Se Akpanade Ọdiọn̄ọ

Idụhe n̄wed ikọ Abasi ndomokiet emi etiede nte Bible. Inyụn̄ idụhe n̄wed en̄wen emi ata ediwak owo toto ke eset ẹdade se mmọ ẹkpepde ẹto. Idụhe n̄wed emi mme owo ẹdụn̄ọrede ẹnyụn̄ ẹtịn̄de n̄kpọ ẹbiat nte Bible.

Ke uwụtn̄kpọ, ndusụk ntaifiọk emi ẹsikpepde n̄kpọ ẹban̄a Bible ẹdọhọ ke se idude ke Bible mfịn okpụhọde ye se mme andiwet Bible ẹkewetde. Ataifiọk kiet emi esinamde ndụn̄ọde aban̄a mme n̄wed ikọ Abasi ọkọdọhọ ete: “Nnyịn ikereke ke imenyene nnennen se ẹkewetde ke ata akpa Bible. N̄kukụre Bible emi inyenede edi mbon emi ndudue ọyọhọde, ndien ẹkesion̄o ediwak mmọ ẹwet ata ediwak isua ke ẹma ẹkewet Bible ẹkụre, mmọ ẹnyụn̄ ẹnen̄ede ẹkpụhọde ye ata akpa Bible.”

Ndusụk mbon emi mîdịghe Christian ẹdọhọ ke Bible inenke. Ke uwụtn̄kpọ, ubon mme Faizal idịghe mme Christian, ndien mmọ ẹma ẹsikpep enye ke Bible edi edisana n̄wed, edi ke ẹkpụhọ n̄kpọ ke Bible etieti. Faizal ọdọhọ ete: “Emi ama anam esisọn̄ mi ndiyak mme owo ẹda Bible ẹkwọrọ ikọ ẹnọ mi. N̄kesikere ke Bible oro mmọ ẹnyenede idịghe ukem ye enye emi mme andiwet Bible ẹkewetde.”

Ndi ufọn odu ndifiọk m̀mê ẹkpụhọ n̄kpọ ke Bible? Ọfọn, kere ban̄a mbụme emi ise: Ndi ekpenịm se Bible ọdọhọde ke eyetịbe ke ini iso edieke mûfiọkke m̀mê mme andiwet Bible ẹma ẹkam ẹwet utọ n̄kpọ oro? (Rome 15:4) Ndi akpada se Bible etịn̄de ebiere utọ utom emi akpanamde, nte akpanamde n̄kpọ ye ubon fo, ye nte okpokponode Abasi edieke ekerede ke Bible oro inyenede mfịn ọyọhọ ye ndudue?

Kpa ye oro Bible emi mme andiwet Bible ẹkewetde mîdụhe aba, imenyene mme Bible emi ẹkedude ke ata eset, esịnede ata ediwak mbai ikpan̄wed Bible. Mme ikpan̄wed Bible emi ẹsan̄a didie ẹdu ẹdisịm mfịn kpa ye se ẹkedade ẹwet mmọ, kpa ye oro ndusụk owo mîkamaha Bible, kpa ye oro mme owo ẹkenyụn̄ ẹdomode ndisịn n̄kpọ ke Ikọ Abasi? Didie ke ndifiọk nte Bible akasan̄ade odu edisịm eyo nnyịn ekeme ndinam fi enịm ke Bible oro inyenede mfịn edi N̄wed Abasi? Yak ibọrọ mme mbụme emi ke mme ibuotikọ oro ẹtienede.