Kpeme Idem ye Ndiọi Spirit

ẸKEBỌK James ke esịt esịt obio-in̄wan̄ Isuo Malaita ke Solomon Islands. Ẹma ẹkpep enye toto ke uyen ẹte esikpono mme spirit. Enye ọdọhọ ete: “Tutu amama n̄kpọkọdọhọke mme spirit ẹnam owo ibak, edi n̄kekereke ke owo ekeme ndikop inem uwem edieke enye mîsidaha rarafono [edinam emi ẹsidade ẹyom un̄wam mme spirit] nte n̄kpọ n̄kpemeidem.”

Mbon oro ẹdụn̄de ke Solomon Islands ẹnịm ke mme spirit ẹkeme ndin̄wam m̀mê ndinam owo ibak ukem nte mme owo ke ediwak ebiet ke ererimbot ẹnịmde. Ke nditịm ntịn̄, ediwak mbon Melanesia ẹmama inua-okot nti spirit, ifeheke-fehe mmọ.

Nsio nsio n̄kpọ ẹwụt ke mme owo ẹnịm se mme spirit ẹsinamde ke akpanikọ. Ke uwụtn̄kpọ, ke ini James ekedide eyenọwọn̄, mme eka ẹma ẹsida nditọ mmọ ẹfehe ẹdụk ufọk ini ekededi oro mmọ ẹkopde uyo inuen oro ẹkotde korokoro. Ntak-a? Mmọ ẹkesinịm ke uyo inuen oro ọwọrọ ke idiọkn̄kpọ ọmọn̄ etịbe ọnọ owo.

Ndusụk owo ẹsidori san̄asan̄a afia itiat ke enyọn̄ enyịnusụn̄ ufọk mmọ. James ama esinam emi n̄ko sia ekenịmde ke itiat emi eyekpeme imọ mbak ndiọi spirit. Ndien ke ini James ekesidiade udia uwemeyo ke itieutom, enye ama esitan̄ mben̄e udia ekededi ọdọn̄ ke ekpat man ama ekem akpada ọkọduọn̄ọ. Enye ekenịm ke owo mfọni ekeme nditan̄ mben̄e udia oro nda n̄kọtọ imọ udọn̄ọ.

Okposụkedi emi ndusụk n̄kpọ emi mîsinen̄ekede itịbe ntem ke edem mbufo, ekeme ndidi afo ekere nte James ekekerede ke oyom inam se ẹsinamde ke obio mbufo man ikpeme idem mbak ndiọi spirit. Afo emekeme ndinịm ke ndinam mme orụk n̄kpọ oro idiyakke mfịna esịm imọ.

Edieke afo enịmde se Bible ekpepde, ọwọrọ ke ayama ndifiọk nte enye ọbọrọde mme mbụme oro ẹtienede mi: (1) Nso mfịna ke ndiọi spirit ẹkeme ndida nsọk fi? (2) Nte nditiene nnam ndusụk ido obio ekeme ndinam fi osụk ibuot ọnọ mme demon? (3) Didie ke ekeme ndinen̄ede n̄kpeme idemfo ye ndiọi spirit nnyụn̄ n̄kop inemesịt?

Nte Ndiọi Spirit Ẹsifịnade Owo

Bible anam ifiọk ke idịghe spirit mme akpan̄kpa ẹdi ndiọi spirit. Ikọ Abasi ọdọhọ ete: “Mme odu-uwem [ẹfiọk] ẹte ke mmimọ inyene ndikpa: edi ama edi mme akpa-n̄kpa, mmọ ifiọkke baba n̄kpọ kiet.” (Ecclesiastes 9:5) Ke nditịm ntịn̄, ndiọi spirit ẹdi mme ọsọn̄ibuot angel oro ẹtienede Satan ẹdomo ndibian̄a mme owo.—Ediyarade 12:9.

Bible etịn̄ in̄wan̄-in̄wan̄ ke oyom ikpeme idem ye ndiọi spirit. Apostle Paul ekewet ntem ọnọ mme Christian ke Ephesus: “Imenyene en̄wan ndin̄wana, idịghe ye obụk ye iyịp, edi in̄wana . . . ye odudu ndiọi spirit ke enyọn̄.” Apostle Peter ọkọdọhọ ke Satan kpa Devil, andikara kpukpru ndiọi spirit, etie nte “ekpe eke okụnide, oyom owo eke enye editade.”—Ephesus 6:12; 1 Peter 5:8.

Akpan usụn̄ emi Satan esifịnade owo edi nditụn mmọ usụn̄, abian̄a mmọ ẹnam mme n̄kpọ oro mînemke Abasi esịt. Bible ọdọhọ ke Satan “ke akaka iso ndiforo angel un̄wana.” (2 Corinth 11:14) Enye anam nte idi spirit oro ekemede ndikpeme owo, ke ini enye akam aduakde ndinam ibak. Satan iyakke mme owo ẹfiọk owo emi imọ idide inyụn̄ iyakke mme owo ẹfiọk Abasi. (2 Corinth 4:4) Ntak emi Satan esitụnde mme owo usụn̄?

Satan oyom mme owo ẹtuak ibuot ẹnọ imọ, edide mmọ ẹfiọk m̀mê ifiọkke. Ke ini Jesus Eyen Abasi okodude ke isọn̄, Satan ama oyom enye ‘ọduọ ke isọn̄ atuak ibuot’ ọnọ imọ. Jesus ọkọdọhọ ete: “Daha mi, Satan! Koro ẹwet ẹte, ‘Edi Jehovah Abasi fo ke ana afo atuak ibuot ọnọ.’” (Matthew 4:9, 10) Jesus ama esịn ndinam n̄kpọ ekededi oro ọkpọwọrọde ndituak ibuot nnọ Satan.

Jehovah okop odudu akan ke otu kpukpru spirit, idinyụn̄ iyakke ẹnam mbon oro ẹkopde uyo esie nsinsi ibak. (Psalm 83:18; Rome 16:20) Edi edieke anade inem Jehovah Abasi esịt nte Jesus ekenemde, inyene ndifep orụk utuakibuot ekededi oro ẹtuakde ẹnọ Satan ye mme demon esie. Ke ntem, oyom ifiọk mme ido obio oro ẹdide edituak ibuot nnọ ndiọi spirit. Ikeme ndisan̄a didie mfiọk?

Fiọk Mme Ido Obio Oro Mînemke Abasi Esịt

Jehovah Abasi ama akpan nditọ Israel, kpa ikọt esie eke eset, ete ẹkûkpebe ndusụk ido mme idụt oro ẹkedude ẹkpere mmọ. Enye ọkọdọhọ ete: “Kûyak ẹkụt owo ekededi ke otu fo emi . . . ebrede idiọn̄, m̀mê ebre mfọni m̀mê owo ekededi emi omụmde ndomo m̀mê abiamfa, m̀mê owo emi ọkọkde nduọhọ ọnọ owo.” N̄wed Abasi etịn̄ ntem aban̄a mbon oro ẹtienede ẹnam mme n̄kpọ emi ete: “Kpukpru owo eke ẹnamde n̄kpọ emi ẹdi mbubiam ke iso Jehovah.”—Deuteronomy 18:10-12, NW.

Do, ke ini ekerede aban̄a ido edinam edem mbufo, kere ban̄a mme mbụme emi: Nte ido edinam emi esịn udọn̄ ọnọ edimụm ndomo? Ndi ẹdọhọ ke mme n̄kpọ oro mînyeneke uwem ẹkeme ndida odudu mfọni n̄kpeme mme owo? Nte enye abuana edikọk nduọhọ nnọ owo m̀mê edida mbiat nduọhọ? Nte enye anam owo osụk ibuot ọnọ spirit en̄wen utu ke Jehovah m̀mê Jesus emi adade ke ibuot esie?—Rome 14:11; Philippi 2:9, 10.

Ọfọn ẹsịn ido edinam ekededi oro esịnde udọn̄ ọnọ mme orụk edinam emi. Ntak-a? Ẹma ẹnọ apostle Paul odudu spirit ndiwet ete: “Mbufo ikemeke ndidia n̄kpọ ke ‘okpokoro Jehovah’ ye ke okpokoro mme demon.” Enye ọkọdọhọ ke mbon oro ẹdomode ndinem Abasi ye mme spirit eken esịt ‘ẹnam Jehovah efịbe ufụp.’ (1 Corinth 10:20-22) Jehovah Abasi oyom onyụn̄ odot ẹnọ enye “san̄asan̄a utuakibuot.”—Exodus 20:4, 5, NW.

Kere n̄ko mbụme emi: Nte ido edinam emi anam owo ekere ke idịghe imọ idi ntak n̄kpọ oro inamde? Ke uwụtn̄kpọ, ediwak obio imaha efịbe ye edifiọk owo mbemiso ndọ, Bible onyụn̄ akpan mme n̄kpọ emi n̄ko. (1 Corinth 6:9, 10) Edi ẹkeme ndinyịme mme utọ edinam oro ke ndusụk obio Pacific edieke n̄kaiferi ọdọhọde ke “ẹkenọ imọ awawa ikọn̄,”a oro edi, ke nduọhọ oro ẹkekọkde ẹnọ imọ akanam imọ inam use.

Edi Bible ekpep ke iyanam ibat edinam nnyịn. (Rome 14:12; Galatia 6:7) Ke uwụtn̄kpọ, Eve emi ekedide akpa n̄wan ọkọdọhọ ke Satan akabian̄a imọ isọn̄ ibuot ye Jehovah ke ini enye ọkọdọhọde ete: “Urụkikọt akabian̄a mi, ndien ndia.” Edi Jehovah ọkọduọhọ Eve ke se enye akanamde. (Genesis 3:13, 16, 19) Nnyịn n̄ko iyanam ibat iban̄a se inamde inọ Abasi.—Mme Hebrew 4:13.

Nso ke Ana Anam?

Afo enyene ndinam ofụri se ekekeme man ọbiọn̄ọ Satan ye mme demon esie edieke oyomde ndinem Abasi esịt nnyụn̄ ndu uwem ekekem ye mme edumbet Bible. Ke n̄kpọ nte tọsịn isua iba emi ẹkebede, mbon Ephesus oro ẹkenyenede esịt akpanikọ ẹma ẹnịm eti uwụtn̄kpọ ke n̄kpọ emi. Mmọ ẹma ẹda kpukpru n̄wed oro ẹkenyenede ebuana ye mme edinam ubreidiọn̄ “ẹdifọp mmọ ke iso kpukpru owo,” man ẹwọrọ ke idak ndiọi spirit.—Utom 19:19.

Mbemiso mmọ ẹkefọpde mme n̄wed emi, mmọ ẹma “ẹdi ẹdiyarade ẹnyụn̄ ẹtịn̄ se mmọ ẹkenamde an̄wan̄wa.” (Utom 19:18) Sia se Paul ekekpepde mmọ aban̄a Christ okotụkde mmọ, mmọ ẹma ẹfọp mme n̄wed idiọn̄ mmọ. Mmọ ẹma ẹnyụn̄ ẹkpụhọde ekikere ẹban̄a mme n̄kpọ oro mmọ ẹkesinamde.

Edi akpanikọ, ekeme ndisọn̄ nditre mme ido obio. Se ikọwọrọde James edi oro. Enye ama ọtọn̄ọ ndikpep Bible ye Mme Ntiense Jehovah onyụn̄ ama se enye ekekpepde. Edi enye okosụk ananam rarafono. Ke ama akafiak ese mme ido edinam emi, enye ama okụt ke imọ imenịm mme un̄wọn̄ọ Jehovah kaban̄a ini iso, edi ke ana ika iso inam mme n̄kpọ emi man ikeme ndikpeme idem imọ.

Nso ikan̄wam James okpụhọde ekikere esie? Enye ọdọhọ ete: “Mma mbọn̄ akam nnọ Jehovah nte ekpeme mi, onyụn̄ anam mi mbuọt idem ye enye. Mma nnyụn̄ ntre mme ido obio oro n̄kesinamde.” Ndi n̄kpọ ama anam enye? James ọdọhọ ete: “Baba, n̄kukụre se iketịbede edi ke mma n̄kpep ndibuọt idem ye Jehovah. Mmokụt nte Jehovah ekemede ndidi ata ufan.” Ke nditịm ntịn̄, ke isua itiaba emi ẹbede, James anam utom ukwọrọikọ nte iso utom esie, an̄wam mbon en̄wen ẹfiọk se Bible ekpepde.

Ntak emi mûnamke nte James akanamde? Dụn̄ọde ido edem mbufo, nyụn̄ da “ukeme ukere n̄kpọ” fo biere m̀mê mmọ ẹdu ke n̄kemuyo ye “uduak Abasi.” (Rome 12:1, 2) Ekem, da uko dian̄ade idem kpọn̄ mme n̄kpọ oro ẹsinamde ke ntak nsunsu ekikere. Edieke anamde ntre, afo eyenyene mbuọtidem ke Jehovah ‘ayadara fi’ onyụn̄ ekpeme fi. (2 Corinth 6:16-18) Afo oyokụt nte Mme N̄ke 18:10 edide akpanikọ, kpa nte James okokụtde. Itien̄wed oro ọdọhọ ete: “Enyịn̄ Jehovah edi ọkpọsọn̄ tower: eti owo efehe odụk ke esịt, ndien odu ke ifụre.”—Mme N̄ke 18:10.

[Ikọ Idakisọn̄]

[Ndise ke page 19]

“Korokoro”

[Ebiet Ẹdade N̄kpọ Ẹto]

Ẹbọ ẹto Dr. Bakshi Jehangir

[Ndise ke page 19]

N̄kaiferi ke atan̄ mben̄e udia mbak ẹdida ẹtọ mmọ ibọk