Ntak Emi Ẹketọn̄ọde Nsiondi Enyọn̄-Ukpeme Eke Mmemmem Ikọmbakara?
KE EDIWAK isua emi ẹbede, ediwak irenowo ye iban ke ofụri ererimbot ẹbọ ufọn ẹto etop Bible emi ẹsimịn̄de ke Enyọn̄-Ukpeme. Ke July 2011, ẹma ẹsio akpa nsiondi magazine emi ke mmemmem Ikọmbakara. Ẹkewet ke nsiondi oro ẹte: “Ẹyedomo obufa nsiondi emi ẹse ke isua kiet, ndien edieke enye enyenede ufọn, ẹyesika iso ẹmịn̄ enye.”
Idahaemi, nnyịn imokop idatesịt ndisian mbufo nte ke imebiere ndika iso nsio Enyọn̄-Ukpeme emi. Akan oro, nte ini akade ẹyesio Enyọn̄-Ukpeme ke mmemmem usem French, Portuguese, ye Spanish.
SE INAMDE ẸMA ENYE
Ke ndusụk owo ke Edem Usụk Pacific ẹma ẹkebọ mmemmem nsiondi emi, mmọ ẹkewet ẹte: “Idahaemi ndien ke Enyọn̄-Ukpeme enen̄ede an̄wan̄a nditọete.” Ẹkewet ke leta en̄wen ẹte: “Ida ini oro ikesidade iyom ikọ ke n̄wed ukabadeikọ idụn̄ọde mme itie N̄wed Abasi idahaemi inyụn̄ ise nte mmọ ẹnyenede ebuana ye se ikpepde.”
Eyenete an̄wan kiet ke United States emi ama okokụre ufọkn̄wed ntaifiọk ọdọhọ ete: “Mmada isua 18 nsem nnyụn̄ n̄wet ikpọ Ikọmbakara oro ẹsikpepde ke ufọkn̄wed ntaifiọk. Ama emehe mi nditịn̄ ikọ nnyụn̄ n̄kere n̄kpọ ke usụn̄ emi awakde n̄kukọhọ akan nte ekpedide. Mma mfiọk ke ana nnen̄ede nnam ukpụhọde ke nte nsikerede n̄kpọ nnyụn̄ nnamde n̄kpọ.” Idahaemi enye enen̄ede ọfiọk ndikwọrọ ikọ. Enye ekewet ete: “Mmemmem nsiondi Enyọn̄-Ukpeme enen̄ede an̄wam mi. Nte ẹwetde enye mmemmem mmemmem anam mfiọk nte n̄kemede nditịn̄ ikọ ke usụn̄ oro ọsọpde an̄wan̄a owo.”
Eyenete an̄wan kiet ke England emi akanade baptism ke 1972 ekewet ntem aban̄a mmemmem nsiondi Enyọn̄-Ukpeme: “Ke ini n̄kokotde ata akpa nsiondi oro, eketie nte n̄kpọ eke Jehovah etiede mi ke n̄kan̄ odori mi ubọk ke afara etiene mi okot. Eketie nte ete ndikot n̄wed nnọ eyen mbemiso enye odụkde idap.”
Eyenete an̄wan kiet emi odude ke Bethel United States, emi okonyụn̄ anade baptism ke se ikande isua 40 emi ẹkebede, ọkọdọhọ ke mmemmem nsiondi esinam akpanikọ Bible enen̄ede an̄wan̄a imọ. Ke uwụtn̄kpọ, kop mi nte ekebe oro “Some Expressions Explained” (Ndusụk Ikọ Oro Ẹnamde An̄wan̄a) ke nsiondi eke September 15, 2011, akanamde ikọ oro “akwa otu ntiense” ke Mme Hebrew 12:1 an̄wan̄a: “Mmọ ẹma ẹwak tutu owo ikemeke ndibat.” Eyenete emi ọkọdọhọ ete: “Emi ama anam ufan̄ikọ oro enen̄ede an̄wan̄a mi.” Kop se enye ekewetde mi n̄ko aban̄a mbono esop eke urua ke urua: “Idem ọkpọkọm eyenọwọn̄ okokot ibọrọ esie ke mmemmem nsiondi Enyọn̄-Ukpeme emi, iditiehe nte enye okokot sia nte ẹwetde enye oro okpụhọde ye nte ẹwetde nsiondi enye eken emi ata ediwak owo ẹkamade. Ntre otuowo ẹdisụk imama ibọrọ esie.”
Eyenete an̄wan en̄wen ke Bethel ekewet ete: “Esinenem mi ndikop ibọrọ nditọwọn̄ ke esop. Mmemmem nsiondi Enyọn̄-Ukpeme an̄wam mmọ ẹkeme ndibọrọ mbụme ye uko. Ibọrọ mmọ esisịn udọn̄ ọnọ mi.”
Eyenete an̄wan emi akanade baptism ke 1984 etịn̄ nte enye amade mmemmem nsiondi emi ete: “Etie nte n̄kpọ emi ẹkewetde enye ẹnọ mi. Enye anam se n̄kotde ọsọp an̄wan̄a mi. Idahaemi mmekeme ndibọrọ mbụme ke Ukpepn̄kpọ Enyọn̄-Ukpeme uko uko.”
ENYE ENEN̄EDE AN̄WAM MME ETE YE EKA
Eka emi enyenede eyen isua itiaba ọkọdọhọ ete: “Ndisidomo ndinam ediwak udịmikọ an̄wan̄a enye ke ini itịmde idem inọ Ukpepn̄kpọ Enyọn̄-Ukpeme ama esida ini onyụn̄ akak mi.” Didie ke mmemmem nsiondi emi akan̄wam? Eyenete oro ewet ete: “Idem akpa mi ndikụt nte enye esitienede okot ikpehe ekikere, se enye okotde onyụn̄ an̄wan̄a enye. Idem isinyekke enye sia nte ẹwetde nsiondi emi isọn̄ke, ndien mme udịmikọ esie edi mbio mbio. Enye ọtọn̄ọ ndisitịm idem nnọ Ukpepn̄kpọ Enyọn̄-Ukpeme ke idemesie nnyụn̄ nyom mme ibọrọ oro enye edinọde ke mbono esop. Ndien enye esiwụk ntịn̄enyịn ke magazine tutu ukpepn̄kpọ asuana.”
Eka emi enyenede eyenan̄wan isua usụkkiet ekewet ete: “Ke ini edem, nnyịn ikesiteme enye se edibọrọde. Idahaemi enye esiyom ibọrọ ke idemesie. Nnyịn ibiatke aba ini inam n̄kpọ an̄wan̄a enye. Sia nte ẹwetde ikọ mîsọn̄ke ikan enye, Ukpepn̄kpọ Enyọn̄-Ukpeme edinenem enye.”
NSO KE NDITỌWỌN̄ ẸTỊN̄?
Ediwak nditọwọn̄ ẹdọhọ ke ẹkewet mmemmem nsiondi Enyọn̄-Ukpeme ẹnọ mmimọ. Rebecca emi edide isua 12 ọkọdọhọ ete: “Mbọk ẹka iso ẹmịn̄ obufa nsiondi emi!” Enye ama adian do ete: “Mmama nte ẹsịnde ikpehe oro ‘Some Expressions Explained.’ Enye enen̄ede an̄wan̄a nditọwọn̄.”
Nicolette emi edide isua itiaba ekere ntre n̄ko. Enye ọdọhọ ete: “Enyọn̄-Ukpeme ikesisọpke in̄wan̄a mi. Idahaemi mmekeme ndinọ ibọrọ ke idemmi.” Emma ekewet ete: “Enyọn̄-Ukpeme emi enen̄ede an̄wam mi ye eyeneka mi emi edide isua itiokiet. N̄kpọ enen̄ede an̄wan̄a nnyịn idahaemi! Ẹsọsọn̄ọ-o!”
Mmọdo, ata ediwak owo ke ẹbọ ufọn ẹto nsiondi Enyọn̄-Ukpeme emi ẹwetde ke usụn̄ oro ọsọpde an̄wan̄a owo. Enye enyene ufọn, ẹyenyụn̄ ẹka iso ẹmịn̄ enye ye nsiondi enye eken emi an̄wamde ata ediwak owo toto ke 1879.
[Se ẹwetde ke ikpọ abisi ke page 30]
“Ida ini oro ikesidade iyom ikọ ke n̄wed ukabadeikọ idụn̄ọde mme itie N̄wed Abasi idahaemi inyụn̄ ise nte mmọ ẹnyenede ebuana ye se ikpepde”
[Se ẹwetde ke ikpọ abisi ke page 31]
“Idem akpa mi ndikụt nte enye esitienede okot ikpehe ekikere, se enye okotde onyụn̄ an̄wan̄a enye”