‘Ẹka Iso Ndikpono Utọ Irenowo Emi’

TOTO ke 1992, Otu Emi Ẹsede Ẹban̄a Utom Mme Ntiense Jehovah ẹma ẹtọn̄ọ ndisimek mbiowo emi ẹnen̄erede ẹnyene ifiọk, ẹnyụn̄ ẹnamde n̄kpọ Abasi ẹbịghi, ẹsịn ke kọmiti itiokiet oro mmọ ẹdude, man ẹsin̄wam mmọ.a Nditọete emi ẹdi “mme erọn̄ en̄wen,” ndien mmọ ẹnen̄ede ẹn̄wam Otu Emi Ẹsede Ẹban̄a Utom Nnyịn. (John 10:16) Mmọ ẹsidụk mbono kọmiti mmọ oro ẹsinịmde kpukpru urua, ẹsinyụn̄ ẹtiene ẹsịn uyo ke se ẹnemede, ẹnyụn̄ ẹtịn̄ se mmọ ẹkerede. Edi Otu Emi Ẹsede Ẹban̄a Utom Nnyịn ẹsibiere se ẹdinamde. Nditọete oro ẹn̄wamde mmọ mi ẹsinam se ẹbierede, ẹnyụn̄ ẹnam utom ekededi oro ẹnọde mmọ. Mmọ ẹsitiene Otu Emi Ẹsede Ẹban̄a Utom Nnyịn ẹka akpan mbono ye ikpọ mbono ke nsio nsio idụt. Ibuot itieutom esinyụn̄ ọnọ mmọ ẹka ẹkese nsio nsio n̄kọk itieutom.

Eyenete kiet emi an̄wamde otu emi toto ke 1992 ọdọhọ ete: “Ke ini nnamde utom oro ẹnọde mi, emi esinam Otu Emi Ẹsede Ẹban̄a Utom Nnyịn ẹnyene ini ẹkpep nnyịn Ikọ Abasi.” Eyenete en̄wen emi an̄wamde otu emi ke se ibede isua 20 ọdọhọ ete: “N̄kekereke ke n̄kpenyene utọ akwa ifet emi.”

Otu Emi Ẹsede Ẹban̄a Utom Nnyịn ẹnọ nditọete oro ẹn̄wamde mmọ ata ediwak utom, mmọ ẹnyụn̄ ẹnen̄ede ẹkop inemesịt ndikụt nte nditọete emi ẹsịnde idem ẹnam utom oro ẹnọde mmọ. Nnyịn ikpakam ika iso ‘ndikpono utọ irenowo emi.’—Phil. 2:29.