Wụt ke Amama Se Jehovah Ọnọde Nnyịn

JEHOVAH esitat ubọk ọnọ nnyịn n̄kpọ. (Jas. 1:17) Mme n̄kpọ oro Jehovah obotde ke heaven ye ke isọn̄ ẹsikwọ ẹtoro enye, ke ntak emi enye atatde ubọk.—Ps. 65:12, 13; 147:7, 8; 148:3, 4.

Andiwet Psalm ama ọkwọ ikwọ otoro Jehovah, ke ini enye okokụtde mme n̄kpọ emi Jehovah anamde onyụn̄ obotde. Edieke okotde Psalm ọyọhọ 104, afo n̄ko eyetiene otoro Jehovah. Andiwet Psalm ọkọdọhọ ete: “Nyọkwọ ikwọ nnọ Jehovah ke ofụri eyouwem mi; nyọkwọ edinem ikwọ nnọ Abasi mi adan̄a nte ndude uwem.” (Ps. 104:33) Ndi idọn̄ke fi n̄ko nditoro Jehovah?

SE JEHOVAH ANAMDE NDIWỤT KE IMENEN̄EDE ITAT UBỌK

Jehovah oyom nnyịn itat ubọk nte imọ, onyụn̄ etịn̄ ntak emi imọ iyomde nnyịn itat ubọk. Kop se enye ọkọdọhọde apostle Paul ewet mi: “Nọ mbon oro ẹnyenede inyene ke editịm n̄kpọ emi uyo ete ẹkûkohode idem, ẹkûnyụn̄ ẹdori enyịn ke inyene oro mînyeneke iwụk, edi ẹdori enyịn ke Abasi, emi ọnọde nnyịn kpukpru n̄kpọ uwak uwak ete ida ikop inemesịt; dọhọ mmọ ete ẹfọn ido, ẹyọhọ ye nti utom, ẹtat ubọk, ẹnyịme ndibuana se mmọ ẹnyenede, ẹsịn eti itiat idakisọn̄ nte n̄kpọuto ẹnịm ẹnọ idemmọ kaban̄a ini iso, man mmọ ẹkpesọn̄ọ ẹmụm ata uwem ẹkama.”—1 Tim. 6:17-19.

Ke ini Paul ekewetde udiana leta esie ọnọ ẹsọk esop Corinth, enye ama ọdọhọ ke enen̄ede ọfọn isitat esịt inọ enọ. Enye ekewet ete: “Yak owo kiet kiet anam kpa nte enye ebierede ke esịt esie, okûnam mmen̄e mmen̄e m̀mê ke edinyenyịk, koro Abasi amama owo eke ọnọde ke idatesịt.” (2 Cor. 9:7) Ekem, Paul ama ọdọhọ ke Abasi esidiọn̄ mbon oro ẹtatde ubọk ẹnọ mme owo n̄kpọ, mbon oro ẹbọde enọ ẹsinyụn̄ ẹkop inemesịt.—2 Cor. 9:11-14.

Paul ama etịn̄ n̄ko n̄kpọ oro anamde nnyịn inịm ke Abasi enen̄ede atat ubọk. Enye ọkọdọhọ ete: “Ekọm enyene Abasi ke ntak enọ mfọn esie oro inua mîkemeke ndibụk.” (2 Cor. 9:15) Enọ oro Jehovah ọnọde nnyịn mi esịne kpukpru nti n̄kpọ oro enye adade Jesus Christ anam ọnọ nnyịn. Idụhe enọ oro ẹkemede ndimen ndomo ye enọ emi.

Nso ke ikpanam man iwụt ke imama kpukpru se Jehovah ye Eyen esie ẹnamde ẹnọ nnyịn mfịn, ye se mmọ ẹdinamde inọ nnyịn ke ini iso? Oyom ida ini, odudu, ye inyene nnyịn, ọkpọkọm ekpri didie, inam n̄kpọ Jehovah.—1 Chron. 22:14; 29:3-5; Luke 21:1-4.

Usụn̄ Emi Ndusụk Owo Ẹmekde Nditịp N̄kpọ Ẹda Ẹnam Utom Ofụri Ererimbot

Ukem nte ekedide ke eyo apostle Paul, ediwak owo ‘ẹsisio n̄kpọ ẹnịm,’ mîdịghe ẹbiere ibatokụk oro mmọ ẹdisisịnde ke ekebe etịbe esop oro ẹdiande idiọn̄ọ emi: “Utom Ofụri Ererimbot.” (1 Cor. 16:2) Ke ọfiọn̄ kiet kiet, mme esop ẹsinọ okụk emi aka ọfis Mme Ntiense Jehovah emi esede aban̄a idụt mmọ. Afo n̄ko emekeme ndinọ enọ imaesịt nnennen nnennen ẹsọk n̄ka emi ibet enyịmede, emi adade ke ibuot Mme Ntiense Jehovah ke idụt mbufo. Edieke oyomde ndifiọk enyịn̄ akpan n̄ka emi ibet enyịmede, emi adade ke ibuot Mme Ntiense Jehovah ke idụt mbufo, mbọk wet m̀mê kot n̄kọk itieutom. Emekeme ndikụt adres n̄kọk itieutom ke www.jw.org. Emekeme ndinọ enọ imaesịt oro ẹtienede mi:

ENỌ

Owo ekeme ndinam ban̄k esie ẹda Intanet ẹsio okụk ke account esie ẹsịn ke account n̄kọk itieutom, mîdịghe ada kad ATM osio okụk ke account esie esịn ke eke n̄kọk itieutom. Ke ndusụk idụt, ẹkeme ndida jw.org m̀mê ikpehe Intanet en̄wen nnọ okụk ẹsọk n̄kọk itieutom.
Ẹkeme ndinọ okụk, mme n̄kpọuto, m̀mê mme ọkpọkpọ ọsọn̄urua n̄kpọ eken. Mme utọ etịbe oro ẹkpenyene ndisan̄a ye leta oro owụtde in̄wan̄-in̄wan̄ nte ke emi edi enọ.

SE ẸNỌDE NTE EBUỌT

Owo ekeme ndinọ okụk ẹda ẹnam utom onyụn̄ ọdọhọ ẹnọ ẹsọk imọ ke ini iyomde.
Sịn ibio ibio leta emi owụtde ke imekeme ndiyom ẹfiak ẹnọ okụk emi ẹsọk imọ.

ENỌ EMI ẸDIOMIDE-DIOMI

Ke adianade ye edinọ okụk ye ọkpọkpọ ọsọn̄urua n̄kpọ nte enọ, mme usụn̄ efen ẹdu oro ẹkemede ndinọ enọ man ẹda ẹnam utom Obio Ubọn̄ ke ofụri ererimbot. Ẹwet mme usụn̄ emi ke idak emi. Usụn̄ ekededi emi emekde ndida nnọ enọ, mbọk bem iso bụp n̄kọk itieutom emi esede aban̄a idụt mbufo man ọfiọk m̀mê ewe ke otu usụn̄ emi ẹdude mi ke idak ẹdu ke idụt mbufo. Sia ibet obio mîdịghe ukem ke kpukpru ebiet, enen̄ede ọfọn osobo ye mbon emi ẹfiọkde n̄kpọ ẹban̄a ibet mbemiso emekde usụn̄ emi oyomde ndida nnọ enọ.

Insurance: Ẹkeme ndiwet enyịn̄ n̄ka emi ibet enyịmede, emi adade ke ibuot Mme Ntiense Jehovah, nte andibọ ufọn insurance m̀mê okụk ukpọn̄ utom.

Okụk Oro Ẹsịnde ke Ban̄k: Owo ekeme ndikpọn̄ okụk esie ke ban̄k m̀mê okụk ukpọn̄ utom esie nnọ Watch Tower ẹkama, onyụn̄ ọdọhọ mmọ ẹda okụk emi m̀mê ẹkpọn̄ ẹnọ owo imọ ke ini imọ ikpade.

Inyene ye Mbubehe: Ẹkeme ndinọ n̄ka emi ibet enyịmede, emi adade ke ibuot Mme Ntiense Jehovah, inyene ye mbubehe nte enọ, mîdịghe ẹnam n̄wed man ẹkpọn̄ enye ẹnọ n̄ka emi ke ini andinyene akpade.

Isọn̄ ye Ufọk: Ẹkeme ndinọ n̄ka emi ibet enyịmede, emi adade ke ibuot Mme Ntiense Jehovah, isọn̄ ye ufọk oro ẹkemede ndinyam, edide nte enọ m̀mê, edieke edide ufọk emi owo odụn̄de, man ẹmụm isọn̄ ye ufọk oro ẹkama ẹnọ andinọ, emi ekemede ndisụk n̄ka iso ndụn̄ do ke eyouwem esie.

Unen N̄kpọ-Akpa ye Mme Ebuọt: Ẹkeme ndiyak inyene m̀mê okụk nnọ n̄ka emi ibet enyịmede, emi adade ke ibuot Mme Ntiense Jehovah, ke ndinọ enye unen oro ekemde ye ibet ndidia n̄kpọ-akpa, mîdịghe ẹkeme ndiwet enyịn̄ n̄ka emi ibet enyịmede, emi adade ke ibuot Mme Ntiense Jehovah, nte adia-ufọn ke n̄wed ebuọt.

Nte ikọ oro “enọ emi ẹdiomide-diomi” owụtde, oyom andinọ utọ enọ emi anam ndutịm.

Edieke oyomde ntọt efen efen, emekeme ndinyene nneme ye N̄kọk Itieutom Mme Ntiense Jehovah.