Mmọkọm Abasi kpa ye Oro Mme Afanikọn̄ Ẹsịmde Mi—Nte Bible An̄wamde Mi Nyọ

Nte Enrique Caravaca Acosta Obụkde

Ekedi ke April 15, 1971. N̄kaka ndise mbonufọk nnyịn ke ebiet oro ubon nnyịn ẹsidude ẹtọ in̄wan̄. Sia mma n̄kọkpọn̄ ufọk ke anyan ini, ama enen̄ede ọdọn̄ mi ndikụt kpukpru owo. Mma n̄kere m̀mê kpukpru mmọ ẹyedu ke ufọk, n̄ko, m̀mê anie ke ndibem iso n̄kụt? Ke mma n̄kesịm ufọk, ndịk ama anam mi ndikụt owo inan̄ oro ẹkewotde, esịnede eka mi!

IDEM ama enen̄ede enyek mi. Nso iketịbe? N̄kpanam nso? Owo ndomokiet ikodụhe, ibuot ama oyon̄ mi, n̄konyụn̄ mfiọkke se n̄kpanamde. Mbemiso n̄kade iso ntịn̄ se iketịbede, yak ntịn̄ esisịt mban̄a idemmi. Oro ayanam enen̄ede ọfiọk nte eketiede mi ke idem ke ini n̄kosobode n̄kpọ mmọn̄eyet oro ye mme afanikọn̄ en̄wen.

Ima Ikụt Akpanikọ

N̄kamana ke Quirimán ke mbọhọ Nicoya, ke Costa Rica. Ke 1953, ke ini n̄kedide isua 37, n̄kodụn̄ ye ete ye eka mi ke ufọk nnyịn ke obio-in̄wan̄. Okposụkedi oro ikesikade Ufọkabasi Catholic, nnyịn ikamaha ndusụk ukpepn̄kpọ, owo ikonyụn̄ ibọrọke ediwak mbụme nnyịn.

Usenubọk kiet, ete kiet oro ekekerede Anatolio Alfaro, ama edi ufọk nnyịn onyụn̄ edisịn udọn̄ ọnọ nnyịn ete ikpep Bible. Enye ama okot ediwak itie N̄wed Abasi ọnọ nnyịn onyụn̄ ekpep nnyịn ediwak n̄kpọ ke Bible. Ami, ete ye eka mi, udọ udọ eka mi, adiahaeka mi ye ufan esie emi okodụn̄de ye nnyịn, ima isụhọde itie ikpan̄ utọn̄ ikop se enye ekekpepde. Ima ineme n̄kpọ oro ofụri usen oro tutu eyo ọsọn̄. Nnyịn ima ibụp enye ediwak mbụme.

Anatolio ama odu ye nnyịn usen iba. Ima ima se ikokopde, edi se ikamade ikan edi emi enye akadade Bible ọbọrọ mme mbụme nnyịn. Se ikenemede ama enen̄ede otụk nnyịn. Ima itie ikere iban̄a se ikekpepde, inyụn̄ ifiọk ke imokụt akpanikọ. Anatolio ama ọnọ nnyịn Enyọn̄ Ukpeme, Awake!, ye mme n̄wed ukpep Bible. Nnyịn ima isitie nte ubon ikot inyụn̄ ikpep mme n̄wed emi ke mbubreyo. Emi ama enen̄ede ọsọn̄ sia nnyịn mîkenyeneke ikan̄ ilektrik. Ke ini iyomde ndikpep n̄kpọ, nnyịn ima isida ikpọ ekpat emi ẹsidade ẹdọn̄ bia mbakara ifụk ukot mbak ọbọn̄ edita nnyịn.

Ke ọfiọn̄ itiokiet ẹma ẹkebe, owo ition ke ubon nnyịn, esịnede ami ye ete ye eka mi, ima ina baptism. Ima ikop inemesịt nditọn̄ọ ndikwọrọ ikọ nnọ mme owo ke ufọk ke ufọk. Ima isisan̄a ke ukot ke n̄kpọ nte hour iba isinyụn̄ iwat ke enan̄-mbakara ndusụk ini ika obio oro ekerede Carrillo man ikosop idem ye Mme Ntiense eken oro ẹkedude do. Anatolio okosụk esidedi ufọk nnyịn edikpep nnyịn Bible. Ekem ẹma ẹnịm mbono esop ke ufọk nnyịn ndien owo itiaita ẹkesidụk. Nte ini akakade, kpukpru mmọ ẹma ẹna baptism. Ikebịghike, otu emi ama akabade ekpri esop oro n̄kpọ nte owo 20 ẹkebuanade.

Ndinam Utom Abasi Ofụri Ini

Nte ini akakade, n̄kọk itieutom Mme Ntiense Jehovah ke Costa Rica ama ọdọhọ mbon oro ẹkekemede, ete ẹtọn̄ọ utom ukwọrọikọ ofụri ini nte iso utom mmọ. Mma ntọn̄ọ utom oro ke 1957. Ke akpanikọ, utom emi ama enem mi ọsọn̄! Mma nsisan̄a ediwak hour man n̄kosobo ye mme owo ke obio-in̄wan̄. Ndusụk ini, mme owo ikesimaha ndikop ukwọrọikọ mi. Ẹma ẹda ofụt ẹdịghe mi uwem, ke nsụhọde n̄kaha ikata, ẹte ntịn̄ owo emi ndide ye se nyomde.

Ke iduọk isua 1950, ata ediwak usụn̄ ẹkedi mme afan̄ emi ẹbede wilderness, ndien ama esisọn̄ nnyịn ndisan̄a do n̄kosobo ye mme owo. Ikesiwat enan̄-mbakara ika ndusụk ebiet. Ima isisan̄a ke mme akpa ibe isinyụn̄ ina ke usụn̄ ndusụk ini. Ọbọn̄ ikesiyakke owo ọbọ emem. Nnyịn ikesidehe idap ifre idem enyịn ke ntak urụkikọt ye fiom. Kpa ye kpukpru emi, mma nsinen̄ede n̄kop inemesịt ndin̄wam mme owo ẹkpep ẹban̄a Jehovah Abasi. Sia n̄kekemede ndikpep mme owo Bible, mma nsikop inemesịt ye uyụhọ ke ini nnyọn̄de ndi ufọk. Ndikwọrọ ikọ nnyụn̄ n̄kpep Bible kpukpru usen ama anam nnen̄ede mma Jehovah Abasi nnyụn̄ nsan̄a n̄kpere enye.

Nte ini akakade, ẹma ẹnọ mi mme utom en̄wen. Mma nsida urua kiet kiet nsan̄a ke nsio nsio ebiet nse nnyụn̄ nsọn̄ọ mme esop idem ke se ibede isua duop. Kpa ye oro unana nsọn̄idem mîkayakke nsisan̄a aba nse mme esop, mmokop inemesịt ndika iso nnam n̄kpọ Abasi nte ọkwọrọikọ ofụri ini.

Afanikọn̄ Ọtọn̄ọ

Ekem ke 1971, ke ini n̄kodude ke Nicoya, mma n̄ka n̄kese mbonubon nnyịn. Ke ini n̄kodụkde ufọk, mma n̄kụt eka mi oro ekedide isua 80 anade ke isọn̄ufọk. Ẹma ẹtop enye ke ikan̄ ẹnyụn̄ ẹkịm ke ikwa. Enye okosụk en̄wen̄wek ke ini n̄koyomde ndimenede enye. Ikebịghike, enye ama akpa odoro mi ke ubọk. Mma nse n̄kanade nnyụn̄ n̄kụt etemudia oro akasan̄ade ye idịbe ọfiọn̄ itiaita akpade ana do ke isọn̄ufọk utemudia. Ikokụreke ke oro. Ẹma ẹwot Ntiense kiet ke obio oro ẹnịm ke kọridọ ufọk nnyịn, ẹnyụn̄ ẹwot eyen etemudia oro ẹnịm ke itie uyeremmọn̄. Ẹketotop ẹnyụn̄ ẹkịm kpukpru mmọ ẹwot afai afai. Anie ikpanam utọ enyene-ndịk n̄kpọ oro, ndien nso ikpanam enye anam oro?

Nte nsan̄ade ndụk esa, mma n̄kụt ete mi anade ke isọn̄. Ẹma etop enye ibuot edi enye ikakpaha kan̄a! Mma nsọsọp mfehe n̄ka ufọk udọ udọ eka mi oro akadade minit 15 ndikesịm, nnyụn̄ n̄kokop ke ẹma ẹwot n̄wan kiet ye eyen esie ke ufọk oro. Mbọribọ ama omụm mi ndikop ke eyen eyeneka mi oro ekedide isua 17, emi mîkedịghe Ntiense Jehovah, oro ọkọdọn̄ọde udọn̄ọ mbeibuot okowot kpukpru owo emi! Enye ama efehe ọwọrọ ke obio. Mme bodisi ẹma ẹtọn̄ọ ndiyom enye, ndien idụhe abiatibet oro akanam ẹyomde ntre ke ofụri Costa Rica.

Mbụk emi ama asuana ke ofụri idụt. Ke urua kiet ama ekebe, mme bodisi ẹma ẹkụt enye. Enye ama akama akamba ikwa ye ata okopodudu ikan̄ oro ẹkenyamde ẹnọ enye kpa ye oro ẹkefiọkde ke ibuot esie ifọnke. Ẹma ẹtop eyen eyeneka mi oro ẹwot ke adan̄aemi ẹkedomode ndimụm enye.

Ke ini oro ẹkesụk ẹyomde enye, ediwak owo ẹma ẹdọhọ mi mfehe n̄wọrọ ke obio mbak enye editiene owot mi. Mma nsịn n̄kpọ emi ke akam sia n̄koyomde ndidu ke obio man nse mban̄a mbonubon nnyịn oro ẹkesụhọde, ye mbon eken ke esop. Ntre n̄kọwọrọke.

Mma Nsobo Mme Afanikọn̄ Efen Efen

Ete mi okodu uwem isua kiet kpọt. Ke isua oro eketienede, mfịna en̄wen oro eketịbede ama anam ẹwot adiahaeka mi oro ekedide anam-akpanikọ asan̄autom Jehovah Abasi. Mbonubon nnyịn ẹma ẹnen̄ede ẹfụhọ n̄kpa esie. Inua ikemeke nditịn̄ orụk mfụhọ oro nnyịn ye mme ufan nnyịn ikofụhọde. Ke ofụri ini mfịna oro, mma nnen̄ede mberi edem ke Jehovah nnyụn̄ n̄ka iso mben̄e enye ọnọ mi odudu.

Ke 1985, mma ntiene ndụk ufọkn̄wed usen ita oro ẹkedade ẹnọ mbiowo Mme Ntiense Jehovah ukpep, ke ibuot obio San José. Ke ẹma ẹkekụre, ukpep oro ama enen̄ede ọsọn̄ọ itie ebuana mi ye Jehovah. Ke usenubọk Monday, mma n̄ka ndidụk bọs nnyọn̄. Nte nsụk nsan̄ade n̄ka, mbon afai ẹma ẹmụm mi, ẹsịn mi afia itọn̄ ẹnyụn̄ ẹbọ mi se n̄kakamade. Sia eketịbede usọp usọp, n̄kekemeke ndikụt mmọ iso. N̄kpọ emi ikayakke n̄kọm mme owo nte n̄kesikọmde ke ido mbon Costa Rica. Mi ke mbahade obio ukara Guanacaste, irenowo ẹsifiori n̄kpo ke ini ẹkụtde ẹnyụn̄ ẹkọmde kiet eken, ẹsinam ntem man mme owo ẹfiọk ke mmimọ imedi. Mma nsitiene mmọ mfiori ntre, edi ke mbon n̄wo oro ẹma ẹkewo mi, n̄kekemeke aba ndinam ntre.

Ke 1979, mma ndọ Celia, emi ekedide Ntiense Jehovah ke esop mbọhọ oro. Celia ama ama Bible etieti. Nnyịn ima isikot inyụn̄ ikpep Bible ọtọkiet kpukpru usen. Edi n̄kpọ mfụhọ nditịn̄ ke udọn̄ọ kansa ama owot enye ke July 2001. Mmesikop ndobo ndusụk ini, edi idotenyịn ediset ke n̄kpa esifiak ọsọn̄ọ mi idem.—John 5:28, 29.

Mmokop Idatesịt kpa ye Mme Idomo

Okposụkedi oro etiede nte ke n̄kpọ mmọn̄eyet oro nsobode akan eke mbon en̄wen, nsida mme idomo emi nte ifet ndibuọt idem nnyụn̄ nsọn̄ọ nda nnam n̄kpọ Jehovah. (James 1:13) Mmesiti idemmi ke “ini ye unọmọ” ẹsitịbe ẹnọ kpukpru nnyịn, ndien emi esin̄wam mi nsọn̄ọ nda ke mme ini ntem. (Ecclesiastes 9:11) Mmesiti n̄ko ke idu ke “ndiọk eyo” emi mme owo ẹtiede obom obom, afai afai, ẹnyụn̄ ẹnana mfara ke idem. (2 Timothy 3:1-5) Mmesiti uwụtn̄kpọ Job n̄ko. Kpa ye ofụri ufen oro enye ọkọbọde—n̄kpan̄a nditọ esie, udọn̄ọ esie, ye inyene esie nditak—Job ama ọsọn̄ọ ada ọdọhọ ete: “Ekọm enyene Jehovah.” Nsọn̄ọnda Job ama anam Jehovah enen̄ede ọdiọn̄ enye. (Job 1:13-22; 42:12-15) Se Bible etịn̄de emi anam mi n̄ka iso n̄kop idatesịt kpa ye oro nsobode ediwak idomo.

Jehovah esin̄wam mi nti enye ke n̄kpọ ekededi oro nnamde. Ndikot Bible kpukpru usen anam mi nnen̄ede n̄kop ndọn̄esịt, onyụn̄ anam mi nsọn̄ọ nda nyọ. Ke ini mbọn̄de akam nnọ Jehovah, mmesinyene “emem Abasi emi akande kpukpru ekikere.” (Philippi 4:6, 7) Emi esinam nnyene ifụre. Ndidụk nnyụn̄ ntiene mbuana ke mme mbono esop Christian esisọn̄ọ mbuọtidem mi.—Mme Hebrew 10:24, 25.

Okposụkedi emi ndụkde idem akani owo, mmọkọm Jehovah nte enye osụk ọnọde mi odudu ndinam utom ye Mme Ntiense eken, ndikpep Bible ye mbon en̄wen, ndinyụn̄ ntiene mbuana ke utom ukwọrọikọ. Ndinam n̄kpọ nnọ mme owo ke mme utọ usụn̄ emi anam mi n̄keme ndiyọ. Mmenen̄ede n̄kọm Jehovah ke ofụri esịt kpa ye oro mme afanikọn̄ ẹsịmde mi.a

[Ikọ Idakisọn̄]

[Se ẹwetde ke ikpọ abisi ke page]

Ndikot Bible ke usen ke usen anam nnen̄ede n̄kop ndọn̄esịt onyụn̄ ọnọ mi odudu ndiyọ

[Ndise ke page 19]

Ini oro n̄kọtọn̄ọde-tọn̄ọ ndinọ utịn̄ikọ Bible

[Ndise ke page 20]

Ndu ke an̄wautom ke ini mmen̄kodụkke kan̄a idem akani owo