Mme Mbụme Oro Mme Andikot Ẹbụpde

Nso iwụt ke owo ikakanke obio Jericho ikụk ke anyan ini?

Joshua 6:10-15, 20 ọdọhọ ke mbonekọn̄ Israel ẹma ẹsan̄a ẹkanade Jericho ini kiet ke usen itiokiet. Ke ọyọhọ usen itiaba, mmọ ẹma ẹsan̄a ẹkanade obio Jericho utịm ikatiaba, ndien Abasi ama anam ikpọ ibibene Jericho ẹduọ. Emi ama anam nditọ Israel ẹdụk Jericho ẹnyụn̄ ẹkan enye. Ndi se mme ọdọkisọn̄ nyom n̄kpọeset ẹkụtde owụt ke owo ikakanke obio Jericho ikụk ke anyan ini nte Bible ọdọhọde?

Ke eyo Bible, mbonekọn̄ ẹma ẹsiwak ndikan obio oro enyenede ibibene n̄kụk, mbemiso ẹn̄wanade ye enye. Ke ini mmọ ẹkande obio ẹkụk ke anyan ini, mbon obio oro ẹma ẹsidia udia oro mmọ ẹkenịmde ẹkpere ndikụre. Ke ini mbonekọn̄ ẹken̄wanade ẹkan obio, mmọ ẹma ẹsitan̄ kpukpru n̄kpọ oro mmọ ẹyomde, esịnede udia oro okosụhọde. Edi mme ọdọkisọn̄ nyom n̄kpọeset ẹma ẹkụt ata ediwak udia ke ndon Jericho. N̄wed oro Biblical Archaeology Review ọdọhọ ete: “Ẹma ẹkụt ata ediwak mbai usiọn̄ ye wheat m̀mê barley. . . . Akananam mme ọdọkisọn̄ nyom n̄kpọeset ikwe utọ n̄kpọ emi ke mme ndon obio Palestine eken. Ẹkesikụt ata esisịt wheat ke mme obio eken, edi ama akpa mmọ idem ndikụt wheat oro akawakde ntre ke ndon Jericho.”

Bible ọdọhọ ke mbonekọn̄ Israel ikatan̄ke wheat oro mmọ ẹkekụtde ke Jericho, koro Jehovah ama ọdọhọ mmọ ẹkûmen n̄kpọ ndomokiet do. (Josh. 6:17, 18) Nditọ Israel ẹkekan Jericho ke ini ukpen̄e, ndien wheat ama odu barasuene ini oro. (Josh. 3:15-17; 5:10) Sia ẹkekụtde ata ediwak wheat ke Jericho, emi owụt ke Bible enen ndidọhọ ke nditọ Israel ikakanke obio Jericho ikụk ke anyan ini.