Se Ediwak Owo Ẹnịmde ke Akpanikọ
“Mma nsidaba ata idiọk ndap mban̄a nte ẹfọpde mi ke hell! Mma nsidaba nte ẹtopde mi ẹsịn ke ebiet oro asakde ikan̄ ndien mma nsidemede mfiori n̄kpo. Emi ama esinam nnen̄ede ndomo nditre ndinam idiọkn̄kpọ.”—Arline.
NDI afo emenịm ke hell edi ebiet ndutụhọ oro ẹnịmde ẹnọ mme anamidiọk? Ediwak owo ẹnịm. Ke uwụtn̄kpọ, ke 2005, eyen ukpepn̄kpọ Bible kiet ke Ufọkn̄wed Ntaifiọk St. Andrews ke Scotland ọkọdọhọ ke edieke ẹbaharede mme ọkwọrọ ederi ke Scotland ẹsịn ke ikpehe ita, ke ikpehe kiet enịm ke mbon oro ẹdianarede ẹkpọn̄ Abasi ẹyekop “ọkpọsọn̄ editịmede esịt ke nsinsi ke hell.” Edieke ẹbaharede mmọ ẹsịn ke ikpehe ition, ikpehe kiet enịm ke ẹditotụhọde mbon oro ẹdude ke hell.
Ke ediwak idụt, ediwak owo ẹnịm ke hell odu. Ke uwụtn̄kpọ, ndụn̄ọde oro ẹkenamde ke United States ke 2007 ama owụt ke n̄kpọ nte owo itiaba ke otu owo duop ẹnịm ke hell odu. Idem ke mme idụt oro ata ediwak owo mîsikaha ufọkabasi, ẹsụk ẹnenịm ke hell odu. Ndụn̄ọde oro ẹkenamde ke Canada ke 2004 ama owụt ke n̄kpọ nte owo ition ke otu owo duop ẹnịm ke hell odu. Ndien ke Great Britain, n̄kpọ nte owo inan̄ ke otu owo duop ẹnen̄ede ẹnịm ke hell odu.
Se Mme Ọkwọrọ Ederi Ẹkpepde
Ediwak mme ọkwọrọ ederi ikpepke aba ke hell edi ebiet emi ẹdidade ikan̄ ẹtụhọde mme owo. Edi mmọ ẹtiene ẹkpep se Catechism of the Catholic Church, oro ẹkesiode ke 1994 etịn̄de aban̄a hell. N̄wed oro ọdọhọ ete: “Akpan usụn̄ oro ẹtụhọrede mme owo ke hell edi ndidianade mmọ n̄kpọn̄ Abasi ke nsinsi.”
Kpa ye oro, mme owo ẹsụk ẹnenịm ke hell edi ebiet oro ẹsitụhọrede mme owo. Mbon oro ẹsikpepde ukpepn̄kpọ emi ẹdọhọ ke enye odu ke Bible. Albert Mohler emi etiede ibuot ke Southern Baptist Theological Seminary ọdọhọ ete: “Se N̄wed Abasi akam ekpepde edi oro.”
Nte Nnyịn Imekeme Ndinịm Se Imade?
Edieke hell edide ebiet ndutụhọ nte ẹdọhọde, afo ekpenyene ndikop ndịk mban̄a enye. Edi edieke ukpepn̄kpọ emi mîdịghe akpanikọ, mme adaiso ido ukpono oro ẹkpepde ukpepn̄kpọ emi ẹtịmerede mme owo ẹnyụn̄ ẹnam mbon oro ẹnịmde enye ke akpanikọ ẹkop ndịk oro mmọ mîkpokopke. Mmọ n̄ko ẹsu nsu ẹdian Abasi.
Nso ke Ikọ Abasi, kpa Bible, etịn̄ aban̄a hell? Mme ibuotikọ oro ẹtienede ẹyebọrọ mme mbụme emi: (1) Nso isitịbe ke ini owo akpade? (2) Nso ke Jesus ekekpep aban̄a hell? (3) Didie ke ndifiọk se hell edide edin̄wam fi?