Ntak Emi Ikpenyenede Esịtekọm-ọ?

“Edima Raquel,

Sọsọn̄ọ etieti ke ndisisịn udọn̄ nnọ mi. Okposụkedi ekemede ndidi udufiọkke, nti edu fo ye ndinem ikọ oro esitịn̄de ẹsinen̄ede ẹsịn udọn̄ ẹnọ mi.”—Jennifer.

NDI akanam owo ọnọ fi leta ekọm oro mûkodorike enyịn? Ke edide ntre, anaedi esịt ama enen̄ede enem fi. Edi ndammana n̄kpọ ndifiọk ke owo ama se afo anamde.—Matthew 25:19-23.

Edieke ọkọmde owo ke ini enye anamde n̄kpọ ọnọ fi, oro ekeme ndinam mbufo ẹdi ufan. Ke adianade do, owo oro esimade ndikọm owo ke ini ẹnamde n̄kpọ ẹnọ enye etiene uwụtn̄kpọ Jesus Christ emi ekesinyenede esịtekọm aban̄a nti n̄kpọ oro mme owo ẹkenamde.—Mark 14:3-9; Luke 21:1-4.

Edi n̄kpọ mbọm nditịn̄ nte ke mme owo mfịn ẹnen̄ede ẹnana esịtekọm. Bible ama ọdọhọ ke mme owo ‘ẹyenana esịtekọm ke mme akpatre usen.’ (2 Timothy 3:1, 2) Edieke nnyịn mîkpemeke, utọ edu emi ekeme ndibe nnyịn.

Nso ke mme ete ye eka ẹkpenam man ẹkpep nditọ mmọ ndinyene esịtekọm? Mmanie ke nnyịn ikpesikọm? Ndien ntak emi ikpesikọmde owo ke ini ẹnamde n̄kpọ ẹnọ nnyịn, kpa ye oro mme owo ẹnanade esịtekọm?

Ndinyene Esịtekọm ke Ubon

Mme ete ye eka ẹsinam utom ọkpọsọn̄ man ẹnyene se ẹnọde nditọ. Edi ndusụk ini, mmọ ẹsikere ke nditọ mmimọ ikwe kpukpru se inamde inọ mmọ. Nso ke mme ete ye eka ẹkpenam man ẹn̄wam nditọ ẹnyene esịtekọm? Mmọ ẹkpenyene ndinam n̄kpọ ita emi:

(1) Uwụtn̄kpọ. Ndinịm eti uwụtn̄kpọ edi mfọnn̄kan usụn̄ ndinọ nditọwọn̄ ukpep. Kop se Bible etịn̄de aban̄a n̄wan Israel kiet oro akanamde utom ọkpọsọn̄. Enye ọdọhọ ete: “Nditọ esie ẹdaha ke enyọn̄ ẹkọm enye.” Anie ekekpep nditọ emi ndisikọm owo? Ufan̄ikọ oro ọbọrọ ete: “Ebe esie n̄ko onyụn̄ otoro enye.” (Mme N̄ke 31:28) Mme ete ye eka oro ẹsikọmde kiet eken ẹnam nditọ mmọ ẹfiọk ke ekọm esidat owo esịt, anam ubon adiana kiet, onyụn̄ owụt ke owo ọdiọn̄ọ idem.

Ete kiet oro ekerede Stephen ọdọhọ ete: “Mmodomo ndinịm uwụtn̄kpọ nnọ nditọ mi ke ndisikọm n̄wan mi ke udia oro enye etemde.” Nso idi utịp? Enye aka iso ete: “Nditọ mi iban iba ẹsikop n̄kọmde eka mmọ ndien emi anam mmọ ẹsima ndikọm owo.” Ndi emesikọm n̄wan m̀mê ebe fo kpukpru ini, idem ke n̄kpri utom ufọk oro enye anamde? Ndi emesikọm nditọ fo, idem ke ini mmọ ẹnamde se akpanade mmọ ẹnam?

(2) Ukpep. Ẹkeme ndimen ekọm ndomo ye flawa. Ukem nte ẹsidade ini ẹbọk flawa man eye, ntre n̄ko ke oyom mme ete ye eka ẹda ini ẹkpep nditọ mmọ ndisikọm owo. Didie ke mmọ ẹkeme ndinam emi? Enyene-ọniọn̄ Edidem Solomon ama asiak akpan usụn̄ kiet oro ẹkpenamde emi. Enye ọkọdọhọ ete: “Esịt eti owo etịm ekere ndibọrọ.”—Mme N̄ke 15:28.

Mme ete ye eka, ndi mbufo ẹmekeme ndinam nditọ mbufo ẹtie ẹkere ẹban̄a ukeme oro owo ekesịnde man ẹkeme ndinọ mmọ enọ ekededi? Emi ayanam mmọ ẹsinen̄ede ẹkọm owo. Maria emi enyenede nditọ ita ọdọhọ ete: “Oyom ada ini anam mmọ ẹfiọk se isinamde owo ọnọ owo enọ—ke owo oro ọnọde fi enọ enen̄ede ekere aban̄a fi onyụn̄ oyom ndinam fi ọfiọk adan̄a nte imọ imade fi. Udutuaha n̄kpọfiọk edieke anamde emi.” Utọ nneme emi ayanam nditọ fo ẹfiọk se ẹkpetịn̄de ke ini ẹkọmde owo ye ntak mmọ ẹkpekọmde owo oro anamde n̄kpọ ọnọ mmọ.

Nti ete ye eka isiyakke nditọ mmọ ẹkere ke mme owo ẹnọ mmimọ se akpanade ẹnọ mmimọ.a Item oro Mme N̄ke 29:21 ọnọde aban̄a nte ẹkpekamade ofụn owụt n̄ko nte ẹkpekamade nditọ. Enye ọdọhọ ete: “Owo ama akama ofụn esie ke mmemido toto ke uyen: [“nte ini akade, enye ayakabade edi anana-esịtekọm,” NW].”

Didie ke ẹkeme ndin̄wam n̄kpri nditọwọn̄ ẹsima ndikọm owo? Linda emi enyenede nditọ ita ọdọhọ ete: “Ami ye ebe mi imesidọhọ nditọ nnyịn ẹwet ndise mîdịghe ẹwet enyịn̄ mmọ ke leta ekọm oro iyomde ndinọ owo.” Edi akpanikọ ke ekeme ndidi ndise ye ubọkn̄wed mmọ idinen̄ekede iye, edi nditọ mbufo idifreke se mbufo ẹkpepde mmọ oro.

(3) Nyene Ime. Kpukpru nnyịn ikadada ibụk imana, ndien emi ekeme ndinam ọsọn̄ ndikọm owo. (Genesis 8:21; Matthew 15:19) Kpa ye oro, Bible ọdọhọ mme asan̄autom Abasi ete: “Mbufo ẹkabade ẹdi obufa ke odudu oro onụkde ekikere mbufo, [ẹnyụn̄] ẹmen obufa owo ẹsịne emi ẹkebotde nte ekemde ye uduak Abasi.”—Ephesus 4:23, 24.

Nte ededi, mme ete ye eka oro ẹnyenede mbufiọk ẹdiọn̄ọ ke imemke utom ndinam nditọ “ẹmen obufa owo ẹsịne.” Stephen oro ikebemde iso itịn̄ iban̄a ọdọhọ ete, “Ama ada ini ndikpep nditọ nnyịn ẹsikọm owo ke idemmọ.” Edi Stephen ye n̄wan esie ikakpaha mba. Enye aka iso ete: “Ima inyene ime ye nditọ nnyịn, ndien nte ini akakade, mmọ ẹma ẹdifiọk ndikọm owo ke idemmọ. Idahaemi, esinen̄ede ẹnem nnyịn ndikụt mmọ ẹkọmde owo.”

Nso Kaban̄a Mme Ufan ye Mme Mbọhọidụn̄ Nnyịn?

Nnyịn imekeme ndifre ndikọm owo, edi emi iwọrọke ke imanana esịtekọm. Edi edieke inyenede esịtekọm ke se owo anamde ọnọ nnyịn, ndi ufọn osụk odu ndikọm enye? Man ibọrọ mbụme emi, kere ban̄a mbon akpamfia oro Jesus akanamde ẹsana.

Ke ini Jesus akakade Jerusalem, enye ama osobo iren duop emi ẹkedọn̄ọde akpamfia. Bible ọdọhọ ete: “Mmọ ẹmenede uyo mmọ ẹfiori ẹte: ‘Jesus, Andikpep, tua nnyịn mbọm!’ Ndien ke ini enye okụtde mmọ, enye ọdọhọ mmọ ete: ‘Ẹka ẹkewụt mme oku idem mbufo.’ Edi nte mmọ ẹsan̄ade ẹka, ẹnam mmọ ẹsana. Ke ini owo kiet ke otu mmọ okụtde ete ẹma ẹnam udọn̄ọ okụre imọ, enye afiak edem, edi edinọ Abasi ubọn̄ ke ọkpọsọn̄ uyo. Ndien enye ọduọ ekịbi iso esie ke isọn̄ ke ukot Jesus, ọkọm enye; n̄ko-n̄ko, enye ekedi owo Samaria.”—Luke 17:11-16.

Ndi Jesus ama efre enyịn aban̄a mbon oro mîkafiakke idikọm enye? Mbụk oro aka iso ete: “Jesus ọdọhọ ete: ‘Nte idịghe owo duop ke ẹkenam ẹsana? Enye, ndien, owo usụkkiet eken? Nte owo baba kiet idụhe eke afiakde edem edi ndinọ Abasi ubọn̄ ke mîbọhọke owo idụt efen emi?’”—Luke 17:17, 18.

Mbon akpamfia usụkkiet eken ikedịghe mme idiọkowo. Mmọ ẹma ẹwụt in̄wan̄-in̄wan̄ ke imenyene mbuọtidem ke Jesus ẹnyụn̄ ẹka Jerusalem ẹkewụt oku idem nte enye eketemede. Ntre, okposụkedi mmọ ẹkenen̄erede ẹnyene esịtekọm ẹban̄a se Jesus akanamde ọnọ mmọ, mmọ ikafiakke ika ikọkọm enye. N̄kpọ emi ikenemke Christ esịt. Nso kaban̄a nnyịn? Ke ini owo ọfọnde ido ye nnyịn, ndi nnyịn imesisọp ikọm owo oro, inyụn̄ iwet leta ikọm enye edieke ikemede?

Bible ọdọhọ ke “ima inamke se mîdotke [inyụn̄] iyomke ufọn esiemmọ.” (1 Corinth 13:5) Ntre, ke ini ọkọmde owo, emi owụt ke emenyene eti edu, onyụn̄ ama owo oro afo ọkọmde. Se Bible etịn̄de aban̄a mbon akpamfia oro ekpep nnyịn ke ana mbon oro ẹyomde ndinem Christ esịt ẹma ẹnyụn̄ ẹsikọm kpukpru owo, inamke n̄kpọ m̀mê mmọ ẹto m̀mọ̀n̄, m̀mê ewe ido ukpono ke mmọ ẹsinyụn̄ ẹka.

Bụp idemfo ete, ‘Ndi mmekeme nditi akpatre ini oro n̄kọkọmde mbọhọidụn̄ mi m̀mê owo itieutom nnyịn, eyen ufọkn̄wed nnyịn, owo emi anamde utom ke ufọkibọk, anyam ufọkurua, m̀mê owo efen ekededi oro akan̄wamde mi?’ Ntak mûdaha usen kiet m̀mê iba uwet ibat ini oro ọkọmde owo m̀mê ewetde leta ọkọm owo? Emi ekeme ndinam fi ọfiọk ebiet emi oyomde anam n̄kọri.

Ke akpanikọ, oyom inen̄ede ikọm Jehovah Abasi. Enye ọnọ nnyịn “kpukpru nti enọ ye kpukpru enọ eke ẹfọnde ẹma.” (James 1:17) Ndi emekeme nditi akpatre ini oro ekenen̄erede ọkọm Abasi ke mme akpan n̄kpọ oro enye anamde ọnọ fi?—1 Thessalonica 5:17, 18.

Ntak Emi Ikpesikọmde Owo Idem Ọkpọkọm Mbon En̄wen Ikọmke Nnyịn?

Ekeme ndidi mme owo idikọmke nnyịn ke ini inamde n̄kpọ inọ mmọ. Ntak ndien nnyịn ikpesikọmde owo ke ini ẹnamde n̄kpọ ẹnọ nnyịn idem ke ini mbon en̄wen mîsikọmke nnyịn? Yak ineme ntak kiet.

Edieke inamde eti n̄kpọ inọ mbon oro ẹnanade esịtekọm, oro owụt ke ikpebe edima Andibot nnyịn, Jehovah Abasi. Okposụkedi ediwak owo mîsikọmke Jehovah ke ima oro enye amade mmọ, enye itreke ndinam eti n̄kpọ nnọ mmọ. (Rome 5:8; 1 John 4:9, 10) Enye anam ‘utịn esie asiaha ọnọ ndiọi owo ye nti owo onyụn̄ anam edịm edep ọnọ ndinen owo ye mme anam ukwan̄ido.’ Edieke nnyịn idomode ndinyene esịtekọm kpa ye oro idụn̄de ke ererimbot oro mme owo ẹnanade esịtekọm, nnyịn iwụt ke idi “nditọ Ete [nnyịn] emi odude ke heaven.”—Matthew 5:45.

[Ikọ Idakisọn̄]

[Se ẹwetde ke ikpọ abisi ke page 15]

Da usen kiet m̀mê iba wet ibat ini oro ọkọmde owo

[Ndise ke page 15]

Nịm uwụtn̄kpọ nọ nditọ fo ke ndisikọm owo

[Ndise ke page 15]

Ẹkeme ndikpep n̄kpri nditọwọn̄ ndisikọm owo