Ndi Owo Ekeme Nditie Idiaha Inọ ke Ererimbot Emi?
“Nnyịn [imesinam] akpanikọ ke kpukpru n̄kpọ.”—MME HEBREW 13:18.
NNYỊN imekeme ndinam akpanikọ kpa ye oro Satan, idiọk ererimbot, ye idiọkn̄kpọ oro ikadade imana mîyakke nnyịn ibọ emem. Idisan̄a didie inam emi? Se idin̄wamde nnyịn edi ndisan̄a n̄kpere Abasi nnyụn̄ nnam item Bible sia item Bible mîsikpaha mmọn̄. Ẹyak ise iba ke otu item emi.
ITEM BIBLE: “Ẹkûnyụn̄ ẹkabade ẹbiet eyo emi.”—Rome 12:2, Edisana Ŋwed Abasi Ibom.
Owo kiet emi anamde item emi: Guilherme esinam mbubehe ke Brazil, ndien mbubehe oro anam enye oforo etieti. Enye enyịme ke imemke ndinam akpanikọ. Enye ọdọhọ ete: “Owo emi anamde mbubehe ekeme ndisọsọp ntọn̄ọ ndidia inọ. Emi ekeme ndidi sia enye oyomde ndinam mbubehe esie aka iso esene mîdịghe man mme anam-mbubehe eken ẹdikan enye. Ediwak owo ikwe se idiọkde ke owo ndinọ m̀mê ndibọ ubọkedem. Esinen̄ede ọsọn̄ ndinam akpanikọ edieke ọtọn̄ọde-tọn̄ọ mbubehe, onyụn̄ enyenede ediwak n̄kpọ emi akpadade okụk anam.”
Kpa ye emi, Guilherme esinam akpanikọ, itieneke mme owo idia inọ. Enye aka iso ete: “Owo osụk ekeme ndinam akpanikọ ke ererimbot emi udia-inọ okponde ntem. Edi ana enye enen̄ede ama ndinam akpanikọ, onyụn̄ ebiere ndidu eti uwem. Bible anam mi n̄kụt ufọn edinam akpanikọ. Esịt isibiomke owo akpanikọ, n̄kpọ isinyekke enye idem, mme owo ẹsinyụn̄ ẹkpono enye. Mbon emi ẹnamde utom ye enye ẹkeme nditiene nnam akpanikọ.”
ITEM BIBLE: “Mbon oro ẹbierede ndinyene inyene ẹduọ ẹdụk idomo ye ekpọ ye ediwak ndisịme ye ndiọi udọn̄, emi ẹdụride mme owo ẹsịn ke nsobo ye nditaha. Koro ima okụk edi orụn̄ kpukpru orụk idiọkn̄kpọ.”—1 Timothy 6:9, 10.
Owo kiet emi anamde item emi: André esitiene anam utom ọnọ n̄ka mbre ikpa. Isan̄ kiet ke ẹma ẹkebre mbre ẹma, André ama aka ọfis ikpọ owo n̄ka mbre ikpa oro man ọkọbọ okụk utom esie. Mme akama-okụk ke ẹkesụk ẹbat okụk ke ubọk. Sia eyo ama ekekpere ndikụt, akwaowo ama ọsọsọp ekpe kpukpru owo okụk onyụn̄ etiene ekpe André.
André ọdọhọ ete: “Ekedi ke mma n̄kọkpọn̄ do ke n̄kokụt ke okụk oro ẹkekpede mi awak akan se ẹkpekpede. Mma ndiọn̄ọ ke akwaowo oro ididiọn̄ọke owo emi enye ekekpede awak akan se enye ekpekpede. Mbọm esie ama anam mi sia mma mfiọk ke enye edida okụk idemesie ikpe isịn. Ntre, mma mfiak n̄kafaha mbe kpukpru mbon oro ẹkedide ndise mbre ikpa n̄kayak okụk oro nnọ enye. Idem ama enen̄ede akpa enye. Akanam owo ndomokiet inamke utọ n̄kpọ emi inọ enye.”
André aka iso ete: “Ndikanam akpanikọ ama anam akwaowo oro enen̄ede ama mi. Ediwak isua ẹbe tọn̄ọ emi eketịbe, edi ami ikpọn̄ nsụk n̄ka iso nnam utom nnọ n̄ka mbre ikpa emi ke otu kpukpru mbon oro ẹkesinamde utom ẹnọ mmọ. Mmenem esịt sia item Bible anam nnyene eti enyịn̄.”
Enen̄ede enem ndifiọk nte ke Abasi ekeme ndin̄wam nnyịn inam akpanikọ ke idiọk ererimbot emi. Emi iwọrọke ke owo ekeme nditie ke idemesie n̄kpụhọde ererimbot emi. Ererimbot emi abiara ebe se owo ekemede ndidiọn̄. Edi ndi emi ọwọrọ ke owo iditreke udia-inọ tutu amama? Ibuotikọ oro etienede oyowụt nnyịn nte Bible ọbọrọde mbụme emi.
[Se ẹwetde ke ikpọ abisi ke page 6]
“Bible anam mi n̄kụt ufọn edinam akpanikọ.”—GUILHERME
[Se ẹwetde ke ikpọ abisi ke page 6]
“Mmenem esịt sia item Bible anam nnyene eti enyịn̄.”—ANDRÉ