IBUOTIKỌ IKPAEDEM | SE AKPANAMDE MAN ESIKOP INEM UTOM
Ndi Ọkpọsọn̄ Utom Edi N̄kpọeset?
Alex anam utom ke kọmpeni emi ẹsimende mbiomo owo ẹka ebiet ekededi oro enye oyomde. Nte enye osụk atan̄de mbiomo ọdọn̄ ke moto itieutom mmọ, enye asiama onyụn̄ ekere ke esịt esie ete: ‘Ntak nnamde utọ ntaha utom emi? Ini ewe ke nditiene ndi owo? Uwem ekpenem etieti edieke n̄kpetiede-tie ndia okụk!’
Ukem nte Alex, ediwak owo mfịn imaha ọkpọsọn̄ utom. Aaron, emi esidiọn̄de moto, ọdọhọ ete: “Ediwak owo imaha utom emi mme owo ẹsede ke usụhọde, ẹsinyụn̄ ẹnam utọ utom oro ke nnam-didie tutu mmọ ẹnyene utom en̄wen.”
Ntak emi ediwak owo mîmaha ndinam ọkpọsọn̄ utom? Ekeme ndidi se mmọ ẹkụtde ke TV, radio, ye n̄wedmbụk n̄kpọntịbe anam, sia ẹsiwak ndinam etie nte udia-uwem ye utom emi owo mîbọhọ ufen ọfọn akan. Matthew, emi esidiọn̄de mme n̄kpọ emi ẹtọn̄ọde ndibiara ke ufọk, ọdọhọ ete: “Mme owo ẹkere ke owo emi anamde ọkpọsọn̄ utom mbemiso enye enyene se adade aka inua idịghe n̄kpọ ndomokiet ke ererimbot emi.” Shane, emi esisede aban̄a ufọkn̄wed onyụn̄ okụtde ẹte ke ẹnịm enye asana, ọdọhọ ete: “Mme owo imaha aba ndisụhọde ntie nnam utom yak ekem okụk emi ẹkpede mmọ.”
Edi ediwak owo oro ẹdide n̄kpọ mfịn ẹdi mbon oro ẹmade ndinam ọkpọsọn̄ utom. Daniel emi edide isua 25 onyụn̄ edide ọbọpufọk ọdọhọ ete: “N̄kere ke ndinam ọkpọsọn̄ utom enen̄ede enyene ufọn, akpan akpan edieke owo enyenede eti ntak ndinam emi.” Andre, emi edide isua 23, esịn ke uyo oro. Enye ọdọhọ ke owo emi mîsịnke idem inam utom ikemeke ndikop inemesịt, ke uwem esikam ododorode utọ owo emi.
Nso inam mme owo nte Daniel ye Andre ẹma ndinam ọkpọsọn̄ utom? Ke nditịn̄ ibio ibio, mmọ ẹnam se Bible ọdọhọde. Bible idọhọke owo etie ifu, akam ọdọhọ ẹsịn idem ẹnam utom. Edi idịghe n̄kukụre se Bible ọdọhọde edi oro. Enye etịn̄ n̄ko se ikpanamde man isikop inem utom nnyịn.
Mme item Bible ewe ikeme ndin̄wam fi esikop inem utom? Mbọk kot ndusụk mmọ ke ibuotikọ oro etienede.