Mmemmem Ndutịm Usuan N̄wed Nnyịn
1 Ẹmenọ n̄wed ke mmemmem ndutịm unọ n̄wed ye unana edinịm ekọmurua ke se ibede isua kiet idahaemi. Nte ndutịm emi okụt unen? Ibatutom an̄wautom owụt nte ke n̄kọri odu ke edinịm kpukpru nsio nsio n̄wed. Ke ata ata usụn̄, ẹnọ ediwak miliọn owo ifet “ẹdi ẹdibọ mmọn̄ uwem ke ikpîkpu.”—Edi. 22:17.
2 Nte ededi, idịghe mbiomo nnyịn, m̀mê udọn̄ nnyịn, ndiyak n̄wed ntịme ntịme nnọ owo ekededi oro edibọde. Ukem nte nnyịn isidade mme n̄kpọ obụkidem nnyịn inam n̄kpọ ke ọniọn̄, asuanetop kiet kiet enyene mbiomo ndida mme n̄wed oro enye ọbọde ye unana edinịm ekọmurua oto N̄ka ebe ke esop n̄kann̄kụk, nnam n̄kpọ ke ọniọn̄. N̄ka ndinam n̄wed odu ọnọ mme asuanetop ye unana edinịm ekọmurua iwọrọke ite ke owo idaha okụk ision̄o inyụn̄ isuan mmọ. Kpukpru owo ẹkpenyene ndinen̄ede n̄kụt ufọn n̄wed nnyịn ke ndin̄wam mbon esịt akpanikọ ke ediyom oro mmọ ẹyomde nnennen ifiọk aban̄ade Jehovah Abasi ye Eyen esie Jesus Christ.—John 17:3.
3 Didie ke N̄ka ekeme ndinọ kpukpru owo mme n̄wed esie ye unana ekọmurua? Ẹda mme etịbe ẹse ẹban̄a mme ekọmurua oro owo mîkemeke ndifep oro ẹdade ẹmịn̄ ẹnyụn̄ ẹsuan mmọ. Mme asan̄autom Jehovah oro ẹma ẹkeyak idem ẹnọ ẹdi akpan mme andinọ un̄wam emi. Mme Ntiense Jehovah idorike enyịn mbon an̄wa ndinọ un̄wam ke ata usọp usọp utom editan̄a Obio Ubọn̄ emi. Akanam nnyịn ibuanake ke ndin̄wana okụk nto an̄wa, inyụn̄ ibuanake idahaemi. Nte ededi, ẹwụt esịtekọm ẹban̄a n̄kpri etịbe ẹtode mbon oro ẹnyenede esịt akpanikọ oro ẹnyenede udọn̄ ye mbon emi ẹwụtde esịtekọm, emi nnyịn isisobode ke an̄wautom.
4 Se Mme Etịbe Nnyịn Ẹnamde: Ntem, odot nnyịn ndiben̄e idem ndinam an̄wan̄a ibio ibio ye in̄wan̄-in̄wan̄ nte ẹnọde utom unọ ukpep Bible ofụri ererimbot nnyịn ibetedem ebe ke enọ unyịmesịt. Ẹda kpukpru okụk emi ẹbọde ẹnam n̄kpọ ndisụhọde ata akamba ubiatokụk emi abuanade ke ndiyọhọ utom ukwọrọikọ Obio Ubọn̄ ke eyomfịn. Ke adianade ye edision̄o mme n̄wed nsuan ke ofụri ererimbot, N̄ka ese aban̄a mme ọfis n̄kọk itieutom, mme ufọkidụn̄ Bethel, mme ufọkn̄wed mme asan̄autom ye eke mme isụn̄utom, mme isụn̄utom, mme esenyịn oro ẹsan̄ade-san̄a, mme itie unọ n̄wed, ye ata ediwak utom unọ un̄wam eken emi ẹyomde ke ndiyọhọ ofụri utom oro Jesus ọkọnọde mme mbet esie.—Matt. 24:14; 28:19, 20.
5 Akwa n̄kọri oro ẹnyenede ke otu ikọt Jehovah onụk ediwak owo ndibụp se mmimọ ikemede ndinam man in̄wam. Ata ediwak owo ikemeke ndinọ ọkpọkpọ un̄wam ke ndibọp mbufa n̄kọk itieutom ye mme Ufọkmbono Obio Ubọn̄ m̀mê ndika mme nsannsan idụt n̄kan̄wam ke utom ukwọrọikọ do. Edi man ẹkeme ndinyene ndusụk ebuana ke mme aduai-owo-idem n̄kọri emi ẹdade itie mi ke udomo oro mmọ ẹkemede, ediwak asuanetop ye mme ubon mmọ ẹnam edi ido mmọ ndisisio n̄kpọ nnịm kpukpru ini nditịp nsịn ke utom ofụri ererimbot. (Men 1 Corinth 16:1, 2 domo.) Ke usụn̄ emi, ẹnọ kpukpru utom N̄ka ibetedem, esịnede edisuan mme n̄wed. Owo ndomokiet ikpenyeneke ndise enọ unyịmesịt emi kaban̄a utom ofụri ererimbot nte okụk oro ẹkpede ke n̄wed.
6 Ke ini isobode mme enyeneufọk m̀mê mbon efen ye uduak edinọ ikọ ntiense, nnyịn ikpenyene ndidu ke mben̄eidem ndineme ibuotikọ Bible ye mmọ. Ẹnọ ekikere ẹban̄a ediwak edemede-owo-udọn̄ ntọn̄ọikọ adianade ye ediwak ibuot nneme Bible oro ẹdotde ke Reasoning From the Scriptures. Mîdịghe nnyịn imekeme ndida mme nneme oro ẹnọde ekikere ẹban̄a ke Utom Obio Ubọn̄ Nnyịn. Etienede nte owo oro ọbọde etop Obio Ubọn̄, asuanetop enyene ndibiere nte enye edinamde ke ebuana ye edinọ n̄wed. Edieke etiede nte ke owo inyeneke udọn̄ ikem se ẹnọde n̄wed, afo emekeme nditre nneme oro ke mbufiọk onyụn̄ aka itie efen. Mîdịghe afo emekeme ndinọ n̄wedikot m̀mê tract edieke owo oro enyịmede ndikot etop emi esịnede. Kụt ete ke emenyene n̄wetnnịm n̄kpọ aban̄ade udọn̄ oro man ekeme ndinam mfiakn̄ka. Ẹkeme ndinam ukem oro ke mme idaha emi ini mîdụhe ikem ndinyene eti nneme ye owo ke ntak emi enye ọyọhọde ye utom m̀mê ke nnyịn mîkaha ke ini oro eferede enye ke idem.
7 Mmemmem ndutịm usuan n̄wed an̄wam kpukpru owo ẹkụt nte ke utom unọ ukpep Bible nnyịn idịghe unyamurua ke usụn̄ ekededi. Enye n̄ko an̄wam nnyịn ndinịm uduak nnyịn ndikwọrọ eti mbụk Obio Ubọn̄ nnyụn̄ nnam mme mbet Jesus Christ, akpa. Ke edide ata isio ye mme esop emi ẹbuanade ke “eben̄e ntatubọk,” Mme Ntiense Jehovah ẹnem esịt ndikụt nte ke ẹkeme ndinam n̄wed odu ọnọ kpukpru owo ye unana edinịm ekọmurua. Akananam owo iben̄eke mme etịbe ẹban̄ade utom ofụri ererimbot emi ito mbon oro mînyeneke ata udọn̄ ke etop nnyịn. (Se Enyọn̄-Ukpeme, December 1, 1990, page 22 ye 23.) Ẹda kpukpru okụk oro ẹtịpde ẹnam n̄kpọ ke ndinọ utom unọ ukpep Bible eke ofụri ererimbot emi ibetedem, sia kpukpru mme andinam utom emi ẹdide mme anamutom unyịmesịt, owo mînyụn̄ ikpehe owo ndomokiet ke esop okụkọfiọn̄ m̀mê ndinọ n̄kpọ eyenutom. Ẹsineme n̄kpọ aban̄ade mme etịbe ndida n̄n̄wam utom ofụri ererimbot emi kpọt ye mbon oro ẹbụpde ẹban̄a m̀mê ke usụn̄ ekededi ẹwụtde udọn̄ ke utom nnyịn.
8 Nte nnyịn itatde utom nnyịn ifịk ifịk, idade mme ọsọn̄urua n̄wed N̄ka inam n̄kpọ ke ọniọn̄, Jehovah ayaka iso ndinam n̄kọri odu. Mbon oro ẹnyenede eti esịt ke kpukpru itie ẹwụt esịtekọm ẹban̄a nte nnyịn inamde utom nnyịn an̄wan̄a ke usụn̄ oro owụtde eti ibuot ẹnyụn̄ ẹnem esịt ndinọ ibetedem mmọ ebe ke etịbe unyịmesịt mmọ.