“Utom Emi Okpon”

EDIDEM DAVID okot kpukpru mbọn̄, mme adaidaha, ye n̄kpọsọn̄ owo esie ẹdi ata akpan mbono ke Jerusalem. David etịn̄ ata akpan n̄kpọ emi enemde mmọ esịt. Enye ọdọhọ mmọ ke Jehovah ọdọhọ Solomon eyen imọ ọbọp ata akwa temple man ẹda ẹtuak ibuot ẹnọ ata Abasi. Enye ayak mbuwed ufọk emi Jehovah okowụtde enye ke n̄kukụt ọnọ Solomon. Ekem ọdọhọ ete: “Utom emi okpon; koro akwa [temple] emi mîdịghe eke owo, edi enyene Jehovah Abasi.”—1 Chron. 28:1, 2, 6, 11, 12; 29:1.

Ndien David obụp ete: “Anie odu emi oyomde ndida enọ nyọhọ ubọk esie nnọ Jehovah mfịn emi?” (1 Chron. 29:5) Edieke afo okpokodude do, nso ke akpakanam? Ndi ekpeketiene etịp n̄kpọ ẹda ẹnam akwa utom emi? Nditọ Israel ẹma ẹtịp n̄kpọ, ẹnyụn̄ “ẹkop idatesịt ke ndinọ enọ unyịmesịt, koro mmọ ẹkedade ofụri esịt mmọ ẹnọ Jehovah enọ.”—1 Chron. 29:9.

Nte ini akakade, Jehovah ama ọtọn̄ọ n̄kpọ en̄wen oro enen̄erede ọfọn akan temple oro. Enye ama ọtọn̄ọ ndamban̄a temple, oro edi, ndutịm emi edin̄wamde mme owo ẹkeme ndituak ibuot nnọ enye ke ntak uwa ufak Jesus. (Heb. 9:11, 12) Didie ke Jehovah an̄wam mme owo mfịn ẹdituak ibuot ẹnọ enye? Enye ada utom ukwọrọikọ anam emi. (Matt. 28:19, 20) Kpukpru isua, utom ukwọrọikọ anam ikeme ndikpep ata ediwak miliọn owo Bible, inịm ediwak tọsịn owo baptism, inyụn̄ isiak mbufa esop.

Emi esinam imịn̄ ediwak n̄wed oro isidade ikpep Bible, ibọp inyụn̄ ise iban̄a mme Ufọkmbono Obio Ubọn̄, ye mme itiembono. Ke akpanikọ, utom ukwọrọikọ oro inamde edi akwa utom oro enyenede ufọn.—Matt. 24:14.

Ikọt Abasi ẹtịp n̄kpọ man ẹda ẹnam n̄kpọ Jehovah sia mmọ ẹma Jehovah ye mbọhọidụn̄ mmọ, ẹnyụn̄ ẹfiọk ke ana isịn idem ikwọrọ ikọ, koro utịt enen̄ede ekpere. Esịt esinen̄ede enem nnyịn nditịp n̄kpọ nnọ esop Abasi nnyụn̄ n̄kụt nte ẹdade se itịpde oro ẹnam n̄kpọ ke eti usụn̄!—N̄ke 3:9.

Usụn̄ Emi Ndusụk Owo Ẹmekde Nditịp N̄kpọ Ẹda Ẹnam Utom Ofụri Ererimbot

Ediwak owo ‘ẹsisio n̄kpọ ẹnịm,’ mîdịghe ẹbiere ibatokụk oro mmọ ẹdisisịnde ke ekebe etịbe esop oro ẹdiande idiọn̄ọ emi: “Utom Ofụri Ererimbot.” (1 Cor. 16:2) Ke ọfiọn̄ kiet kiet, mme esop ẹsinọ okụk emi aka ọfis Mme Ntiense Jehovah emi esede aban̄a idụt mmọ. Afo n̄ko emekeme ndinọ enọ imaesịt nnennen nnennen ẹsọk n̄ka emi ibet enyịmede, emi adade ke ibuot Mme Ntiense Jehovah ke idụt mbufo. Edieke oyomde ndifiọk enyịn̄ akpan n̄ka emi ibet enyịmede, emi adade ke ibuot Mme Ntiense Jehovah ke idụt mbufo, mbọk wet m̀mê kot n̄kọk itieutom. Emekeme ndikụt adres n̄kọk itieutom ke www.jw.org. Emekeme ndinọ enọ imaesịt oro ẹtienede mi:

ENỌ

Owo ekeme ndinam ban̄k esie ẹda Intanet ẹsio okụk ke account esie ẹsịn ke account n̄kọk itieutom, mîdịghe ada kad ATM osio okụk ke account esie esịn ke eke n̄kọk itieutom. Ke ndusụk idụt, ẹkeme ndida jw.org m̀mê ikpehe Intanet en̄wen nnọ okụk ẹsọk n̄kọk itieutom.
Ẹkeme ndinọ okụk, mme n̄kpọuto, m̀mê mme ọkpọkpọ ọsọn̄urua n̄kpọ eken. Mme utọ etịbe oro ẹkpenyene ndisan̄a ye leta oro owụtde in̄wan̄-in̄wan̄ nte ke emi edi enọ.

SE ẸNỌDE NTE EBUỌT

Owo ekeme ndinọ okụk ẹda ẹnam utom onyụn̄ ọdọhọ ẹnọ ẹsọk imọ ke ini iyomde.
Sịn ibio ibio leta emi owụtde ke imekeme ndiyom ẹfiak ẹnọ okụk emi ẹsọk imọ.

ENỌ EMI ẸDIOMIDE-DIOMI

Ke adianade ye edinọ okụk ye ọkpọkpọ ọsọn̄urua n̄kpọ nte enọ, mme usụn̄ efen ẹdu oro ẹkemede ndinọ enọ man ẹda ẹnam utom Obio Ubọn̄ ke ofụri ererimbot. Ẹwet mme usụn̄ emi ke idak emi. Usụn̄ ekededi emi emekde ndida nnọ enọ, mbọk bem iso bụp n̄kọk itieutom emi esede aban̄a idụt mbufo man ọfiọk m̀mê ewe ke otu usụn̄ emi ẹdude mi ke idak ẹdu ke idụt mbufo. Sia ibet obio mîdịghe ukem ke kpukpru ebiet, enen̄ede ọfọn osobo ye mbon emi ẹfiọkde n̄kpọ ẹban̄a ibet mbemiso emekde usụn̄ emi oyomde ndida nnọ enọ.

Insurance: Ẹkeme ndiwet enyịn̄ n̄ka emi ibet enyịmede, emi adade ke ibuot Mme Ntiense Jehovah, nte andibọ ufọn insurance m̀mê okụk ukpọn̄ utom.

Okụk Oro Ẹsịnde ke Ban̄k: Owo ekeme ndikpọn̄ okụk esie ke ban̄k m̀mê okụk ukpọn̄ utom esie nnọ Watch Tower ẹkama, onyụn̄ ọdọhọ mmọ ẹda okụk emi m̀mê ẹkpọn̄ ẹnọ owo imọ ke ini imọ ikpade.

Inyene ye Mbubehe: Ẹkeme ndinọ n̄ka emi ibet enyịmede, emi adade ke ibuot Mme Ntiense Jehovah, inyene ye mbubehe nte enọ, mîdịghe ẹnam n̄wed man ẹkpọn̄ enye ẹnọ n̄ka emi ke ini andinyene akpade.

Isọn̄ ye Ufọk: Ẹkeme ndinọ n̄ka emi ibet enyịmede, emi adade ke ibuot Mme Ntiense Jehovah, isọn̄ ye ufọk oro ẹkemede ndinyam, edide nte enọ m̀mê, edieke edide ufọk emi owo odụn̄de, man ẹmụm isọn̄ ye ufọk oro ẹkama ẹnọ andinọ, emi ekemede ndisụk n̄ka iso ndụn̄ do ke eyouwem esie.

Unen N̄kpọ-Akpa ye Mme Ebuọt: Ẹkeme ndiyak inyene m̀mê okụk nnọ n̄ka emi ibet enyịmede, emi adade ke ibuot Mme Ntiense Jehovah, ke ndinọ enye unen oro ekemde ye ibet ndidia n̄kpọ-akpa, mîdịghe ẹkeme ndiwet enyịn̄ n̄ka emi ibet enyịmede, emi adade ke ibuot Mme Ntiense Jehovah, nte adia-ufọn ke n̄wed ebuọt.

Nte ikọ oro “enọ emi ẹdiomide-diomi” owụtde, oyom andinọ utọ enọ emi anam ndutịm.

Edieke oyomde ntọt efen efen, ka ebiet oro ẹwetde “Nọ Enọ Fo Mi Ẹda Ẹnam Utom Abasi ke Ofụri Ererimbot,” emi odude ke isọn̄ isọn̄ akpa page jw.org/efi, mîdịghe nyene nneme ye N̄kọk Itieutom Mme Ntiense Jehovah.