Asiakusụn̄ Emi Mîkokopke Ndịk

KE INI ọyọhọ ekọn̄ ererimbot iba, ikpọ owo ukara ke Sukabumi, ke West Java, ẹma ẹkot Brọda Elias ye Josephine n̄wan esie ẹte ẹdi ibuot itieutom mbonekọn̄ Japan emi mme owo ẹkefehede etieti. Ẹkesikot mbonekọn̄ emi Kempeitai. André ke ẹkebem iso ẹfak mbụme. Ẹma ẹbụp enye ẹte: “Mme Ntiense Jehovah ẹdi mmanie? Ndi mbufo ẹsasua ukara mbon Japan? Ndi ẹdọn̄ fi asan̄a eyep mbon Japan?”

André ama ọbọrọ mmọ ete: “Nnyịn idi mme asan̄autom Ata Ọkpọsọn̄ Abasi, nnyịn inyụn̄ iduehe owo ndomokiet.” Akwaowo ekọn̄ ama ọkọn̄ọde anyan akan̄kan̄ ke ibibene anyan ke enyọn̄.

Enye ama ofiori ete: “Mmekeme ndiwot fi idahaemi!” André ama ekịbi iso ke okpokoro ọbọn̄ akam ke esịt. Ekem, akwaowo ekọn̄ oro ama obom imam onyụn̄ ọdọhọ André ete: “Afo edi ata erenowo!” Ekem enye ama okot Josephine afak mbụme n̄ko. Ke ini enye okokụtde ke Josephine etịn̄ ukem ukem se ebe esie eketịn̄de, enye ama ofiori ete: “Mbufo idịghe mbon uyep. Ẹwọn̄ọ ẹnyọn̄ọ!”

Ke ọfiọn̄ ifan̄ ebede, “nditọete abian̄a” ẹma ẹdori André ikọ; emi ama anam ẹmụm enye ẹkọbi. (2 Cor. 11:26) Enye ama esịne do ke ediwak ọfiọn̄ onyụn̄ ẹsitan̄ mben̄e udia ke kọta emi ekebede ke esịt ufọk-n̄kpọkọbi esie adia. Kpa ye oro, mme ekpeme ufọk-n̄kpọkọbi ikekemeke ndinam enye akan̄ Abasi. Ke ini ẹkeyakde Josephine ekese enye, enye ama esịn iso ke ekpri ufan̄ emi okodude onyụn̄ ọdọhọ sụn̄sụn̄ ete: “Kûkere. M̀mê mmọ ẹwot mi m̀mê iwotke, ndikpọn̄ke Jehovah. Utu ke n̄kan̄ Abasi n̄wọrọ ke itie emi, yak ẹmen mi okpo.”

Ke ọfiọn̄ itiokiet ama ekebe, ẹma ẹmen André ẹka ikpe ke Akwa Esopikpe Jakarta, ekem ẹsana enye ẹyak.

Ke n̄kpọ nte isua 30 ama ekebe, ukara Indonesia ẹma ẹfiak ẹtre utom Mme Ntiense Jehovah. Akwa ekpeibet Manado, ke North Sulawesi, ama okot André ete edi itieutom imọ. Enye ama obụp André ete: “Ndi ọmọdiọn̄ọ ke ẹtre utom Mme Ntiense Jehovah?”

André ama ọbọrọ enye ete, “Mmọdiọn̄ọ.”

Ete oro ama obụp enye m̀mê enye ọmọn̄ etre ndidi Ntiense Jehovah ndien.

André ama esịk ekpere enye, ọkọn̄ ubọk ke esịt, onyụn̄ ọdọhọ ke ọkpọkọm enye asiak imọ esịt osio, ke enye idikemeke ndinam imọ itre ndidi Ntiense Jehovah.

Akwa ekpeibet oro ama ọdọhọ André ọnyọn̄, ikonyụn̄ ifịnake enye aba.

André ama akpa ke 2000 ke ini ekedide isua 85. Enye ama esịn idem anam utom usiakusụn̄ ke isua 60.