Ntak Emi Udia-Inọ Mîtreke?

“Owo [akara] owo tutu ọnọ enye unan.”—ECCLESIASTES 8:9.

IKỌ emi owụt nte ukara owo etiede. Ukara owo edi ntak ofụri ufen emi ibọde mi. Ndusụk owo ẹnen̄ede ẹyom ndikpụhọde ererimbot emi nnam enye ọfọn, edi idiọkitọn̄ ye udia-inọ iyakke, ndien emi itọn̄ọke mfịn. Ntak emi n̄kpọ etiede ntem-e? Ntak emi udia-inọ mîtreke? Imọn̄ itịn̄ ntak ita idahaemi.

1. Idiọkn̄kpọ edi ntak.

Bible ọdọhọ ke “kpukpru [owo] ẹdu ke idak idiọkn̄kpọ.” (Rome 3:9) Idiọkn̄kpọ ododụn̄ ye nnyịn nte ata idiọk udọn̄ọ emi owo adade-da amana, emi owo mîkemeke ndikọk. Idiọkn̄kpọ akara owo tọn̄ọ Adam akabiat ibet Abasi. Enye iyakke nnyịn ibọ emem ndomo esisịt. Enye anam ediwak owo ẹma idemmọ kpọt, ẹkere nte ikpenyenede ofụri ererimbot m̀mê nte ikpakarade mbon en̄wen.—Rome 5:21; 7:17, 20, 23, 25.

2. Idiọk ererimbot emi idude mi edi ntak.

Mme owo ẹdiọk itọn̄ etieti ke ererimbot emi inyụn̄ ikereke iban̄a mbon en̄wen. Ndinam utom ye mme adia-inọ anam ndusụk owo ẹtiene ẹdia inọ. Ndusụk owo ẹyom ndikara mbon en̄wen ke odudu. Ndusụk ẹyom inyene ye okụk ofụri ererimbot emi. Ntak edi oro mmọ ẹdiade inọ man ẹnyene kpukpru se mmọ ẹyomde. Utu ke nditre ndụk ye mbon oro ẹtiede ntem, ndusụk owo ẹkam ẹtetiene mmọ ẹdia inọ.—Exodus 23:2.

3. Satan kpa Devil edi ntak.

Satan ke ada “kpukpru mme andidụn̄ isọn̄ otụn usụn̄.” (Ediyarade 12:9) Esinenem enye ndida owo ntụn usụn̄. Enye ekeme ndida n̄kari nnam owo ekere ke idiọkke ndinyene ekpri okụk m̀mê n̄kpọ ifan̄ emi anamde uwem afiak enem tutu owo emi ọtọn̄ọ ndidia inọ.

Ndi oro ọwọrọ ke Satan ekeme ndida nnyịn nnam se enye amama ye nte ke nnyịn ikemeke ndinyan̄a idem? Iyọbọrọ mbụme emi ke ibuotikọ oro etienede.