Tọ ke Ntatubọk ye ke Mbufiọk
1 Ọtọin̄wan̄ kiet kiet ọfiọk ete ke edieke enye ọtọde n̄kpasịp ke ntatubọk, anaedi enye ọyọdọk uwak uwak, edi edieke enye ọtọde ke ufat, enye iditreke ndidọk ke ufat. (2 Cor. 9:6) Mme ọtọin̄wan̄ ẹsikpeme mbak ẹdibaha n̄kpasịp ke nditọ n̄kpọ ke ebiet oro n̄kpọ mîkemeke ndikọri. Oyom ukem mbufiọk oro ke ini nnyịn inọde n̄wed nnyịn ke an̄wautom. Udọn̄ nnyịn edi ndiyak n̄wed nnyịn nnọ mbon oro ẹnyenede udọn̄ ndikot enye. Nnyịn iyom ndinọ mbon oro ẹdotde ifet ndikpep mban̄a ima mfọnido Jehovah oro owo mîdotke ye idotenyịn Obio Ubọn̄.
2 Ndi afo omokụt nte ke mme magazine, ndiye uduot n̄kpri n̄wed, ye mme n̄wed eken ẹdọn̄ọ ke n̄kpọ udọn̄ n̄wed ke ufọk ẹbịghi ke ini ẹkemede ndida mmọ nnam mbon oro ẹdotde ke efakutom mbufo ẹnyene ifiọk akpanikọ? (Men Matthew 25:25 domo.) Ndi afo ndusụk ini emesimen̄e ndinọ mme magazine ye mme n̄wed eken ke akpa ediwaha n̄kukụre koro etiede fi etikwo etikwo nditịn̄ nte ẹnọde utom edikwọrọ Obio Ubọn̄ ibetedem? Mme asuanetop oro ẹnyenede mbufiọk ẹmekụt ẹte ke mme enyeneufọk oro ẹwụtde esịtekọm ẹsinam n̄kpọ ẹban̄a mmemmem, nnennen utịn̄ikọ ke ini ẹsiande mmọ nte ẹdade mme etịbe ẹnọde kaban̄a utom Obio Ubọn̄ ẹnam n̄kpọ.
3 Afo emekeme ndidọhọ:
◼ “Ekeme ndidi akpa fi idem nte nnyịn ikemede ndinọ n̄wed ye unana edinịm ekọmurua. Enye edi ubak utom unọ ukpep ofụri ererimbot oro ẹdade mme enọ unyịmesịt ẹnọ ibetedem. Edieke afo edimade ndinọ ekpri etịbe kaban̄a utom emi, ami nyenem esịt ndibọ.”
4 Ediwak mme enyeneufọk ẹyebụp m̀mê n̄wed akpa okụk ifan̄.
Afo emekeme ndibọrọ ete:
◼ “N̄wed nnyịn inyeneke ekọmurua koro ẹda mme enọ unyịmesịt ẹnọ utom nnyịn ibetedem. Edieke afo edimade ndinọ ekpri etịbe mfịn, nnyịn iyenem esịt ndikụt nte ke ẹda enye ẹnam n̄kpọ kaban̄a utom ukwọrọikọ ofụri ererimbot.”
Mîdịghe afo emekeme ndidọhọ:
◼ “Nnyịn inam mme n̄wed nnyịn ẹdu ẹnọ kpukpru owo oro ẹnyenede udọn̄ ndikpep n̄kpọ efen efen mban̄a Bible. Edieke afo edimade ndinọ ekpri etịbe kaban̄a utom ofụri ererimbot emi, ami nyama ndibọ etịbe fo nnọ ẹka.”
5 Ke utom magazine ndusụk asuanetop ẹsiwụt page esịt magazine ẹnyụn̄ ẹdọhọ ẹte:
◼ “Nte afo okụtde mi, ẹda mme enọ unyịmesịt ẹnọ utom nnyịn ibetedem. Edieke afo edimade ndinọ ekpri etịbe man an̄wam ke utom emi, ami nyama ndibọ enye.”
Mmemmem utịn̄ikọ efen edi emi:
◼ “Okposụkedi ẹnọde mme n̄wed nnyịn ye unana edinịm ekọmurua, nnyịn imesibọ mme etịbe oro ẹdotde kaban̄a utom ofụri ererimbot nnyịn.”
6 Nnyịn ikpedehede itre nditọ n̄kpasịp Obio Ubọn̄ koro nnyịn imen̄ede nditịn̄ nte ẹdade okụk ẹse ẹban̄a utom emi. Ke ukem ini oro, oyom mbufiọk mbak mme n̄wed nnyịn ẹditak ke “isọn̄ itiat.” (Mark 4:5, 6, 16, 17) Mbon oro ẹmade eti mbụk oro nnyịn idade isọk mmọ ẹnem esịt ndinyene ifet nditịp n̄kpọ man ẹse ẹban̄a enye ke n̄kan̄ n̄kpọ obụkidem.—Men Matthew 10:42 domo.