Edikot Bible—Se Isọn̄ọde Mi Idem ke Ofụri Eyouwem Mi

Nte Marceau Leroy obụkde

MMA ndịbe ke ubet mi n̄kot ikọ emi, “Ke editọn̄ọ, Abasi okobot enyọn̄ ye isọn̄.” Ntak emi n̄kedịbede-dịbe n̄kot? Sia ete mi, emi mîkenịmke ke Abasi odu, idimaha ndikụt mi nte n̄kamade Bible.

Akpa ini oro n̄kokotde Bible ekedi oro, ndien ntọn̄ọikọ Genesis oro ama ọtọ mi nte itiat obuma. Mma n̄kere nte, ‘Emi edi ntak emi ibet obot emi ẹsikpade mi idem kpukpru ini ẹdude ke n̄kemuyo!’ Sia emi ekenemde mi etieti, mma n̄kot Bible ọtọn̄ọde ke n̄kanika itiaita okoneyo tutu esịm n̄kanika inan̄ usenubọk. Ntem ke n̄kọtọn̄ọ edu edikot Ikọ Abasi ke ofụri eyouwem mi. Yak ntịn̄ nte edikot Bible ọsọn̄ọde mi idem ke ofụri eyouwem mi.

“Edisikot Enye Kpukpru Usen”

N̄kamana ke 1926, ke Vermelles, obio emi ẹsidọkde ukan̄ ke edem edere France. Ẹkeda ukan̄ nte ata akpan n̄kpọ ke France ke ini ọyọhọ ekọn̄ ererimbot iba. Ntem, sia n̄kedide ọdọk-ukan̄, owo ikoyomke mi ndụk ekọn̄. Edi man n̄keme ndinyene n̄kpọ, mma ntọn̄ọ ndikpep nte ẹkemede ndinam owo etie ke ebiet kiet etịn̄ ikọ ye owo ke ebiet en̄wen, nnyụn̄ n̄kpep mban̄a odudu ikan̄ ilektrik, ndien emi ama anam nnen̄ede mfiọk nte mme ibet obot ẹdude ke n̄kemuyo. Ke ini n̄kedide isua 21, eyen ubet ukpepn̄kpọ nnyịn ama ọnọ mi akpa Bible mi onyụn̄ ọdọhọ ete, “Ọfọn owo okot n̄wed emi.” Ke ini n̄kokotde Bible mma, mma nnen̄ede nnịm ke Bible edi Ikọ Abasi, ke ẹda enye ẹyarade n̄kpọ ẹnọ mme owo.

Sia n̄kekerede ke mme mbọhọidụn̄ nnyịn ẹyema ndikot Bible, mma mbọ idem itiaita. Edi idem ama akpa mi ke ini mmọ ẹkesakde ẹnyụn̄ ẹbiọn̄ọde mi. Mme iman mi emi ẹkenịmde nsunsu ekikere ke akpanikọ ẹma ẹdọhọ mi ẹte, “Ama ọtọn̄ọ ndikot n̄wed emi, edisikot enye kpukpru usen!” Mma n̄kot enye, ndien akananam ntuaha n̄kpọfiọk ndikot enye. Mmonyụn̄ n̄kot enye ke ofụri eyouwem mi.

Sia ndusụk mme mbọhọidụn̄ nnyịn ẹkekụtde ke mmama Bible, mmọ ẹma ẹnọ mi mme n̄wed Mme Ntiense Jehovah oro mmọ ẹkebọde. Mme utọ n̄kpri n̄wed nte One World, One Governmenta (ẹwụtde mi ke usem French) ẹma ẹtịn̄ ntak emi Bible ọdọhọde ke Obio Ubọn̄ Abasi edi n̄kukụre idotenyịn ubonowo. (Matt. 6:10) Mma nnen̄ede mbiere ndibuana idotenyịn emi ye mbon en̄wen.

Kiet ke otu akpa mbon emi ẹkebọde mi Bible ekedi Noël, ufan mi toto ke ini nditọwọn̄. Sia enye ekedide ata eyen Catholic, enye ama odiomi man ikosobo ye ete emi ọkọbọde ukpep ndikabade ndi oku. Idem ama enyek mi, edi mma mfiọk ke ini n̄kokotde Psalm 115:4-8 ye Matthew 23:9, 10 nte ke Abasi akpan owo ndida ndisọi mbiet ntuak ibuot ye ndikot mme ọkwọrọikọ udorienyịn̄ ido ukpono. Emi ama ọnọ mi uko ndida nnọ obufa ido ukpono mi. Emi ama anam Noël ọbọ akpanikọ onyụn̄ edi Ntiense oro anamde akpanikọ tutu mfịn emi.

Mma n̄ka n̄ko n̄kese adiahaeka mi. Ebe esie ama enyene mme n̄wed ubụpekpo, ndien mme demon ẹma ẹsifịna enye. Okposụkedi emi n̄kekerede ke n̄kemeke ndinam n̄kpọ ndomokiet ke ntọn̄ọ ntọn̄ọ, mme utọ itie Bible nte Mme Hebrew 1:14 ẹma ẹnam mi mfiọk ke mme angel Jehovah ẹdu ye ami. Ke ini ebe eyeneka mi akadade mme edumbet Bible esịn ke edinam onyụn̄ ọduọn̄ọde kpukpru se ikenyenede ebuana ye mme ndedịbe odudu, mme demon ikesifịnake enye aba. Enye ye eyeneka mi ẹma ẹkabade ẹdi ifịk ifịk Mme Ntiense.

Arthur Emiot, eyen America emi edide Ntiense, ama edi ufọk nnyịn ke 1947. Esịt ama enem mi, ndien mma mbụp enye ebiet emi Mme Ntiense ẹsisopde idem. Enye ama etịn̄ ọnọ mi ke ekpri otu kiet odu ke Liévin, emi edide n̄kpọ nte kilomita duop. Ikememke utom ndinyene ọkpọkọm enan̄ukwak ini oro, ntem ke ediwak ọfiọn̄ n̄kesisasan̄a n̄ka mbono esop nsan̄a nnyọn̄. Ẹma ẹkpan utom Mme Ntiense Jehovah ke France ke isua itiaita. Mme Ntiense 2,380 kpọt ẹkedu mi ke ofụri France—ndien ediwak mmọ ẹkedi nditọ Poland emi ẹkewọrọde ẹdidụn̄ mi. Edi ke September 1, 1947, ukara ẹma ẹfiak ẹnyịme utom nnyịn ke France. Ẹma ẹfiak ẹtọn̄ọ n̄kọk itieutom ke Villa Guibert ke Paris. Sia asiakusụn̄ ndomokiet mîkodụhe ke France, Informant (oro edi, Utom Obio Ubọn̄ Nnyịn) eke December 1947 ama esịne eben̄e emi ẹkesịnde ẹnọ mbon emi ẹyomde ndidi mme asiakusụn̄ ofụri ini, emi ẹdisikwọrọde hour 150 ke ọfiọn̄. (Ẹma ẹsụhọde ibat hour oro ẹdinịm ke 100 ke 1949.) Sia n̄kenen̄erede nnịm ikọ Jesus oro ke John 17:17, “ikọ [Abasi] edi akpanikọ,” mma nna baptism ke 1948, ndien ke December 1949 mma ntọn̄ọ utom usiakusụn̄.

Ndiwọrọ ke Ufọk-N̄kpọkọbi N̄ka Dunkerque

N̄kebịghike ke akpa efakutom mi, oro edi, Agen, ke edem usụk France. Sia n̄kọkpọn̄de utom udọk ukan̄, mma ndot ndidụk ekọn̄. Edi mma nsịn, ntre ẹma ẹkọbi mi. Okposụkedi emi owo mîkayakke mi nnyene Bible, mma mbọ page ifan̄ ke n̄wed Psalm. Ndikot mmọ ama esisịn udọn̄ ọnọ mi. Ke ini ẹkesiode mi ke ufọk-n̄kpọkọbi, mma nnyene ubiere ndinam: Ndi n̄kpetetre utom uyọhọ ini ntọn̄ọ ubon idemmi? Edi se n̄kokotde ke Bible ama an̄wam mi ke n̄kpọ emi n̄ko. Mma ntie n̄kere se Paul ekewetde ke Philippi 4:11-13: “Mmenyene ukeme ndinam kpukpru n̄kpọ ebe ke enye emi ọnọde mi odudu.” Mma mbiere ndika iso nnam utom usiakusụn̄. Ke 1950, ẹma ẹnọ mi n̄ka obufa efakutom—Dunkerque, obio emi mma n̄kọkọkwọrọ ikọ.

Ke ini n̄kesịmde do n̄kenyeneke n̄kpọ ndomokiet. Ẹma ẹbiat n̄kpọ etieti ke obio oro ke ini ọyọhọ ekọn̄ ererimbot iba, ndien ama ọsọn̄ owo ndikụt ufọk. Mma ndọhọ yak n̄ka ufọk ubon kiet ke otu mme ubon emi n̄kesikwọrọde ikọ nnọ, ndien n̄wan enyeneufọk oro ama enen̄ede okop idatesịt ndikụt mi, onyụn̄ ọdọhọ ete: “Oh, Ete Leroy, ọwọrọ ẹma ẹsana fi ẹyak! Ebe mi ete ke ekpedi utọ irenowo nte afo ẹwak, ke owo ikpan̄wanake ekọn̄.” Mmọ ẹma ẹnyene ufọkisen, ntre ẹma ẹnọ mi ebiet ndụn̄ tutu esịm ini emi mme owo ẹsidide ẹdise obio. Kpa usen oro, Evans eyeneka Arthur Emiot ama ọnọ mi utom.b Enye ekesikabade ikọ ke esụkmbehe, ndien enye okoyoyom owo emi edisikpemede nsụn̄ikan̄ okoneyo. Enye ama ada mi ebịne kiet ke otu etubom nsụn̄ikan̄. Ke ẹma ẹkesio mi ke ufọk-n̄kpọkọbi, n̄kebiet ọkpọ-ayan̄. Ke ini Evans eketịn̄de se ikanamde ntie ntre, etubom oro ama ọdọhọ mi n̄kosio udia ke ekebe ntụhube nda n̄n̄wam idem. Usen kiet oro, ẹma ẹnọ mi ufọk, utom, ye udia! Emi ama anam mi nnen̄ede nnyene mbuọtidem ke ikọ Jesus oro odude ke Matthew 6:25-33.

Akana ami ye Simon Apolinarski, nsan̄a usiakusụn̄ mi, ikoyom ufọk en̄wen ke ini emi mme owo ẹsidide ẹdise obio ama ebe, edi ima ibiere ndika iso ndu ke efakutom nnyịn. Ẹma ẹnọ nnyịn ebietidụn̄ ke akani ufọk horse, emi nnyịn ikesinade ke matras mbiet. Ikesida ofụri usen ikwọrọ ikọ. Ima ikwọrọ ikọ inọ enyene ufọk ufene oro, ndien enye ekedi kiet ke otu ediwak owo oro ẹkebọde akpanikọ. Ikebịghike ẹma ẹmịn̄ ibuotikọ kiet ke n̄wedmbụk n̄kpọntịbe edem oro ẹdụri mbon Dunkerque utọn̄ ẹban̄a nte “utom Mme Ntiense Jehovah atarade ke n̄kann̄kụk oro.” Edi ami ye Simon ye asuanetop ifan̄ kpọt ikodu do! Ke ini n̄kpọ ọkọsọn̄de ye nnyịn, ima ibọ nsịnudọn̄ ke ndikere mban̄a idotenyịn emi mme Christian ẹnyenede ye nte Jehovah esisede aban̄a nnyịn. Ifịk ifịk mme asuanetop 30 ẹkedu ke Dunkerque ke 1952 ke ini ẹkenọde mi n̄ka efakutom en̄wen.

Ẹtịm Mi Idem Ẹnọ Mme Ifetutom En̄wen

Ke mma n̄kodu esisịt ke Amiens, ẹma ẹmek mi n̄kedi akpan asiakusụn̄ ke Boulogne-Billancourt, ke mbọhọ Paris. Mma nnịm ediwak ukpepn̄kpọ Bible, ndien nte ini akakade ndusụk mbon oro n̄kekpepde n̄kpọ ẹma ẹdụk utom uyọhọ ini ye utom isụn̄utom. Akparawa kiet emi ekekerede Guy Mabilat, ama ọbọ akpanikọ onyụn̄ akabade edi esenyịn circuit ndien ekem edi esenyịn district. Nte ini akakade, enye ama ese aban̄a utom edibọp itie umịn̄n̄wed ke Bethel emi odude idahaemi ke Louviers, emi oyomde usụn̄ ọkpọn̄ Paris. Ndisineme Bible ndien ndien ye mme owo ke an̄wautom anam Ikọ Abasi enen̄ede osụhọde odụk mi esịt, anam esịt adat mi, onyụn̄ anam mi n̄keme ndinọ ukpep nte ọfọnde.

Ekem ke 1953, ke mbuari, ẹma ẹmek mi esenyịn circuit ke Alsace-Lorraine, kpa ikpehe emi ẹkesịbede ẹsịn ke Germany utịm ikaba ọtọn̄ọde ke 1871 esịm 1945. Ntem, akana n̄kpep ndisem German ọfọn. Ke ini n̄kọtọn̄ọde utom circuit, ibat ibat ubomisọn̄, ekebe ndise, ye ukwak utaip n̄wed ẹkedu ke ikpehe oro, ndien ekebe ukopikọ ye kọmputa ikodụhe. Edi oro ikanamke mi ntre ndikop inemesịt m̀mê inem uwem. Ke nditịm ntịn̄, ini oro ke n̄kokop idatesịt n̄kan. Ndinam item Bible oro ọdọhọde inam ‘enyịn nnyịn enen̄ede ese,’ ọkọwọrọ ke mme n̄kpọ oro ẹwọn̄ọrede mme owo ntịn̄enyịn ẹkpọn̄ ndinam n̄kpọ Jehovah ikawakke ini oro nte idahaemi.—Matt. 6:19-22.

Mbono “Edikan Obio Ubọn̄” emi ẹkenịmde ke Paris ke 1955 edi edinam oro mmen̄kemeke ndifre. Do ke n̄kokụt Irène Kolanski, eyenan̄wan emi akakabarede edi n̄wan mi; enye ama ọtọn̄ọ utom uyọhọ ini isua kiet mbemiso ami. Ete ye eka esie emi ẹketode Poland ẹma ẹdi ifịk ifịk Mme Ntiense ẹbịghi. Adolf Weber akaka ekese mmọ ke France. Enye ekesidiọn̄ flawa Brọda Russell, ndien ekedi Europe ndikwọrọ eti mbụk. Mma ndọ Irène ke 1956, ndien enye ama asan̄a ye ami ke utom circuit. Enye emenen̄ede ọnọ mi ibetedem ke adan̄a ediwak isua emi ẹbede.

Ke isua iba ẹma ẹkebe, n̄kpọ en̄wen ama etịbe ke mbuari—ẹma ẹmek mi esenyịn district. Edi ke ntak emi nditọete iren emi ẹdotde mîkawakke, mma nsisụk n̄ka iso n̄kese mme esop nte esenyịn circuit. N̄kpọ ama awak ọnọ mi ini oro tutu! Ke adianade ye ndikwọrọ hour 100 ke ọfiọn̄, kpukpru urua n̄kenyene ndinọ utịn̄ikọ, n̄ka n̄kese otu ukpepn̄kpọ n̄wed esop ita, ndụn̄ọde n̄wetnnịm n̄kpọ esop, nnyụn̄ n̄wet n̄kpọ mban̄a esop. N̄kpanam didie ndep ifet nda n̄kot Ikọ Abasi? Mma n̄kụt n̄kpọ kiet oro n̄kekemede ndinam—mma n̄kịbi ndusụk ikọn̄ akani Bible n̄kama nsan̄a. Ini ekededi oro n̄ketiede mbet owo mma nsisio ikọn̄ Bible oro n̄kot. N̄kpri ini oro n̄kesidade n̄kot Bible do ama ọsọn̄ọ mi idem ndika iso ke utom mi.

Ke 1967, ẹma ẹkot mi ye Irène ẹte ididi mbonubon Bethel ke Boulogne-Billancourt. N̄kọtọn̄ọ utom ke Itieutom Utịmutom, ndien ke isua 40 oro ẹbede nsụk nnam utom do. Utom oro mmade n̄kan edi ndisibọrọ mme leta oro ẹwetde ẹbụp mme mbụme Bible. Esịt esinem mi didie ntem ndisinen̄ede ndụn̄ọde Ikọ Abasi nnyụn̄ ‘n̄n̄wana nnọ eti mbụk’! (Phil. 1:7) Esinem mi n̄ko ndinịm utuakibuot usenubọk mbemiso idiade udia usenubọk. Ke 1976, ẹma ẹmek mi ẹsịn ke Kọmiti N̄kọk Itieutom France.

Mfọnn̄kan Usụn̄ Uwem

Okposụkedi oro nsobode mme idomo, akakan idomo emi akanam esịmde mi edi idahaemi, emi usọn̄ ye unana nsọn̄idem mîyakke mi ye Irène inam se ikpanamde. Kpa ye oro, ndikot nnyụn̄ ntie kiet n̄kpep Ikọ Abasi anam nnyịn ika iso inyene idotenyịn. Esịt esidat nnyịn ndidụk bọs n̄ka efakutom nnyịn n̄kabuana idotenyịn emi ye mme owo. Isua 120 emi ami ye n̄wan mi inamde utom uyọhọ ini anam nnyịn isịn udọn̄ ke ofụri esịt inọ kpukpru mbon emi ẹyomde ndidu inem inem uwem idatesịt emi enyenede se ọwọrọde ite ẹnam utom uyọhọ ini. Edidem David ‘ama ọsọn̄’ n̄ko ke ini enye ekewetde mme ikọ Psalm 37:25, edi ukem nte enye, akananam “n̄kwe nte ẹkpọn̄de edinen owo ofụri ofụri.”

Jehovah ada Ikọ esie ọsọn̄ọ mi idem ke ofụri eyouwem mi. Mme iman mi ẹma ẹtịn̄ ẹnịm ke se ikande isua 60 emi ẹbede ke edikot Bible edidi edu ofụri eyouwem mi. Mmọ ẹma ẹnen. Ntre ke edi—kpa edu ofụri usen emi akanam mmentuaha n̄kpọfiọk!

[Mme Ikọ Idakisọn̄]

[Se ẹwetde ẹban̄a ndise ke page 5]

Ami ye Simon

[Se ẹwetde ẹban̄a ndise ke page 5]

Ini emi n̄kedide esenyịn district

[Se ẹwetde ẹban̄a ndise ke page 5]

Utọ akpa Bible oro ẹkenọde mi

[Se ẹwetde ẹban̄a ndise ke page 6]

Ke usen ndọ nnyịn

[Se ẹwetde ẹban̄a ndise ke page 6]

Ami ye Irène imama ndikot nnyụn̄ n̄kpep Ikọ Abasi