Ke Ini Ọdọn̄ọde Idiọk Udọn̄ọ

Linda emi edide isua 71 ọdọhọ ete: “Ini n̄kọfiọkde ke mmenyene kansa ke obufre ye nsia, n̄kekere ke mmọn̄ n̄kpa. Edi ke mma n̄kenyene nneme ye dọkta, mma ndifiọk ke idiọkke nte n̄kekerede, edi ke ana nnam n̄kpọ man n̄keme ndiyọ se iwọrọde mi emi.”

Elise emi edide isua 49 ọdọhọ ete: “Mmenyene idiọk udọn̄ọ emi abiatde mi mban̄ n̄kan̄ kiet. Ndusụk ini, ọkpọsọn̄ ubiak esinam nnen̄ede mfụhọ. Ediwak ini ekesitie mi nte ke idụhe eke amade mi, mma nsinyụn̄ tutu n̄kere ndiwot idem.”

Mme owo ẹsan̄a ye owo ubon mmọ emi etiede ke n̄kpọitie mbon n̄kpọnnam

EDIEKE edide afo m̀mê owo fo ọdọn̄ọ udọn̄ọ-ada-owo-ibuot, anaedi ọmọdiọn̄ọ nte utọ n̄kpọ oro esifịnade owo. Ke ẹsiode udọn̄ọ oro ndifịna owo mfep, esịt esitịmede owo oro ọdọn̄ọde udọn̄ọ oro m̀mê owo oro esede aban̄a enye, n̄kpọ onyụn̄ ekeme ndisisọp nyat mmọ. Ndịk esinam owo etieti mîdịghe esịt enen̄ede etịmede owo ke ini enye oyomde ndika n̄kokụt dọkta, ke ini enye mîkwe usọbọ, ke ini enye mînyeneke okụk ika ufọkibọk, m̀mê ke ini ibọk oro ẹnọde enye afịnade enye. Editịmede esịt emi udọn̄ọ esidade edi esinam ibuot oyon̄ owo.

M̀mọ̀n̄ ke ikeme ndikụt un̄wam? Ediwak owo ẹdọhọ ke se in̄wamde mmimọ edi ndibọn̄ akam nnọ Abasi nnyụn̄ n̄kot mme itie Bible emi ẹsidọn̄de owo esịt. Mme ufan ye mbonubon mbufo ẹkeme n̄ko ndin̄wam fi.

MME N̄KPỌ ORO ẸKEMEDE NDIN̄WAM FI

Robert emi edide isua 58 ọdọhọ ete: “Buọt idem ke Abasi ndien enye ayan̄wam fi ọyọ se iwọrọde fi. Bọn̄ akam nọ Jehovah. Tịn̄ nte etiede fi ke idem nọ enye. Dọhọ enye ọnọ fi edisana spirit. Ben̄e enye an̄wam fi ekere n̄kpọ ọfọn onyụn̄ ekeme ndisọn̄ọ mbonubon fo idem, okûnyụn̄ utịmede esịt ukaha ke ini ọdọn̄ọde.

“Edieke mbonubon mbufo ẹkerede ẹban̄a fi ẹnyụn̄ ẹn̄wamde fi, oro eyenen̄ede ọsọn̄ọ fi idem. Owo kiet m̀mê iba ẹsikot mi kpukpru usen obụp m̀mê idem mi etie didie. Mme ufan mi emi ẹdụn̄de ke nsio nsio itie ẹsinyụn̄ ẹsọn̄ọ mi idem. Mmọ ẹsinam mi mfiak n̄kop inem uwem, ndien oro etiene anam ndu nsịm mfịn.”

Edieke oyomde ndika n̄kese ufan fo emi idem mîsọn̄ke, kop se Linda eketịn̄de mi: “Owo udọn̄ọ oyom mme owo ẹda imọ nte mbon eken, ndusụk ini enye isiyomke nditịn̄ mban̄a udọn̄ọ esie. Ntre, neme mme n̄kpọ oro ekesinemede ini idem ọkọsọn̄de enye.”

Abasi esin̄wam nnyịn ke ini idọn̄ọde, se ikotde ke Bible esidọn̄ nnyịn esịt, ndien mbonubon nnyịn ye mme ufan nnyịn ẹsinyụn̄ ẹn̄wam nnyịn. Kpukpru oro idiyakke uwem odorode nnyịn idem ke ini idọn̄ọde idiọk udọn̄ọ.

Mme Itie N̄wed Abasi Oro Ẹkemede Ndin̄wam Fi

Buọt idem ye Abasi.

“Ami n̄kobụp Jehovah, ndien enye ọbọrọ mi, enye onyụn̄ anyan̄a mi osio ke kpukpru n̄kpọ emi ẹsịnde mi ndịk. Owo ukụt emi okot, ndien Jehovah okop.”—Psalm 34:4, 6.

Linda oro iketịn̄de iban̄a ọdọhọ ete: “N̄kọbọn̄ke akam ndọhọ Abasi anam udọn̄ọ okụre mi. Edi n̄kọbọn̄ akam mben̄e enye ọsọn̄ọ mi idem onyụn̄ anam n̄keme ndiyọ se iwọrọde mi.”

Kot Ikọ Abasi man ọsọn̄ọ fi idem.

“Baba andidụn̄ kiet ididọhọke ite: ‘Ndọdọn̄ọ.’”—Isaiah 33:24.

Tie kere mme n̄kpọ oro Abasi ọn̄wọn̄ọde ndinam ke ini iso. Emi ayanam enyene idotenyịn, ndien idotenyịn emi ayanam ekeme ndiyọ.

Dọhọ mbonubon fo ye mme ufan fo ẹn̄wam fi.

“Ata ufan amama ufan kpukpru ini, onyụn̄ edi eyeneka emi amanade ọnọ ini nnanenyịn.”—Mme N̄ke 17:17.

Elise oro iketịn̄de iban̄a ọdọhọ ete: “Kûdian̄ade utie ikpọn̄. Nyịme mme ufan fo ẹn̄wam fi. Enyene mme ini emi ekemede nditie nte ke idụhe eke ekerede aban̄a fi, ke Abasi ikam ikopke akam fo. Kpa ye oro, kûdian̄ade utie ikpọn̄.”