt unen. (Isaiah 55:11) Brọda Pierce ama ọdọhọ mbufa isụn̄utom oro ete: “Mbufo ẹmenyene ifet ndida edu n̄waidem mbufo n̄kpono Jehovah. Jehovah akpakam odu ye mbufo owo kiet kiet ke ebiet ekededi oro ẹnamde utom isụn̄utom.”
Ke Brọda Lett, emi ekedide etieibuot okpokoro, ama okokot etop ekọm oro okotode nsio nsio n̄kọk itieutom Mme Ntiense Jehovah, enye ama ọnọ mme andikụre ukpep oro n̄wed itoro ye efakutom mmọ. Vernon Wisegarver emi ama akanam utom ebịghi ke Bethel, ọkọbọn̄ akam ediberi.
Owo 6,872 emi ẹkedụkde edinam oro ẹkedọhọ ke ndutịm oro ama anam mmimọ ifiak inyene ifịk ndinam se Abasi amade. (Psalm 40:8) Andrew ye Anna oro ẹkụrede ukpep mi ẹdọhọ ẹte: “Nnyịn ima iyak uwem nnyịn inọ Jehovah. Ima in̄wọn̄ọ inọ Jehovah ke iyanam n̄kpọ ekededi oro enye ọdọhọde inam. Ndien Jehovah ọdọhọ ika Cameroon ke Africa.” Enen̄ede ọdọn̄ mmọ ye mme andikụre ukpep eken nditọn̄ọ utom oro edinọde mmọ inemesịt ye uyụhọ. Ih, mmọ ẹdat esịt ndinam uduak Abasi.
[Ekebe ke page 17]
IDAHA OTU
Ibat idụt ẹtode: 6
Ibat idụt ẹnọde ẹka: 20
Ibat nditọ ufọkn̄wed: 52
Isua emana ke ẹbaharede ukem ukem: 35.7
Isua ẹdude ke akpanikọ ke ẹbaharede ukem ukem: 18.3
Isua ẹdude ke utom uyọhọ ini ke ẹbaharede ukem ukem: 14.5
[Ndise ke page 18]
Ọyọhọ Otu 120 Oro Ẹkụrede Ukpep ke Ufọkn̄wed Enyọn̄-Ukpeme Ukpep Bible eke Gilead
Ke udịm enyịn̄ oro ẹdude ke idak, ẹtọn̄ọ ke udịm iso ẹnọ nọmba ẹka edem, ẹnyụn̄ ẹtọn̄ọ ke ufien ẹwet enyịn̄ ẹka nnasia ke udịm kiet kiet.
(1) Wright, S.; Suárez, B.; Croisant, B.; Davenport, L. (2) Johnson, A.; Ali, C.; Cady, K.; Guerrero, P.; Ases, A. (3) Ortiz, L.; Lyall, K.; Uzeta, M.; Perez, R.; Backus, K.; Caterina, C. (4) Palmer, B.; Loving, D.; Macdonough, J.; Bostock, D.; Benetatos, L. (5) Jasicki, M.; Sarafianos, E.; Stelter, C.; Vaira, R.; Woon, J.; Prentice, K. (6) Davenport, H.; Croisant, H.; Perez, M.; Vaira, E; Suárez, A.; Caterina, I.; Wright, C. (7) Cady, K.; Macdonough, J.; Ortiz, M.; Woon, J.; Ali, J.; Ases, M. (8) Sarafianos, G.; Lyall, D.; Uzeta, C.; Stelter, P.; Prentice, G.; Johnson, A.; Benetatos, C. (9) Palmer, J.; Jasicki, W.; Backus, J.; Bostock, S.; Guerrero, J. M.; Loving, S.