Kpeme Idem Mbak Ududa Bible nte N̄kpọ N̄kpemeidem
“IKỌ ABASI enyene uwem onyụn̄ enyene odudu.” (Heb. 4:12) Apostle Paul eketịn̄ ikọ emi ndiwụt ke ikọ Abasi enyene odudu ndisịm owo esịt nnyụn̄ n̄kpụhọde mme owo.
Ke ini mfiakedem oro ẹketịn̄de ẹban̄a ekenen̄erede ọsọn̄ ubọk ke mme apostle ẹma ẹkekpan̄a, mme owo ẹma ẹtọn̄ọ ndinyene ukwan̄ ekikere mban̄a etop Bible. (2 Pet. 2:1-3) Nte ini akakade, ikpọ owo ufọkabasi ẹma ẹtọn̄ọ ndikpep ke Ikọ Abasi enyene odudu mfọni. Prọfesọ Harry Y. Gamble ama ewet n̄kpọ aban̄a nte “ẹkedade mme n̄wed Christian nte n̄kpọ n̄kpemeidem.” Enye ekewet ete ke n̄kpọ nte isua 1,800 emi ẹkebede, ke Origen, Ete Ufọkabasi, ama ọdọhọ ke “ndikop nte ẹkotde edisana ikọ ekeme ndin̄wam owo: edieke ikọ mbia idiọn̄ enyenede odudu, n̄wan̄wadise ikọ edisana N̄wed Abasi.” John Chrysostom emi okodude uwem ke n̄kpọ nte isua 1,750 emi ẹkebede ekewet ete ke “Devil isidehedei isan̄a ikpere ufọk emi Gospel odude.” Enye ama ewet n̄ko ete ke ndusụk owo ẹma ẹsiwet ikọ ke Gospel ẹkọn̄ọ ke itọn̄ nte n̄kpọ n̄kpemeidem. Prọfesọ Gamble ama aka iso ọdọhọ ke Augustine, ekpep ukpepn̄kpọ Ufọkabasi Catholic, “ama enyịme ẹsisịn Gospel John ke idak udotibuot ẹde edieke ibuot ọkọn̄de owo.” Ntem ẹma ẹsida Bible nte n̄kpọ n̄kpemeidem. Ndi ọkpọfọn ada Bible nte n̄kpọ n̄kpemeidem m̀mê ibọk mfọniso?
Idiọk usụn̄ en̄wen emi ediwak owo ẹdade Bible ẹnam n̄kpọ edi ndikụbọde enye n̄ka ebiet ekededi nnyụn̄ n̄kot akpa ufan̄ikọ oro enyịn mmọ okụtde. Mbon emi ẹsinamde n̄kpọ emi ẹkere ke Abasi ekeme ndida oro nteme mmimọ se ikpanamde. Ke uwụtn̄kpọ, Prọfesọ Gamble ọdọhọ ke usen kiet ke Augustine ama etie ke ufọk esie okop nte ekpri eyenọwọn̄ esịnede ke ufọk en̄wen ọdọhọ ete: “Bọ mi kot, Bọ mi kot.” Augustine akada oro nte ke Abasi ọdọhọ imọ ikụbọde Bible ikot akpa ufan̄ikọ emi imọ idikụtde.
Ndi akanam omokop nte edide owo ekenyene mfịna enye ọbọn̄ akam, ekem okụbọde ebiet ekededi ke Bible, ekere ke akpa ufan̄ikọ emi imọ idikụtde ayan̄wam imọ ikọk mfịna imọ? Ekeme ndidi owo emi anamde n̄kpọ emi oyom Bible ada imọ usụn̄, edi idịghe ntre ke Bible esida owo usụn̄.
Jesus ọkọdọhọ mme mbet esie ete ke imọ iyọnọ mmọ “andin̄wam, kpa edisana spirit.” Enye ama adian do ete: “Enye oro eyekpep mbufo kpukpru n̄kpọ onyụn̄ anam mbufo ẹti kpukpru n̄kpọ eke n̄ketịn̄de nnọ mbufo.” (John 14:26) Edi iyomke owo ọfiọk N̄wed Abasi mbemiso enye ekemede ndikụbọde Bible n̄ka ebiet ekededi.
Ediwak usụn̄ odu emi mme owo ẹdade Bible nte n̄kpọ n̄kpemeidem, utọ nte ndikụbọde Bible n̄ka ebiet ekededi n̄kere ke iyenyene ndausụn̄ Abasi ke itie oro. Edi Ikọ Abasi ọdọhọ ke ifọnke ndimụm ndomo. (Lev. 19:26; Deut. 18:9-12; Utom 19:19) “Ikọ Abasi enyene uwem onyụn̄ enyene odudu,” edi ana ida enye inam n̄kpọ ke nnennen usụn̄. Se isin̄wamde owo edi nnennen ifiọk Bible, idịghe ndida Bible nte n̄kpọ n̄kpemeidem m̀mê n̄wed mfọniso. Ndinyene utọ ifiọk emi an̄wam ediwak owo ẹkpọn̄ idiọk uwem mmọ ẹkabade ẹdu eti uwem, ẹkop inem ke ubon mmọ, ẹnyụn̄ ẹdi ufan Jehovah, kpa Andinyene Bible.