Ọyọhọ Otu 129 Ẹkụre Ukpep ke Gilead

“Usen Mbufo Edi Emi”

KE September 11, 2010, se ikperede owo 8,000 ẹma ẹdụk akpan edinam ukụre ukpep ọyọhọ otu 129 eke Ufọkn̄wed Enyọn̄-Ukpeme Ukpep Bible Eke Gilead. Samuel Herd emi edide owo Otu Ukara Mme Ntiense Jehovah ama ọdọhọ nditọ ufọkn̄wed emi ete: “Usen mbufo edi emi. Nnyịn idi mi nditiene mbufo n̄kop inemesịt!”

“Utọn̄ Emi Okopde”

Brọda Herd ekeberede edinam emi ke ndineme ntak emi oyomde kpukpru Christian ẹda utọn̄ mmọ ẹnam n̄kpọ nte ọfọnde, oro edi, ẹda ẹkop Ikọ Abasi. (Mme N̄ke 20:12) Enye ama ọdọhọ nditọ ufọkn̄wed oro ete: “Ke ọfiọn̄ ifan̄ emi ẹbede, mbufo ẹma ẹkpan̄ utọn̄ ẹnọ Jehovah, ẹyenyụn̄ ẹka iso ndinam emi ke nsinsi.”

Didie ke mbufa isụn̄utom emi ẹkeme ndida utọn̄ mmọ nnam n̄kpọ nte ọfọnde? Enye ọkọdọhọ ke mmọ ẹdinam emi ke ndikpan̄ utọn̄ nnọ Ikọ Abasi. Enye ama adian do ete: “Ẹyeneme ediwak n̄kpọ ke edinam emi, ndien emi eyetịm mbufo idem ọnọ utom isụn̄utom.”

“Buọt Idem ye Jehovah ke Ofụri Esịt Fo”

Gerrit Lösch emi edide owo Otu Ukara ekeneme ibuotikọ emi anamde owo ekere n̄kpọ mi. Enye ama ọnọ nsio nsio mbụk aban̄a nte ikọt Abasi, ke eset ye idem idahaemi, ẹbuọtde idem ye Jehovah.

Brọda Lösch ama owụt ke kpasụk ntre ke “mme isụn̄utom ẹkpenam utom mmọ ke usụn̄ emi owụtde ke imọbuọt idem ye Jehovah.” Enye ọkọdọhọ ete: “Emekeme ndikere ete, ‘ndi nyekeme ndikpep obufa usem? Ndi nyekeme ndidu uwem nte mbon efakutom mi? Ndinam didie ke ini itọn̄ ufọk ọdọn̄de mi?’” Enye ọkọdọhọ nditọ ufọkn̄wed emi ke ibọrọ ofụri mbụme emi edi: “Buọt idem ye Jehovah.”

Brọda  Lösch ama okot Mme N̄ke 14:26 emi ọdọhọde ete: “Ndibak Jehovah anam owo enyene ọkpọsọn̄ mbuọtidem.” Iyenen̄ede ibuọt idem ye Jehovah edieke itiede ikere adan̄a nte enye ọdiọn̄de nnyịn.

Bible ọdọhọ ke owo emi ọbuọtde idem ye Jehovah “ayakabade etie nte eto eke ẹtọde ke mben ediwak mmọn̄, oro ọdọn̄de orụn̄ esie ke mben akpa mmọn̄; ndien enye idikwe ini emi ufiop edide, edi ikọn̄ esie eyesehe.”—Jeremiah 17:7, 8.

Nso ke emi ọwọrọ? Brọda Lösch ọkọdọhọ ke ‘oyom mmọ ẹbuọt idem ye Jehovah inamke n̄kpọ m̀mê nso itịbe.’

“Kpebe Mme Anam-Akpanikọ Angel”

Ibuotikọ emi ke Stephen Lett emi edide owo Otu Ukara ekeneme. Mme angel ẹnịm nti uwụtn̄kpọ ẹnọ nnyịn. Brọda Lett ọkọdọhọ ke “odot ikpebe kpukpru se Bible etịn̄de aban̄a mmọ.” Ekem enye ama asiak nti edu inan̄ emi mme angel ẹnyenede emi nnyịn ikpekpebede, oro edi, ime, nsụhọdeidem, edinọ un̄wam, ye nsọn̄ọnda.

Bible ọdọhọ ke angel kiet ama an̄wana ye ‘ọbọn̄ Persia’—ata okopodudu demon—ke ofụri urua ita. (Daniel 10:13) Angel oro ama eme ime. Brọda Lett ama owụt ke mme Christian n̄ko ẹnyene “en̄wan ndin̄wana, . . . ye odudu ndiọi spirit.” (Ephesus 6:12) Enye ama ọdọhọ nditọ ufọkn̄wed oro ete “ẹsịn idem ẹn̄wana ndinam utom.”

Ke ini Manoah ete Samson okobụpde angel enyịn̄ esie, angel oro ama esịn ndisiak enyịn̄ esie nnọ Manoah. Angel oro ama osụhọde idem. (Judges 13:17, 18) Brọda Lett ama ọdọhọ nditọ ufọkn̄wed oro ete: “Ke ini owo otorode fi akaha, da ata nsụhọdeidem dọhọ enye akam ọkọm Jehovah ye esop esie.”—1 Corinth 4:7.

Ke ini Jesus okodude ke In̄wan̄ Gethsemane esisịt ini mbemiso enye akpade, ‘angel kiet ama edisọn̄ọ enye idem.’ (Luke 22:43) Un̄wam ke enye ọkọnọ Jesus emi. Brọda Lett ama ọdọhọ nditọ ufọkn̄wed oro ete: “Ẹbọn̄ akam ẹnyụn̄ ẹnen̄ede ẹdomo ndifiọk se mme owo ẹnen̄erede ẹyom ke efakutom mbufo, ndien Jehovah ayanam mbufo ẹkeme ndin̄wam mmọ.”

Sia edide ibat ibat mme angel ẹketiene Satan ẹsọn̄ ibuot ye Abasi, nnyịn imekeme ndidọhọ ke ata ediwak angel ẹnịm ata eti uwụtn̄kpọ nsọn̄ọnda ẹnọ nnyịn.—Ediyarade 12:4.

Brọda Lett ama esịn udọn̄ ọnọ nditọ ufọkn̄wed oro ete, “Ẹtie nte mme anam-akpanikọ angel. Ẹn̄wana ye Devil. Ẹbiọn̄ọ enye, ndien enye ẹyefehe.”—James 4:7.

N̄kpọ Ita En̄wen Oro Ẹkenamde

“Yak Jehovah Edi Akwa Itiat Esịt Mbufo.” Gary Breaux, emi edide owo Kọmiti N̄kọk Itieutom United States, ekeneme ibuotikọ emi. Ẹkeda ibuotikọ emi ẹto Psalm 73:26. Enye ama an̄wam nditọ ufọkn̄wed emi ẹkụt ntak emi oyomde mmọ ẹberi edem ke Jehovah. Didie ke Jehovah edi akwa itiat? Brọda Breaux ọkọdọhọ ete: “Akwa itiat ekeme ndimụm mbak babru n̄kama ke ini ọkpọsọn̄ ofụm ofụmede. Kpasụk ntre ke Jehovah ekeme ndimụm mbufo n̄kama nnyụn̄ n̄kpeme esịt mbufo.” Imọfiọk ke esịt ekeme ndibian̄a nnyịn ke ini isobode idomo. (Jeremiah 17:9) Eyo m̀mê tuep, mbufa udia, ekemmọ isụn̄utom emi owo odụn̄de kiet—ekededi ke otu emi—ekeme ndinam utom isụn̄utom odorode owo. Enye ama afiak ọdọhọ ete: “Mbufo ẹyesobo mme idaha emi ẹdiyomde mbufo ẹnam ubiere. Ndi ẹyebiere se inemde Jehovah esịt? Edieke ẹdinamde ntre, Jehovah eyedi akwa itiat esịt mbufo. Enye eyenen̄ede ikpatisan̄ mbufo.”

“Ndi Mbuọtidem Mbufo Okpon Ekem Ndinam Mbufo Ẹdebi Ikpat ke Mmọn̄?” Sam Roberson emi edide andikpep ke ufọkn̄wed Gilead ekeneme ibuotikọ emi otode Joshua ibuot 3 mi. Didie ke nditọ Israel ẹkekeme ndibe Akpa Jordan emi mmọn̄ ọkọtọde ọyọhọ mben? Jehovah ama ọdọhọ Joshua owụk mme oku ete “ẹtuak ẹda ke Jordan.” Enye ọkọdọhọ mmọ ete: “Ke ndondo oro ekaikpat mme oku oro . . . ẹtụkde mmọn̄ Jordan, mmọn̄ Jordan oro eyesịbe, . . . enye ayatuak ada nte ukpehemmọn̄.” (Joshua 3:8, 13) Brọda Roberson ama ọdọhọ nditọ ufọkn̄wed oro ete: “Mbufo ẹyesobo mme n̄kpọ oro ẹditiede nte Akpa Jordan, ndien edieke mbufo mîkpemeke, mmọ ẹkeme ndinam mbufo ẹtaba edidiọn̄ Abasi.” Ke uwụtn̄kpọ, nso ke mmọ ẹdinam edieke ẹnyenede mfịna ye ekemmọ isụn̄utom? Enye ọkọdọhọ ete: “Ẹse utom mbufo ẹnam; ẹkûse owo. Edieke ẹnyenede ukem mbuọtidem emi akanamde nditọ Israel ẹkeme ndibe Akpa Jordan, Jehovah ayan̄wam mbufo ẹbe n̄kpọ ekededi emi etiede nte Akpa Jordan.”

“Nam Uduak Fo Ọsọn̄ọ Ada.” Ibuotikọ emi ke William Samuelson emi edide andikpep ke ufọkn̄wed Gilead ekeneme. Utịn̄ikọ esie okoto Mme N̄ke 16:3, emi ọdọhọde ete: “Kpat utom fo nọ Jehovah ndien uduak fo ọyọsọn̄ọ ada.” Brọda Samuelson ama obụp nditọ ufọkn̄wed emi ete: “Ndi ufan̄ikọ emi ọwọrọ ke mbufo inyeneke ubọk ke ndinam uduak mbufo ọsọn̄ọ ada, ke n̄kukụre se ẹnyenede ndinam edi ‘ndikpat utom’ mbufo nnọ Jehovah?” Enye ọkọdọhọ ke idịghe ntre, koro Mme N̄ke 16:1 ọdọhọ ke “uduakesịt edi eke owo.” Enye ama adian do ete: “Jehovah isisịnke owo uduak ke esịt ke utịbe utịbe usụn̄. Enyene idem esinam emi ke idemesie. Edieke ẹkpepde Bible, ẹbọn̄de akam, ẹnyụn̄ ẹnyenede nneme ke ubọk ke ubọk ye n̄kọk itieutom idụt emi mbufo ẹdinamde utom, mbufo ẹyeka iso ẹnyene eti esịt, ndien Jehovah ke idemesie ayanam uduak mbufo ọsọn̄ọ ada.”

Mme Ifiọkutom ye Mme Ndụn̄ọde

Kiet ke otu usụn̄ emi ẹnọde nditọ ufọkn̄wed emi ukpep edi ndinam mmọ ẹtiene mme esop Mme Ntiense Jehovah ke mbọhọ oro ẹnam utom ukwọrọikọ. Mark Noumair, emi onyụn̄ edide andikpep ke ufọkn̄wed Gilead ama anam ndụn̄ọde ye ediwak nditọ ufọkn̄wed onyụn̄ ọdọhọ mmọ ẹtịn̄ ifiọkutom emi mmọ ẹkenyenede ke utom ukwọrọikọ. Mme ifiọkutom emi ẹkenen̄ede ẹwụt nte akam esin̄wamde ẹkụt mbon oro ẹnyenede esịt akpanikọ ke efakutom.

Ke uwụtn̄kpọ, ebe ye n̄wan kiet ẹkeka itie unyamudia. Kiet ke otu mbon emi ẹnamde utom do ama okụt nte mmọ ẹbọn̄de akam. Enye ama asan̄a ekpere mmọ okobụp m̀mê mmọ ẹdi Mme Ntiense Jehovah. Ke ama ọkọfiọk ke mmọ ẹdi Mme Ntiense Jehovah, enye ama etịn̄ ọnọ mmọ ke ete ye eka imọ ẹma ẹkpep imọ akpanikọ edi ke imọ ima iwaha ikpọn̄ usụn̄ tutu ikabiat ibet ndien ẹsịn imọ ke ufọk-n̄kpọkọbi. Ke imọ imoyom ndifiak n̄kpono Jehovah. Enye ama etịn̄ ke mbemiso mmọ ẹkedide itie unyamudia emi ke imọ ima ibọn̄ akam inọ Abasi idọhọ ke imoyom ndikpono Enye nnyụn̄ mfiak ndu eti uwem. Abasi ama ọbọrọ akam esie!

Rudi emi anamde utom ke itieutom emi ẹsibọrọde mme mbụme Bible emi mme owo ẹbụpde ama eneme ibuotikọ emi, “Ẹtabi Ẹnyụn̄ Ẹse Nte Jehovah Ọfọnde.” Enye ama anam ndụn̄ọde ye Wayne Wridgway emi otode Mozambique, anam ye Jason Reed emi otode Chile, onyụn̄ anam ye Kenji Chichii emi otode Nepal. Mmọ mbita ẹdi mme isụn̄utom emi ẹma ẹkekụre ukpep ke ufọkn̄wed Gilead. Nditọete emi ẹma ẹtịn̄ mme n̄kpọ oro mmọ ẹkesobode ke efakutom ke ini mmọ ẹketọn̄ọde utom isụn̄utom obufa. Mmọ ẹma ẹtịn̄ nte ọsọn̄de ndikpep obufa usem, ndidu uwem nte mbon efakutom mmimọ, ye nte itọn̄ ufọk ekesinyụn̄ ọdọn̄de mmimọ. Brọda Chichii ọkọdọhọ ete: “N̄kpọ kiet oro akan̄wamde nnyịn ekedi ndisọsọp nnam ufan ye nditọete ke obufa esop nnyịn. Nte ikesịkde ikpere nditọete ke esop emi, itọn̄ ufọk ikenen̄ekede idọn̄ nnyịn aba.”

Ekem, kpukpru nditọ ufọkn̄wed emi ẹkedide owo 56 ẹma ẹbọ n̄wed itoro mmọ, ndien eyen ufọkn̄wed kiet ama okot leta ekọm emi otụkde owo etieti, emi nditọ ufọkn̄wed emi ẹkewetde. Ubak se mmọ ẹkewetde ẹnọ Otu Ukara edi emi: “Kpukpru nnyịn nditọ ufọkn̄wed emi imenen̄ede ikụt nte mbufo ẹwade idem ẹnọ nnyịn sia ẹmade nnyịn, nte ẹtịmde se ẹkpepde nnyịn, ẹdide ẹdise nnyịn, ẹnyụn̄ ẹnọde nnyịn nti item. Sia mbufo ẹwụtde nnyịn utọ ima emi, nnyịn iyesịn ofụri ukeme ikpebe ima, ime, nsụhọdeidem ye edikere mban̄a mbufo ke efakutom oro idikade.”

[Se ẹwetde ke ikpọ abisi ke page 28]

“Ke ini owo otorode fi akaha, . . . , dọhọ enye akam ọkọm Jehovah”

[Se ẹwetde ke ikpọ abisi ke page 29]

“Mbufo ẹyesobo mme n̄kpọ oro ẹditiede nte akpammọn̄ ke uwem mbufo”

[Chart/N̄wed ndise obio ke page 31]

IDAHA NDITỌ UFỌKN̄WED

Ibat idụt oro ẹtode 9

Nditọ ufọkn̄wed 56

Mme ọdọ ndọ 28

Isua emana ke ẹbaharede ukem ukem 33

Isua ifan̄ tọn̄ọ ẹkena baptism ke ẹbaharede ukem ukem 17.9

Isua oro ẹdude ke utom uyọhọ ini ke ẹbaharede ukem ukem 13.3

[N̄wed ndise obio]

(Ama oyom ndikụt nte enye enen̄erede etie, se n̄wed)

Ẹnọ nditọ ufọkn̄wed ẹka idụt 25 oro ẹdude ke idak emi

IDỤT ORO ẸNỌDE MME ISỤN̄UTOM EMI ẸKA

BOLIVIA

BOTSWANA

BULGARIA

CONGO (KINSHASA)

CÔTE D’IVOIRE

GAMBIA

GERMANY

INDIA

INDONESIA

KENYA

LIBERIA

MACEDONIA

MADAGASCAR

MALAYSIA

MOZAMBIQUE

PANAMA

PERU

POLAND

ROMANIA

SERBIA

SIERRA LEONE

SWAZILAND

TANZANIA

UGANDA

ZIMBABWE

[Ndise ke page 30]

Nditọ Ufọkn̄wed Gilead ẹnam kiet ke otu ifiọkutom oro mmọ ẹkenyenede ke an̄wautom ẹwụt

[Ndise ke page 31]

Ọyọhọ Otu 129 Oro Ẹkụrede Ukpep ke Ufọkn̄wed Enyọn̄-Ukpeme Ukpep Bible Eke Gilead

Ẹtọn̄ọ ke udịm iso ẹnọ nọmba ẹka edem, ẹnyụn̄ ẹtọn̄ọ ke ufien ẹwet enyịn̄ ẹka nnasia ke udịm kiet kiet.

(1) Munaretto, R.; Olofsson, Y.; Budden, K.; Najdzion, L.; Moya, G.; Treviño, G.; Dion, A.; Fleegle, A.

(2) Smith, J.; Michael Raj, J.; Smith, S.; Paramo, A.; McDonald, J.; Deans, M.; Joyal, S.; Watson, L.

(3) Joyal, C.; Crawley, T.; Hacker, D.; Shynkarenko, J.; Knapp, T.; Ayling, J.; Highley, C.; Olofsson, B.

(4) Fitzpatrick, M.; Najdzion, B.; Skallerud, L.; Harris, A.; Harris, S.; Budden, R.; Paramo, Y.; Skallerud, K.

(5) Crawley, B.; Michael Raj, J.; Lodge, A.; Lodge, R.; Herms, N.; Fitzpatrick, J.; Moya, R.; Munaretto, P.

(6) Watson, S.; Deans, M.; Hacker, J.; McDonald, J.; Treviño, J.; Harris, S.; Herms, C.; Harris, P.

(7) Shynkarenko, V.; Highley, T.; Smith, A.; Dion, J.; Ayling, R.; Smith, B.; Knapp, T.; Fleegle, B.