Mme Andikot N̄wed Nnyịn Ẹbụp Ẹte . . .

Ndi Mme Ete ye Eka Ẹkpenyene Ndikpep Nditọ Mmọ N̄kpọ Mban̄a Idan̄?

▪ Ediwak ete ye eka ẹsinen̄ede ẹkpeme nditọ mmọ mbak mmọ idimen udọn̄ọ. Ntre n̄ko ke mmọ ẹkpenyụn̄ ẹsịn ofụri ukeme ẹkpeme mmọ mbak mmọ ẹdidu oburobụt uwem. Usụn̄ kiet emi mmọ ẹkemede ndinam emi edi ndikpep mmọ nnennen n̄kpọ mban̄a idan̄. (Mme N̄ke 5:3-23) Enen̄ede oyom ẹnọ nditọ utọ ukpep emi, koro n̄kpọ aban̄ade idan̄ ọyọyọhọ ekebe ndise, Intanet, mme n̄wed, idem ẹdade ẹnam n̄kpọ mbubru.

Diane Levin emi edide prọfesọ ye ewetn̄wed ọdọhọ ete: “Idịghe ndikpep n̄kpọ mban̄a idan̄ edi mfịna. Se nditọ ẹkpepde, isua emana mmọ, ye owo emi ekpepde mmọ mme n̄kpọ emi akam edi mfịna. Ndutịm usuanetop ye nte ẹdude uwem ke n̄kann̄kụk ẹkpep nditọwọn̄ ata idiọkn̄kpọ aban̄a idan̄.”

Mme ete ye eka ẹkpenyene ndikpeme nditọ mmọ mbak oburobụt ekikere oro mme owo ẹnyenede ẹban̄a idan̄ edibiat nditọ emi nte abiatde mme owo ke ererimbot. (Mme N̄ke 5:1; Ephesus 6:4) Ẹkpenyene ndikpep nditọwọn̄ nte idem mmọ etiede, nte mmọ ẹkpekamade idem, ye se mmọ ẹkpenamde man mme oburobụt owo ẹdisabade mmọ. Mbemiso eyen ọtọn̄ọde ndiwọrọ akwaowo, edieke edide eyenan̄wan, ẹkpenyene ndinam enye ọdiọn̄ọ mme ukpụhọde emi ẹdidade itie ke idem esie, ntak emi iban ẹsikụtde itieisọn̄ ye nte ẹsisan̄ade ẹkụt itieisọn̄. Edi edieke edide eyen erenowo, ẹkpenyene ndibabak ntịn̄ nnọ enye nte idem erenowo esibọhọde ọduọhọ ke okoneyo ke ini enye edede idap. Ete ye eka ẹkeme nditọn̄ọ ke ini nditọ mmọ ẹdide ata n̄kpri n̄kpep mmọ nnennen enyịn̄ emi ẹsikotde mme akpan ndido ke idem mmọ. Mme ete ye eka emi ẹmade nditọ mmọ ẹsinam nditọ emi ẹfiọk akpan n̄kpọ ita emi ẹban̄ade mme ndido emi: (1) Mmọ ẹdi akpan itie ke idem owo emi anade ẹdedịp. (2) Mmọ idịghe itie emi mbon en̄wen ẹkpekụtde ẹnyụn̄ ẹtụkde. (3) Owo ikpadaha mme itie emi itịn̄ ikọ ndisịme ndisịme. Nte nditọ ẹkponide, mme ete ye eka ẹkpenyene ndibiere ini emi ọfọnde ẹtịn̄ ẹnọ mmọ nte n̄wan esisan̄ade oyomo.a

Ini ewe ke mme ete ye eka ẹkpetọn̄ọ nneme emi? Ke ini emi ediwak owo mîkpekereke-kere. Eyenan̄wan isua 10 m̀mê emi akam ekpride akan emi ekeme ndikụt itieisọn̄. Idem ekeme nditọn̄ọ ndibọhọ eyen erenowo ke ini edide isua 11 m̀mê 12. N̄kpọ emi ekeme ndinen̄ede mfịna nditọwọn̄ akpan akpan edieke se itịbede emi mîn̄wan̄ake mmọ. Ẹkpenyene ndibabak nnam nditọwọn̄ ẹdiọn̄ọ ke se iditịbede inọ mmọ edi emi ndien ke inyeneke se inamde mmọ. Ini emi ndien ke enen̄ede ọfọn ẹkpep mmọ se ekebe ndise, Intanet, m̀mê n̄wed mîdikpepke mmọ, oro edi, adan̄a nte ọfọnde nditiene se Bible etịn̄de aban̄a idan̄.—Mme N̄ke 6:27-35.

[Ikọ Idakisọn̄]