San̄a Kpere Abasi
Andibot Oro Odotde Itoro
NDI akanam emekere ‘ntak emi nnyịn idude uwem?’ Mbon oro ẹdọhọde ke unam okoforo owo ifiọkke ibọrọ mbụme emi. Edi mbon oro ẹnịmde ke Jehovah Abasi okobot owo ẹfiọk. (Psalm 36:9) Mmọ ẹfiọk ke enyene ntak oro enye okobotde nnyịn. Ediyarade 4:11 etịn̄ ntak emi. Ẹyak ise nte mme ikọ oro apostle John ekewetde ẹnamde ifiọk ntak emi ẹkebotde nnyịn.
John etịn̄ nte ẹkwọde ikwọ ẹtoro Abasi ke heaven ete: “Jehovah, kpa Abasi nnyịn, afo omodot ndibọ ubọn̄ ye ukpono ye odudu, koro afo okobotde kpukpru n̄kpọ, ndien oto uduak fo ke mmọ ẹkedu, ẹkenyụn̄ ẹbot mmọ.” Jehovah kpọt odot ndibọ utọ ukpono oro. Ntak-a? Koro enye “okobotde kpukpru n̄kpọ.” Nso ndien ke emi akpanam nnyịn inam?
Ẹdọhọ ke Jehovah odot “ndibọ” ubọn̄, ukpono, ye odudu. Nnyịn imetịm ifiọk ke idụhe owo ndomokiet emi enyenede ubọn̄, ukpono, ye odudu nte Abasi. Nte ededi, ata ediwak owo inen̄ekede ifiọk ke enye okobot kpukpru n̄kpọ. Kpa ye oro, mme n̄kpọ oro Abasi obotde ẹnam ndusụk owo ẹnen̄ede “ẹkụt mme edu esie oro enyịn mîkwe.” (Rome 1:20) Esịtekọm oro mmọ ẹnyenede anam mmọ ẹnọ Jehovah ubọn̄ ye ukpono. Mmọ ẹnam kpukpru mbon oro ẹmade ẹkụt akwa uyarade oro owụtde ke Jehovah okobot kpukpru n̄kpọ ke utịbe utịbe usụn̄ ye nte ke enye odot ukpono.—Psalm 19:1, 2; 139:14.
Didie ndien ke mme andituak nnọ Jehovah ẹsinọ enye odudu? Edi akpanikọ nte ke edibotn̄kpọ ndomokiet ikemeke ndinọ Ata Ọkpọsọn̄ Andibot odudu. (Isaiah 40:25, 26) Edi enyene mme n̄kpọ oro nnyịn idade ibiet Abasi sia ẹkebotde nnyịn ke mbiet esie, ndien odudu edi kiet ke otu mme n̄kpọ emi. (Genesis 1:27) Edieke nnyịn inen̄erede inyene esịtekọm iban̄a se Andibot nnyịn anamde ọnọ nnyịn, emi ayanam nnyịn ida odudu ye ukeme nnyịn ikpono inyụn̄ inọ enye ubọn̄. Utu ke ndida ofụri odudu nnyịn nnam n̄kpọ idem nnyịn, nnyịn imọfiọk ke akpana ida ofụri odudu nnyịn ikpono Jehovah Abasi.—Mark 12:30.
Ntak emi ẹkebotde nnyịn ndien-e? Akpatre ikpehe Ediyarade 4:11 ọbọrọ ete: “Oto uduak fo ke mmọ ẹkedu, [oro edi, afo okobot kpukpru n̄kpọ man ẹnam uduak fo].” Idịghe nnyịn ikobot idem nnyịn. Edi Abasi okobot nnyịn. Ntre, uwem nnyịn idinyeneke ufọn edieke isịnde ibuot isịn itọn̄ inam mbubehe idem nnyịn kpọt. Man inen̄ede inyene emem, ikop idatesịt, inyụn̄ ikop uyụhọ, oyom ifiọk uduak Abasi inyụn̄ idu uwem ekekem ye uduak emi. Adan̄aoro ndien ke ikeme ndidọhọ ke imọfiọk ntak oro ẹkebotde nnyịn.—Psalm 40:8.
[Ebiet Ẹdade Ndise Ẹto ke page 31]
NASA, ESA, ye A. Nota (STScI)