Ndi Ẹkpụhọ N̄kpọ ke N̄wed Abasi?

Ndusụk owo ẹsikere m̀mê ẹkam ẹkpụhọ n̄kpọ ke N̄wed Abasi. Prọfet Isaiah ọkọdọhọ ke Ikọ Abasi “eyebịghi ke nsinsi.” (Isaiah 40:8) Isan̄a didie idiọn̄ọ ke mme un̄wọn̄ọ Abasi emi ẹdude ke Bible ikpụhọkede?

Abasi enyene odudu ndinam Ikọ esie aka iso odu, inyụn̄ iyakke ẹkpụhọ n̄kpọ ke esịt. Ke eset, ndusụk mbon oro ẹkesion̄ode Bible ẹwet ẹma ẹtịn̄ enyịn ẹbat ikọ Bible kiet kiet man ẹkụt ẹte ke owo ikpụhọke n̄kpọ, isioho inyụn̄ isịnke ikọ. Edi sia owo mîfọnke ima, ndusụk mmọ ẹma ẹnam n̄kpri ndudue, edi oro ikanamde etop Bible okpụhọde.

NSO INAM INỊM KE SE IDUDE KE BIBLE ORO IKAMADE IDAHAEMI EDI NNENNEN SE ABASI EKETỊN̄DE?

Ata ediwak n̄kani ikpan̄wed Bible ẹdu. Edieke ẹmende nsio nsio ikpan̄wed eset emi ẹdomo ye kiet eken, ẹkeme ndidiọn̄ọ m̀mê ndudue odu m̀mê idụhe.—Edieke oyomde ndifiọk n̄kpọ en̄wen mban̄a emi, mbọk kot ibuotikọ emi “Ndi Mme Owo Ẹkpụhọ N̄kpọ ke Bible?” ke jw.org/efi.

Ke uwụtn̄kpọ, ẹma ẹkụt n̄kani ikpan̄wed Bible ke 1947, emi ẹkotde Ikpan̄wed Inyan̄ Inụn̄. Ndusụk ke otu ikpan̄wed emi ẹbe isua tọsịn iba. Ntaifiọk emi ẹsinamde ndụn̄ọde ẹban̄a Bible ẹma ẹmen se idude ke mme ikpan̄wed emi ẹdomo ye Bible emi ikamade mfịn. Nso ke mmọ ẹkekụt?

Ntaifiọk ẹma ẹkụt ke se idude ke Bible emi ikamade mfịn edi ukem ye ata akpa Bible oro ẹkewetde.a Emi anam ikụt ke owo ikpụhọke n̄kpọ ke Ikọ Abasi. Enem nnyịn ndifiọk ke Abasi anam ika iso inyene nnennen ikọ esie emi enye ọkọdọhọde mme asan̄autom esie ẹwet.

Ntre ke ini ikotde Bible, imenịm ke ikot nnennen ikọ Abasi. Idahaemi, ẹyak ineme se mme prọfet Abasi ẹkpepde nnyịn ẹban̄a Abasi.