Ẹyak Kpukpru Nnyịn Ikpono Jehovah ye Eyen Esie
Nte Kpukpru Mbon Oro Ẹdụkde Editi ke April 8 Ẹkemede Ndinen̄ede Mbọ Ufọn
1 Mmanie mfịn ke ẹsinọ san̄asan̄a ukpono? Mme owo oro ererimbot ẹdade se mmọ ẹnamde ke ata akpan n̄kpọ. Nte ededi, ke ata ediwak idaha ẹsisọp ẹfre mme edinam mmọ. Edi nso kaban̄a mme edinam oro ẹnen̄erede ẹnyene ufọn ẹnọ ofụri ubonowo? Nnyịn iyenen̄ede ino ntịn̄enyịn ke n̄kponn̄kan ke otu emi nte nnyịn inịmde Udia Mbubịteyo Ọbọn̄ ke utịn ama okosụhọde ke April 8, 2001.
2 Anie odot ndibọ n̄kon̄n̄kan ukpono? Bible ọbọrọ ete: “Afo [Jehovah] omodot ndibọ ubọn̄ ye ukpono ye odudu, koro Afo okobotde kpukpru n̄kpọ.” (Edi. 4:10b) Nte Andibot, Jehovah edi Akakan Andikara ekondo. Ukpono oro enye odotde iditreke tutu amama!—1 Tim. 1:17.
3 Jesus Christ, Eyen Abasi, ama anam mme n̄kpọ oro ẹdotde oro ẹdidade mme anana-utịt edidiọn̄ ẹsọk ubonowo. Enye ama ekpebe Ete esie ke mfọnmma usụn̄. (John 5:19) Mfọnmma n̄kopitem ye utom edinam akpanikọ esie anam enye ‘odot ndibọ odudu, ye inyene, ye ifiọk, ye ukeme, ye ukpono, ye ubọn̄, ye edidiọn̄.’ (Edi. 5:12) Ete esie ama okpono enye ebe ke ndidori enye ke ebekpo nte Edidem. (Ps. 2:6-8) Amaedi nnyịn, iyenyene ifet ndikpono Ete ye Eyen nte nnyịn inịmde Udia Mbubịteyo Ọbọn̄ ke April 8, 2001.
4 Edi n̄kpọ mfụhọ nditịn̄, ibat ibat owo ke mbụk owo ẹnọ Jehovah ye Eyen esie ukpono oro odotde. Ke ndusụk idaha, idem ikọt Abasi eke eset, nditọ Israel, ẹkesinam n̄kpọ ẹnọ Jehovah enyọn̄ enyọn̄. Emi ekedi in̄wan̄-in̄wan̄ edu unana ukpono. (Mal. 1:6) Nnennen ukpono oyom ata n̄kopitem emi ọkọn̄ọde ke ima ye esịtekọm ẹnyenede ẹban̄a kpukpru se Jehovah ye Eyen esie ẹnamde ẹnọ nnyịn. Ndinọ utọ ukpono oro ọwọrọ ete nnyịn iwụt mbak ye uten̄e Abasi, inyịmede Jehovah ye Jesus ke kpukpru usụn̄ nnyịn. Esop Christian odomo ndikpep nnyụn̄ n̄n̄wam mbon efen ndinam ukem oro.
5 Akpan Edinam Ndiwụt Ukpono: Usọrọ Editi edi ata n̄wọrọnda mboho ikọt Jehovah ke isua kiet kiet. Kpukpru owo emi ẹnyenede udọn̄ ndikpono nnyụn̄ nnam n̄kpọ Jehovah ẹkpenyene ndidụk. (Luke 22:19) Nnyịn imodori enyịn ite ke adianade ye ifịk ifịk Mme Ntiense miliọn 6, mbon oro ẹnyenede udọn̄ ẹyenam mme andidụk ẹwak ẹbe miliọn owo 14. Nso eti ifet ke edi ntem ndikpono Ete nnyịn eke heaven! Ke adan̄aemi usọrọ oro owụkde ntịn̄enyịn ke Jesus, ukpono oro ẹwụtde ke se enye akanamde ọnọ Ete emi ọkọdọn̄de enye, ubọn̄.—John 5:23.
6 Nso ke ikeme ndinam man inọ akpan edinam emi ibetedem? Nnyịn imekeme ndin̄wam mbufa mbon oro ẹnyenede udọn̄ ndibọ ufọn ọyọhọ ọyọhọ. Sịn udọn̄ nọ mmọ ndidụk, ndien ke ebiet oyomde, nọ ima ima un̄wam man mmọ ẹsịm do. Nam uduak utịn̄ikọ oro an̄wan̄a. Men mmọ wụt mbon efen. Se mmọ ẹkụtde ẹnyụn̄ ẹkopde ekeme ndinụk mmọ ndiyom ndidiana ye nnyịn n̄kpono Jehovah.
7 Kûda odudu oro ndutịm emi enyenede ke ekpri n̄kpọ. Eyen ukpepn̄kpọ ufọkn̄wed ntaifiọk kiet ọkọdọhọ ete: “Mmodụk Udia Ọbọn̄ ediwak ini ke ufọkabasi nnyịn, edi enye emi edi ata isio. Mmokụt nte ke emi enen̄ede edi se Bible ọdọhọde, ndien n̄kere ke mbufo ẹnyene akpanikọ.” Enye ama ọtọn̄ọ ndidụk mme mbono esop kpukpru ini ndien ibịghike ama ana baptism.
8 N̄wam Mbufa Owo Ẹnam N̄kọri: Tịm fiọk mbufa mbon oro ẹdụkde Editi, nyụn̄ sọp ka kese mmọ man afiak odụn̄ọde ndinem n̄kpọ oro mmọ ẹkekpepde ẹnyụn̄ ẹkụtde. Nam mmọ ẹdiọn̄ọ ẹban̄a mme mbono esop eken, emi ẹkemede ndinam ifiọk Bible mmọ ọkọri. Ndidụn̄ọde ibuot 17 ke n̄wed Ifiọk, “Nyene Ifụre ke Otu Ikọt Abasi,” oyowụt mmọ mme ntatara ndutịm eke spirit oro esop ọnọde, emi odude ọnọ mmọ. Ke ebiet ekemede, nam ndutịm man mmọ ẹse vidio oro Our Whole Association of Brothers, man mmọ ẹkeme ndida enyịn mmọ n̄kụt edidianakiet, idatesịt, ye ifịk ikọt Jehovah!
9 Edi akpan n̄kpọ nte mbon oro ẹnyenede udọn̄ ẹkpep nte mmọ ke idemmọ ẹkemede ndiwụt ukpono nnọ Jehovah. Nam an̄wan̄a nte ke akam ofụri esịt esinem Jehovah esịt ndien ke edi n̄kpọ oro esinọde nsọn̄idem eke spirit kpukpru ini. (1 John 5:14) Ke adade ukpepn̄kpọ 8 esịm 12 ke ediye uduot ekpri n̄wed Oyom, tịn̄ ban̄a utọ edu uwem oro ọnọde Jehovah ukpono. Ke etịn̄de aban̄a se ẹwetde ke ediye uduot ekpri n̄wed Mme Ntiense Jehovah, page 30-31, sịn udọn̄ nọ mbufa owo ndikere nte ẹkemede ndikpono Jehovah ebe ke ndinyene ọkpọkpọ udeme ke utom ukwọrọikọ.
10 Ndiwụt esịtekọm mban̄a uwa ufak Jesus nnyụn̄ n̄wụt mban̄a ifet nnyịn ndinam n̄kpọ nte mme mbet esie ọnọ Ete ukpono onyụn̄ ada mme edidiọn̄ ọsọk mbon efen. Jesus ọkọn̄wọn̄ọ ete: “Edieke owo anamde n̄kpọ ọnọ Mi, Ete Mi oyokpono enye.”—John 12:26.