Ndifiọk Nti Ido Uwem Oro Ẹbịghide ke Nsinsi

IDỤHE obio oro mînyeneke mbet ido uwem. Nte afo ukereke ke mme owo ke ofụri ererimbot ọkọrọ ye ediwak owo ke otu nnyịn ẹma utọ edu nte edinam akpanikọ, mfọnido, editua owo mbọm, ye edikere mban̄a mbon en̄wen?

Nti Ido Uwem Anie?

Ke akpa isua ikie E.N., Saul emi ekenen̄erede ọfiọk n̄wed okodu uwem ke ini oro ido uwem mme Jew, eke mbon Greece, ye mbon Rome, ẹkenen̄erede ẹsọn̄ ubọk. Kpa ye nsio nsio awak-n̄kukọhọ ido edinam ye ibet oro ẹkedude, Saul ama ọfiọk ke ubonowo ẹnyene ndammana edumbet oro etemede mmọ nte ẹkpedude uwem. Oro edi ubieresịt nnyịn. Ke Saul ama akakabade edi Christian, emi ẹkedide ẹdidiọn̄ọ nte apostle Paul, enye ama ewet ete: “Ini ekededi emi mbon idụt emi mînyeneke ibet ẹnamde se ibet etemede ke ndammana usụn̄, mmọ emi, okposụkedi mînyeneke ibet, ẹdi ibet ẹnọ idemmọ. Mmọ ke idemmọ ẹwụt se idude ke ibet emi ẹwetde ke esịt mmọ, ke adan̄aemi ubieresịt mmọ etienede mmọ edi ntiense.”—Rome 2:14, 15.

Nte ededi, ndi “se ibet etemede ke ndammana usụn̄” kpọt ekeme ndinọ nnyịn ndausụn̄ ke ini iyomde ndibiere se idide eti ye idiọk? Anaedi omokụt ke ubonowo ẹwak ndikpu ke se mmọ ẹnamde. Emi anam ediwak owo ẹnịm ke imoyom ndausụn̄ oro okon̄de akan eke owo man ikeme ndinyene ata eti edumbet oro ikpadade idu uwem. Ediwak owo ẹfiọk ke Andibot edi n̄kukụre owo oro ekemede ndinọ edumbet oro ebịghide ke nsinsi. Dr. Carl Jung ekewet ke n̄wed esie oro, The Undiscovered Self, ete: “Owo ekededi oro mîdaha Abasi idian idem ikemeke ndikan idomo ido uwem ererimbot emi.”

Ikọ ọbọn̄ emi ekekem ye se prọfet kiet ke eset ekewetde ete: “Usụn̄ owo idụhe owo ke ubọk: owo eke asan̄ade inyụn̄ ikemeke ndinen̄ede ikpat esiemmọ.” (Jeremiah 10:23) Andibot nnyịn ọdọhọ ete: “[N̄kpep] fi usụn̄ udori, nda fi usụn̄ eke afo edisan̄ade.”—Isaiah 48:17.

N̄wed Oro Ọdọn̄ọde Nti Ido Uwem Oro Ẹkemede Ndiberi Edem

Ikọ oro isụk ikotde ikụre mi odu ke n̄wed oro ẹsuande ẹkan, emi ọdọn̄ọde nti ido uwem—oro edi, Edisana N̄wed Abasi. Ata ediwak miliọn owo ke ofụri ererimbot, idem mbon oro mîdịghe Christian, ye mbon oro mînyeneke ido ukpono ẹsikot N̄wed Abasi man ẹnyene ikike ye ọniọn̄. Johann Wolfgang von Goethe, ewetuto eyen Germany ekewet ete: “Ami mmama, nnyụn̄ n̄kpono [Bible], ekpere ndidi n̄kpep kpukpru nti ido uwem oro nnyenede nto Bible.” Ẹdọhọ ke Mohandas Gandhi, emi ekedide adaiso ido ukpono Hindu, ọkọdọhọ ete: “Kûtre ndida ukpepn̄kpọ oro odude ke Ukwọrọikọ Oro ke Obot [ndusụk ukpepn̄kpọ Jesus Christ, oro odude ke Bible] nsịn ke edinam . . . Koro se ẹkekpepde ke Obot oro enyene kpukpru nnyịn.”

Apostle Paul oro ikebemde iso ikot se enye ekewetde ama owụt nte Edisana N̄wed Abasi ekemede nditeme owo nte ẹkpedude eti uwem. Enye ekewet ete: “Abasi ọkọnọ odudu ẹda ẹwet ofụri N̄wed Abasi ndien enye ọfọn ndida nnọ ukpep.” (2 Timothy 3:16) Ndi emi enen̄ede edi akpanikọ?

Ntak mûdụn̄ọkede use ke idemfo? Se mme edumbet oro ẹwetde ke page oro etienede. Se nti ido uwem oro enye esịnde udọn̄ ọnọ nnyịn ete inyene. Tie kere nte se ẹtịn̄de emi ẹkemede ndinam uwem fo ye itie ebuana fo ye mbon en̄wen amana ọfọn.

Ndi Ayama Ndikpep Ikọ Abasi man Ọbọ Ufọn?

Se inemede emi ẹdi ibat ibat uwụtn̄kpọ nti item oro ẹdude ke Edisana N̄wed Abasi. Ke adianade ye emi, Ikọ Abasi ọdọn̄ọ ekese item oro odụride owo utọn̄ aban̄a ndiọi ekikere, ndiọi ikọ, ye mme edinam oro ẹkemede nditahade uwem nnyịn.—Mme N̄ke 6:16-19.

Ke akpanikọ, ukpepn̄kpọ Bible ọnọ se n̄kaowo mîkemeke ndinọ—oro edi, item oro anamde owo enyene ata nti edumbet. Mbon oro ẹnyịmede ẹnyụn̄ ẹdade ukpepn̄kpọ emi ẹsịn ke edinam ẹnam ata akamba ukpụhọde ke uwem mmọ. Mmọ ẹkabade ẹkere n̄kpọ ọfọn. (Ephesus 4:23, 24) Ẹnyene nti uduak. Ndikpep ido uwem oro Abasi etemede ke Bible amanam ekese owo ẹsio asari ye usua ẹfep ke esịt. (Mme Hebrew 4:12) N̄wed Abasi ye nti ido uwem oro enye esịnde udọn̄ ọnọ mme owo ẹnyene ẹnam mme owo ẹtre kpukpru orụk afai ye ibak, ẹnyụn̄ ẹkabade nti owo.

Ih, ido uwem oro Bible etemede anam ediwak miliọn owo ẹtre edu uwem oro ama akadia mmọ idem, utọ nte mme edu oro ẹtaharede uwem mbon eken. (1 Corinth 6:9-11) Ukpepn̄kpọ Bible okpụhọde uwem utọ mbon oro ofụri ofụri, okpụhọde mmọ esịt, okpụhọde ubon mmọ onyụn̄ ọnọ mmọ obufa idotenyịn. Inamke n̄kpọ m̀mê ererimbot abiara adan̄a didie, mme owo ke ofụri ererimbot ke ẹnam ukpụhọde ẹdu eti uwem. Ndien emi iditreke. “Mbiet amasat, ediye ikọn̄ onyụn̄ akpa: edi ikọ Abasi nnyịn ayada ke nsinsi.”—Isaiah 40:8.

Edi, nte afo eyekpep “ikọ Abasi nnyịn” man ọbọ ufọn? Mme Ntiense Jehovah ẹyema ndiwụt fi nte ekemede ndikpep nnyụn̄ mbọ ufọn nto nti ido uwem oro Bible etemede. Ndinyene utọ nti ido uwem oro ayanam Abasi ama nnyịn idahaemi, onyụn̄ anam idu uwem ekekem ye mme edumbet Abasi oro ẹbịghide ke nsinsi.

[Ekebe ke page 6, 7]

NSINSI EDUMBET

Mfọnmma Ibet. “Kpukpru n̄kpọ eke mbufo ẹyomde mme owo ẹnam ye mbufo, ana mbufo n̄ko ẹnam kpasụk ntre ye mmọ; ke akpanikọ, emi edi se Ibet ye ikọ mme prọfet ẹwọrọde.”—Matthew 7:12.

Ma mbọhọidụn̄ fo. “Afo enyene ndima mbọhọidụn̄ fo nte idemfo.” (Matthew 22:39) “Ima inamke mbọhọidụn̄ esie idiọkn̄kpọ; ke ntre ima edi edinịm ibet mma.”—Rome 13:10.

Kpono owo. “Ẹda ima nditọete ẹnyene esịt ima ẹnọ kiet eken. Ẹda iso ke ndinọ kiet eken ukpono.”—Rome 12:10.

Yom emem. “Ẹtie ke emem ye kiet eken.” (Mark 9:50) “Edieke usụn̄ odude, adan̄a nte mbufo ẹkekeme, ẹtie ke emem ye kpukpru owo.” (Rome 12:18) “Ẹyak nnyịn ibịne mme n̄kpọ eke ẹnamde emem odu.”—Rome 14:19.

Fen nọ owo. “Fen nọ nnyịn ke isọn eke nnyịn ikamade, kpa nte nnyịn n̄ko ifende inọ mmọ eke ẹkamade nnyịn isọn.” (Matthew 6:12) “Ẹfọn ido ye kiet eken, ẹtua owo mbọm, ẹfen kiet eken ke ofụri esịt.”—Ephesus 4:32.

Nam akpanikọ. “Nam akpanikọ nọ n̄wan fo nyụn̄ ma enye ikpọn̄-ikpọn̄. . . . Dara n̄wan fo nyụn̄ kop idatesịt ye eyenan̄wan emi afo ọdọde . . . Yak uyai esie adat fi esịt; yak enye ada ima esie oyụhọ fi. . . . Ntak emi akpamade n̄wan en̄wen? Ntak emi akpayakde n̄wan owo en̄wen eye fi akan okwo?” (Mme N̄ke 5:15-20, Today’s English Version) “Owo eke anamde akpanikọ ke ata ekpri n̄kpọ anam akpanikọ n̄ko ke akamba n̄kpọ, owo eke onyụn̄ akwan̄ade ke ata ekpri n̄kpọ akwan̄a n̄ko ke akamba n̄kpọ.” (Luke 16:10) “Se ẹyomde ẹto mme akama-ukpọhọde edi mmọ ndinam akpanikọ.”—1 Corinth 4:2. “Nte ami n̄keme ndibat owo eke enyenede idiọk balance ye ekpat itiat idomo abian̄a ke edisana?” (Micah 6:11) “Nnyịn imobụre ifiọk ite nnyịn imenyene eti ubieresịt, sia nnyịn iyomde ndidu uwem edinam akpanikọ ke kpukpru n̄kpọ.”—Mme Hebrew 13:18.

Tịn̄ akpanikọ, nyụn̄ nam se inende. “Mbufo ẹsua idiọk, ẹnyụn̄ ẹma eti, ẹnyụn̄ ẹwụk edinen ikpe ke inua-otop.” (Amos 5:15) “Ẹtịn̄ akpanikọ kiet ye kiet; ẹnyụn̄ ẹkpe ikpe akpanikọ ye emem ke inua-otop mbufo.” (Zechariah 8:16) “Ke emi mbufo ẹma ẹkeduọn̄ọ nsu, yak owo mbufo kiet kiet etịn̄ akpanikọ ọnọ mbọhọidụn̄ esie.”—Ephesus 4:25.

Sịn ifịk nyụn̄ tịn̄ enyịn nam utom. “Nte afo [omokụt] owo eke ọsọpde ubọk ke utom esie? Enye ayada ke iso mbọn̄.” (N̄ke 22:29) “Ẹkûsịn ifu ke mbubehe mbufo.” (Rome 12:11) “Se ededi eke mbufo ẹnamde, ẹnam ke ofụri ukpọn̄ nte ẹnam ẹnọ Jehovah, inamke inọ owo.”—Colossae 3:23.

Nyene ifụre ifụre ido, tua owo mbọm, nyụn̄ fọn ido. “Ẹsịne esịt ima emi asan̄ade ye mbọm, mfọnido, nsụhọdeidem, ifụre ifụre ido, ye anyanime.”—Colossae 3:12.

Da eti n̄kpọ kan idiọk ubọk. “Ẹka iso ẹma mme asua mbufo ẹnyụn̄ ẹbọn̄ akam ẹban̄a mmọ eke ẹkọbọde mbufo.” (Matthew 5:44) “Ẹkûyak idiọk akan mbufo, edi ẹka iso ẹda nti n̄kpọ ẹkan idiọk ubọk.”—Rome 12:21.

Nam n̄kpọ Abasi ke ofụri esịt. “‘Afo enyene ndima Jehovah Abasi fo ke ofụri esịt fo ye ke ofụri ukpọn̄ fo ye ke ofụri ekikere fo.’ Emi edi n̄kponn̄kan ye akpa ewụhọ.”—Matthew 22:37, 38.

[Mme ndise]

Ndida edumbet Bible ndu uwem anam ndọ nnyịn ọfọn, anam ubon nnyịn enem, onyụn̄ anam inyene nti ufan