MME MBỤME BIBLE ORO ẸBỌRỌDE
Ntak emi ikpetide n̄kpa Jesus?
Didie ke uwem editie ke ini iso ke emi Jesus ama ekedikpa mi ọnọ nnyịn?—Isaiah 25:8; 33:24
N̄kpa Jesus edi n̄kponn̄kan n̄kpọ oro akanam etịbede ke ererimbot emi. Jesus akakpa man mme owo ẹfiak ẹketie nte Abasi okoyomde mmọ ẹtie. Abasi ikobotke owo man owo edinam idiọkn̄kpọ, ọdọn̄ọ, onyụn̄ akpa. (Genesis 1:31) Idiọkn̄kpọ okoto akpa ete nnyịn, Adam, odụk ererimbot. Jesus akakpa man anyan̄a nnyịn osio ke idiọkn̄kpọ ye n̄kpa.—Kot Matthew 20:28; Rome 6:23.
Abasi ama ama nnyịn tutu enye ọdọn̄ Eyen esie edi isọn̄ edikpa ọnọ nnyịn. (1 John 4:9, 10) Jesus ọkọdọhọ mme anditiene enye ẹsiti n̄kpa imọ. Enye ọkọdọhọ mmọ ẹsikama uyo ye wine ẹnam emi. Ndisiti n̄kpa Jesus kpukpru isua owụt ke imenen̄ede inem esịt nte Abasi ye Jesus ẹmade nnyịn.—Kot Luke 22:19, 20.
Mmanie ẹkpeta uyo ẹnyụn̄ ẹn̄wọn̄ wine?
Akpa ini emi Jesus ọkọdọhọde mbet esie ẹsiti n̄kpa imọ, enye ama etịn̄ n̄kpọ aban̄a ediomi. (Matthew 26:26-28) Ediomi emi ayanam mbet esie ye ibat ibat mbon en̄wen ẹkeme ndika n̄kedi ndidem ye mme oku ke heaven ye Jesus. Okposụkedi emi ata ediwak owo ẹsitide n̄kpa Jesus, mbon emi ẹtienede ẹdụk ediomi emi kpọt ẹsita uyo ẹnyụn̄ ẹn̄wọn̄ wine.—Kot Ediyarade 5:10.
Ke n̄kpọ nte isua 2,000 idahaemi, Jehovah ke emek mbon oro ẹdidide ndidem. (Luke 12:32) Mmọ iwakke edieke ẹmende mmọ ẹdomo ye mbon oro ẹdidude uwem mi ke isọn̄ ke nsinsi.—Kot Ediyarade 7:4, 9, 17.